ಅಮೆರಿಕಾದ ಮೇಲೆ ಯುದ್ಧಕ್ಕೆ ಮುಂದಾಗುತ್ತ ಚೀನಾ

ಬೀಜಿಂಗ್: ಜಗತ್ತಿನ ಎರಡು ಬಲಿಷ್ಠ ಆರ್ಥಿಕ ಮತ್ತು ಮಿಲಿಟರಿ ಶಕ್ತಿಗಳಾದ ಅಮೆರಿಕ ಹಾಗೂ ಚೀನಾ ನಡುವಿನ ಶೀತಲ ಸಮರ ದಿನದಿಂದ ದಿನಕ್ಕೆ ತಾರಕಕ್ಕೇರುತ್ತಿದೆ. ತೈವಾನ್ ಸ್ವಾತಂತ್ರ್ಯದ ಪರವಾಗಿ ಅಮೆರಿಕ ಕಠಿಣ ನಿಲುವು ತಳೆದಾಗಿನಿಂದ ಚೀನಾ ತೀವ್ರ ಆಕ್ರೋಶಗೊಂಡಿದೆ. ಇದರ ಬೆನ್ನಲ್ಲೇ, ಚೀನಾದ ತಕ್ಲಮಕಾನ್ (Taklamakan) ಮರುಭೂಮಿಯಲ್ಲಿ ಅಮೆರಿಕದ ಅತ್ಯಂತ ಶಕ್ತಿಶಾಲಿ ಯುದ್ಧ ನೌಕೆಗಳ ಮಾದರಿಯನ್ನು ನಿರ್ಮಿಸಿದ್ದು, ಅವುಗಳ ಮೇಲೆ ಕ್ಷಿಪಣಿ ದಾಳಿಯ ತಾಲೀಮು ನಡೆಸುತ್ತಿರುವ ಆತಂಕಕಾರಿ ವಿಚಾರ ಉಪಗ್ರಹ ಚಿತ್ರಗಳ ಮೂಲಕ ಬಹಿರಂಗವಾಗಿದೆ.

ತಕ್ಲಮಕಾನ್ ಮರುಭೂಮಿಯಲ್ಲಿ ‘ಅರ್ಲಿ ಬರ್ಕ್’ ನೌಕೆಯ ಪ್ರತಿಕೃತಿ

ಅಮೆರಿಕ ನೌಕಾಪಡೆಯ ಅತ್ಯಂತ ವಿಶ್ವಾಸಾರ್ಹ ಮತ್ತು ವಿನಾಶಕಾರಿ ಯುದ್ಧ ನೌಕೆಗಳಲ್ಲಿ ‘ಅರ್ಲಿ ಬರ್ಕ್’ (Arleigh Burke-class) ಗೈಡೆಡ್-ಮಿಸೈಲ್ ಡಿಸ್ಟ್ರಾಯರ್ ಕೂಡ ಒಂದು. ಒಂದು ವೇಳೆ ತೈವಾನ್ ಮೇಲೆ ಚೀನಾ ಆಕ್ರಮಣ ಮಾಡಿದರೆ, ತೈವಾನ್ ರಕ್ಷಣೆಗಾಗಿ ಅಮೆರಿಕದ ಈ ಯುದ್ಧ ನೌಕೆಗಳು ಧಾವಿಸುವುದು ಖಚಿತ. ಇದನ್ನು ಅರಿತಿರುವ ಚೀನಾ, ಜಲಾವೃತ ಪ್ರದೇಶದಲ್ಲಿ ಅಮೆರಿಕದ ಈ ನೌಕೆಗಳನ್ನು ಹೇಗೆ ಹೊಡೆದುರುಳಿಸಬೇಕು ಎಂಬುದಕ್ಕೆ ತಕ್ಲಮಕಾನ್ ಮರುಭೂಮಿಯಲ್ಲಿ ಮಾದರಿ ನೌಕೆಯನ್ನು ಸೃಷ್ಟಿಸಿ ಕೃತಕ ಯುದ್ಧ ತಾಲೀಮು ನಡೆಸುತ್ತಿದೆ. ಯಾವ ಕ್ಷಿಪಣಿಯಿಂದ ದಾಳಿ ಮಾಡಿದರೆ ಅರ್ಲಿ ಬರ್ಕ್ ನೌಕೆಯನ್ನು ಸಂಪೂರ್ಣವಾಗಿ ಧ್ವಂಸಗೊಳಿಸಬಹುದು ಎಂಬ ಸಂಶೋಧನೆಯಲ್ಲಿ ಚೀನಾ ಮಿಲಿಟರಿ ತೊಡಗಿದೆ.

ಚೀನಾದ ‘ಕ್ಯಾರಿಯರ್ ಕಿಲ್ಲರ್’ ಕ್ಷಿಪಣಿಗಳ ಅಸ್ತ್ರ ಬಲ

ಅಮೆರಿಕದ ಬೃಹತ್ ನೌಕೆಗಳನ್ನು ಸದೆಬಡಿಯಲು ಚೀನಾ ತನ್ನ ಅತ್ಯಾಧುನಿಕ ವೈಜೆ (YJ) ಸರಣಿಯ ಆಂಟಿ-ಶಿಪ್ ಕ್ಷಿಪಣಿಗಳು ಹಾಗೂ ‘ಕ್ಯಾರಿಯರ್ ಕಿಲ್ಲರ್’ ಎಂದೇ ಕರೆಯಲಾಗುವ DF-21D ಮತ್ತು DF-26 ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಪರೀಕ್ಷಿಸುತ್ತಿದೆ. ಮರುಭೂಮಿಯಲ್ಲಿ ನಿರ್ಮಿಸಲಾದ ಅಮೆರಿಕದ ನೌಕೆಗಳ ಕೃತಕ ಮಾದರಿಗಳ ಮೇಲೆ ಈ ದೀರ್ಘ ವ್ಯಾಪ್ತಿಯ ಕ್ಷಿಪಣಿಗಳನ್ನು ಉಡಾಯಿಸಿ, ಅವುಗಳ ನಿಖರತೆಯನ್ನು ಚೀನಾ ಪರೀಕ್ಷಿಸುತ್ತಿದೆ ಎಂದು ರಾಜತಾಂತ್ರಿಕ ಮೂಲಗಳು ತಿಳಿಸಿವೆ.

ಇತಿಹಾಸದ ಹಾದಿ ಮತ್ತು ಚೀನಾದ ಸೈಕಲಾಜಿಕಲ್ ವಾರ್ಫೇರ್

ಚೀನಾ ಇಂತಹ ತಂತ್ರಗಳನ್ನು ಬಳಸುತ್ತಿರುವುದು ಇದೇ ಮೊದಲೇನಲ್ಲ. ಹಿಂದೆ ಜಪಾನ್ ಜೊತೆಗಿನ ಭಿನ್ನಾಭಿಪ್ರಾಯದ ಸಂದರ್ಭದಲ್ಲೂ ಚೀನಾ ಇಂತಹದೇ ರಹಸ್ಯ ತಾಲೀಮುಗಳನ್ನು ನಡೆಸಿತ್ತು. ಇತಿಹಾಸದ ಪುಟಗಳನ್ನು ತಿರುವಿದರೆ, ಚೀನಾ ಮತ್ತು ಜಪಾನ್ ನಡುವೆ ಹಲವು ಸಂಘರ್ಷಗಳು ನಡೆದಿವೆ. ಎರಡನೇ ಮಹಾಯುದ್ಧದ ಸಮಯದಲ್ಲಿ ಜಪಾನ್ ಪಡೆಗಳು ಚೀನಾದ ಮೇಲೆ ಭೀಕರ ಆಕ್ರಮಣ ನಡೆಸಿದ್ದವು. ಆದರೆ, ಆಧುನಿಕ ಕಾಲದಲ್ಲಿ ಜಪಾನ್ ಭದ್ರತೆಗೆ ಅಮೆರಿಕದ ರಕ್ಷಣೆ ಇರುವುದರಿಂದ ಚೀನಾಗೆ ಜಪಾನ್ ಅನ್ನು ನೇರವಾಗಿ ಎದುರಿಸುವುದು ಸುಲಭವಾಗಿಲ್ಲ.

ಹೀಗಾಗಿಯೇ ಚೀನಾ ತನ್ನ ದೇಶಿ ಚಲನಚಿತ್ರಗಳು ಹಾಗೂ ಮಾಧ್ಯಮಗಳ ಮೂಲಕ ಪ್ರಾಪಗಂಡಾ (Propaganda) ಸೃಷ್ಟಿಸುತ್ತಿದೆ. ಚೀನಾದ ಮಿಲಿಟರಿ ಆಧಾರಿತ ಸಿನಿಮಾಗಳಲ್ಲಿ ಜಪಾನ್ ಪಡೆಗಳನ್ನು ಸೋಲಿಸಿದಂತೆ ಬಿಂಬಿಸಿ ಅಲ್ಲಿನ ಜನರಲ್ಲಿ ರಾಷ್ಟ್ರೀಯವಾದವನ್ನು ತುಂಬುವ ಪ್ರಯತ್ನ ನಿರಂತರವಾಗಿ ನಡೆಯುತ್ತಿರುತ್ತದೆ. ಆದರೆ ವಾಸ್ತವ ಯುದ್ಧ ಭೂಮಿಯಲ್ಲಿ ಅಮೆರಿಕ ಮತ್ತು ಅದರ ಮಿತ್ರ ರಾಷ್ಟ್ರಗಳ ನೌಕಾ ಶಕ್ತಿಯನ್ನು ಎದುರಿಸುವುದು ಚೀನಾಗೆ ಅಷ್ಟು ಸುಲಭವಲ್ಲ ಎಂಬುದು ರಕ್ಷಣಾ ತಜ್ಞರ ಅಭಿಪ್ರಾಯವಾಗಿದೆ.