ಈ ವಾರ ಬೆಳ್ಳಿತೆರೆಗೆ ಸುನಾಮಿ ಅಪ್ಪಳಿಸೋದು ಗ್ಯಾರಂಟಿ. ಅರ್ಥಾತ್ ಸುನಾಮಿ ಕಿಟ್ಟಿ ನಟನೆಯ ಕೋರ ತೆರೆಗೆ ಬರ್ತಿದೆ. ಮೇಕಿಂಗ್‌ನಿಂದಲೇ ಎಲ್ಲರ ಹುಬ್ಬೇರಿಸಿರೋ ಈ ಸಿನಿಮಾ, ಸ್ಯಾಂಪಲ್ಸ್‌‌ನಿಂದ ಗೆಲ್ಲೋ ಮುನ್ಸೂಚನೆ ನೀಡಿದೆ. ಇಷ್ಟಕ್ಕೂ ಸಿನಿಮಾದ ಹೈಲೈಟ್ಸ್ ಏನು ಅಂತೀರಾ..? ಈ ಮಾಸ್ ಮ್ಯಾಟರ್ ಇರೋ ಸ್ಟೋರಿಯನ್ನ ಒಮ್ಮೆ ಕಣ್ತುಂಬಿಕೊಳ್ಳಿ.
ಕೋರ.. ಟೈಟಲ್‌ ಅನೌನ್ಸ್ ಆದ ದಿನದಿಂದ ಸಿಕ್ಕಾಪಟ್ಟೆ ಕ್ಯೂರಿಯಾಸಿಟಿ ಹುಟ್ಟಿಸಿರೋ ಸಿನಿಮಾ. ಒರಟ ಸಿನಿಮಾ ಖ್ಯಾತಿಯ ಡೈರೆಕ್ಟರ್ ಒರಟಶ್ರೀ ಆ್ಯಕ್ಷನ್ ಕಟ್ ಹೇಳಿರೋ ಈ ಸಿನಿಮಾದಲ್ಲಿ ಸುನಾಮಿ ಕಿಟ್ಟಿ ಹೀರೋ ಆಗಿ ಲೀಡ್‌ ರೋಲ್‌‌‌ನಲ್ಲಿ ಮಿಂಚುತ್ತಿದ್ದಾರೆ. ಇನ್ನು ಚಿತ್ರದ ನಿರ್ಮಾಪಕ ಪಿ ಮೂರ್ತಿ ಅವರು ಸಿನಿಮಾಗೆ ಹಣ ಹೂಡಿಕೆ ಮಾಡೋದ್ರ ಜೊತೆಗೆ ಖಡಕ್ ಖಳನಾಯಕನಾಗಿ ಅಬ್ಬರಿಸಿದ್ದಾರೆ.
ಟೀಸರ್, ಟ್ರೈಲರ್ ಹಾಗೂ ಸಾಂಗ್ಸ್ ನೋಡುಗರ ನಾಡಿಮಿಡಿತ ಹೆಚ್ಚಿಸಿದ್ದು, ಇದೇ ಏಪ್ರಿಲ್ 18ರಂದು ಪ್ರೇಕ್ಷಕರಿಗೆ ಒಂದೊಳ್ಳೆ ಮನರಂಜನೆ ನೀಡುವುದಕ್ಕೆ ಥಿಯೇಟರ್‌ಗೆ ಬರ್ತಿದೆ ಕೋರ. ಅಂದಹಾಗೆ ಕೋರ ಕೊರಗಜ್ಜನ ಕುರಿತ ಕಥೆ ಎನ್ನಲಾಗ್ತಿದೆ. ಆದ್ರೆ ಇಲ್ಲಿ ಕೋರ ಅಂದ್ರೆ ಒಂದು ಬುಡಕಟ್ಟು ಜನಾಂಗದ ಹೆಸರು. ಅಲ್ಲಿ ಅವರ ಏಳು ಬೀಳಿನ ಜೀವನ ಹೇಗಿರಲಿದೆ ಅನ್ನೋದನ್ನ ಕಾಲ್ಪನಿಕವಾಗಿ ಕಟ್ಟಿಕೊಡೋ ಪ್ರಯತ್ನ ಮಾಡಲಾಗಿದೆ.
ಬಹಳ ವರ್ಷಗಳ ಹಿಂದೆಯೇ ಚಿತ್ರರಂಗದಲ್ಲಿ ಸೆಟಲ್ ಆಗಬೇಕಿದ್ದ ಸುನಾಮಿ ಕಿಟ್ಟಿ, ಇಂದಿಗೂ ನೆಲೆಯೂರೋಕ್ಕೆ ಒದ್ದಾಡ್ತಿದ್ದಾರೆ. ಹೌದು.. ಒಳ್ಳೆಯ ಪರ್ಫಾರ್ಮರ್ ಕಿಟ್ಟಿಯಲ್ಲಿದ್ದು, ಅದೃಷ್ಠ ಕೈಗೂಡಬೇಕಿದೆ. ಈ ಚಿತ್ರದಲ್ಲಿ ಗುಳಿಗ ದೈವ ಸೇರಿದಂತೆ ಒಂದಷ್ಟು ಕರಾವಳಿ ಆಚಾರಗಳು ಇರಲಿದ್ದು, ಆ ದೈವ ಕೃಪೆಗೆ ಪಾತ್ರರಾಗ್ತಾರಾ ಸುನಾಮಿ ಕಿಟ್ಟಿ ಅನ್ನೋದನ್ನ ಕಾದು ನೋಡಬೇಕಿದೆ.
ಮ್ಯೂಸಿಕ್, ಬ್ಯಾಗ್ರೌಂಡ್ ಮ್ಯೂಸಿಕ್, ಲೊಕೇಷನ್ಸ್, ಚಿತ್ರದಲ್ಲಿ ಬಳಸಿರೋ ಕಾಸ್ಟ್ಯೂಮ್ಸ್, ಪಾತ್ರಗಳು ಯಾವುದರಲ್ಲೂ ರಾಜಿಯಿಲ್ಲ. ಮಾಸ್ ಕಮರ್ಷಿಯಲ್ ಚಿತ್ರಗಳ ರೀತಿ ಸಿನಿಮಾನ ಅದ್ಭುತವಾಗಿ ಕಟ್ಟಿಕೊಡಲಾಗಿದ್ದು, ಎಷ್ಟರ ಮಟ್ಟಿಗೆ ಜನಕ್ಕೆ ರುಚಿಸುತ್ತೆ ಅನ್ನೋದನ್ನ ನಿರೀಕ್ಷಿಸಬೇಕಿದೆ. ಹಣ ಹೂಡಿ, ಅನ್ನದಾತನಾಗಿರೋ ಪಿ ಮೂರ್ತಿ ಹಾಗೂ ಬಹಳ ದಿನಗಳ ನಂತ್ರ ನಿರ್ದೇಶನಕ್ಕೆ ಕೈ ಹಾಕಿರೋ ಒರಟಶ್ರೀ, ನಟ ಸುನಾಮಿ ಕಿಟ್ಟಿ ಎಲ್ಲರಿಗೂ ಇದು ಕೈ ಹಿಡಿಯಬೇಕಿದೆ. ಕನ್ನಡಿಗರು ಒಳ್ಳೆಯ ಪ್ರಯತ್ನಗಳನ್ನ ಎಂದೂ ಕೈ ಬಿಟ್ಟಿಲ್ಲ. ಹಾಗಾಗಿ ಈ ಬಾರಿಯೂ ಕೈಬಿಡಲ್ಲ ಅನ್ನೋ ಭರವಸೆಯಿದೆ.
