ಬೆಂಗಳೂರು ಮೆಟ್ರೋ ಪ್ರಿಯರಿಗೆ ಮತ್ತೊಂದು ಬಂಪರ್ ಸುದ್ದಿ! ರಾಜಧಾನಿ ಬೆಂಗಳೂರಿನಿಂದ ತುಮಕೂರು ಜಿಲ್ಲೆಯವರೆಗೆ ನಮ್ಮ ಮೆಟ್ರೋ ಸೇವೆ ವಿಸ್ತರಣೆಯಾಗಲಿದೆ. ಇದು ಕರ್ನಾಟಕದಲ್ಲಿ ಮೊಟ್ಟಮೊದಲ ಬಾರಿಗೆ ಅಂತರಜಿಲ್ಲಾ ಮೆಟ್ರೋ ಸಂಪರ್ಕವಾಗಿ ಇತಿಹಾಸ ನಿರ್ಮಾಣ ಮಾಡಲಿದೆ.
ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (BMRCL) ಈ ದಿಟ್ಟ ಹೆಜ್ಜೆ ಇಟ್ಟಿದ್ದು, ಮಾದವರ (BIEC) ನಿಂದ ತುಮಕೂರುವರೆಗಿನ 59.6 ಕಿಲೋಮೀಟರ್ ಹಸಿರು ಮಾರ್ಗ (Green Line) ವಿಸ್ತರಣೆಗೆ ವಿವರವಾದ ಯೋಜನಾ ವರದಿ (Detailed Project Report – DPR) ತಯಾರಿಗೆ ಟೆಂಡರ್ ಆಹ್ವಾನಿಸಿದೆ. BMRCL ಶನಿವಾರವೇ ಅಧಿಕೃತವಾಗಿ ಬಿಡ್ ಕರೆದಿದ್ದು, ನವೆಂಬರ್ 21, 2025ರಂದು ಟೆಂಡರ್ಗಳನ್ನು ತೆರೆಯಲಾಗುವ ಸಾಧ್ಯತೆ ಇದೆ. ಬಿಡ್ದಾರರು ನವೆಂಬರ್ 20ರೊಳಗೆ 4.5 ಲಕ್ಷ ರೂಪಾಯಿ ಮುಂಗಡ ಹಣದೊಂದಿಗೆ ಅರ್ಜಿ ಸಲ್ಲಿಸಬೇಕಿದೆ.
ಈ ಹೊಸ ಕಾರಿಡಾರ್ ಮಾದವರದಿಂದ ಆರಂಭವಾಗಿ ನೆಲಮಂಗಲ, ದಾಬಸ್ಪೇಟೆ, ಕ್ಯಾತಸಂದ್ರ ಮಾರ್ಗವಾಗಿ ತುಮಕೂರು ತಲುಪಲಿದೆ. ಈ ಮಾರ್ಗವು ಬೆಂಗಳೂರು ಗ್ರಾಮಾಂತರ ಮತ್ತು ತುಮಕೂರು ಜಿಲ್ಲೆಗಳನ್ನು ಸಂಪರ್ಕಿಸುವ ಮೊದಲ ಅಂತರಜಿಲ್ಲಾ ಮೆಟ್ರೋ ಆಗಿ ಗುರುತಿಸಿಕೊಳ್ಳಲಿದೆ.
ಯೋಜನೆಯ ಮೊದಲ ಹಂತದ ಅಂದಾಜು ವೆಚ್ಚ 20, 649 ಕೋಟಿ ರೂಪಾಯಿ ಎಂದು ನಿಗದಿಪಡಿಸಲಾಗಿದೆ. ಡಿಪಿಆರ್ ತಯಾರಿಗೆ ಆಯ್ಕೆಯಾದ ಸಂಸ್ಥೆಗೆ ಕನಿಷ್ಠ 4-5 ತಿಂಗಳ ಕಾಲಾವಕಾಶ ನೀಡಲಾಗುವುದು. ಡಿಪಿಆರ್ ಸಿದ್ಧವಾದ ನಂತರ ಕಾಮಗಾರಿ ಆರಂಭಿಸಲು ಸರ್ಕಾರ ಹಾಗೂ ಕೇಂದ್ರದ ಅನುಮೋದನೆ ಪಡೆಯಬೇಕಿದೆ. ಆದರೆ ಈಗಾಗಲೇ 2024-25ನೇ ಸಾಲಿನ ಕರ್ನಾಟಕ ಬಜೆಟ್ನಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಈ ಯೋಜನೆಯನ್ನು ಘೋಷಿಸಿದ್ದರು.
ಪ್ರಯಾಣಿಕರಿಗೆ ಬಿಗ್ ಶಾಕ್..ನಮ್ಮ ಮೆಟ್ರೋ ದರ ಮತ್ತೆ ಏರಿಕೆ?
ಬೆಂಗಳೂರು: ಸಿಲಿಕಾನ್ ಸಿಟಿಯ ಜನರಿಗೆ ನಮ್ಮ ಮೆಟ್ರೋ ಮತ್ತೊಂದು ಶಾಕ್ ಕೊಡಲು ಸಿದ್ಧವಾಗಿದೆ. 2026ರ ಫೆಬ್ರವರಿಯಲ್ಲಿ ಮೆಟ್ರೋ ಟಿಕೆಟ್ ದರವನ್ನು ಶೇಕಡಾ 5ರಷ್ಟು ಹೆಚ್ಚಿಸುವ ಸಾಧ್ಯತೆ ಇದೆ. ದರ ಪರಿಷ್ಕರಣೆ ಸಮಿತಿಯ ಶಿಫಾರಸು ವರದಿಯಿಂದ ಈ ವಿಷಯ ಬಹಿರಂಗವಾಗಿದೆ. ಈ ದರ ಏರಿಕೆಯಿಂದಾಗಿ ಬೆಂಗಳೂರಿನ ಪ್ರಯಾಣಿಕರಲ್ಲಿ ಆತಂಕ ಮತ್ತು ಅಸಮಾಧಾನ ಮನೆಮಾಡಿದೆ.
ಕಳೆದ ಏಳೂವರೆ ವರ್ಷಗಳ ಹಿಂದೆ, 2025ರ ಫೆಬ್ರವರಿಯಲ್ಲಿ ಬೆಂಗಳೂರು ಮೆಟ್ರೋ ರೈಲು ಕಾರ್ಪೊರೇಷನ್ ಲಿಮಿಟೆಡ್ (BMRCL) ದರವನ್ನು ಶೇಕಡಾ 71.43ರಷ್ಟು ಹೆಚ್ಚಿಸಿತ್ತು. ಈ ಏರಿಕೆಯಿಂದ ಬೆಂಗಳೂರು ಮೆಟ್ರೋ ಭಾರತದಲ್ಲೇ ಅತಿ ದುಬಾರಿ ಮೆಟ್ರೋ ಎನಿಸಿಕೊಂಡಿತ್ತು. ಈಗ ಮತ್ತೆ ದರ ಏರಿಕೆಯ ಸುದ್ದಿಯಿಂದ ಪ್ರಯಾಣಿಕರಿಗೆ ಮತ್ತೊಂದು ಆಘಾತವಾಗಿದೆ.
ದರ ಏರಿಕೆಯ ಹಿನ್ನೆಲೆ
ದರ ಪರಿಷ್ಕರಣೆ ಸಮಿತಿಯು ಪ್ರತಿ ವರ್ಷ ಶೇಕಡಾ 5ರಷ್ಟು ದರ ಏರಿಕೆಯನ್ನು ಶಿಫಾರಸು ಮಾಡಿದೆ. ಈ ಏರಿಕೆಯನ್ನು ಕಾರ್ಯಾಚರಣೆ ಮತ್ತು ನಿರ್ವಹಣಾ ವೆಚ್ಚದ ಆಧಾರದ ಮೇಲೆ ಲೆಕ್ಕಹಾಕಲಾಗುತ್ತದೆ. BMRCLನ ಆರ್ಥಿಕ ಸ್ಥಿರತೆಯನ್ನು ಕಾಪಾಡಿಕೊಳ್ಳಲು ಈ ಕ್ರಮ ಅನಿವಾರ್ಯ ಎಂದು ಸಮಿತಿ ತಿಳಿಸಿದೆ. ಒಂದು ವೇಳೆ ದರ ಹೊಂದಾಣಿಕೆ ಮಾಡದಿದ್ದರೆ, 2029-30ರ ವೇಳೆಗೆ BMRCLಗೆ 577 ಕೋಟಿ ರೂಪಾಯಿಗಳ ನಷ್ಟವಾಗುವ ಸಾಧ್ಯತೆ ಇದೆ. ಜೊತೆಗೆ, ಸಾಲ ಮರುಪಾವತಿ ವೆಚ್ಚವು 2025-26ರಲ್ಲಿ 911 ಕೋಟಿಯಿಂದ 2029-30ರ ವೇಳೆಗೆ 1,457 ಕೋಟಿಗೆ ಏರಿಕೆಯಾಗಲಿದೆ ಎಂದು ಅಂದಾಜಿಸಲಾಗಿದೆ.
ಈಗಿನ ದರ ಎಷ್ಟು?
ಮೆಜೆಸ್ಟಿಕ್ನಿಂದ ರೇಷ್ಮೆಸಂಸ್ಥೆಗೆ ಮತ್ತು ಬೈಯಪ್ಪನಹಳ್ಳಿಗೆ 50 ರೂಪಾಯಿ, ಜಾಲಹಳ್ಳಿಯಿಂದ ರೇಷ್ಮೆಸಂಸ್ಥೆಗೆ 90 ರೂಪಾಯಿ, ಮೆಜೆಸ್ಟಿಕ್ನಿಂದ ವೈಟ್ಫೀಲ್ಡ್ಗೆ 80 ರೂಪಾಯಿ, ಚಲ್ಲಘಟ್ಟಕ್ಕೆ 60 ರೂಪಾಯಿ, ವಿಧಾನಸೌಧಕ್ಕೆ 10 ರೂಪಾಯಿ, ಮತ್ತು ಕಬ್ಬನ್ ಪಾರ್ಕ್ಗೆ 20 ರೂಪಾಯಿ ದರವಿದೆ. ಈ ದರಗಳು ಕೆಲವು ಮಾರ್ಗಗಳಲ್ಲಿ ಈ ಹಿಂದೆ ಇಳಿಕೆಯಾಗಿದ್ದವು. ಆದರೆ, ಕೆಲವು ಮಾರ್ಗಗಳಲ್ಲಿ ದರ ಏರಿಕೆಯಾಗಿತ್ತು, ಇದರಿಂದ BMRCL ಕೆಲವೆಡೆ ದರ ಇಳಿಸಿ, ಇನ್ನೆಡೆ ಏರಿಸಿತ್ತು.
BMRCLನ ಪ್ರಕಾರ, ಈ ದರ ಏರಿಕೆಯಿಂದ ಸಂಸ್ಥೆಯ ಆರ್ಥಿಕ ಸ್ಥಿರತೆಯನ್ನು ಕಾಪಾಡಿಕೊಳ್ಳಲು ಸಾಧ್ಯವಾಗುತ್ತದೆ. ಕಾರ್ಯಾಚರಣೆ ವೆಚ್ಚ, ನಿರ್ವಹಣೆ, ಮತ್ತು ಸಾಲದ ಮರುಪಾವತಿಯ ಹೊರೆಯನ್ನು ಸಮತೋಲನಗೊಳಿಸಲು ಈ ಕ್ರಮ ಅನಿವಾರ್ಯ ಎಂದು BMRCL ಹೇಳಿಕೊಂಡಿದೆ.
ಕಳೆದ ದರ ಏರಿಕೆಯ ವಿರುದ್ಧ ಬೆಂಗಳೂರಿನ ಜನರು ವ್ಯಾಪಕ ಪ್ರತಿಭಟನೆ ನಡೆಸಿದ್ದರು. 47% ಏರಿಕೆ ಎಂದು ಘೋಷಿಸಿದ್ದ BMRCL, ಕೆಲವು ಮಾರ್ಗಗಳಲ್ಲಿ 100% ದರ ಏರಿಕೆ ಮಾಡಿತ್ತು ಎಂದು ಜನರು ಆಕ್ರೋಶ ವ್ಯಕ್ತಪಡಿಸಿದ್ದರು. ಈಗ ಮತ್ತೆ ಶೇಕಡಾ 5ರಷ್ಟು ಏರಿಕೆಯ ಸುದ್ದಿಯಿಂದ ಪ್ರಯಾಣಿಕರಲ್ಲಿ ಅಸಮಾಧಾನ ಮೂಡಿದೆ.
