ನವದೆಹಲಿ: ಭಾರತ ಕ್ರಿಕೆಟ್ ತಂಡದ ಮಾಜಿ ತರಬೇತುದಾರ ಸಂಜಯ್ ಬಂಗಾರ್ ಅವರ ಪುತ್ರಿ ಅನಯಾ ಬಂಗಾರ್ ಅವರು ತಮ್ಮ ಲಿಂಗ ಪರಿವರ್ತನೆಯ ಕುರಿತು ಹೃದಯಸ್ಪರ್ಶಿಯಾದ ಪೋಸ್ಟ್ ಅನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಈ ಸವಾಲಿನ ಹಾದಿಯಲ್ಲಿ ತಮಗೆ ತಂದೆಯೇ ಬಂಡೆಯಂತೆ ಆಸರೆಯಾಗಿ ನಿಂತಿದ್ದಾರೆ ಎಂದು ಭಾವುಕತೆಯಿಂದ ಬರೆದುಕೊಂಡಿದ್ದಾರೆ. ಅವರ ಪೋಸ್ಟ್ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿದೆ.
ಲಿಂಗ ಪರಿವರ್ತನೆಯ ಶಸ್ತ್ರಚಿಕಿತ್ಸೆಯ ನಿರ್ಧಾರ ತಮಗಷ್ಟೇ ಅಲ್ಲದೆ, ಇಡೀ ಕುಟುಂಬಕ್ಕೂ ಮಾನಸಿಕವಾಗಿ ಸವಾಲಿನದ್ದಾಗಿತ್ತು ಎಂದು ಅನಯಾ ತಮ್ಮ ಪೋಸ್ಟ್‌ನಲ್ಲಿ ನೆನಪಿಸಿಕೊಂಡಿದ್ದಾರೆ. ಆರಂಭದಲ್ಲಿ ಗೊಂದಲಗಳಿದ್ದರೂ, ಕ್ರಮೇಣ ತಂದೆ-ತಾಯಿ ತಮ್ಮ ನಿರ್ಧಾರವನ್ನು ಸಂಪೂರ್ಣವಾಗಿ ಸ್ವೀಕರಿಸಿದರು ಎಂದು ಅವರು ಹೇಳಿದ್ದಾರೆ. “ಅದು ಅವರಿಗೂ ಸುಲಭವಾದ ಪ್ರಯಾಣವಾಗಿರಲಿಲ್ಲ. ಆದರೆ ಅವರು ನನ್ನ ಜೊತೆಗೆ ನಿಂತರು, ನನ್ನನ್ನು ಅರ್ಥಮಾಡಿಕೊಂಡರು” ಎಂದು ಅನಯಾ ಬರೆದುಕೊಂಡಿದ್ದಾರೆ.
ಈ ಎಲ್ಲಾ ಕಠಿಣ ಹಂತಗಳಲ್ಲಿ ಸಂಜಯ್ ಬಂಗಾರ್ ಅವರು ತಮ್ಮ ಮಗಳ ಬೆನ್ನಿಗೆ ಬಂಡೆಯಂತೆ ನಿಂತಿದ್ದಾರೆ. ಶಸ್ತ್ರಚಿಕಿತ್ಸೆಯ ಸಂಪೂರ್ಣ ವೆಚ್ಚವನ್ನು ತಂದೆಯೇ ಭರಿಸಿದ್ದು, ಅವರ ಬೇಷರತ್ತಾದ ಪ್ರೀತಿ ಮತ್ತು ಬೆಂಬಲವೇ ತನಗೆ ಇಂದು ಹೊಸ ಅಸ್ಮಿತೆಯನ್ನು ತಂದುಕೊಟ್ಟಿದೆ ಎಂದು ಅನಯಾ ಅತ್ಯಂತ ಕೃತಜ್ಞತೆಯಿಂದ ಸ್ಮರಿಸಿದ್ದಾರೆ. “ನನಗೆ ತಂದೆಯೇ ಆಸರೆ. ಅವರಿಲ್ಲದೆ ಈ ಪ್ರಯಾಣ ಸಾಧ್ಯವಾಗುತ್ತಿರಲಿಲ್ಲ” ಎಂದು ಅವರು ಭಾವುಕತೆಯಿಂದ ಹೇಳಿಕೊಂಡಿದ್ದಾರೆ.
ಅನಯಾ ಅವರು ಕ್ರಿಕೆಟ್ನಲ್ಲಿ ಆಸಕ್ತಿ ಹೊಂದಿದ್ದರು. ಆದರೆ ಹಾರ್ಮೋನ್ ಚಿಕಿತ್ಸೆಯ ನಂತರ ಕ್ರೀಡಾ ನಿಯಮಗಳ ಕಾರಣದಿಂದಾಗಿ ಆಟವನ್ನು ಮುಂದುವರಿಸಲು ಸಾಧ್ಯವಾಗಲಿಲ್ಲ. ಇದು ಅವರಿಗೆ ತುಂಬಾ ನೋವನ್ನು ಉಂಟುಮಾಡಿತ್ತು.
ತಮ್ಮ ಪೋಸ್ಟ್‌ನಲ್ಲಿ ಅನಯಾ ಸಮಾಜಕ್ಕೂ ಒಂದು ಮಹತ್ವದ ಸಂದೇಶವನ್ನು ನೀಡಿದ್ದಾರೆ. “ಲಿಂಗ ಪರಿವರ್ತನೆ ಎಂಬುದು ಯಾರಿಗೂ ಸುಲಭವಾದ ನಿರ್ಧಾರವಲ್ಲ. ಇದಕ್ಕೆ ಅಪಾರ ಧೈರ್ಯ ಮತ್ತು ಕುಟುಂಬದ ಬೆಂಬಲ ಬೇಕು. ನನ್ನ ತಂದೆ-ತಾಯಿ ನನಗೆ ನೀಡಿದ ಬೆಂಬಲ ಅಪಾರವಾದುದು. ಅವರು ನನ್ನನ್ನು ನಾನಾಗಿ ಸ್ವೀಕರಿಸಿದ್ದಾರೆ. ಅದು ನನಗೆ ಸಿಕ್ಕ ದೊಡ್ಡ ಗೆಲುವು” ಎಂದು ಅವರು ಹೇಳಿದ್ದಾರೆ.
ಅನಯಾ ಅವರ ಈ ಭಾವುಕ ಪೋಸ್ಟ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಸ್ಪಂದನೆ ವ್ಯಕ್ತವಾಗಿದೆ. ಹಲವು ಕ್ರಿಕೆಟ್ ಅಭಿಮಾನಿಗಳು, ಸೆಲೆಬ್ರಿಟಿಗಳು ಮತ್ತು ಸಾರ್ವಜನಿಕರು ಅನಯಾ ಅವರ ಧೈರ್ಯವನ್ನು ಶ್ಲಾಘಿಸಿದ್ದಾರೆ. ಸಂಜಯ್ ಬಂಗಾರ್ ಅವರ ತಂದೆಯ ಪ್ರೀತಿಗೂ ಅಭಿಮಾನಿಗಳು ಭಾರೀ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
