ಬೆಳಗಾವಿ: ಬೆಳಗಾವಿಯಲ್ಲಿ ಸುಂದರ ಮಹಿಳೆಯೊಬ್ಬಳು ನಡೆಸುತ್ತಿದ್ದ ಹೈಟೆಕ್ ವಂಚನೆಯ ಜಾಲವನ್ನು ಕಂಡು ಪೊಲೀಸರೇ ದಂಗಾಗಿದ್ದಾರೆ. ತನ್ನ ಥಳುಕು-ಬಳುಕಿನ ಸೌಂದರ್ಯವನ್ನೇ ಬಂಡವಾಳ ಮಾಡಿಕೊಂಡು, ಶ್ರೀಮಂತ ವ್ಯಕ್ತಿಗಳನ್ನು ಹನಿ ಟ್ರ್ಯಾಪ್ (Honey Trap) ಬಲೆಗೆ ಬೀಳಿಸುತ್ತಿದ್ದ ಕಿಲಾಡಿ ಲೇಡಿಯನ್ನು ಬೆಳಗಾವಿಯ ಟಿಳಕವಾಡಿ ಪೊಲೀಸರು ಅರೆಸ್ಟ್ ಮಾಡಿದ್ದಾರೆ.
ಬಂಧಿತ ಮಹಿಳೆಯನ್ನು ಬಾಗಲಕೋಟೆ ಜಿಲ್ಲೆ ಮಹಾಲಿಂಗಪುರ ಮೂಲದ ದೀಪಾ ಅವಟಗಿ (33) ಎಂದು ಗುರುತಿಸಲಾಗಿದೆ. ವೃತ್ತಿಯಲ್ಲಿ ಫ್ಯಾಷನ್ ಡಿಸೈನರ್ ಆಗಿರುವ ಈಕೆ, ಬೆಳಗಾವಿಯಲ್ಲಿ ನೆಲೆಸಿದ್ದಳು. ಈಕೆಯ ಜೊತೆಗೆ ಶ್ರೀಮಂತ ಕುಳಗಳ ಮಾಹಿತಿ ನೀಡುತ್ತಿದ್ದ ಸ್ನೇಹಿತ ಶಿವಾನಂದ ಮಠಪತಿ ಎಂಬಾತನಿಗಾಗಿ ಪೊಲೀಸರು ಈಗ ತೀವ್ರ ಹುಡುಕಾಟ ನಡೆಸುತ್ತಿದ್ದಾರೆ.
ಈ ಕಿಲಾಡಿ ಜೋಡಿ ಶ್ರೀಮಂತರನ್ನು ಬಲೆಗೆ ಬೀಳಿಸಲು ಬಳಸುತ್ತಿದ್ದ ತಂತ್ರಗಳು ಬಹಳ ಸ್ಮಾರ್ಟ್ ಆಗಿದ್ದವು. ಇನ್ಸ್ಟಾಗ್ರಾಮ್ ಮತ್ತು ಫೇಸ್ಬುಕ್ ಮೂಲಕ ಶ್ರೀಮಂತ ವ್ಯಕ್ತಿಗಳನ್ನು ಪರಿಚಯ ಮಾಡಿಕೊಳ್ಳುವುದು ದೀಪಾಳ ಮೊದಲ ಕೆಲಸವಾಗಿತ್ತು. ಬಳಿಕ ನಯವಾದ ಮಾತುಗಳ ಮೂಲಕ ನಂಬಿಕೆ ಗಳಿಸಿ, ನಂತರ ಅಶ್ಲೀಲವಾಗಿ ಚಾಟ್ ಮಾಡುತ್ತಾ ಅವರನ್ನು ಲಾಡ್ಜ್ಗಳಿಗೆ ಆಹ್ವಾನಿಸುತ್ತಿದ್ದಳು. ವ್ಯಕ್ತಿ ಲಾಡ್ಜ್ಗೆ ಬಂದ ತಕ್ಷಣ ಆತನನ್ನು ಬಾತ್ರೂಂನಲ್ಲಿ ಲಾಕ್ ಮಾಡಿ ಅಥವಾ ಏಕಾಏಕಿ ಅಲ್ಲಿಂದ ಪರಾರಿಯಾಗುತ್ತಿದ್ದಳು. ಹೋಗುವಾಗ ವ್ಯಕ್ತಿಯ ಮೊಬೈಲ್, ಹಣ ಮತ್ತು ಕಾರಿನ ಕೀಗಳನ್ನು ಹೊತ್ತು ಎಸ್ಕೇಪ್ ಆಗುತ್ತಿದ್ದಳು. ನಂತರ ಆ ವ್ಯಕ್ತಿಗೆ ಕರೆ ಮಾಡಿ, ನನ್ನ ಬಳಿ ನಿನ್ನ ಅಶ್ಲೀಲ ಚಾಟ್ ಮತ್ತು ವಿಡಿಯೋಗಳಿವೆ. ಹಣ ನೀಡದಿದ್ದರೆ ಪೊಲೀಸ್ ಕೇಸ್ ಹಾಕುತ್ತೇನೆ ಎಂದು ಲಕ್ಷಾಂತರ ರೂಪಾಯಿಗೆ ಬೇಡಿಕೆ ಇಡುತ್ತಿದ್ದಳು.
ಖಾಕಿ ಬಲೆಯ ಬಿದ್ದ ಆಂಟಿ
ದೀಪಾಳ ಈ ಬ್ಲ್ಯಾಕ್ಮೇಲ್ ತಂತ್ರಕ್ಕೆ ಹೆದರಿ ಹಲವರು ಹಣ ನೀಡಿದ್ದರು. ಆದರೆ, ಇತ್ತೀಚೆಗೆ ಈಕೆಯ ಕಾಟ ತಡೆಯಲಾರದೆ ವ್ಯಕ್ತಿಯೊಬ್ಬರು ಟಿಳಕವಾಡಿ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದರು. ಕಾರ್ಯಾಚರಣೆಗೆ ಇಳಿದ ಪೊಲೀಸರು ಹನಿ ಟ್ರ್ಯಾಪ್ ಲೇಡಿ ದೀಪಾಳನ್ನು ವಶಕ್ಕೆ ಪಡೆದಿದ್ದಾರೆ.
ಜಪ್ತಿಯಾದ ವಸ್ತುಗಳ ಮೌಲ್ಯ ಕಂಡು ಪೊಲೀಸರೇ ಶಾಕ್!
ಆರೋಪಿ ದೀಪಾಳಿಂದ ಪೊಲೀಸರು ಒಟ್ಟು 32 ಲಕ್ಷದ 86 ಸಾವಿರ ರೂಪಾಯಿ ಮೌಲ್ಯದ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ. ಅವುಗಳಲ್ಲಿ ಒಂದು ಫಾರ್ಚುನರ್ ಕಾರು ಮತ್ತು ಮಾರುತಿ ಸುಜುಕಿ ಎಸ್-ಕ್ರಾಸ್ ಕಾರು, 11 ದುಬಾರಿ ಮೊಬೈಲ್ ಫೋನ್ಗಳು ಮತ್ತು 1 ಟ್ಯಾಬ್, 3 ಕಾರ್ ಕೀಗಳು, 1 ಡೊಂಗಲ್ ಹಾಗೂ 14 ಸಾವಿರ ನಗದು ಹಣ. ಬೆಳಗಾವಿಯ ಟಿಳಕವಾಡಿ ಪೊಲೀಸರು ಈ ಕುರಿತು ಹೆಚ್ಚಿನ ತನಿಖೆ ನಡೆಸುತ್ತಿದ್ದು, ಈಕೆಯ ಬಲೆಗೆ ಬಿದ್ದಿರುವ ಇತರ ಸಂತ್ರಸ್ಥರ ಮಾಹಿತಿ ಕಲೆಹಾಕುತ್ತಿದ್ದಾರೆ.
