ನಟಿ ರಶ್ಮಿಕಾ ಮಂದಣ್ಣ ಸದ್ಯ ಸಾಲು ಸಾಲು ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದು, ಭಾರತೀಯ ಚಿತ್ರರಂಗದ ಬಹುಬೇಡಿಕೆಯ ನಟಿಯರ ಸಾಲಿನಲ್ಲಿ ಗುರುತಿಸಿಕೊಂಡಿದ್ದಾರೆ. ವಿಭಿನ್ನ ಪಾತ್ರಗಳ ಮೂಲಕ ಪ್ರೇಕ್ಷಕರ ಗಮನ ಸೆಳೆಯುತ್ತಿರುವ ರಶ್ಮಿಕಾ ಇದೀಗ ಮತ್ತೊಂದು ಸಾಹಸಮಯ ಹಾಗೂ ಸವಾಲಿನ ಪಾತ್ರದೊಂದಿಗೆ ಪ್ರೇಕ್ಷಕರ ಮುಂದೆ ಬರಲು ಸಜ್ಜಾಗಿದ್ದಾರೆ. ಅವರ ಬಹುನಿರೀಕ್ಷಿತ ಮಹಿಳಾ ಪ್ರಧಾನ ಸಿನಿಮಾ ‘ಮೈಸಾ’ ಚಿತ್ರದ ಟೀಸರ್ ಬಿಡುಗಡೆಯಾಗಿದ್ದು, ರಶ್ಮಿಕಾ ಅವರ ಹೊಸ ಅವತಾರಕ್ಕೆ ಭರ್ಜರಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
‘ಮೈಸಾ’ ಚಿತ್ರದಲ್ಲಿ ರಶ್ಮಿಕಾ, ‘ಮೈಸಾ’ ಎಂಬ ಗೋಂಡ್ ಬುಡಕಟ್ಟು ಮಹಿಳೆಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಸಮಾಜದ ಕಷ್ಟಗಳು, ಅಡೆತಡೆಗಳು ಹಾಗೂ ಅನ್ಯಾಯಗಳನ್ನು ಎದುರಿಸುವ ನಾಯಕಿ ಯಾವುದಕ್ಕೂ ತಲೆಬಾಗದೆ ತನ್ನ ಹಕ್ಕಿಗಾಗಿ ಹೋರಾಟ ನಡೆಸುತ್ತಾಳೆ. ತನ್ನ ಅಸ್ತಿತ್ವ ಹಾಗೂ ಹಕ್ಕುಗಳಿಗಾಗಿ ರಣಕಹಳೆ ಮೊಳಗಿಸುವ ಆಕೆ, ಎದುರಾಗುವ ಶತ್ರುಗಳ ವಿರುದ್ಧ ಸಮರ ಸಾರುತ್ತಾಳೆ. ಈ ಹೋರಾಟ, ಸಂಘರ್ಷ ಮತ್ತು ಪ್ರತಿರೋಧದ ಪಯಣವೇ ಚಿತ್ರದ ಪ್ರಮುಖ ಕಥಾವಸ್ತುವಾಗಿದೆ.
ವಿಭಿನ್ನ ಹಿನ್ನೆಲೆಯ ಈ ಪಾತ್ರಕ್ಕೆ ಜೀವ ತುಂಬಲು ರಶ್ಮಿಕಾ ಸಾಕಷ್ಟು ಕಠಿಣ ಸಿದ್ಧತೆ ಮಾಡಿಕೊಂಡಿರುವುದು ಟೀಸರ್ನಲ್ಲಿ ಸ್ಪಷ್ಟವಾಗಿ ಗೋಚರಿಸುತ್ತದೆ. ಈವರೆಗೆ ಕಾಣಿಸಿಕೊಂಡಿರದಷ್ಟು ರಗಡ್ ಲುಕ್ನಲ್ಲಿ ಅವರು ಮಿಂಚಿದ್ದು, ಆ್ಯಕ್ಷನ್ ದೃಶ್ಯಗಳಲ್ಲಿ ಅವರ ಕಟ್ಟುಮಸ್ತಾದ ದೇಹದಂಡನೆ ಗಮನ ಸೆಳೆಯುತ್ತದೆ. ವಿಶೇಷವಾಗಿ ಬೈಕ್ ರೈಡಿಂಗ್ ಹಾಗೂ ನೀರೊಳಗಿನ ಸಾಹಸ ದೃಶ್ಯಗಳು ಟೀಸರ್ನ ಪ್ರಮುಖ ಆಕರ್ಷಣೆಯಾಗಿವೆ. ರಶ್ಮಿಕಾ ಅವರ ಸಾಹಸಮಯ ಅಭಿನಯ ಹಾಗೂ ಆ್ಯಕ್ಷನ್ ಅವತಾರ ಅಭಿಮಾನಿಗಳಲ್ಲಿ ಕುತೂಹಲ ಹೆಚ್ಚಿಸಿದೆ.
ತಾಂತ್ರಿಕವಾಗಿಯೂ ‘ಮೈಸಾ’ ಸಿನಿಮಾ ಅದ್ದೂರಿಯಾಗಿ ಮೂಡಿಬಂದಿರುವ ಸೂಚನೆ ಟೀಸರ್ನಲ್ಲಿ ಸಿಕ್ಕಿದೆ. ನಿರ್ದೇಶಕ ರವೀಂದ್ರ ಪುಲ್ಲೆ ಅವರ ವಿಭಿನ್ನ ಕಲ್ಪನೆಗೆ ಛಾಯಾಗ್ರಾಹಕ ಶ್ರೇಯಾಸ್ ಪಿ. ಕೃಷ್ಣ ಅವರ ಕ್ಯಾಮೆರಾ ಕೆಲಸ ಮತ್ತಷ್ಟು ಮೆರುಗು ನೀಡಿದೆ. ಚಿತ್ರದ ದೃಶ್ಯಗಳು ಕಥೆಯ ಗಂಭೀರತೆ ಮತ್ತು ಸಾಹಸಮಯ ವಾತಾವರಣವನ್ನು ಪರಿಣಾಮಕಾರಿಯಾಗಿ ಕಟ್ಟಿಕೊಡುವಂತಿವೆ. ಜೇಕ್ಸ್ ಬಿಜಾಯ್ ಅವರ ಹಿನ್ನೆಲೆ ಸಂಗೀತ ಟೀಸರ್ನ ಸಸ್ಪೆನ್ಸ್ ಹಾಗೂ ಥ್ರಿಲ್ ಅಂಶವನ್ನು ಮತ್ತಷ್ಟು ಹೆಚ್ಚಿಸಿದೆ. ‘ಅನ್ಫಾರ್ಮುಲಾ ಫಿಲ್ಮ್ಸ್’ ಸಂಸ್ಥೆಯ ನಿರ್ಮಾಣ ಮೌಲ್ಯವೂ ಗಮನ ಸೆಳೆಯುತ್ತಿದೆ.
ಈ ಬಹುನಿರೀಕ್ಷಿತ ‘ಮೈಸಾ’ ಸಿನಿಮಾ ನವೆಂಬರ್ 27ರಂದು ಚಿತ್ರಮಂದಿರಗಳಲ್ಲಿ ಅದ್ದೂರಿಯಾಗಿ ಬಿಡುಗಡೆಯಾಗಲಿದೆ. ಟೀಸರ್ನಲ್ಲಿರುವ ಮಾಸ್, ಆ್ಯಕ್ಷನ್ ಹಾಗೂ ರಶ್ಮಿಕಾ ಅವರ ಹೊಸ ಲುಕ್ ಸಿನಿಮಾದ ಮೇಲಿನ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದೆ. ರಶ್ಮಿಕಾ ಮಂದಣ್ಣ ಅವರ ವೃತ್ತಿಜೀವನದಲ್ಲಿ ‘ಮೈಸಾ’ ವಿಭಿನ್ನ ಮೈಲಿಗಲ್ಲಾಗುವ ಸಾಧ್ಯತೆಯನ್ನು ಟೀಸರ್ ಸೂಚಿಸಿದ್ದು, ಸಿನಿಮಾ ಬಿಡುಗಡೆಯತ್ತ ಅಭಿಮಾನಿಗಳ ಕುತೂಹಲ ಹೆಚ್ಚಾಗಿದೆ.
