ಬಿಗ್ ಬಾಸ್ ಕನ್ನಡ ಸೀಸನ್‌ 12 ಈಗ ತೀವ್ರ ತಿರುವು ಪಡೆದುಕೊಂಡಿದೆ. ರಜತ್‌ ಮತ್ತು ಚೈತ್ರಾ ಕುಂದಾಪುರ ಅವರು ಮನೆಗೆ ವೈಲ್ಡ್‌ ಕಾರ್ಡ್‌ ಎಂಟ್ರಿಯಾಗಿದ್ದಾರೆ. ಆದರೆ ಇವರಿಬ್ಬರನ್ನೂ ಒಂದೇ ವಾರದಲ್ಲಿ ತನ್ನ ಮಾತಿನಿಂದ ತಳ್ಳಿ ನಿಲ್ಲಿಸಿದ್ದಾರೆ ಮಾತಿನ ಮಲ್ಲ ಎಂದೇ ಕರೆಸಿಕೊಳ್ಳುವ ಗಿಲ್ಲಿ ನಟ!..
ಭಾನುವಾರದ ಎಪಿಸೋಡ್‌ ಪ್ರೋಮೋ ಈಗಾಗಲೇ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ. ಕಿಚ್ಚ ಸುದೀಪ್ ಅವರು ಕೊಟ್ಟ ಟಾಸ್ಕ್‌ನಲ್ಲಿ ರಜತ್‌ ಅವರನ್ನು ಬಿಗ್ ಬಾಸ್ ಮನೆಗೆ ಕಾಲ್‌ ಮಾಡಿ, ಗಿಲ್ಲಿ ಬಗ್ಗೆ ಮಾತನಾಡಿ ಎಂದು ಹೇಳಿದರು. “ಯಾವಾಗ ನೋಡಿದ್ರೂ ಮಾತಾಡ್ತಾನೇ ಇದ್ದಾನೆ. ಯಾವಾಗ ಆಟ ಆಡ್ತೀಯಾ? ಮೊದಲು ಆಟ ಆಡು, ನಂತರ ಮಾತಾಡು!” ರಜತ್‌ ತಪ್ಪಿಸಿಕೊಳ್ಳದೇ ನೇರವಾಗಿ ಗಿಲ್ಲಿಗೆ ಟಾಂಗ್‌ ಕೊಟ್ಟರು.
ಇದಕ್ಕೆ ಗಿಲ್ಲಿ ತಕ್ಷಣ ತಿರುಗೇಟು ಕೊಟ್ಟರು. “ಬರಬೇಕಾದರೆ ಸ್ವಲ್ಪ ಮಾಸ್‌ ಆಗಿ ಬಂದಿದ್ದರು ಸಾರ್‌… ಆದ್ರೆ ಈಗ ಠುಸ್‌ ಆಗಿ ಬಿಟ್ಟಿದ್ದಾರೆ!” ಅಂತ ಒಂದೇ ಸಾಲಿನಲ್ಲಿ ರಜತ್‌ ಅವರ ಎಂಟ್ರಿ ಇಮೇಜ್‌ನ್ನೇ ಒಡದು ಹಾಕಿದರು.
ಗಿಲ್ಲಿ ಇನ್ನಷ್ಟು ಮುಂದೆ ಹೋಗಿ, “ಗೇಮ್‌ ಅಲ್ಲಿ ತೋರಿಸಿ ಅಂತಾರಲ್ಲ… ನಾನು ಗೇಮ್‌ನಲ್ಲೇ ತೋರಿಸ್ತೀನಿ!” ಅಂತ ನೇರ ಚಾಲೆಂಜ್ ಎಸೆದರು. ಇದು ರಜತ್‌ಗೆ ಮಾತ್ರವಲ್ಲ, ಇಡೀ ಮನೆಗೇ ಎಚ್ಚರಿಕೆಯ ಸಂದೇಶವಾಗಿತ್ತು.
ಚೈತ್ರಾ ಕುಂದಾಪುರ ಕೂಡ ಗಿಲ್ಲಿಯನ್ನು ಟೀಕೆ ಮಾಡುವ ಪ್ರಯತ್ನ ಮಾಡಿದರು. “ಗಿಲ್ಲಿ ಮಾತನಾಡಲೇ ಬೇಡವಾ ಅಂತ ಸೈಲೆಂಟ್‌ ಆಗಿ ಕೂತಿದ್ದಾನಲ್ಲ” ಅಂತ ಟಾಂಗ್‌ ಕೊಟ್ಟರು. ಆದ್ರೆ ಗಿಲ್ಲಿ ಇದನ್ನೂ ಬಿಟ್ಟಿಲ್ಲ. “ಮಾತಾಡಬೇಕೋ ಬೇಡವೋ ಅನ್ನೋ ಭಯಕ್ಕೆ ಕೂತಿಲ್ಲ ಸಾರ್‌. ಮಾತಾಡಿದ್ರೆ ಇವರೇ ಮನೆಯಿಂದ ಹೊರಗೆ ಹೋಗಿ ಬಿಡ್ತಾರೆ. ಅದಕ್ಕೆ ಮಾತಾಡ್ತಾ ಇಲ್ಲ ಅಷ್ಟೇ!” ಅಂತ ಚೈತ್ರಾ ಅವರನ್ನೂ ತರಾಟೆಗೆ ತೆಗೆದುಕೊಂಡರು.
ವೈಲ್ಡ್‌ ಕಾರ್ಡ್‌ ಟ್ವಿಸ್ಟ್ ಇನ್ನೂ ಮುಗಿದಿಲ್ಲ. ಒಟ್ಟು ಐವರು ವೈಲ್ಡ್‌ ಕಾರ್ಡ್‌ ಸ್ಪರ್ಧಿಗಳು ಬಂದಿದ್ದು, ಇಬ್ಬರನ್ನು ಮಾತ್ರ ಮನೆಯಲ್ಲಿ ಉಳಿಸಿಕೊಳ್ಳಲಾಗುತ್ತದೆ. ಮೂವರು ಅತಿಥಿಗಳಾಗಿ ಮರಳಿ ಹೋಗಬೇಕು. ಸುದೀಪ್ ಅವರು ಈ ಟ್ವಿಸ್ಟ್ ಬಗ್ಗೆ ಇನ್ನೂ ಪೂರ್ತಿ ಬಾಯ್ಬಿಟ್ಟಿಲ್ಲ, ಆದರೆ ಮನೆಯ ಸ್ಪರ್ಧಿಗಳನ್ನು “ನಿಮ್ಮ ಪ್ರಕಾರ ಯಾರು ಉಳಿಯಬೇಕು?” ಎಂದು ಕೇಳಿದಾಗ ಬಹುತೇಕ ಎಲ್ಲರೂ ಮೋಕ್ಷಿತಾ ಪೈ ಹೆಸರನ್ನೇ ಹೇಳಿದ್ದರು. ರಜತ್‌ ಮತ್ತು ಚೈತ್ರಾ ಈಗಾಗಲೇ ಒಳಗೆ ಇದ್ದಾರೆ. ಆದರೆ ಗಿಲ್ಲಿ ಈಗ ತನ್ನ ಆಟವನ್ನೇ ಬದಲಾಯಿಸಿದ್ದಾನೆ. ಇತ್ತೀಚೆಗೆ ಅಶ್ವಿನಿ ಗೌಡ ಜೊತೆಗಿನ ಜಗಳ ಇದ್ದವನು ಈಗ ಅವರಿಗೇ ಬೆಂಬಲವಾಗಿ ನಿಂತಿದ್ದಾನೆ.
ವೀಕ್ಷಕರ ಪ್ರಕಾರ, ರಜತ್‌ ಮತ್ತು ಚೈತ್ರಾ ಕುಂದಾಪುರ ಅವರು ಸೀಸನ್‌ 12ಗೆ ಪ್ರಬಲ ಸ್ಪರ್ಧಿಗಳಾಗಿ ಆಗಮಿಸಿದ್ದಾರೆ. ಆದರೆ ಗಿಲ್ಲಿ ಒಬ್ಬನೇ ಇಡೀ ಗೇಮ್‌ನ್ನು ತನ್ನ ಕಡೆಗೆ ತಿರುಗಿಸುವ ಸಾಧ್ಯತೆ ಕಂಡುಬರುತ್ತಿದೆ.