ಟೆಹರಾನ್: ಇರಾನ್, ಅಮೆರಿಕಾ ಮತ್ತು ಇಸ್ರೇಲ್ ರಾಷ್ಟ್ರಗಳ ನಡುವಿನ ಭೀಕರ ಸಂಘರ್ಷವು ಇದೀಗ 29ನೇ ದಿನಕ್ಕೆ ಕಾಲಿಟ್ಟಿದೆ. ದಿನದಿಂದ ದಿನಕ್ಕೆ ಯುದ್ಧದ ತೀವ್ರತೆ ಹೆಚ್ಚುತ್ತಿದ್ದು, ಇಡೀ ಜಗತ್ತು ಆತಂಕ ಎದುರಿಸುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ.
ಇರಾನ್ ಮೇಲೆ ಬಾಂಬ್ಗಳ ಸುರಿಮಳೆ
ಅಮೆರಿಕಾ ಸಂಘರ್ಷದಿಂದ ಹಿಂದೆ ಸರಿದರೂ ನಾವು ಇರಾನ್ ಅನ್ನು ಸುಮ್ಮನೆ ಬಿಡುವ ಮಾತೇ ಇಲ್ಲ ಎಂದು ಇಸ್ರೇಲ್ ಗುಡುಗಿದೆ. ಅದರಂತೆ, ಇರಾನ್ನ ಪ್ರಮುಖ ನಗರಗಳ ಮೇಲೆ ಇಸ್ರೇಲ್ ಬಾಂಬ್ಗಳ ಸುರಿಮಳೆಗೈದಿದೆ. ಈ ದಾಳಿಯಲ್ಲಿ ಇದುವರೆಗೆ ಏಳು ನಾಗರಿಕರು ಮೃತಪಟ್ಟಿದ್ದಾರೆ ಎಂದು ವರದಿಯಾಗಿದೆ. ಈ ದಾಳಿಗೆ ಪ್ರತಿಯಾಗಿ ಇರಾನ್ ಕೂಡ ಇಸ್ರೇಲ್ ಮೇಲೆ ಪ್ರತಿ ದಾಳಿ ಆರಂಭಿಸಿದೆ.
ಇಸ್ರೇಲ್ ಮೇಲೆ ಕ್ಲಸ್ಟರ್ ಬಾಂಬ್ ದಾಳಿ
ಮೂಲಗಳ ಪ್ರಕಾರ, ಇಸ್ರೇಲ್ನ ವೈಮಾನಿಕ ದಾಳಿಗೆ ಪ್ರತ್ಯುತ್ತರ ನೀಡಿರುವ ಇರಾನ್, ಇಸ್ರೇಲ್ ಸೇನೆಯನ್ನು ಗುರಿಯಾಗಿಸಿ ಕ್ಲಸ್ಟರ್ ಬಾಂಬ್ಗಳನ್ನು ಪ್ರಯೋಗಿಸಿದೆ. ಅಷ್ಟೇ ಅಲ್ಲದೆ, ಇರಾನ್ ತನ್ನ ಅತ್ಯಾಧುನಿಕ ಮಿಸೈಲ್ (ಕ್ಷಿಪಣಿ) ಮೂಲಕವೂ ದಾಳಿ ನಡೆಸಿದೆ ಎಂದು ಇಸ್ರೇಲ್ ಗಂಭೀರ ಆರೋಪ ಮಾಡಿದೆ.
ಒಂದೆಡೆ ಕದನ ವಿರಾಮದ ಮಾತುಗಳನ್ನಾಡುತ್ತಿರುವ ಅಮೆರಿಕಾ, ಮತ್ತೊಂದೆಡೆ ಇರಾನ್ ಗಡಿಯಲ್ಲಿ ಸೇನಾ ಬಲವನ್ನು ಹೆಚ್ಚಿಸುತ್ತಿದೆ. ಈಗಾಗಲೇ 7 ಸಾವಿರ ಅಮೆರಿಕಾ ಸೈನಿಕರು ಇರಾನ್ ಸುತ್ತಮುತ್ತ ಬೀಡು ಬಿಟ್ಟಿದ್ದು, ಹೆಚ್ಚುವರಿಯಾಗಿ 10 ಸಾವಿರ ಸೈನಿಕರನ್ನು ಕಳುಹಿಸಲು ವೈಟ್ ಹೌಸ್ ಮುಂದಾಗಿದೆ.
ಅಮೆರಿಕಾದ ಈ ದ್ವಂದ್ವ ನಿಲುವು ಮತ್ತು ಸೈನ್ಯ ಜಮಾವಣೆಯ ಉದ್ದೇಶ ಈಗ ಜಾಗತಿಕ ಮಟ್ಟದಲ್ಲಿ ಚರ್ಚೆಗೆ ಗ್ರಾಸವಾಗಿದೆ. ಇತ್ತ ಇರಾನ್ ಕೂಡ ಅಮೆರಿಕಾದ ನೌಕಾಪಡೆಯನ್ನೇ ಗುರಿಯಾಗಿಸಿಕೊಂಡು ನಿರಂತರವಾಗಿ ದಾಳಿ ನಡೆಸುತ್ತಿದೆ. ಇರಾನ್ ಸೇನೆಯು ಪ್ರಮುಖವಾಗಿ ಅಮೆರಿಕಾದ ಸೈನಿಕರನ್ನು ಗುರಿಯಾಗಿಸಿಕೊಂಡಿದೆ. ವಿಶೇಷವಾಗಿ ‘ಅಲ್ ಅಸಾದ್’ (Al-Asad) ಏರ್ಬೇಸ್ನಲ್ಲಿರುವ ಅಮೆರಿಕಾ ಸೇನೆಯ ಮೇಲೆ ಇರಾನ್ ಕಣ್ಣಿಟ್ಟಿದ್ದು, ಅಮೆರಿಕಾ ಸೈನಿಕರು ಕಂಡುಬಂದಲ್ಲಿ ಗುಂಡು ಹಾರಿಸುವಂತೆ ತನ್ನ ಪಡೆಗಳಿಗೆ ಸೂಚನೆ ನೀಡಿದೆ ಎನ್ನಲಾಗಿದೆ.
