SWCL ಚಾಂಪಿಯನ್‌ಶಿಪ್‌ನಲ್ಲಿ ಮೋನಿಕಾ ಕಲ್ಲೂರಿ ಆರ್ಟ್ಸ್ ಒಡೆತನದ “ಟೀಮ್ ಮಂಜುಳ” ತಂಡ ಜಯಭೇರಿ!

ಬೆಂಗಳೂರು: ದುಬೈನಲ್ಲಿ ಇತ್ತೀಚೆಗೆ ನಡೆದ ಸ್ಯಾಂಡಲ್‌ವುಡ್ ವಿಮೆನ್ಸ್ ಕ್ರಿಕೆಟ್ ಲೀಗ್ (SWCL) ಮೊದಲ ಆವೃತ್ತಿಯಲ್ಲಿ ಮೋನಿಕಾ ಕಲ್ಲೂರಿ ಆರ್ಟ್ಸ್ ಒಡೆತನದ “ಟೀಮ್ ಮಂಜುಳಾ” ಚಾಂಪಿಯನ್ ಪಟ್ಟವನ್ನು ಗೆದ್ದುಕೊಂಡಿದೆ. ಈ ಗೆಲುವಿನ ಸಂಭ್ರಮವನ್ನು ಆಚರಿಸಲು ತಂಡದ ಒಡತಿ ಮೋನಿಕಾ ಕಲ್ಲೂರಿ ಅವರು ಬೆಂಗಳೂರಿನಲ್ಲಿ ಆತ್ಮೀಯ ಸಮಾರಂಭವೊಂದನ್ನು ಆಯೋಜಿಸಿ, ತಂಡದ ಸದಸ್ಯರನ್ನು ಸ್ಮರಣಿಕೆಗಳೊಂದಿಗೆ ಸನ್ಮಾನಿಸಿದರು.

ವಿಜಯೋತ್ಸವ ಸಮಾರಂಭ

ಸಮಾರಂಭದಲ್ಲಿ ತಂಡದ ರಾಯಭಾರಿ ನಟಿ ಅನು ಪ್ರಭಾಕರ್, ನಾಯಕಿ ಸಂಗೀತಾ ಭಟ್, ಉಪನಾಯಕಿ ನಿಖಿತ ಸ್ವಾಮಿ, ಹಾಗೂ ಆಟಗಾರರಾದ ಪವಿ ಪೂವಯ್ಯ, ಜಾಯ್ಸಿ ಫರ್ನಾಂಡೀಸ್, ಭಾರತಿ ಪೃಥ್ವಿರಾಜ್, ಸುಷ್ಮಾ ತೊಗರೆ, ಸೌಮ್ಯ ಮುಂತಾದವರು ಭಾಗವಹಿಸಿದ್ದರು. ಈ ಸಂದರ್ಭದಲ್ಲಿ ತಂಡದ ಸದಸ್ಯರು ತಮ್ಮ ಸಂತಸವನ್ನು ಹಂಚಿಕೊಂಡರು. ಮೋನಿಕಾ ಕಲ್ಲೂರಿ ಅವರು ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ತಂಡದ ಗೆಲುವಿನ ಹಿಂದಿನ ಕಠಿಣ ಪರಿಶ್ರಮವನ್ನು ಶ್ಲಾಘಿಸಿದರು.

“ಈಗಿನ ಹೆಣ್ಣುಮಕ್ಕಳು ಎಲ್ಲಾ ಕ್ಷೇತ್ರಗಳಲ್ಲಿ ಮುಂಚೂಣಿಯಲ್ಲಿರುವುದು ಖುಷಿಯ ವಿಷಯ. ನಾನು SWCLನಲ್ಲಿ ಟೀಮ್ ಮಂಜುಳಾದ ಒಡತಿಯಾಗಲು ನಟಿ ತಾರಾ ಅನುರಾಧ ಅವರೇ ಕಾರಣ. ಅವರ ಮೂಲಕ ಈ ತಂಡದ ಪರಿಚಯವಾಯಿತು. ಮೊದಲ ಆವೃತ್ತಿಯಲ್ಲೇ ಗೆಲುವು ಸಾಧಿಸಿದ್ದು ಅತ್ಯಂತ ಸಂತೋಷದಾಯಕ. ಕೊನೆಯ ಓವರ್‌ನಲ್ಲಿ ಜಾಯ್ಸಿ ಫರ್ನಾಂಡೀಸ್ ಅವರ ಅದ್ಭುತ ಆಟ ಇನ್ನೂ ಕಣ್ಣ ಮುಂದೆ ಇದೆ. ಇಡೀ ತಂಡಕ್ಕೆ ಮತ್ತು ರಾಯಭಾರಿ ಅನು ಪ್ರಭಾಕರ್‌ಗೆ ಅಭಿನಂದನೆಗಳು,” ಎಂದು ಮೋನಿಕಾ ಕಲ್ಲೂರಿ ಹೇಳಿದರು.

ತಂಡಕ್ಕೆ ಅಭಿನಂದಿಸಿದ ಅನು ಪ್ರಭಾಕರ್‌

ನಟಿ ಅನು ಪ್ರಭಾಕರ್ ಮಾತನಾಡಿ, “ದುಬೈನಲ್ಲಿ ಪಂದ್ಯಗಳು ಮುಗಿದು ಟೀಮ್ ಮಂಜುಳಾ ಗೆಲುವು ಸಾಧಿಸಿತು. ಆದರೆ, ಈ ಸಂಭ್ರಮವನ್ನು ಮೋನಿಕಾ ಕಲ್ಲೂರಿ ಅವರು ಬೆಂಗಳೂರಿನಲ್ಲಿ ಆಚರಿಸಿ, ಎಲ್ಲರನ್ನೂ ಗೌರವಿಸಿದ್ದು ಸಂತಸದ ವಿಷಯ. ಇಡೀ ತಂಡಕ್ಕೆ ನನ್ನ ಅಭಿನಂದನೆಗಳು,” ಎಂದರು.

ಟೀಮ್ ಮಂಜುಳಾದ ಸಾಧನೆ

ಟೀಮ್ ಮಂಜುಳಾದ ಆಟಗಾರರು ತಮ್ಮ ಅತ್ಯುತ್ತಮ ಪ್ರ   ದರ್ಶನದೊಂದಿಗೆ ಲೀಗ್‌ನ ಚಾಂಪಿಯನ್ ಪಟ್ಟವನ್ನು ಗೆದ್ದುಕೊಂಡಿದ್ದಾರೆ. ತಂಡದ ನಾಯಕಿ ಸಂಗೀತಾ ಭಟ್ ಮತ್ತು ಉಪನಾಯಕಿ ನಿಖಿತ ಸ್ವಾಮಿ ನೇತೃತ್ವದಲ್ಲಿ ತಂಡ ಉತ್ತಮ ಸಾಮರ್ಥ್ಯವನ್ನು ತೋರಿತು. ಜಾಯ್ಸಿ ಫರ್ನಾಂಡೀಸ್‌ರ ಕೊನೆಯ ಓವರ್‌ನ ಆಟ ಗೆಲುವಿನಲ್ಲಿ ನಿರ್ಣಾಯಕವಾಯಿತು.

ಚಿಕ್ಕ ವಯಸ್ಸಿನಲ್ಲೇ ಶೈಕ್ಷಣಿಕ ಸಂಸ್ಥೆಯ ಉಸ್ತುವಾರಿಯನ್ನು ವಹಿಸಿಕೊಂಡಿರುವ ಮೋನಿಕಾ ಕಲ್ಲೂರಿ, ಸಮಾಜಮುಖಿ ಕೆಲಸಗಳಿಂದಲೂ ಗುರುತಿಸಿಕೊಂಡಿದ್ದಾರೆ. SWCLನ ಈ ಯಶಸ್ಸು ಅವರ ನಾಯಕತ್ವ ಮತ್ತು ಸಮಾಜಕ್ಕೆ ಮಾಡುತ್ತಿರುವ ಕೊಡುಗೆಗೆ ಮತ್ತೊಂದು ಸಾಕ್ಷಿಯಾಗಿದೆ.