ಎಸ್‌ಎಸ್ ರಾಜಮೌಳಿ ಮತ್ತು ಮಹೇಶ್ ಬಾಬು ಕಾಂಬಿನೇಷನ್‌ನಲ್ಲಿ ಮೂಡಿಬರುತ್ತಿರುವ ಬಹುನಿರೀಕ್ಷಿತ ಭಾರಿ ಬಜೆಟ್‌ ಸಿನಿಮಾ ‘ವಾರಣಾಸಿ’ ಇದೀಗ ಬಿಡುಗಡೆಯ ಮೊದಲೇ ದೊಡ್ಡ ಸುದ್ದಿಯಲ್ಲಿದೆ. ಸಿನಿಮಾದ ಬಗ್ಗೆ ಈಗಾಗಲೇ ಅಭಿಮಾನಿಗಳಲ್ಲಿ ಅತಿದೊಡ್ಡ ಕುತೂಹಲ ಮೂಡಿಸಿದ್ದರು, ಈಗ ಚಿತ್ರ ಟೈಟಲ್‌ಗೆ ಸಂಬಂಧಿಸಿದ ಹೊಸ ತಿರುವು ಹೊರಬಿದ್ದಿದೆ. ತೆಲುಗು ಭಾಷೆಯಲ್ಲಿ ‘ವಾರಣಾಸಿ’ ಎಂಬ ಹೆಸರನ್ನು ಎರಡು ವರ್ಷಗಳ ಹಿಂದೆಯೇ ಮತ್ತೊಬ್ಬ ನಿರ್ಮಾಪಕರು ನೋಂದಾಯಿಸಿರುವುದು ಬೆಳಕಿಗೆ ಬಂದಿದ್ದು, ಈ ಕಾರಣ ರಾಜಮೌಳಿ ತಂಡ ಟೈಟಲ್‌ನಲ್ಲಿ ಬದಲಾವಣೆ ಮಾಡಲು ಮುಂದಾಗಿದೆ.
ಟೈಟಲ್ ಗೊಂದಲಕ್ಕೆ ಕಾರಣವೇನು?
ಪ್ರಾರಂಭದಲ್ಲಿ ಈ ಚಿತ್ರವನ್ನು ‘SSMB29’ ಎಂಬ ಕೆಲಸದ ಹೆಸರಿನಿಂದ ಕರೆಯಲಾಗುತ್ತಿತ್ತು. ನಂತರ ಅದಕ್ಕೆ ‘ವಾರಣಾಸಿ’ ಎಂಬ ಶೀರ್ಷಿಕೆ ಘೋಷಿಸಲಾಯಿತು. ಇದನ್ನು ಎಲ್ಲಾ ಭಾರತೀಯ ಭಾಷೆಗಳಲ್ಲಿ ಒಂದೇ ಶೀರ್ಷಿಕೆಯಲ್ಲಿ ಬಿಡುಗಡೆ ಮಾಡುವ ಯೋಜನೆಗೂ ತಂಡ ಮಾಡಿತ್ತು. ಆದರೆ, ತೆಲುಗು ಫಿಲ್ಮ್ ಚೇಂಬರ್‌ನಲ್ಲಿ ‘ವಾರಣಾಸಿ’ ಟೈಟಲ್ ಈಗಾಗಲೇ ನೋಂದಾಯಿತವಾಗಿರುವುದು ರಾಜಮೌಳಿ ತಂಡಕ್ಕೆ ಅಡ್ಡಿಯಾಯಿತು. ಹೇಳಿಕೆಗಳ ಪ್ರಕಾರ, ರಾಮಭಕ್ತ ಹನುಮ ಕ್ರಿಯೇಷನ್ಸ್ ಸಂಸ್ಥೆಯ ಸಿ.ಎಚ್. ಸುಬ್ಬಾ ರೆಡ್ಡಿ ಈ ಟೈಟಲ್ ಅನ್ನು ಎರಡು ವರ್ಷಗಳ ಹಿಂದೆಯೇ ತಮ್ಮ ಯೋಜನೆಗಾಗಿ ಕಾಯ್ದಿರಿಸಿದ್ದರು. ಇದೇ ಕಾರಣದಿಂದ, ರಾಜಮೌಳಿ ತಂಡವು ಟೈಟಲ್ ಬದಲಾಯಿಸುವ ನಿರ್ಧಾರಕ್ಕೆ ಬಂದಿದೆ.
ಹೊಸ ಟೈಟಲ್ ಏನು?
ಮಾಹಿತಿಯ ಪ್ರಕಾರ, ಮಹೇಶ್ ಬಾಬು ಅಭಿನಯದ ಈ ಚಿತ್ರವನ್ನು ತೆಲುಗಿನಲ್ಲಿ ‘ರಾಜಮೌಳಿ ವಾರಣಾಸಿ’ ಎಂಬ ಹೆಸರಿನಲ್ಲಿ ಬಿಡುಗಡೆ ಮಾಡಲು ನಿರ್ಧರಿಸಲಾಗಿದೆ. ಉಳಿದ ಎಲ್ಲಾ ಭಾಷೆಗಳಲ್ಲಿ ಚಿತ್ರವು ಮೂಲ ಹೆಸರಿನಾದ ‘ವಾರಣಾಸಿ’ಯಲ್ಲೇ ಬಿಡುಗಡೆಯಾಗಲಿದೆ. ಇದರಿಂದ, ತೆಲುಗಿನಲ್ಲಿ ಮಾತ್ರ ವಿಶೇಷ ಶೀರ್ಷಿಕೆಯೊಂದಿಗೆ ಸಿನಿಮಾ ನಡೆಯಲಿದೆ.
ಇದು ರಾಜಮೌಳಿ, ಮಹೇಶ್ ಬಾಬು ಜೋಡಿಗೆ ಮೊದಲ ಬಾರಿಗೆ ಎದುರಾಗುತ್ತಿರುವ ಸಮಸ್ಯೆಯಲ್ಲ. ಮಹೇಶ್ ಬಾಬು ಅಭಿನಯಿಸಿದ್ದ ‘ಖಲೇಜಾ’ ಚಿತ್ರಕ್ಕೂ ಇದೇ ರೀತಿಯ ಟೈಟಲ್ ವಿವಾದ ಎದುರಾಗಿತ್ತು. ಅಂತಿಮವಾಗಿ ಆ ಚಿತ್ರವನ್ನು ‘ಮಹೇಶ್ ಖಲೇಜಾ’ ಎಂದು ಬಿಡುಗಡೆ ಮಾಡಬೇಕಾಯಿತು. ಈ ಹಿನ್ನೆಲೆ ‘ವಾರಣಾಸಿ’ಗೂ ಇದೇ ರೀತಿಯ ಮಾರ್ಗ ಅನುಸರಿಸಲಾಗುತ್ತಿದೆ.
ಚಿತ್ರದ ತಂಡದಿಂದ ಅಧಿಕೃತ ಘೋಷಣೆ ಬಾಕಿ
ಈ ಟೈಟಲ್ ಬದಲಾವಣೆ ಕುರಿತಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಹೇಳಿಕೆಗಳು ಹರಿದಾಡುತ್ತಿದ್ದರೂ, ಚಿತ್ರತಂಡ ಇನ್ನೂ ಅಧಿಕೃತ ಪ್ರಕಟಣೆ ನೀಡಿಲ್ಲ. ನಿರ್ದೇಶಕ ರಾಜಮೌಳಿ ತೆಗೆದುಕೊಂಡಿರುವ ಈ ತೀರ್ಮಾನ ಅಭಿಮಾನಿಗಳಲ್ಲಿ ಹೊಸ ಚರ್ಚೆಗೆ ಕಾರಣವಾಗಿದೆ. ಅವರು ಯಾವಾಗ ಅಧಿಕೃತ ಸ್ಪಷ್ಟನೆ ನೀಡುತ್ತಾರೆ ಎಂಬುದು ಕಾದುನೋಡಬೇಕಾಗಿದೆ.
ಚಿತ್ರದಲ್ಲಿ ಮಹೇಶ್ ಬಾಬು ರುದ್ರ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಪ್ರಿಯಾಂಕಾ ಚೋಪ್ರಾ ನಾಯಕಿಯಾಗಿ, ಪೃಥ್ವಿರಾಜ್ ಸುಕುಮಾರನ್ ವಿಲನ್ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.
