ಪ್ರತಿಯೊಬ್ಬರಿಗೂ ತಮ್ಮ ಭವಿಷ್ಯದ ಜೀವನ ಸಂಗಾತಿಯ ಬಗ್ಗೆ ಸಾವಿರಾರು ಕನಸುಗಳಿರುತ್ತವೆ. ಆದರೆ ವಾಸ್ತವ ಜೀವನವು ಕನಸುಗಳಿಗಿಂತ ಭಿನ್ನವಾಗಿರುತ್ತದೆ. ಅದು ಪ್ರೇಮ ವಿವಾಹವಿರಲಿ ಅಥವಾ ಮನೆಯವರು ನಿಶ್ಚಯಿಸಿದ ಮದುವೆಯಿರಲಿ, ದಾಂಪತ್ಯಕ್ಕೆ ಕಾಲಿಡುವ ಮುನ್ನವೇ ಕೆಲವು ಗಂಭೀರ ವಿಷಯಗಳ ಬಗ್ಗೆ ಮುಕ್ತವಾಗಿ ಮಾತನಾಡುವುದು ಅಗತ್ಯ. ಹೇಗೆ ನಿಮ್ಮ ಸಂಗಾತಿಯೊಂದಿಗೆ ಮದಿವೆ ಮುನ್ನ ಕೆಲವು ವಿಚಾರಗಳನ್ನ ಮಾತನಾಡುವುದರಿಂದ ಭವಿಷ್ಯದಲ್ಲಿ ಉಂಟಾಗಬಹುದಾದ ಅನೇಕ ಗೊಂದಲಗಳನ್ನು ತಪ್ಪಿಸುತ್ತವೆ.
ವೃತ್ತಿಜೀವನ ಮತ್ತು ಮಹತ್ವಾಕಾಂಕ್ಷೆ
ಮದುವೆಯ ನಂತರ ಕೆಲಸ ಬಿಡಬೇಕೆ ? ಅಥವಾ ಕೆಲಸದ ನಿಮಿತ್ತ ಬೇರೆ ಕಡೆ ವರ್ಗಾವಣೆಯಾದರೆ ಸಂಗಾತಿಯ ನಿಲುವು ಏನು ? ಇಂತಹ ವಿಷಯಗಳನ್ನು ಮೊದಲೇ ಚರ್ಚಿಸಿ. ಇಬ್ಬರೂ ಉದ್ಯೋಗಸ್ಥರಾಗಿದ್ದರೆ ಮನೆ ಕೆಲಸ ಮತ್ತು ಕಚೇರಿ ಜವಾಬ್ದಾರಿಗಳನ್ನು ಹೇಗೆ ಹಂಚಿಕೊಳ್ಳಬೇಕು ಎಂಬುದರ ಬಗ್ಗೆ ಸ್ಪಷ್ಟತೆ ಇರಲಿ. ವೃತ್ತಿಜೀವನದ ಬೆಳವಣಿಗೆಗೆ ಸಂಗಾತಿಯ ಬೆಂಬಲ ಎಷ್ಟಿದೆ ಎಂಬುದು ಮೊದಲೇ ತಿಳಿದಿದ್ದರೆ ಮದುವೆಯ ನಂತರದ ಕಿರಿಕಿರಿಗಳು ತಪ್ಪುತ್ತವೆ.
ಹಣಕಾಸಿನ ವಿಚಾರದಲ್ಲಿ ಮುಚ್ಚುಮರೆ ಬೇಡ
ಹಣಕಾಸಿನ ಬಗ್ಗೆ ಮಾತನಾಡುವುದು ಎದುರಿಗಿರುವ ವ್ಯಕ್ತಿಗೆ ಮುಜುಗರ ತರಬಹುದು ಅಥವಾ ನಮ್ಮನ್ನು ತಪ್ಪಾಗಿ ತಿಳಿದುಕೊಳ್ಳಬಹುದು ಎಂಬ ಭಯ ಬೇಡ. ಭವಿಷ್ಯದ ಉಳಿತಾಯ, ಮನೆ ಖರ್ಚು, ಹೂಡಿಕೆ ಹಾಗೂ ಸಾಲಗಳ ಬಗ್ಗೆ ಮೊದಲೇ ಪಾರದರ್ಶಕವಾಗಿ ಮಾತನಾಡಿ. ಇಬ್ಬರ ಹಣಕಾಸಿನ ಗುರಿಗಳು ಒಂದೇ ದಿಕ್ಕಿನಲ್ಲಿ ಇಲ್ಲದಿದ್ದರೆ ಮುಂದೆ ಆರ್ಥಿಕ ಸಂಘರ್ಷಗಳು ಉಂಟಾಗಬಹುದು. ಖರ್ಚು ಮಾಡುವ ಸ್ವಭಾವದ ಬಗ್ಗೆಯೂ ತಿಳುವಳಿಕೆ ಇರುವುದು ಒಳ್ಳೆಯದು.
ಫ್ಯಾಮಿಲಿ ಪ್ಲಾನಿಂಗ್
ಮಕ್ಕಳ ವಿಚಾರದಲ್ಲಿ ಪ್ರತಿಯೊಬ್ಬರ ಆಲೋಚನೆ ವಿಭಿನ್ನವಾಗಿರುತ್ತದೆ. ಕೆಲವರು ಮದುವೆಯಾದ ತಕ್ಷಣ ಮಕ್ಕಳನ್ನು ಬಯಸಿದರೆ, ಇನ್ನು ಕೆಲವರು ವೃತ್ತಿಜೀವನದಲ್ಲಿ ನೆಲೆ ನಿಂತ ನಂತರ ಅಂದರೆ ತಾವು ಸೆಟ್ಟಲ್ ಆದ ಮೇಲೆ ಪೋಷಕರಾಗಲು ಇಚ್ಛಿಸುತ್ತಾರೆ. ಹಾಗಾಗಿ, ಮಕ್ಕಳ ಬಗ್ಗೆ ನಿಮ್ಮ ಅಭಿಪ್ರಾಯವೇನು ಮತ್ತು ಯಾವಾಗ ಪೋಷಕರಾಗಲು ಸಿದ್ಧರಿದ್ದೀರಿ ಎಂಬುದನ್ನು ಚರ್ಚಿಸಿ. ಇದು ನಿಮ್ಮ ವೈಯಕ್ತಿಕ ಸ್ವಾತಂತ್ರ್ಯ ಮತ್ತು ಜವಾಬ್ದಾರಿಯ ನಡುವಿನ ಸಮತೋಲನಕ್ಕೆ ಸಹಕಾರಿ.
ಹಳೆಯ ಸಂಬಂಧಗಳ ಬಗ್ಗೆ ಪ್ರಾಮಾಣಿಕತೆ
ಹಿಂದಿನ ಸಂಬಂಧಗಳ ಬಗ್ಗೆ ಮಾತನಾಡುವುದು ಕಷ್ಟಕರವಾಗಿರಬಹುದು, ಆದರೆ ಇದು ನಿಮ್ಮ ನಡುವಿನ ವಿಶ್ವಾಸವನ್ನು ಬಲಪಡಿಸುತ್ತದೆ. ನಿಮ್ಮ ಹಳೆಯ ಸಂಬಂಧಗಳಿಂದ ಕಲಿತ ಪಾಠಗಳನ್ನು ಹಂಚಿಕೊಳ್ಳಿ. ಆದರೆ ನೆನಪಿಡಿ, ಹಳೆಯ ಸಂಗಾತಿಯನ್ನು ಅತಿಯಾಗಿ ಹೊಗಳುವುದು ಅಥವಾ ತೆಗಳುವುದು ಬೇಡ. ನಿಮ್ಮ ಪ್ರಸ್ತುತ ಸಂಗಾತಿಗೆ ನೀವು ಪ್ರಾಮಾಣಿಕವಾಗಿದ್ದೀರಿ ಎಂದು ತೋರಿಸಲು ಇದು ಒಂದು ಅವಕಾಶ. ಅತಿಯಾದ ವಿವರಗಳಿಗಿಂತ ಹೆಚ್ಚಾಗಿ, ಆ ಸಂಬಂಧ ಮುಗಿದುಹೋಗಿದೆ ಮತ್ತು ನೀವು ಹೊಸ ಬದುಕಿಗೆ ಸಿದ್ಧರಿದ್ದೀರಿ ಎಂಬ ಸ್ಪಷ್ಟತೆ ಇರಲಿ.
