ಬೆಂಗಳೂರು, ಆ.16: ಇಂಧನ ದರ ಮತ್ತು ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದ ಸಂಕಷ್ಟದಲ್ಲಿರುವ ವಾಹನ ಸವಾರರಿಗೆ ರಾಜ್ಯ ಸರ್ಕಾರ ಮತ್ತೊಂದು ಆರ್ಥಿಕ ಹೊರೆ ವಿಧಿಸಿ ಬಿಗ್ ಶಾಕ್ ನೀಡಿದೆ. ಕರ್ನಾಟಕದಲ್ಲಿ ಮಾಲಿನ್ಯ ನಿಯಂತ್ರಣ ಪ್ರಮಾಣಪತ್ರ (PUCC) ಪಡೆಯುವ ಶುಲ್ಕವನ್ನು ಸಾರಿಗೆ ಇಲಾಖೆ ಪರಿಷ್ಕರಿಸಿದ್ದು, ಆಗಸ್ಟ್ 13, 2026ರಿಂದ ಹೊಸ ದರಗಳು ಜಾರಿಗೆ ಬಂದಿವೆ.
ಮಾಲಿನ್ಯ ಪರೀಕ್ಷಾ ಕೇಂದ್ರಗಳ ನಿರ್ವಾಹಕರ ಸಂಘದ ಮನವಿಯನ್ನು ಪರಿಗಣಿಸಿ, ಕಾರ್ಯಾಚರಣೆಯ ವೆಚ್ಚ ಹೆಚ್ಚಳದ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ.
ಮಾಲಿನ್ಯ ನಿಯಂತ್ರಣ ಪ್ರಮಾಣಪತ್ರ ಶುಲ್ಕ ಏಕೆ ಹೆಚ್ಚಳ?
ಸಾರಿಗೆ ಇಲಾಖೆಯ ಪ್ರಕಾರ, 2022ರ ಏಪ್ರಿಲ್ ಬಳಿಕ ಮೊದಲ ಬಾರಿಗೆ ಶುಲ್ಕ ಪರಿಷ್ಕರಣೆ ಮಾಡಲಾಗಿದೆ. ಕಳೆದ ನಾಲ್ಕು ವರ್ಷಗಳಲ್ಲಿ:
-
ಬಾಡಿಗೆ ಹಾಗೂ ವಿದ್ಯುತ್ ವೆಚ್ಚ ಏರಿಕೆ
-
ಇಂಟರ್ನೆಟ್ ಮತ್ತು ನಿರ್ವಹಣಾ ವೆಚ್ಚ ಹೆಚ್ಚಳ
-
ಪರೀಕ್ಷಾ ಉಪಕರಣಗಳ ಕ್ಯಾಲಿಬ್ರೇಷನ್ ವೆಚ್ಚ ದುಬಾರಿ
-
ಸಿಬ್ಬಂದಿ ವೇತನ ಮತ್ತು ಪ್ರಿಂಟರ್ ಕಾರ್ಟ್ರಿಡ್ಜ್ ಸೇರಿದಂತೆ ಕಚ್ಚಾ ವಸ್ತುಗಳ ಬೆಲೆ ಏರಿಕೆ
ಈ ಕಾರಣಗಳಿಂದ ಶುಲ್ಕ ಹೆಚ್ಚಳ ಅನಿವಾರ್ಯವಾಗಿದೆ ಎಂದು ಇಲಾಖೆ ತಿಳಿಸಿದೆ.
ಹಳೆಯ ದರ vs ಹೊಸ ದರ
|
ವಾಹನದ ಪ್ರಕಾರ |
ಹಳೆಯ ಶುಲ್ಕ |
ಹೊಸ ಶುಲ್ಕ |
|---|---|---|
|
ದ್ವಿಚಕ್ರ ವಾಹನ |
65 ರೂ. |
80 ರೂ. |
|
ತ್ರಿಚಕ್ರ ವಾಹನ |
75 ರೂ. |
80 ರೂ. |
|
ಪೆಟ್ರೋಲ್ / LPG / CNG ಕಾರು |
115 ರೂ. |
150 ರೂ. |
|
ಎಲ್ಲಾ ಡೀಸೆಲ್ ವಾಹನ |
160 ರೂ. |
200 ರೂ. |
ಪರೀಕ್ಷಾ ಕೇಂದ್ರಗಳಿಗೆ ಹೊಸ ನಿಯಮಗಳು
ಶುಲ್ಕ ಹೆಚ್ಚಳದ ಜೊತೆಗೆ ಸಾರ್ವಜನಿಕರಿಗೆ ಪಾರದರ್ಶಕ ಸೇವೆ ನೀಡಲು ಸಾರಿಗೆ ಇಲಾಖೆ ಕಟ್ಟುನಿಟ್ಟಿನ ಮಾರ್ಗಸೂಚಿಗಳನ್ನು ಜಾರಿಗೆ ತಂದಿದೆ.
-
ಪರೀಕ್ಷಾ ಉಪಕರಣಗಳ ಕಡ್ಡಾಯ ಕ್ಯಾಲಿಬ್ರೇಷನ್
-
ಕ್ಯಾಲಿಬ್ರೇಷನ್ ದಿನಾಂಕವನ್ನು ಗ್ರಾಹಕರಿಗೆ ಕಾಣುವಂತೆ ಪ್ರದರ್ಶನ
-
ಕೈಬರಹದ ಪ್ರಮಾಣಪತ್ರ ನಿಷೇಧ, ಗಣಕೀಕೃತ ಮಾಲಿನ್ಯ ನಿಯಂತ್ರಣ ಪ್ರಮಾಣಪತ್ರ ಮಾತ್ರ ಮಾನ್ಯ
-
ಕೇಂದ್ರ ಮೋಟಾರು ವಾಹನ ನಿಯಮ 1989ರ ರೂಲ್ 115 ಅನುಸಾರ ಹೊರಸೂಸುವಿಕೆ ಮಿತಿ ಪಾಲನೆ
-
BS-IV ಮತ್ತು BS-VI ವಾಹನಗಳಿಗೆ 12 ತಿಂಗಳ ಮಾನ್ಯತೆ
-
ಪರವಾನಗಿ ಪತ್ರವನ್ನು ಸಾರ್ವಜನಿಕರಿಗೆ ಕಾಣುವ ಸ್ಥಳದಲ್ಲಿ ಪ್ರದರ್ಶಿಸುವುದು ಕಡ್ಡಾಯ
ಸಾರಿಗೆ ಇಲಾಖೆಯ ಈ ಕ್ರಮದಿಂದ ಸೇವೆಯ ಗುಣಮಟ್ಟ ಸುಧಾರಿಸುವ ಉದ್ದೇಶವಿದ್ದರೂ, ವಾಹನ ಸವಾರರಿಗೆ ಇದು ಹೆಚ್ಚುವರಿ ಆರ್ಥಿಕ ಹೊರೆಯಾಗಿ ಪರಿಣಮಿಸಿದೆ.
