ಐಪಿಎಲ್ 2026 ಟೂರ್ನಿಗೆ ದಿನಗಣನೆ ಶುರುವಾಗಿರುವ ಹೊತ್ತಲ್ಲೇ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಫ್ರಾಂಚೈಸಿ ಮಾರಾಟ ವಿಚಾರದಲ್ಲಿ ಅಚ್ಚರಿಯ ಬೆಳವಣಿಗೆಗಳು ಕಂಡುಬಂದಿವೆ. ಟೂರ್ನಿಗೆ ಭರ್ಜರಿ ಸಿದ್ಧತೆ ನಡೆಸುತ್ತಿರುವ ಆರ್ಸಿಬಿ ತಂಡ ಮೈದಾನದಲ್ಲಿ ಮಾತ್ರವಲ್ಲ, ಮೈದಾನದ ಹೊರಗಡೆಯೂ ದೊಡ್ಡ ಸುದ್ದಿಯಲ್ಲಿದೆ. ಫ್ರಾಂಚೈಸಿ ಮಾಲೀಕತ್ವ ಬದಲಾವಣೆ ಸಾಧ್ಯತೆ ಈಗ ಭಾರೀ ಚರ್ಚೆಗೆ ಕಾರಣವಾಗಿದೆ.
ಹಾಲಿ ಚಾಂಪಿಯನ್ ಆಗಿ ಕಣಕ್ಕಿಳಿಯಲಿರುವ ಆರ್ಸಿಬಿ, ಸತತ ಎರಡನೇ ಬಾರಿ ಟ್ರೋಫಿ ಗೆಲ್ಲುವ ಗುರಿ ಹೊಂದಿದೆ. ತಂಡದ ಅಭ್ಯಾಸಗಳು ಜೋರಾಗಿ ಸಾಗುತ್ತಿರುವ ಸಮಯದಲ್ಲೇ ಫ್ರಾಂಚೈಸಿ ಮಾರಾಟದ ಪ್ರಕ್ರಿಯೆ ವೇಗವಾಗಿ ಸಾಗುತ್ತಿದೆ.. ಆರಂಭದಲ್ಲಿ ಹಲವಾರು ಕಂಪನಿಗಳು ಆಸಕ್ತಿ ತೋರಿದ್ದರೂ, ಮೌಲ್ಯ ಏರಿಕೆಯಿಂದಾಗಿ ಕೆಲವು ಕಂಪನಿಗಳು ಹಿಂದಕ್ಕೆ ಸರಿದವು. ಇದರಿಂದ ಬಿಡ್ಡಿಂಗ್ ಪ್ರಕ್ರಿಯೆ ಕೆಲಕಾಲ ನಿಧಾನಗೊಂಡಂತೆ ಕಂಡಿತು.
ಆದರೆ ಇದೀಗ ಹೊಸ ತಿರುವು ಸಿಕ್ಕಿದ್ದು, ಆದಿತ್ಯ ಬಿರ್ಲಾ ಗ್ರೂಪ್ ಎಂಟ್ರಿಯೊಂದಿಗೆ ಪೈಪೋಟಿ ಮತ್ತೆ ಕಾವೇರಿದೆ. ಭಾರತದ ಪ್ರಮುಖ ಉದ್ಯಮ ಗುಂಪಾಗಿರುವ ಬಿರ್ಲಾ ಗ್ರೂಪ್, ಅಮೆರಿಕದ ಖ್ಯಾತ ಕ್ರೀಡಾ ಹೂಡಿಕೆದಾರ ಡೇವಿಡ್ ಬ್ಲಿಟ್ಜರ್ ಜೊತೆಗೂಡಿ ಆರ್ಸಿಬಿ ಖರೀದಿಗೆ ಬಿಡ್ ಸಲ್ಲಿಸಿದೆ. ಈ ಜಂಟಿ ಪ್ರಯತ್ನದಿಂದ ಬಿಡ್ಡಿಂಗ್ ರೇಸ್ ಮತ್ತಷ್ಟು ಕುತೂಹಲಕಾರಿ ಆಗಿದೆ.
ಇದಕ್ಕೂ ಮುನ್ನ ಮಣಿಪಾಲ್ ಗ್ರೂಪ್ನ ರಂಜನ್ ಪೈ ಮತ್ತು ಅಜೀಮ್ ಪ್ರೇಮ್ಜಿ ಅವರ ಪ್ರೇಮ್ಜಿ ಇನ್ವೆಸ್ಟ್ ಸಂಸ್ಥೆಗಳು ಆರ್ಸಿಬಿ ಖರೀದಿಗೆ ಮುಂದಾಗಿದ್ದವು. ಈಗ ಬಿರ್ಲಾ-ಬ್ಲಿಟ್ಜರ್ ಜೋಡಿ ಸೇರ್ಪಡೆಯಿಂದ ಒಟ್ಟು ಮೂರು ಪ್ರಮುಖ ಬಿಡ್ಡರ್ಗಳು ಕಣದಲ್ಲಿದ್ದಾರೆ. ಇದರಿಂದ ಅಂತಿಮ ಹಂತದ ಪೈಪೋಟಿ ತೀವ್ರಗೊಂಡಿದ್ದು, ಯಾರು ಫ್ರಾಂಚೈಸಿ ಪಡೆಯುತ್ತಾರೆ ಎಂಬುದು ಕುತೂಹಲ ಹುಟ್ಟಿಸಿದೆ.
ಆರ್ಸಿಬಿ ಮಾಲೀಕತ್ವ ಹೊಂದಿರುವ ಡಿಯಾಜಿಯೋ ಕಂಪನಿ, ಫ್ರಾಂಚೈಸಿ ಮಾರಾಟದಿಂದ ಭಾರೀ ಮೊತ್ತ ನಿರೀಕ್ಷಿಸುತ್ತಿದೆ. ಅಂದಾಜು 16,000 ಕೋಟಿ ರೂಪಾಯಿಯಿಂದ 18,000 ಕೋಟಿ ರೂಪಾಯಿ ತನಕ ಡೀಲ್ ಆಗಬಹುದು ಎಂದು ವರದಿಗಳು ಸೂಚಿಸುತ್ತಿವೆ. ಡಾಲರ್ ಲೆಕ್ಕದಲ್ಲಿ ಕನಿಷ್ಠ 2 ಬಿಲಿಯನ್ ಮೌಲ್ಯ ಗುರಿಯಾಗಿದ್ದು, ಇದು ಐಪಿಎಲ್ ಇತಿಹಾಸದಲ್ಲೇ ದೊಡ್ಡ ವ್ಯವಹಾರಗಳಲ್ಲಿ ಒಂದಾಗುವ ಸಾಧ್ಯತೆ ಇದೆ.
ಆದಿತ್ಯ ಬಿರ್ಲಾ ಗ್ರೂಪ್ ಕೇವಲ ಆರ್ಸಿಬಿಗಷ್ಟೇ ಅಲ್ಲ, ರಾಜಸ್ಥಾನ್ ರಾಯಲ್ಸ್ ಫ್ರಾಂಚೈಸಿಗೂ ಬಿಡ್ ಸಲ್ಲಿಸಿದೆ. ಆದರೆ ಬಿಸಿಸಿಐ ನಿಯಮಗಳ ಪ್ರಕಾರ, ಒಂದೇ ಸಂಸ್ಥೆ ಅಥವಾ ವ್ಯಕ್ತಿ ಒಂದಕ್ಕಿಂತ ಹೆಚ್ಚು ಐಪಿಎಲ್ ತಂಡಗಳಲ್ಲಿ ಪಾಲುದಾರರಾಗಲು ಅವಕಾಶವಿಲ್ಲ. ಹೀಗಾಗಿ ಬಿರ್ಲಾ ಗ್ರೂಪ್ ಎರಡೂ ಬಿಡ್ಡಿಂಗ್ ಗೆದ್ದರೆ, ಒಂದು ತಂಡವನ್ನು ಮಾತ್ರ ಉಳಿಸಿಕೊಂಡು ಮತ್ತೊಂದನ್ನು ಬಿಡಬೇಕಾಗುತ್ತದೆ.
ಒಟ್ಟಿನಲ್ಲಿ, ಐಪಿಎಲ್ 2026 ಆರಂಭಕ್ಕೂ ಮುನ್ನವೇ ಆರ್ಸಿಬಿ ಮಾರಾಟ ವಿಚಾರ ಕ್ರಿಕೆಟ್ ಅಭಿಮಾನಿಗಳಲ್ಲಿ ಭಾರೀ ಕುತೂಹಲ ಮೂಡಿಸಿದೆ. ಅಂತಿಮವಾಗಿ ಯಾವ ಕಂಪನಿ ಆರ್ಸಿಬಿ ಮಾಲೀಕತ್ವ ಪಡೆಯಲಿದೆ ಎಂಬುದು ಮುಂದಿನ ದಿನಗಳಲ್ಲಿ ಬಹಿರಂಗವಾಗಲಿದೆ.
