ರಾಮನಗರ ಜಿಲ್ಲೆಯ ತಾವರೆಕೆರೆ ಪೊಲೀಸ್ ಠಾಣಾ ವ್ಯಾಪ್ತಿಯ ಸೂಲಿವಾರ ಗ್ರಾಮದಲ್ಲಿ ದೊಡ್ಡ ಆಲದ ಮರ ಸಮೀಪ ಕಿಡಿಗೇಡಿಗಳು ಹಸುವಿನ ಕೆಚ್ಚಲು ಕೊಯ್ದು ಅಮಾನವೀಯ ಕೃತ್ಯವೆಸಗಿರುವ ಘಟನೆ ನಡೆದಿದೆ. ಈ ದುಷ್ಕೃತ್ಯಕ್ಕೆ ಸ್ಥಳೀಯರಲ್ಲಿ ಭಾರೀ ಆಕ್ರೋಶ ವ್ಯಕ್ತವಾಗಿದೆ.
ಗ್ರಾಮದ ಮರಿಬಸವಯ್ಯ ಎಂಬುವವರಿಗೆ ಸೇರಿದ ಹಸುವು ಪಕ್ಕದ ಜಮೀನಿಗೆ ಮೇಯಲು ತೆರಳಿತ್ತು. ಈ ವೇಳೆ ಆರೋಪಿಗಳಾದ ಗುರುಸಿದ್ದಪ್ಪ ಮತ್ತು ಮಹದೇವಯ್ಯ ಎಂಬವರು ಹಳೆಯ ದ್ವೇಷದಿಂದ ಮಚ್ಚಿನಿಂದ ಹಸುವಿನ ಕೆಚ್ಚಲು ಕೊಯ್ದಿದ್ದಾರೆ ಎಂದು ಆರೋಪಿಸಲಾಗಿದೆ. ತೀವ್ರ ರಕ್ತಸ್ರಾವದಿಂದಾಗಿ ಸುಮಾರು 5 ಗಂಟೆಗಳ ಕಾಲ ಶಸ್ತ್ರಚಿಕಿತ್ಸೆ ನಡೆಸಿದರೂ, ಚಿಕಿತ್ಸೆ ಫಲಕಾರಿಯಾಗದೇ ಹಸು ದಾರುಣವಾಗಿ ಸಾವನ್ನಪ್ಪಿದೆ.
ಮರಿಬಸವಯ್ಯ ಅವರು, ತಮ್ಮ ಮೇಲಿನ ಹಳೆಯ ವೈಷಮ್ಯದಿಂದಾಗಿ ಗುರುಸಿದ್ದಪ್ಪ ಮತ್ತು ಮಹದೇವಯ್ಯ ಈ ಕೃತ್ಯವನ್ನು ನಡೆಸಿದ್ದಾರೆ ಎಂದು ಆರೋಪಿಸಿದ್ದಾರೆ. ಜಮೀನಿನಲ್ಲಿ ಬೆಳೆ ಮೇಯಿತು ಎಂಬ ಕಾರಣಕ್ಕೆ ಈ ವಿಕೃತಿಯನ್ನು ಎಸಗಲಾಗಿದೆ ಎಂದು ಅವರು ಹೇಳಿದ್ದಾರೆ.
ಈ ಘಟನೆಯ ಬಗ್ಗೆ ತಾವರೆಕೆರೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಆರೋಪಿಗಳಾದ ಗುರುಸಿದ್ದಪ್ಪ ಮತ್ತು ಮಹದೇವಯ್ಯರನ್ನು ಪೊಲೀಸರು ವಶಕ್ಕೆ ಪಡೆದು ವಿಚಾರಣೆ ನಡೆಸುತ್ತಿದ್ದಾರೆ. ಈ ಘಟನೆಯಿಂದ ಸ್ಥಳೀಯರಲ್ಲಿ ತೀವ್ರ ಕೋಪ ಮತ್ತು ಆತಂಕ ವ್ಯಕ್ತವಾಗಿದೆ.
