ಕೀರ್ತಿ ಪಾಟೀಲ್, ಫಿಲಂ ಬ್ಯೂರೋ, ಗ್ಯಾರಂಟಿ ನ್ಯೂಸ್.
ಸುಮಾರು ಮೂರು ದಶಕಗಳ ಹಿಂದೆ ಬಾಲಿವುಡ್ ಬಾಕ್ಸ್ ಆಫೀಸ್ನಲ್ಲಿ ಸುನಾಮಿ ಎಬ್ಬಿಸಿದ್ದ ಸಿನಿಮಾ ‘ಖಳನಾಯಕ್’. ಸಂಜಯ್ ದತ್ ಅವರ ರಗಡ್ ಲುಕ್, ಆ ಕಿಲ್ಲರ್ ಆಟಿಟ್ಯೂಡ್ ಅಕ್ಷರಶಃ ಭಾರತೀಯ ಸಿನಿರಂಗವನ್ನೇ ಬೆಚ್ಚಿಬೀಳಿಸಿತ್ತು. ಈಗ ಅದೇ ಕ್ರೇಜ್ಅನ್ನು ಡಬಲ್ ಮಾಡಲು ಸಂಜು ಬಾಬಾ ಮತ್ತೆ ಬರ್ತಿದ್ದಾರೆ. ಹೌದು, ‘ಖಳನಾಯಕ್ ರಿಟರ್ನ್ಸ್’ ಚಿತ್ರದ ಪವರ್ಫುಲ್ ಟೀಸರ್ ಈಗ ಕಿಚ್ಚು ಹಚ್ಚಿದೆ. ಹಾಗಾದ್ರೆ ಮೂರು ದಶಕಗಳ ಬಳಿಕ ಸಂಜು ಬಾಬಾ ಇಟ್ಟಿರೋ ಆ ಖತರ್ನಾಕ್ ಹೆಜ್ಜೆ ಹೇಗಿದೆ? ಅದ್ರ ಫುಲ್ ಡಿಟೇಲ್ಸ್ ಇಲ್ಲಿದೆ ನೋಡಿ.
- 33 ವರ್ಷದ ನಂತ್ರ ಖಳ್ನಾಯಕ್ ರಿಟರ್ನ್ಸ್..ಸಂಜು ಸೆನ್ಸೇಷನ್
- ಸೀಕ್ವೆಲ್ ಧಮಾಕಾ…ಪವರ್ಫುಲ್ ಟೀಸರ್ ಔಟ್..!
- ರಗಡ್ ಅವತಾರದಲ್ಲಿ ಸಂಜು ಬಾಬಾ.. ಕಿಲ್ಲರ್ ಲುಕ್ಗೆ ಫ್ಯಾನ್ಸ್ ಫಿದಾ
- 30 ವರ್ಷದ ಕ್ರೇಜ್ ರೀ-ಕ್ರಿಯೇಟ್ ಮಾಡ್ತಾರಾ ಸುಭಾಷ್ ಘೈ..?
ಬಾಲಿವುಡ್ನ ಕಲ್ಟ್ ಕ್ಲಾಸಿಕ್ ಸಿನಿಮಾ ಅಂದ ತಕ್ಷಣ ಕಣ್ಣ ಮುಂದೆ ಬರೋದು ಅದೇ ಬಲ್ಲು ಕ್ರೇಜ್. ಸುಮಾರು 30 ವರ್ಷಗಳ ಹಿಂದೆ ತೆರೆಕಂಡು ಇತಿಹಾಸ ಸೃಷ್ಟಿಸಿದ್ದ ‘ಖಳನಾಯಕ್’ ಚಿತ್ರದ ಸೀಕ್ವೆಲ್ ಈಗ ಅಧಿಕೃತವಾಗಿ ಅನೌನ್ಸ್ ಆಗಿದೆ. ಸಂಜಯ್ ದತ್ಗೆ ಸ್ಟಾರ್ಗಿರಿ ತಂದುಕೊಟ್ಟ ಈ ಸಿನಿಮಾ ಈಗ ‘ಖಳನಾಯಕ್ ರಿಟರ್ನ್ಸ್’ ಎಂಬ ಟೈಟಲ್ನೊಂದಿಗೆ ಮರುಜನ್ಮ ಪಡೆಯುತ್ತಿದೆ. ಈ ಹಿಂದೆ ‘ಧುರಂಧರ್ 2’ ಗೆಲ್ಲುತ್ತಿದ್ದಂತೆಯೇ ಸಂಜು ಬಾಬಾ ಕ್ರೇಜ್ ಮತ್ತಷ್ಟು ಹೆಚ್ಚಾಗಿದ್ದು, ಅದಕ್ಕೆ ಸಾಕ್ಷಿ ಎಂಬಂತೆ ಈ ಮೆಗಾ ಅಪ್ಡೇಟ್ ಹೊರಬಿದ್ದಿದೆ.
ಇನ್ನು ಮುಂಬೈನಲ್ಲಿ ನಡೆದ ಅದ್ಧೂರಿ ಖಳನಾಯಕ್ ರಿಟರ್ನ್ ಇವೆಂಟ್ ನಲ್ಲಿ ರಿಲೀಸ್ ಆಗಿರೋ ಈ ಟೀಸರ್ ಮತ್ತು ಫಸ್ಟ್ ಲುಕ್ ಪೋಸ್ಟರ್ ಸಿನಿರಸಿಕರಲ್ಲಿ ನಡುಕ ಹುಟ್ಟಿಸುತ್ತಿದೆ. ಬಿಡುಗಡೆಯಾಗಿರುವ ಟೀಸರ್ನಲ್ಲಿ ಸಂಜು ಬಾಬಾ ಅಕ್ಷರಶಃ ಬೆಂಕಿಯಂತೆ ಕಾಣಿಸಿಕೊಂಡಿದ್ದಾರೆ. ಅವರ ಆ ತೀಕ್ಷ್ಣವಾದ ಕಣ್ಣುಗಳು, ಕಿವಿಯಲ್ಲಿ ಹಾಕಿಕೊಂಡಿರುವ ಆ ಕಡಕು ಮತ್ತು ಹಳೆಯ ‘ಬಲ್ಲು’ ಪಾತ್ರದ ಗತ್ತು ಎಳ್ಳಷ್ಟೂ ಕಡಿಮೆಯಾಗಿಲ್ಲ. ಈ ರಗಡ್ ಅವತಾರ ಕಂಡ ಅಭಿಮಾನಿಗಳು “ಕಿಂಗ್ ಈಸ್ ಬ್ಯಾಕ್” ಅಂತಾ ಸೋಶಿಯಲ್ ಮೀಡಿಯಾದಲ್ಲಿ ಜೈಕಾರ ಹಾಕ್ತಿದ್ದಾರೆ.
ಬರಿ ಟೀಸರ್ ಮಾತ್ರವಲ್ಲ, ಸಂಜು ಬಾಬಾ ನೀಡಿದ ಕ್ಯಾಪ್ಷನ್ ಕೂಡ ಸಖತ್ ಸ್ಪೈಸಿ ಆಗಿದೆ. “ಯಾವುದೇ ಕಥೆ ಮುಗಿಯುವುದಿಲ್ಲ, ಅದು ಮತ್ತೆ ಆರಂಭವಾಗುತ್ತದೆ” ಎಂದು ಬರೆದುಕೊಳ್ಳುವ ಮೂಲಕ ವಿಲನ್ನ ಎರಡನೇ ಆಟ ಶುರುವಾಗಿದೆ ಅನ್ನೋ ಮುನ್ಸೂಚನೆ ಕೊಟ್ಟಿದ್ದಾರೆ. ಬ್ಯಾಕ್ಗ್ರೌಂಡ್ನಲ್ಲಿ ಕೇಳಿಬರೋ ಆ ಕ್ಲಾಸಿಕ್ ಮ್ಯೂಸಿಕ್ ಮತ್ತು ಆಧುನಿಕ ಸ್ಪರ್ಶದ ದೃಶ್ಯಗಳು ಹಳೆಯ ನೆನಪುಗಳನ್ನು ಕೆದಕುತ್ತಲೇ ಹೊಸ ಕುತೂಹಲಕ್ಕೆ ನಾಂದಿ ಹಾಡಿವೆ.
1993ರಲ್ಲಿ ಸುಭಾಷ್ ಘೈ ನಿರ್ದೇಶನದಲ್ಲಿ ಬಂದಿದ್ದ ಈ ಚಿತ್ರದಲ್ಲಿ ಜಾಕಿ ಶ್ರಾಫ್ ಮತ್ತು ಮಾಧುರಿ ದೀಕ್ಷಿತ್ ಜೋಡಿ ಕೂಡ ಇತ್ತು. ‘ಚೋಲಿ ಕೆ ಪೀಚೆ’ ಹಾಡಂತೂ ಈಗಲೂ ಇಡೀ ಭಾರತವನ್ನ ಕುಣಿಸುತ್ತಿದೆ. ಆದರೆ ಈಗಿನ ಪಾರ್ಟ್ 2ನಲ್ಲಿ ಆ ಹಳೆಯ ತಾರಾಗಣ ಇರುತ್ತಾ ಅಥವಾ ಹೊಸ ಮುಖಗಳು ಎಂಟ್ರಿ ಕೊಡಲಿವೆಯೇ ಎಂಬುದು ಸದ್ಯದ ಬಿಲಿಯನ್ ಡಾಲರ್ ಪ್ರಶ್ನೆ. ಇನ್ನು ಇದು ಸೀಕ್ವೆಲ್ಲಾ..? ಬೇರೆಯದ್ದೇ ಕಥೆ ಹೊಂದಿರುವ ಸಿನಿಮಾನಾ..? ಫ್ರಾಂಚೈಸಿನಾ..? ಅಥವಾ 93ರ ಕಥೆಯನ್ನೇ ಮತ್ತೆ ರಿಮೇಕ್ ಮಾಡುವ ಪ್ರಯತ್ನನಾ..? ಎಂಬ ಇತ್ಯಾದಿ ಹಲವು ಪ್ರಶ್ನೆಗಳು ಹಲವರಲ್ಲಿವೆ. ಆದ್ರೆ ಈ ಬಗ್ಗೆ ಚಿತ್ರತಂಡ ಇನ್ನೂ ಗುಟ್ಟು ಬಿಟ್ಟುಕೊಟ್ಟಿಲ್ಲವಾದರೂ, ಗಲ್ಲಾಪೆಟ್ಟಿಗೆಯಲ್ಲಿ ಮಾತ್ರ ಹಣಾಹಣಿ ಫಿಕ್ಸ್ ಎನ್ನಲಾಗುತ್ತಿದೆ.
ಒಟ್ಟಿನಲ್ಲಿ ಬಿಟೌನ್ನಲ್ಲಿ ಈಗ ‘ಖಳನಾಯಕ್’ ಜಪ ಶುರುವಾಗಿದೆ. ಮೂರು ದಶಕಗಳ ಬಳಿಕ ಮತ್ತೆ ಆ ಹಳೆಯ ಕ್ರೇಜ್ ರೀ-ಕ್ರಿಯೇಟ್ ಆಗುತ್ತಾ? ಸಂಜು ಬಾಬಾ ಮತ್ತೆ ಬಾಕ್ಸ್ ಆಫೀಸ್ ಸುಲ್ತಾನನಾಗ್ತಾರಾ? ಟೀಸರ್ ನೋಡಿ ಥ್ರಿಲ್ ಆಗಿರೋ ಫ್ಯಾನ್ಸ್ ಮಾತ್ರ ಫುಲ್ ಮೂವಿಗೆ ಈಗಲೇ ಕಾಯ್ತಿದ್ದಾರೆ. ಚಿತ್ರದ ಮುಂದಿನ ಅಪ್ಡೇಟ್ಗಾಗಿ ಈಗ ಇಡೀ ಸಿನಿವೈಭವವೇ ಕಾತರದಿಂದ ಕಾಯುವಂತಾಗಿದೆ.
| Reported by: ಕೀರ್ತಿ ಪಾಟೀಲ್, ಫಿಲ್ಮ್ ಬ್ಯೂರೋ, ಗ್ಯಾರಂಟಿ ನ್ಯೂಸ್