ಎಲ್‌ಪಿಜಿ ಇ-ಕೆವೈಸಿ ಎಲ್ಲರಿಗೂ ಕಡ್ಡಾಯವಲ್ಲ..! ಗೊಂದಲಗಳಿಗೆ ಕೇಂದ್ರ ಸರ್ಕಾರ ಸ್ಪಷ್ಟನೆ

ಕಳೆದ ಕೆಲವು ದಿನಗಳಿಂದ ಗ್ಯಾಸ್ ಏಜೆನ್ಸಿಗಳ ಮುಂದೆ ಎಲ್‌ಪಿಜಿ ಇ-ಕೆವೈಸಿ (e-KYC) ಮಾಡಿಸಲು ಗ್ರಾಹಕರು ಕಿಲೋಮೀಟರ್‌ಗಟ್ಟಲೆ ಸಾಲಿನಲ್ಲಿ ನಿಲ್ಲುತ್ತಿರುವುದು ಕಂಡುಬರುತ್ತಿದೆ. ಈ ನಡುವೆ ಸಾರ್ವಜನಿಕರಲ್ಲಿ ಉಂಟಾಗಿರುವ ಗೊಂದಲಕ್ಕೆ ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯವು ತೆರೆ ಎಳೆದಿದ್ದು, ಮಹತ್ವದ ಸ್ಪಷ್ಟನೆಯನ್ನು ನೀಡಿದೆ.

ಇ-ಕೆವೈಸಿ ಯಾರಿಗೆ ಕಡ್ಡಾಯ ?

ಸರ್ಕಾರದ ಆದೇಶದಂತೆ, ಇ-ಕೆವೈಸಿ ಪ್ರಕ್ರಿಯೆಯು ಪ್ರತಿಯೊಬ್ಬರಿಗೂ ಕಡ್ಡಾಯವಲ್ಲ. ಮುಖ್ಯವಾಗಿ ಈ ಕೆಳಗಿನ ವರ್ಗದವರಿಗೆ ಮಾತ್ರ ಇದು ಅನ್ವಯಿಸುತ್ತದೆ:

1. ಪಿಎಂ ಉಜ್ವಲ ಯೋಜನೆ ಫಲಾನುಭವಿಗಳು: ಉಜ್ವಲ ಯೋಜನೆಯಡಿ ಉಚಿತ ಅನಿಲ ಸಂಪರ್ಕ ಪಡೆದವರು ಪ್ರತಿ ಹಣಕಾಸು ವರ್ಷಕ್ಕೊಮ್ಮೆ ಇ-ಕೆವೈಸಿ ಮಾಡಿಸುವುದು ಕಡ್ಡಾಯ. ಸಬ್ಸಿಡಿ ಸೌಲಭ್ಯವನ್ನು ಮುಂದುವರಿಸಲು ಇದು ಅತ್ಯಗತ್ಯ.

2. ಇದುವರೆಗೆ ಒಮ್ಮೆಯೂ ಮಾಡಿಸದವರು: ನೀವು ಅಡುಗೆ ಅನಿಲ ಸಂಪರ್ಕ ಪಡೆದ ನಂತರ ಇದುವರೆಗೆ ಒಮ್ಮೆಯೂ ಆಧಾರ್ ಬಯೋಮೆಟ್ರಿಕ್ ದೃಢೀಕರಣ ಮಾಡಿಸದಿದ್ದರೆ ಮಾತ್ರ ನೀವು ಏಜೆನ್ಸಿಗೆ ಭೇಟಿ ನೀಡಬೇಕಾಗುತ್ತದೆ.

3. ಅತಿ ಹೆಚ್ಚು ಬಳಕೆದಾರರು: ವರ್ಷಕ್ಕೆ 7 ಸಿಲಿಂಡರ್‌ಗಳಿಗಿಂತ ಹೆಚ್ಚು ಬಳಸುವ ಮತ್ತು ಸಬ್ಸಿಡಿ ಪಡೆಯುವ ಗ್ರಾಹಕರಿಗೆ ಮಾಹಿತಿಯ ಪುನರ್ ದೃಢೀಕರಣದ ಅವಶ್ಯಕತೆ ಇರಬಹುದು.

ಸಾಮಾನ್ಯ ಗ್ರಾಹಕರಿಗೆ ನೆಮ್ಮದಿಯ ಸುದ್ದಿ: ಈಗಾಗಲೇ ಇ-ಕೆವೈಸಿ ಪೂರ್ಣಗೊಳಿಸಿದ ಅಥವಾ ಸಾಮಾನ್ಯ ವಾಣಿಜ್ಯೇತರ ಸಿಲಿಂಡರ್ ಬಳಸುವ ಗ್ರಾಹಕರು ಮತ್ತೆ ಮತ್ತೆ ಏಜೆನ್ಸಿಗೆ ಇ-ಕೆವೈಸಿ ಅಗತ್ಯವಿಲ್ಲ ಎಂದು ಸರ್ಕಾರ ತಿಳಿಸಿದೆ.

Clarification: LPG Biometric Aadhaar Authentication (eKYC) only required for unauthenticated LPG customers and not all customers pic.twitter.com/oySbhPgJ47

— Ministry of Petroleum and Natural Gas #MoPNG (@PetroleumMin) March 17, 2026

ಮನೆಯಲ್ಲೇ ಕುಳಿತು ಇ-ಕೆವೈಸಿ ಮಾಡುವುದು ಹೇಗೆ?

ಗ್ಯಾಸ್ ಏಜೆನ್ಸಿಗಳ ಮುಂದೆ ಸಾಲಿನಲ್ಲಿ ನಿಲ್ಲುವ ಬದಲು, ನಿಮ್ಮ ಸ್ಮಾರ್ಟ್‌ಫೋನ್ ಬಳಸಿ ಸುಲಭವಾಗಿ ಇ-ಕೆವೈಸಿ ಪೂರ್ಣಗೊಳಿಸಬಹುದು.

• ಹಂತ 1: ಮೊದಲು ಗೂಗಲ್ ಪ್ಲೇ ಸ್ಟೋರ್‌ನಿಂದ ‘Aadhaar Face RD’ ಆ್ಯಪ್ ಡೌನ್‌ಲೋಡ್ ಮಾಡಿ (ಇದು ಫೇಸ್ ಸ್ಕ್ಯಾನ್ ಮಾಡಲು ಸಹಕಾರಿ).

• ಹಂತ 2: ನಿಮ್ಮ ಗ್ಯಾಸ್ ಕಂಪನಿಯ ಅಧಿಕೃತ ಆ್ಯಪ್ ಡೌನ್‌ಲೋಡ್ ಮಾಡಿ (ಉದಾಹರಣೆಗೆ: IndianOil One, BPCL Hello, ಅಥವಾ HP Pay).

• ಹಂತ 3: ಆ್ಯಪ್‌ನಲ್ಲಿ ನಿಮ್ಮ ಮೊಬೈಲ್ ಸಂಖ್ಯೆ ಬಳಸಿ ಲಾಗಿನ್ ಆಗಿ ‘ಇ-ಕೆವೈಸಿ’ (e-KYC) ಆಯ್ಕೆಯನ್ನು ಆರಿಸಿ.

• ಹಂತ 4: ಮುಖದ ಗುರುತಿನ (Face Authentication) ಮೂಲಕ ಪ್ರಕ್ರಿಯೆ ಪೂರ್ಣಗೊಳಿಸಿ. ಇದು ಸಂಪೂರ್ಣ ಉಚಿತ ಮತ್ತು ಸುರಕ್ಷಿತ.

ಅನೇಕ ಕಡೆಗಳಲ್ಲಿ ಕೆವೈಸಿ ಮಾಡಿಸದಿದ್ದರೆ ಸಿಲಿಂಡರ್ ವಿತರಣೆ ಸ್ಥಗಿತಗೊಳ್ಳುತ್ತದೆ ಎಂಬ ವದಂತಿ ಹಬ್ಬಿದೆ. ಆದರೆ ಸರ್ಕಾರವು ಅಂತಹ ಯಾವುದೇ ಕಠಿಣ ಕ್ರಮದ ಬಗ್ಗೆ ಸೂಚಿಸಿಲ್ಲ. ಕೇವಲ ಸಬ್ಸಿಡಿ ಮೊತ್ತವನ್ನು ನೇರವಾಗಿ ಬ್ಯಾಂಕ್ ಖಾತೆಗೆ ವರ್ಗಾಯಿಸಲು ಮತ್ತು ಅರ್ಹ ಫಲಾನುಭವಿಗಳನ್ನು ಗುರುತಿಸಲು ಮಾತ್ರ ಈ ಪ್ರಕ್ರಿಯೆ ನಡೆಯುತ್ತಿದೆ. ಹೀಗಾಗಿ ಗ್ರಾಹಕರು ಆತಂಕಕ್ಕೆ ಒಳಗಾಗಬಾರದು ಎಂದು ಸಚಿವಾಲಯ ಮನವಿ ಮಾಡಿದೆ.

ಒಂದು ವೇಳೆ ನಿಮ್ಮ ವಿತರಕರು ಇ-ಕೆವೈಸಿ ಹೆಸರಿನಲ್ಲಿ ಹಣದ ಬೇಡಿಕೆ ಇಟ್ಟರೆ ಅಥವಾ ಅನಿವಾರ್ಯವಲ್ಲದಿದ್ದರೂ ಒತ್ತಾಯಿಸಿದರೆ, ನೀವು ಅಧಿಕೃತ ಹೆಲ್ಪ್‌ಲೈನ್ ಮೂಲಕ ದೂರು ನೀಡಬಹುದು.