ಕುಬೇರ.. ತೆರೆಕಂಡ ಐದೇ ದಿನದಲ್ಲಿ ನೂರು ಕೋಟಿ ಕ್ಲಬ್ ಸೇರಿದೆ. ಈ ಮೂಲಕ ಭಿಕ್ಷುಕರ ಪಾತ್ರ ಮಾಡಿದ್ರೆ ಆ ಸಿನಿಮಾ ಬ್ಲಾಕ್ ಬಸ್ಟರ್ ಹಿಟ್ ಆಗೋ ಪರಂಪರೆಗೆ ಇದು ಕೂಡ ಸೇರ್ಪಡೆ ಆಗಿದೆ. ಹಾಗಾದ್ರೆ ಇಲ್ಲಿಯವರೆಗೂ ಭಿಕ್ಷುಕರ ಪಾತ್ರ ಮಾಡಿರೋ ಬೆಸ್ಟ್ ಪರ್ಫಾಮರ್ ಕಲಾವಿದರು ಯಾರು..? ಯಾವ್ಯಾವ ಸಿನಿಮಾಗಳು ಅನ್ನೋದಕ್ಕೆ ಈ ಸ್ಪೆಷಲ್ ಸ್ಟೋರಿನ ನೀವೊಮ್ಮೆ ಓದಲೇ ಬೇಕು.
- 100 ಕೋಟಿ ಕ್ಲಬ್ಗೆ ಕುಬೇರ.. ಭಿಕ್ಷುಕನಾದ್ರೆ ಸಿನಿಮಾ ಹಿಟ್
- ಬೆಗ್ಗರ್ ರೋಲ್ ಮಾಡಿ ಸಕ್ಸಸ್ ಕಂಡವರು ಯಾರು ಗೊತ್ತಾ?
- ಇವು ಸೌತ್ ದುನಿಯಾದ ದಿ ಬೆಸ್ಟ್ ಬೆಗ್ಗರ್ ರೋಲ್ಸ್ ಗುರು
- ಭಿಕ್ಷುಕನ ಪಾತ್ರ ಮಾಡೋಕೆ ಡಬಲ್ ಗುಂಡಿಗೆ & ಎಫರ್ಟ್
ಕುಬೇರ.. ಕಳೆದ ವಾರ ತೆರೆಕಂಡ ಶೇಖರ್ ಕಮ್ಮುಲ ನಿರ್ದೇಶನದ ಸೋಶಿಯಲ್ ಡ್ರಾಮಾ. ಇದೊಂದು ಮಲ್ಟಿಸ್ಟಾರ್ ಮೂವಿ ಆಗಿದ್ದು, ಧನುಷ್, ನಾಗಾರ್ಜುನ್ ಹಾಗೂ ರಶ್ಮಿಕಾ ಮಂದಣ್ಣ ಮುಖ್ಯಭೂಮಿಕೆಯಲ್ಲಿ ಮಿಂಚುತ್ತಿದ್ದಾರೆ. ಸಿನಿಮಾ ತೆರೆಕಂಡ ಐದೇ ದಿನದಲ್ಲಿ ಬರೋಬ್ಬರಿ 100 ಕೋಟಿಗೂ ಅಧಿಕ ಮೊತ್ತ ಕಲೆಕ್ಷನ್ ಮಾಡೋ ಮೂಲಕ ಬ್ಲಾಕ್ ಬಸ್ಟರ್ ಹಿಟ್ ಆಗಿದೆ ಸಿನಿಮಾ.
ಈ ಚಿತ್ರದ ಜೀವಾಳ ನಟ ಧನುಷ್. ಹೌದು.. ದೇವ ಅನ್ನೋ ಭಿಕ್ಷುಕನ ಪಾತ್ರ ಮಾಡಿರೋ ಧನುಷ್, ಅದಕ್ಕಾಗಿ ಪರಕಾಯ ಪ್ರವೇಶವೇ ಮಾಡಿದ್ದಾರೆ. ಒಬ್ಬ ದೊಡ್ಡ ಸ್ಟಾರ್ ಆದವರು ಇಂತಹ ಪಾತ್ರ ಮಾಡಿರೋದೇ ಹೆಚ್ಚು. ಅದರಲ್ಲೂ ಡಂಪಿಂಗ್ ಯಾರ್ಡ್ನಲ್ಲಿ ಕಸದ ಜೊತೆ ದುರ್ವಾಸನೆಯಲ್ಲಿ ಕೊಳಕು ಕೊಳಕಾಗಿ ಗಂಟೆ ಗಟ್ಟಲೆ ಶೂಟಿಂಗ್ ಮಾಡೋದು ಸುಲಭದ ಮಾತಲ್ಲ. ಚಿತ್ರಕ್ಕಾಗಿ ಹಾಗೂ ಪಾತ್ರಕ್ಕಾಗಿ ಧನುಷ್ ಜೀವಿಸಿದ್ದಾರೆ. ಇಂತಹ ಪಾತ್ರಗಳನ್ನ ಮಾಡೋಕೆ ಡಬಲ್ ಗುಂಡಿಗೆ ಬೇಕು ಜೊತೆಗೆ ಏಫರ್ಟ್ ಕೂಡ ಡಬಲ್ ಹಾಕಬೇಕು. ಆಗಲೇ ಸಿನಿಮಾಗಳು ಹೀಗೆ ಬಿಗ್ ಸಕ್ಸಸ್ ಕಾಣುತ್ತವೆ.
ಅಂದಹಾಗೆ ನಮ್ಮ ಸೌತ್ ಸಿನಿದುನಿಯಾದಲ್ಲಿ ಸಾಕಷ್ಟು ಮಂದಿ ಸ್ಟಾರ್ಗಳು ಹಾಗೂ ಕಲಾವಿದರು ಬೆಗ್ಗರ್ ರೋಲ್ಸ್ ಮಾಡಿದ್ದಾರೆ. ಆ ಸಿನಿಮಾಗಳೆಲ್ಲಾ ಬಹುತೇಕ ಬ್ಲಾಕ್ ಬಸ್ಟರ್ ಹಿಟ್ ಆಗಿವೆ. ಅವುಗಳನ್ನ ಒಮ್ಮೆ ಮೆಲುಕು ಹಾಕುವುದಾದ್ರೆ ಮೊದಲ ಸಾಲಿನಲ್ಲಿ ನಿಲ್ಲೋದೇ ತಲೈವಾ ರಜನೀಕಾಂತ್. ಹೌದು, ಮುತ್ತು ಸಿನಿಮಾಗಾಗಿ ಜಮೀನ್ದಾರನಾಗಿದ್ದ ರಜನೀಕಾಂತ್ ಸರ್ವವನ್ನೂ ತ್ಯಜಿಸಿ, ಭಿಕ್ಷುಕನಂತೆ ದೇಶಾಂತರ ಹೊರಡ್ತಾರೆ. ನಂತ್ರ ಕ್ಲೈಮ್ಯಾಕ್ಸ್ನಲ್ಲಿ ಆತ ತನ್ನ ಕೋಟೆ ಹೇಗಿದೆ ಅಂತ ನೋಡೋಕೆ ಬರ್ತಾರೆ. ಆಗಲೂ ಜನ ಬದಲಾಗಿರಲ್ಲ. ಆ ದೃಶ್ಯಕ್ಕಾಗಿ ರಜನಿ ಸಾಕಷ್ಟು ಶ್ರಮ ಹಾಕಿದ್ದರು. ಅದೇ ಸಿನಿಮಾ ಕನ್ನಡದಲ್ಲಿ ವಿಷ್ಣುವರ್ಧನ್ ಮೂಲಕ ಸಾಹುಕಾರ ಆಯ್ತು.
ಇನ್ನು ವಿಜಯ್ ಆಂಟನಿ ನಟನೆಯ ಪಿಚ್ಚೈಕಾರನ್, ಬಿಚ್ಚಗಾಡು ಸಿನಿಮಾ ಕೂಡ ಆಲ್ ಟೈಂ ಹಿಟ್. ಅದನ್ನ ಕನ್ನಡದಲ್ಲಿ ಚಿರಂಜೀವಿ ಸರ್ಜಾ ಅಮ್ಮ ಐ ಲವ್ ಯೂ ಟೈಟಲ್ನಲ್ಲಿ ನಟಿಸಿದ್ರು. ಸ್ಟಾರ್ ಅನ್ನೋದನ್ನ ಮರೆತು ಬೆಗ್ಗರ್ ರೋಲ್ಸ್ ಮಾಡಿದ ಅವರುಗಳಿಗೆ ಪ್ರೇಕ್ಷಕರು ಜೈಕಾರ ಹಾಕಿದ್ರು.
ಉಪೇಂದ್ರ ರಕ್ತ ಕಣ್ಣೀರು ಸಿನಿಮಾದಲ್ಲಿ ಮಾಡಿದ ಆ ಕುಷ್ಠರೋಗಿಯ ಪಾತ್ರ ನಿಜಕ್ಕೂ ಕರುಳು ಕಿವುಚಿ ಬರುವಂತಿದೆ. ಅಷ್ಟು ಅದ್ಭುತವಾಗಿ ಸಾಧು ಕೋಕಿಲ ಆ ಚಿತ್ರವನ್ನು ನಿರ್ದೇಶಿಸಿದ್ರು. ಉಪ್ಪಿ ಅದಕ್ಕೆ ಜೀವ ಕೂಡ ತುಂಬಿದ್ದರು.
ಆಸ್ಕರ್ ಪ್ರಶಸ್ತಿ ವಿಜೇತ ಸಿನಿಮಾ ಸ್ಲಂ ಡಾಗ್ ಮಿಲಿಯನೇರ್, ಬ್ಲಡಿ ಬೆಗ್ಗರ್, ಸಾಧು ಕೋಕಿಲಾ ಬೆಗ್ಗರ್ ಆಗಿ ಮಾಡಿದ ಕಾಮಿಡಿ ಪಾತ್ರ, ಪೋಕಿರಿ ಸಿನಿಮಾದಲ್ಲಿ ಆಲಿ ಮಾಡಿದ ಭಿಕ್ಷುಕನ ಪಾತ್ರ, ಮಿಲನ ಸಿನಿಮಾದಲ್ಲಿ ರಂಗಾಯಣ ರಘು ಪಾತ್ರಗಳು ಸದಾ ಜೀವಂತ.
ಅಲ್ಲದೆ ಪೆಳ್ಳಿ ಅಯಿಂದಿ ಕಾನಿ ಸಿನಿಮಾದಲ್ಲಿ ಅಲ್ಲರಿ ನರೇಶ್ ಮಾಡಿದ್ದ ಭಿಕ್ಷುಕನ ರೋಲ್ ನಿಜಕ್ಕೂ ತುಂಬಾ ಸ್ವಾಭಾವಿಕ ಅನಿಸುತ್ತೆ. ನಟ ಶರಣ್ ಕೂಡ ಸಿನಿಮಾದ ಪ್ರಮೋಷನ್ಗಾಗಿ ಹಾಡೊಂದರಲ್ಲಿ ಭಿಕ್ಷಕುನ ಗೆಟಪ್ ಹಾಕಿದ್ರು. ಇವರೆಲ್ಲಾ ಈ ರೀತಿಯ ಬೆಗ್ಗರ್ ರೋಲ್ಗಳನ್ನ ಮಾಡಿರೋದು ನಿಜಕ್ಕೂ ಗ್ರೇಟ್. ಕಲಾವಿದ ಎಂಥದ್ದೇ ಪಾತ್ರ ಕೊಟ್ರೂ ಅಷ್ಟೇ ನಿಷ್ಠೆಯಿಂದ ಮಾಡ್ತಾನೆ ಅನ್ನೋದಕ್ಕೆ ಇವೆಲ್ಲಾ ಜ್ವಲಂತ ಸಾಕ್ಷಿಗಳು. ಇನ್ನು ಬೆಗ್ಗರ್ ರೋಲ್ಗಳನ್ನ ಮಾಡೋರು ಇಷ್ಟು ಮಂದಿ ಕಲಾವಿದರ ಪಾತ್ರಗಳನ್ನ ಸೂಕ್ಷ್ಮವಾಗಿ ಅವಲೋಕಿಸಿದ್ರೆ ಸಾಕು. ನಟನೆ ಮತ್ತಷ್ಟು ಸರಾಗವಾಗಲಿದೆ.
