ಅಮೆರಿಕದ ಅದ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಒಂದಲ್ಲ ಒಂದು ಸುದ್ದಿಯಿಂದ ಮುನ್ನಲೆಗೆ ಬಾರ್ತನೆ ಇರ್ತಾರೆ. ಇದೀಗ ವಿಶ್ವದ 41 ದೇಶಗಳ ನಾಗರಿಕರಿಗೆ ಬಿಗ್ ಶಾಕ್ ಕೊಟ್ಟಿದ್ದಾರೆ. ಇದರಂತೆ ಪಾಕಿಸ್ತಾನ, ಅಫ್ಘಾನಿಸ್ತಾನ, ಭೂತಾನ್, ಇರಾನ್ ಮತ್ತು ಕ್ಯೂಬಾ ಸೇರಿದಂತೆ ಒಟ್ಟು 41 ದೇಶಗಳ ನಾಗರಿಕರಿಗೆ ಅಮೆರಿಕಕ್ಕೆ ಪ್ರವೇಶವನ್ನು ನಿರ್ಬಂಧಿಸುವ ಚಿಂತನೆ ನಡೆಸಲಾಗಿದ್ದು, ಈ ನಿಷೇಧವನ್ನು ಟ್ರಂಪ್ ಅವರ ಹೊಸ ಯೋಜನೆಯಲ್ಲಿ ಮೂರು ವರ್ಗಗಳಲ್ಲಿ (ಕೆಂಪು, ಕಿತ್ತಳೆ, ಹಳದಿ) ದೇಶಗಳನ್ನು ವಿಂಗಡಿಸಲಾಗಿದೆ.
1. ಕೆಂಪು ಪಟ್ಟಿ (11 ದೇಶಗಳು):
ಈ ಗುಂಪಿನ ದೇಶಗಳ ನಾಗರಿಕರಿಗೆ ಸಂಪೂರ್ಣ ಪ್ರಯಾಣ ನಿಷೇಧ ಜಾರಿಯಾಗಲಿದೆ. ಇದರಲ್ಲಿ ಕ್ಯೂಬಾ, ಇರಾನ್, ಉತ್ತರ ಕೊರಿಯಾ, ಸಿರಿಯಾ, ಸೊಮಾಲಿಯಾ, ಸುಡಾನ್, ಲಿಬಿಯಾ, ಯೆಮೆನ್, ವೆನೆಜುವೆಲಾ, ಅಫ್ಘಾನಿಸ್ತಾನ ಮತ್ತು ಭೂತಾನ್ ಸೇರಿವೆ. ಇವುಗಳನ್ನು “ರಾಷ್ಟ್ರೀಯ ಭದ್ರತೆಗೆ ಗಂಭೀರ ಬೆದರಿಕೆ” ಎಂದು ಪರಿಗಣಿಸಲಾಗಿದೆ.
2. ಕಿತ್ತಳೆ ಪಟ್ಟಿ (10 ದೇಶಗಳು):
ರಷ್ಯಾ, ಪಾಕಿಸ್ತಾನ, ಮ್ಯಾನ್ಮಾರ್ ಸೇರಿದ ಈ ದೇಶಗಳ ನಾಗರಿಕರಿಗೆ ಕೆಲವು ವೀಸಾ ವರ್ಗಗಳನ್ನು (ಹಾಲಿಡೆ, ವ್ಯಾಪಾರ) ಮಾತ್ರ ಅನುಮತಿಸಲಾಗುವುದು. ಇಲ್ಲಿ ಅರ್ಜಿದಾರರು ಕಠಿಣ ವೀಸಾ ಸಂದರ್ಶನಗಳನ್ನು ಎದುರಿಸಬೇಕಾಗುತ್ತದೆ.
3. ಹಳದಿ ಪಟ್ಟಿ (20 ದೇಶಗಳು):
ಆಫ್ರಿಕಾ ಮತ್ತು ಕೆರಿಬಿಯನ್ ದೇಶಗಳನ್ನು ಈ ವರ್ಗದಲ್ಲಿ ಇಡಲಾಗಿದೆ. ಈ ದೇಶಗಳಿಗೆ 60 ದಿನಗಳ ಒಳಗಡೆ ಭದ್ರತಾ ಕೊರತೆಗಳನ್ನು ಪರಿಹರಿಸಲು ಸಮಯ ನೀಡಲಾಗಿದೆ. ನಿಬಂಧನೆ ಪಾಲಿಸಲು ವಿಫಲವಾದರೆ ಅವುಗಳನ್ನು ಕಿತ್ತಳೆ ಅಥವಾ ಕೆಂಪು ಪಟ್ಟಿಗಳಿಗೆ ಸ್ಥಳಾಂತರಿಸಬಹುದು.
ಹಿಂದಿನ ಪ್ರಯಾಣ ನಿಷೇಧಗಳು
ಟ್ರಂಪ್ ಅವರ ಮೊದಲ ಅವಧಿಯಲ್ಲಿ, ಏಳು ಮುಸ್ಲಿಂ ಬಹುಸಂಖ್ಯಾತ ರಾಷ್ಟ್ರಗಳ ಪ್ರಯಾಣಿಕರಿಗೆ ಅಮೆರಿಕ ಪ್ರವೇಶಕ್ಕೆ ನಿರ್ಬಂಧ ವಿಧಿಸಲಾಗಿತ್ತು. ಈ ನೀತಿಯನ್ನು 2018ರಲ್ಲಿ ಅಮೆರಿಕದ ಸುಪ್ರೀಂಕೋರ್ಟ್ ಎತ್ತಿಹಿಡಿದಿತ್ತು. ಆದರೆ, 2021ರಲ್ಲಿ ಅಧ್ಯಕ್ಷ ಜೋ ಬೈಡೆನ್ ಈ ನಿಷೇಧವನ್ನು ರದ್ದುಗೊಳಿಸಿದರು ಮತ್ತು ಅದನ್ನು “ನಮ್ಮ ರಾಷ್ಟ್ರೀಯ ಮನಸ್ಸಾಕ್ಷಿಯ ಮೇಲಿನ ಕಳಂಕ” ಎಂದು ಹೇಳಿದ್ದರು. ಇದೀಗ, ಟ್ರಂಪ್ ಅವರ ಆಡಳಿತವು ಮತ್ತೆ ಪ್ರಯಾಣ ನಿಷೇಧ ನೀತಿಯನ್ನು ಜಾರಿಗೆ ತರುವ ಚಿಂತನೆ ನಡೆಸುತ್ತಿದೆ.
ಜನವರಿ 20ರಂದು ಅಧಿಕಾರ ಸ್ವೀಕರಿಸಿದ ದಿನವೇ, ಟ್ರಂಪ್ ಕಾರ್ಯಕಾರಿ ಆದೇಶವನ್ನು ಹೊರಡಿಸಿದ್ದು, ರಾಷ್ಟ್ರೀಯ ಭದ್ರತಾ ಬೆದರಿಕೆಗಳನ್ನು ಪತ್ತೆಹಚ್ಚಲು ಅಮೆರಿಕಕ್ಕೆ ಪ್ರವೇಶಿಸಲು ಬಯಸುವ ಯಾವುದೇ ವಿದೇಶಿಯರ ತೀವ್ರ ಭದ್ರತಾ ಪರಿಶೀಲನೆ ಕಡ್ಡಾಯ ಎಂದು ಸ್ಪಷ್ಟಪಡಿಸಿದರು. ಅದೇ ರೀತಿ, ಪ್ರವೇಶ ನಿರ್ಬಂಧಕ್ಕೆ ಅನ್ವಯವಾಗುವ ದೇಶಗಳ ಪಟ್ಟಿಯನ್ನು ಮಾರ್ಚ್ 12ರೊಳಗೆ ಸಲ್ಲಿಸುವಂತೆ ಸೂಚಿಸಲಾಯಿತು. ಈ ಕಾರ್ಯಕಾರಿ ಆದೇಶದಂತೆ, ಸಂಪೂರ್ಣ ಪ್ರಯಾಣ ನಿಷೇಧಕ್ಕಾಗಿ ಶಿಫಾರಸು ಮಾಡಲಾದ ದೇಶಗಳ ಪಟ್ಟಿಯಲ್ಲಿ ಅಫ್ಘಾನಿಸ್ತಾನ, ಪಾಕಿಸ್ತಾನ, ಭೂತಾನ್ ಮತ್ತು ಕ್ಯೂಬಾ ದೇಶಗಳನ್ನು ಸೇರಿಸಲಾಗಿದೆ.
