ಆಗಸ್ಟ್ 1, 2025 ರಿಂದ ಯೂನಿಫೈಡ್ ಪೇಮೆಂಟ್ ಇಂಟರ್ಫೇಸ್ (ಯುಪಿಐ) ವ್ಯವಸ್ಥೆಯಲ್ಲಿ ಹಲವು ಪ್ರಮುಖ ಬದಲಾವಣೆಗಳು ಜಾರಿಗೆ ಬರಲಿವೆ. ಫೋನ್‌ಪೇ, ಗೂಗಲ್‌ಪೇ, ಪೇಟಿಎಂನಂತಹ ಯುಪಿಐ ಆಧಾರಿತ ಆಪ್‌ಗಳನ್ನು ಬಳಸುವ ಕೋಟ್ಯಂತರ ಬಳಕೆದಾರರಿಗೆ ಈ ಬದಲಾವಣೆಗಳು ಅನ್ವಯವಾಗಲಿವೆ. ಈ ಹೊಸ ನಿಯಮಗಳು ಆಟೋ ಪೇ ವ್ಯವಸ್ಥೆ, ಬ್ಯಾಲೆನ್ಸ್ ಚೆಕಿಂಗ್, ವಹಿವಾಟು ಸ್ಟೇಟಸ್ ತಪಾಸಣೆ, ಮತ್ತು ಪೇಮೆಂಟ್ ರಿಹರ್ಸಲ್‌ಗೆ ಸಂಬಂಧಿಸಿದಂತೆ ಕಟ್ಟುನಿಟ್ಟಾದ ಮಿತಿಗಳನ್ನು ವಿಧಿಸಲಿವೆ.
ಬ್ಯಾಲೆನ್ಸ್ ಚೆಕಿಂಗ್‌ಗೆ ಹೊಸ ಮಿತಿ
ಹೊಸ ನಿಯಮದ ಪ್ರಕಾರ, ಯುಪಿಐ ಬಳಕೆದಾರರು ತಮ್ಮ ಬ್ಯಾಂಕ್ ಖಾತೆಯ ಬ್ಯಾಲೆನ್ಸ್ ತಿಳಿಯಲು ಇನ್ನು ಮುಂದೆ ಮಿತಿಯನ್ನು ಎದುರಿಸಬೇಕಾಗುತ್ತದೆ. ಒಬ್ಬ ಬಳಕೆದಾರ ಒಂದು ಆಪ್‌ನಲ್ಲಿ ದಿನಕ್ಕೆ ಗರಿಷ್ಠ 50 ಬಾರಿ ಬ್ಯಾಲೆನ್ಸ್ ಚೆಕ್ ಮಾಡಬಹುದು. ಒಂದು ವೇಳೆ ಎರಡು ಆಪ್‌ಗಳನ್ನು ಬಳಸುತ್ತಿದ್ದರೆ, ಪ್ರತಿ ಆಪ್‌ಗೆ 50 ಬಾರಿ, ಒಟ್ಟಾರೆ 100 ಬಾರಿ ಬ್ಯಾಲೆನ್ಸ್ ಚೆಕ್ ಮಾಡಬಹುದು. ಅದೇ ರೀತಿ, ಮೊಬೈಲ್ ಸಂಖ್ಯೆಗೆ ಲಿಂಕ್ ಆಗಿರುವ ಬ್ಯಾಂಕ್ ಖಾತೆಗಳನ್ನು ದಿನಕ್ಕೆ ಗರಿಷ್ಠ 25 ಬಾರಿ ತಪಾಸಣೆ ಮಾಡಬಹುದು. ಈ ನಿಯಮವು ಸರ್ವರ್‌ಗಳ ಮೇಲಿನ ಒತ್ತಡವನ್ನು ಕಡಿಮೆ ಮಾಡಲು ಉದ್ದೇಶಿಸಿದೆ.
ನೆಟ್‌ಫ್ಲಿಕ್ಸ್, ಯೂಟ್ಯೂಬ್ ಸಬ್‌ಸ್ಕ್ರಿಪ್ಶನ್, ಮ್ಯೂಚುವಲ್ ಫಂಡ್, ಎಸ್‌ಐಪಿ, ಇಎಂಐ, ಮತ್ತು ಯುಟಿಲಿಟಿ ಬಿಲ್‌ಗಳಿಗೆ ಸಂಬಂಧಿಸಿದ ಆಟೋ ಪೇ ವಹಿವಾಟುಗಳಿಗೆ ಇನ್ನು ಮುಂದೆ ನಿಗದಿತ ಸಮಯದ ಸ್ಲಾಟ್‌ಗಳು ಜಾರಿಯಾಗಲಿವೆ. ಈ ವಹಿವಾಟುಗಳು ಬೆಳಗ್ಗೆ 10 ಗಂಟೆಗಿಂತ ಮೊದಲು, ಮಧ್ಯಾಹ್ನ 1 ರಿಂದ ಸಂಜೆ 5 ಗಂಟೆಯವರೆಗೆ, ಮತ್ತು ರಾತ್ರಿ 9:30 ರ ನಂತರ ಮಾತ್ರ ನಡೆಯಲಿವೆ. ಈ ಕ್ರಮವು ಪೀಕ್ ಅವರ್‌ಗಳಲ್ಲಿ ಸರ್ವರ್‌ಗಳ ಮೇಲಿನ ಒತ್ತಡವನ್ನು ಕಡಿಮೆ ಮಾಡಲು ಸಹಾಯ ಮಾಡಲಿದೆ.
ವಹಿವಾಟು ಸ್ಟೇಟಸ್ ಚೆಕಿಂಗ್‌ಗೆ ನಿರ್ಬಂಧ
ಯುಪಿಐ ವಹಿವಾಟು ವಿಫಲವಾದ ಸಂದರ್ಭದಲ್ಲಿ, ಬಳಕೆದಾರರು ದಿನಕ್ಕೆ ಗರಿಷ್ಠ ಮೂರು ಬಾರಿ ಸ್ಟೇಟಸ್ ಚೆಕ್ ಮಾಡಬಹುದು. ಪ್ರತಿ ಚೆಕಿಂಗ್‌ನ ನಡುವೆ ಕನಿಷ್ಠ 90 ಸೆಕೆಂಡ್‌ಗಳ ಅಂತರವಿರಬೇಕು. ಈ ನಿಯಮವು ಅತಿಯಾದ ತಪಾಸಣೆಯಿಂದ ಸರ್ವರ್‌ಗಳ ಮೇಲಿನ ಒತ್ತಡವನ್ನು ತಡೆಯಲು ಜಾರಿಗೊಳಿಸಲಾಗಿದೆ.
ಒಬ್ಬ ಬಳಕೆದಾರ 30 ದಿನಗಳಲ್ಲಿ ಗರಿಷ್ಠ 10 ಬಾರಿ ಪೇಮೆಂಟ್ ರಿಹರ್ಸಲ್ ವಿನಂತಿಯನ್ನು ಸಲ್ಲಿಸಬಹುದು. ಒಂದೇ ವ್ಯಕ್ತಿ ಅಥವಾ ಸಂಸ್ಥೆಗೆ ಐದು ಬಾರಿ ಮಾತ್ರ ರಿಹರ್ಸಲ್ ವಿನಂತಿ ಸಲ್ಲಿಸಲು ಅವಕಾಶವಿರುತ್ತದೆ. ಈ ನಿಯಮವು ತಪ್ಪು ವಹಿವಾಟುಗಳಿಂದ ಉಂಟಾಗುವ ಗೊಂದಲವನ್ನು ಕಡಿಮೆ ಮಾಡಲು ಸಹಾಯಕವಾಗಲಿದೆ.
ಈ ತಿಂಗಳ ಆರಂಭದಿಂದ ಜಾರಿಯಲ್ಲಿರುವ ಒಂದು ನಿಯಮದ ಪ್ರಕಾರ, ಹಣ ಕಳುಹಿಸುವ ಮೊದಲು ರಿಸೀವರ್‌ನ ಬ್ಯಾಂಕ್ ಹೆಸರು ಡಿಸ್‌ಪ್ಲೇ ಆಗುತ್ತದೆ. ಇದು ತಪ್ಪು ಖಾತೆಗೆ ಹಣ ಕಳುಹಿಸುವ ಸಾಧ್ಯತೆಯನ್ನು ಗಣನೀಯವಾಗಿ ಕಡಿಮೆ ಮಾಡಲಿದೆ.
