ಮುಂಬೈ, ಫೆ. 27: ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿ ಅವರು ಮುಂಬೈನ ಬಾಂದ್ರಾದಲ್ಲಿ ಆರಂಭಿಸಿರುವ ‘ಅಮ್ಮಾ ಕೈ’ ರೆಸ್ಟೋರೆಂಟ್ ಇದೀಗ ಮುಂಬೈನಲ್ಲಿ ಭಾರೀ ಜನಪ್ರಿಯತೆ ಗಳಿಸಿದೆ. ಫಿಟ್ನೆಸ್, ವೆಲ್ನೆಸ್ ಹಾಗೂ ಹೋಟೆಲ್ ಉದ್ಯಮಗಳಲ್ಲಿ ತೊಡಗಿಸಿಕೊಂಡಿರುವ ಶಿಲ್ಪಾ ಶೆಟ್ಟಿ, ಮುಂಬೈನ ಬಾಂದ್ರಾದಲ್ಲಿ “ಅಮ್ಮಾ ಕೈ” ಎಂಬ ವಿಶೇಷ ರೆಸ್ಟೋರೆಂಟ್ ಆರಂಭಿಸಿ ಸುದ್ದಿಯಲ್ಲಿದ್ದಾರೆ.
ಬಾಂದ್ರಾದಲ್ಲಿ ‘ಅಮ್ಮಾ ಕೈ’ ಹೆಸರಿನ ಹೊಸ ರೆಸ್ಟೋರೆಂಟ್ ಆರಂಭಿಸಿದ್ದು, ಇದು ಈಗಾಗಲೇ ಭಾರಿ ಜನಪ್ರಿಯತೆ ಗಳಿಸಿದೆ. ವಿಶೇಷವಾಗಿ ಕರ್ನಾಟಕದ ಖಾದ್ಯಗಳನ್ನು ಅಚ್ಚುಮೆಚ್ಚಿನ ರುಚಿಯಲ್ಲಿ ಪರಿಚಯಿಸುತ್ತಿರುವ ಈ ರೆಸ್ಟೋರೆಂಟ್, ಮುಂಬೈನ ಆಹಾರ ಪ್ರಿಯರಿಗೆ ಹೊಸ ಅನುಭವ ನೀಡುತ್ತಿದೆ.
ಕರ್ನಾಟಕದ ರುಚಿ, ಕನ್ನಡದ ಸೊಗಡು
‘ಅಮ್ಮಾ ಕೈ’ ರೆಸ್ಟೋರೆಂಟ್ನ ವಿಶೇಷತೆ ಎಂದರೆ ಇದು ಕೇವಲ ಸೌತ್ ಇಂಡಿಯನ್ ಆಹಾರ ಕೇಂದ್ರವಲ್ಲ; ಕರ್ನಾಟಕದ ಪ್ರತಿ ಭಾಗದ ಖಾದ್ಯಗಳನ್ನು ಒಂದೇ ಸ್ಥಳದಲ್ಲಿ ಸವಿಯುವ ಅವಕಾಶ ಒದಗಿಸುತ್ತದೆ. ಮಸಾಲ ದೋಸೆ, ಬೆಣ್ಣೆ ದೋಸೆ, ಕೊಟ್ಟೆ ಕಡಬು, ಕೋರಿ ರೊಟ್ಟಿ ಸೇರಿದಂತೆ ಅನೇಕ ಪ್ರಸಿದ್ಧ ಖಾದ್ಯಗಳು ಇಲ್ಲಿ ಸಿಗುತ್ತವೆ.
ಮೆನುವಿನಲ್ಲಿ ಕರ್ನಾಟಕದ ಭೂಪಟವನ್ನು ಅಚ್ಚಳಿಸಿ, ಪ್ರತಿ ಜಿಲ್ಲೆಯ ವಿಶೇಷ ಆಹಾರವನ್ನು ಅದೇ ಹೆಸರಿನಲ್ಲಿ ನೀಡಲಾಗಿದೆ. ಇದು ಕನ್ನಡಿಗರಿಗೆ ಭಾವನಾತ್ಮಕ ಸ್ಪರ್ಶ ನೀಡುವುದರ ಜೊತೆಗೆ, ಬೇರೆ ರಾಜ್ಯದ ಜನರಿಗೆ ಕರ್ನಾಟಕದ ವೈವಿಧ್ಯಮಯ ಅಡುಗೆ ಪರಂಪರೆಯನ್ನು ಪರಿಚಯಿಸುತ್ತಿದೆ.
ಕರಾವಳಿಯಿಂದ ಮಲೆನಾಡಿನವರೆಗೆ ಸವಿರುಚಿ
ಈ ರೆಸ್ಟೋರೆಂಟ್ನಲ್ಲಿ ಕರಾವಳಿಯ ಅಂಜಲ್ ಫ್ರೈ, ಮಂಗಳೂರು ಫಿಶ್ ಕರಿ, ಕೋರಿ ಗಸಿ, ಕೋರಿ ಪುಳಿಮುಂಚಿ ಸೇರಿದಂತೆ ಸಮುದ್ರ ತೀರದ ಖಾದ್ಯಗಳು ಲಭ್ಯವಿವೆ. ಮಲೆನಾಡಿನ ಕೂರ್ಗ್ ಪಂದಿ ಕರಿ, ಕೂರ್ಗ್ ಚಿಕನ್ ಸಾಸೆಜ್ ನಾನ್ ರೋಲ್ ಕೂಡ ಜನರ ಗಮನ ಸೆಳೆಯುತ್ತಿದೆ.
ಇದರ ಜೊತೆಗೆ ಬೆಳಗಾವಿ ಚಿಕನ್ ಕರಿ, ಮೆಣಸಿನಕಾಯಿ ಬಜ್ಜಿ, ಪುಳಿಯೋಗರೆ, ಪನ್ನೀರ್ ಟೊಮೋಟೋ ಗೊಜ್ಜು, ಮೈಸೂರು ಮಸಾಲಾ ಬೇಬಿ ಪೋಟೇಟೋ, ಮೈಸೂರು ಮಸಾಲಾ ಎಗ್ ಬುರ್ಜಿ ಮುಂತಾದ ವಿವಿಧ ಭಾಗಗಳ ವಿಶೇಷ ರುಚಿಗಳು ಆಹಾರ ಪ್ರಿಯರನ್ನು ಆಕರ್ಷಿಸುತ್ತಿವೆ.
ಫ್ರೀ ಬ್ರೇಕ್ಫಾಸ್ಟ್ ವಿವಾದ
ರೆಸ್ಟೋರೆಂಟ್ ಆರಂಭದ ಸಂದರ್ಭದಲ್ಲಿ ಉಚಿತ ಬ್ರೇಕ್ಫಾಸ್ಟ್ ಘೋಷಣೆ ಮಾಡಲಾಗಿತ್ತು. ಇದರಿಂದ ಭಾರಿ ಜನಸ್ತೋಮ ಉಂಟಾಗಿ ಕೆಲವೊಂದು ಗೊಂದಲಗಳು ಎದುರಾದವು. ಫ್ರೀ ಬ್ರೇಕ್ಫಾಸ್ಟ್ ಪಡೆಯಲು ನೂರಾರು ಮಂದಿ ಸಾಲಿನಲ್ಲಿ ನಿಂತ ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿತ್ತು.
ಆದರೆ ಈ ವಿವಾದದ ನಡುವೆಯೂ ‘ಅಮ್ಮಾ ಕೈ’ ರೆಸ್ಟೋರೆಂಟ್ ಜನಪ್ರಿಯತೆ ಕಡಿಮೆಯಾಗದೆ, ದಿನದಿಂದ ದಿನಕ್ಕೆ ಹೆಚ್ಚು ಜನರನ್ನು ಆಕರ್ಷಿಸುತ್ತಿದೆ.