ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಮ್ಮ ಟ್ಯಾರಿಫ್ ನೀತಿಯ ಗುಮ್ಮವನ್ನು ಮತ್ತೆ ಎರಗಿಸಿದ್ದಾರೆ. ಈ ಬಾರಿ ಗುರಿಯಾಗಿರುವುದು ತಾಂತ್ರಿಕ ದೈತ್ಯ ಆ್ಯಪಲ್ ಕಂಪನಿ. ಭಾರತದಲ್ಲಿ ಅಥವಾ ಅಮೆರಿಕದ ಹೊರಗೆ ತಯಾರಾದ ಐಫೋನ್ಗಳ ಮೇಲೆ ಶೇ. 25ರಷ್ಟು ಆಮದು ಸುಂಕ ವಿಧಿಸುವುದಾಗಿ ಟ್ರಂಪ್ ಎಚ್ಚರಿಕೆ ನೀಡಿದ್ದಾರೆ. ಈ ಬಗ್ಗೆ ತಮ್ಮ ಟ್ರೂತ್ ಸೋಷಿಯಲ್ ಪ್ಲಾಟ್ಫಾರ್ಮ್ನಲ್ಲಿ ಪೋಸ್ಟ್ ಮಾಡಿದ್ದಾರೆ. ಎಕ್ಸ್ನಲ್ಲೂ ಈ ವಿಷಯವನ್ನು ಪ್ರಕಟಿಸಿದ್ದಾರೆ.
“ಅಮೆರಿಕದಲ್ಲಿ ಮಾರಾಟವಾಗುವ ಐಫೋನ್ಗಳು ಅಮೆರಿಕದಲ್ಲೇ ತಯಾರಾಗಬೇಕು. ಭಾರತದಲ್ಲಿ ಅಥವಾ ಬೇರೆಡೆ ತಯಾರಾದರೆ ಆ್ಯಪಲ್ ಶೇ. 25ರಷ್ಟು ಟ್ಯಾರಿಫ್ ಕಟ್ಟಬೇಕು,” ಎಂದು ಟ್ರಂಪ್ ತಮ್ಮ ಪೋಸ್ಟ್ನಲ್ಲಿ ತಿಳಿಸಿದ್ದಾರೆ. ಈ ನಿಲುವು ಟ್ರಂಪ್ಗೆ ಹೊಸದೇನಲ್ಲ. ಈ ಹಿಂದೆಯೂ ಆ್ಯಪಲ್ಗೆ ಇದೇ ರೀತಿಯ ಎಚ್ಚರಿಕೆ ನೀಡಿದ್ದರು.
ಆ್ಯಪಲ್ನ ಐಫೋನ್ಗಳು ವಿಶ್ವದಾದ್ಯಂತ ಜನಪ್ರಿಯ. ಅಮೆರಿಕದಲ್ಲಿ ವರ್ಷಕ್ಕೆ ಸುಮಾರು 6 ಕೋಟಿ ಐಫೋನ್ಗಳು ಮಾರಾಟವಾಗುತ್ತವೆ. ಇವುಗಳಲ್ಲಿ ಶೇ. 80ರಷ್ಟು ಚೀನಾದಲ್ಲಿ ತಯಾರಾಗುತ್ತವೆ. ಆದರೆ, ಇತ್ತೀಚೆಗೆ ಭಾರತದಲ್ಲಿ ಐಫೋನ್ ಉತ್ಪಾದನೆಯನ್ನು ಆ್ಯಪಲ್ ಹೆಚ್ಚಿಸಿದೆ. ‘ಮೇಡ್ ಇನ್ ಇಂಡಿಯಾ’ ಐಫೋನ್ಗಳು ಅಮೆರಿಕದ ಮಾರುಕಟ್ಟೆಗೆ ರಫ್ತಾಗುತ್ತಿವೆ. ಭಾರತದಿಂದ ಸ್ಮಾರ್ಟ್ಫೋನ್ ರಫ್ತು ಗಣನೀಯವಾಗಿ ಹೆಚ್ಚಿದ್ದು, ಇದೀಗ ರಫ್ತು ಸರಕುಗಳಲ್ಲಿ ಸ್ಮಾರ್ಟ್ಫೋನ್ಗಳು ಮೊದಲ ಸ್ಥಾನದಲ್ಲಿವೆ.
ಅಮೆರಿಕದಲ್ಲಿ ಉತ್ಪಾದನಾ ಉದ್ಯಮ ಬೆಳೆಯಬೇಕು, ಉದ್ಯೋಗ ಸೃಷ್ಟಿಯಾಗಬೇಕು. ಈ ಗುರಿಯಡಿ ಐಫೋನ್ ತಯಾರಿಕೆಯನ್ನು ಅಮೆರಿಕಕ್ಕೆ ತರಲು ಒತ್ತಡ ಹೇರುತ್ತಿದ್ದಾರೆ. ಆದರೆ, ಅಮೆರಿಕದಲ್ಲಿ ಉತ್ಪಾದನೆಗೆ ಕಾರ್ಮಿಕ ವೆಚ್ಚ ಗಗನಕ್ಕೇರಿದೆ. ಈ ಕಾರಣಕ್ಕೆ ಆ್ಯಪಲ್ ತನ್ನ ಉತ್ಪಾದನೆಯನ್ನು ಚೀನಾದಂತಹ ಕಡಿಮೆ ವೆಚ್ಚದ ದೇಶಗಳಲ್ಲಿ ಕೇಂದ್ರೀಕರಿಸಿತ್ತು. 2020ರ ನಂತರ ಚೀನಾದಿಂದ ಹೊರಗಡೆ ಉತ್ಪಾದನೆ ವಿಸ್ತರಿಸಲು ಆರಂಭಿಸಿತು, ಇದರಲ್ಲಿ ಭಾರತ ಪ್ರಮುಖ ಪಾತ್ರ ವಹಿಸಿದೆ.
ಟ್ರಂಪ್ರ ಈ ಟ್ಯಾರಿಫ್ ಬೆದರಿಕೆ ಭಾರತಕ್ಕೆ ತೊಂದರೆ ತರಬಹುದು. ಆ್ಯಪಲ್ ತನ್ನ ಉತ್ಪಾದನೆಯನ್ನು ಅಮೆರಿಕಕ್ಕೆ ವರ್ಗಾಯಿಸಿದರೆ, ಭಾರತದ ಸ್ಮಾರ್ಟ್ಫೋನ್ ಉತ್ಪಾದನಾ ಉದ್ಯಮಕ್ಕೆ ದೊಡ್ಡ ಹೊಡೆತ ಬೀಳಬಹುದು. ಭಾರತದಲ್ಲಿ ಆ್ಯಪಲ್ನ ಉತ್ಪಾದನೆಯಿಂದ ಸಾವಿರಾರು ಉದ್ಯೋಗ ಸೃಷ್ಟಿಯಾಗಿದೆ. ರಫ್ತು ಆದಾಯವೂ ಗಮನಾರ್ಹವಾಗಿದೆ. ಟ್ರಂಪ್ನ ನೀತಿಯಿಂದ ಈ ಲಾಭಗಳಿಗೆ ಧಕ್ಕೆ ಬರಬಹುದು. ಆದರೆ, ಆ್ಯಪಲ್ ಈಗಾಗಲೇ ಭಾರತದಲ್ಲಿ ದೊಡ್ಡ ಹೂಡಿಕೆ ಮಾಡಿದೆ. ತಮಿಳುನಾಡು, ಕರ್ನಾಟಕದಂತಹ ರಾಜ್ಯಗಳಲ್ಲಿ ಉತ್ಪಾದನಾ ಘಟಕಗಳನ್ನು ಸ್ಥಾಪಿಸಿದೆ. ಇದರಿಂದ ಭಾರತದ ಆರ್ಥಿಕತೆಗೆ ಗಣನೀಯ ಕೊಡುಗೆಯಾಗಿದೆ.
ಆ್ಯಪಲ್ಗೆ ಟ್ರಂಪ್ರ ಒತ್ತಡ ಹೊಸದೇನಲ್ಲ. ಆದರೆ, ಕಂಪನಿಯು ತನ್ನ ಉತ್ಪಾದನೆಯನ್ನು ವೈವಿಧ್ಯಗೊಳಿಸುವ ತಂತ್ರವನ್ನು ಮುಂದುವರಿಸಿದೆ. ಭಾರತದಂತಹ ದೇಶಗಳಲ್ಲಿ ಉತ್ಪಾದನೆಯನ್ನು ಹೆಚ್ಚಿಸುವುದರಿಂದ ವೆಚ್ಚ ಕಡಿಮೆಯಾಗುತ್ತದೆ ಎಂಬುದು ಆ್ಯಪಲ್ನ ಲೆಕ್ಕಾಚಾರ.
