ಬೆಂಗಳೂರು: ರಾಜ್ಯದಲ್ಲಿ ದಿನಬಳಕೆಯ ವಸ್ತುಗಳ ಬೆಲೆ ಏರಿಕೆಯಿಂದ ತತ್ತರಿಸಿರುವ ಜನಸಾಮಾನ್ಯರಿಗೆ ಇದೀಗ ಶಿಕ್ಷಣ ಕ್ಷೇತ್ರದಲ್ಲೂ ಬೆಲೆ ಏರಿಕೆಯ ಬಿಸಿ ತಟ್ಟಿದೆ. 2026-27ನೇ ಶೈಕ್ಷಣಿಕ ವರ್ಷದ ಶಾಲಾ ಪಠ್ಯಪುಸ್ತಕಗಳ ಬೆಲೆಯನ್ನು ಕರ್ನಾಟಕ ಪಠ್ಯಪುಸ್ತಕ ಸಂಘವು ಶೇಕಡಾ 50 ರಷ್ಟು ಹೆಚ್ಚಳ ಮಾಡಿದ್ದು, ಪೋಷಕರು ಮತ್ತು ಶಾಲಾ ಆಡಳಿತ ಮಂಡಳಿಗಳಲ್ಲಿ ಆತಂಕ ಮೂಡಿಸಿದೆ.
ಗಗನಕ್ಕೇರಿದ ಪುಸ್ತಕಗಳ ಬೆಲೆ: ಯಾವುದಕ್ಕೆ ಎಷ್ಟು ಏರಿಕೆ?
ಕರ್ನಾಟಕ ಪಠ್ಯಪುಸ್ತಕ ಸಂಘವು ಪ್ರಕಟಿಸಿರುವ ಹೊಸ ದರ ಪಟ್ಟಿಯ ಪ್ರಕಾರ, ಪ್ರಾಥಮಿಕ ಹಂತದ ಕೆಲವು ಪುಸ್ತಕಗಳ ಬೆಲೆ ದುಪ್ಪಟ್ಟಾಗಿದೆ. ಕೆಲವು ಪುಸ್ತಕಗಳ ಬೆಲೆ ಶೇ. 45 ರಿಂದ 50 ರಷ್ಟು ಏರಿಕೆಯಾಗಿದೆ.
ದರ ಏರಿಕೆಯ ಕೆಲವು ಪ್ರಮುಖ ಉದಾಹರಣೆಗಳು:
-
3ನೇ ತರಗತಿಯ ಪರಿಸರ ಅಧ್ಯಯನ: ಈ ಹಿಂದೆ ₹22 ಇದ್ದ ಪುಸ್ತಕದ ಬೆಲೆ ಈಗ ₹45 ಕ್ಕೆ ಏರಿಕೆಯಾಗಿದೆ.
-
2ನೇ ತರಗತಿಯ ಗಣಿತ (ಇಂಗ್ಲಿಷ್ ಭಾಗ-2): ₹25 ಇದ್ದ ಪುಸ್ತಕದ ದರ ಈಗ ₹51 ಆಗಿದೆ.
-
1ನೇ ತರಗತಿಯ ಮೃದಂಗ ಪುಸ್ತಕ: ₹42 ರಿಂದ ₹60 ಕ್ಕೆ ಏರಿಕೆಯಾಗಿದೆ.
-
4ನೇ ತರಗತಿಯ ಸಂಗೀತ ಪುಸ್ತಕ: ₹31 ರಿಂದ ₹51 ಕ್ಕೆ ಹೆಚ್ಚಳವಾಗಿದೆ.
ಕೇವಲ ಪ್ರಮುಖ ವಿಷಯಗಳಲ್ಲದೆ, 1 ರಿಂದ 5ನೇ ತರಗತಿಯ ಹಿಂದುಸ್ತಾನಿ ಮತ್ತು ಕರ್ಣಾಟಕ ಸಂಗೀತದಂತಹ ವಿಷಯಗಳ ಪಠ್ಯಪುಸ್ತಕಗಳ ದರದಲ್ಲೂ ಗಣನೀಯ ಏರಿಕೆ ಕಂಡುಬಂದಿದೆ.
ಖಾಸಗಿ ಶಾಲೆಗಳ ಒಕ್ಕೂಟ ಆಕ್ರೋಶ
ಪಠ್ಯಪುಸ್ತಕಗಳ ಈ ದಿಢೀರ್ ಬೆಲೆ ಏರಿಕೆಯ ವಿರುದ್ಧ ಕರ್ನಾಟಕ ಖಾಸಗಿ ಶಾಲೆಗಳ ಒಕ್ಕೂಟ (RUPSA) ತೀವ್ರ ಆಕ್ರೋಶ ವ್ಯಕ್ತಪಡಿಸಿದೆ. ಒಕ್ಕೂಟದ ಅಧ್ಯಕ್ಷರಾದ ಹಾಲನೂರು ಲೇಪಾಕ್ಷಿ ಅವರು ಶಿಕ್ಷಣ ಇಲಾಖೆಗೆ ದೂರು ಸಲ್ಲಿಸಿದ್ದು, ಸರ್ಕಾರದ ನಡೆಯನ್ನು ಖಂಡಿಸಿದ್ದಾರೆ.
ಸರ್ಕಾರವು ಪಠ್ಯಪುಸ್ತಕಗಳ ಹೊಸ ಬೆಲೆಯನ್ನು ಮೊದಲೇ ಪ್ರಕಟಿಸಬೇಕಿತ್ತು. ಶೈಕ್ಷಣಿಕ ವರ್ಷ ಆರಂಭವಾಗುವ ಹಂತದಲ್ಲಿ ಇಷ್ಟು ದೊಡ್ಡ ಮಟ್ಟದ ದರ ಏರಿಕೆ ಮಾಡುವುದು ಸರಿಯಲ್ಲ. ಪ್ರಸ್ತುತ ಸನ್ನಿವೇಶದಲ್ಲಿ ಪೋಷಕರಿಂದ ಹೆಚ್ಚುವರಿ ಹಣ ವಸೂಲಿ ಮಾಡುವ ಸ್ಥಿತಿಯಲ್ಲಿ ಖಾಸಗಿ ಶಾಲೆಗಳಿಲ್ಲ. ಇದು ಪೋಷಕರ ಮೇಲೆ ಹೇರುತ್ತಿರುವ ದೊಡ್ಡ ಆರ್ಥಿಕ ಹೊರೆಯಾಗಿದೆ ಎಂದು ಲೇಪಾಕ್ಷಿ ಅವರು ದೂರಿದ್ದಾರೆ.
ಪಠ್ಯಪುಸ್ತಕಗಳ ಬೆಲೆ ನಿಗದಿಯಲ್ಲಿ ಸರ್ಕಾರವು ಪಾರದರ್ಶಕ ನೀತಿಯನ್ನು ಅಳವಡಿಸಿಕೊಳ್ಳಬೇಕು ಎಂದು ರುಪ್ಸಾ ಆಗ್ರಹಿಸಿದೆ. ಏಕಾಏಕಿ ಬೆಲೆ ಏರಿಕೆ ಮಾಡುವ ಬದಲು, ವೈಜ್ಞಾನಿಕವಾಗಿ ಬೆಲೆ ನಿಗದಿಪಡಿಸಬೇಕು ಮತ್ತು ಪೋಷಕರಿಗೆ ಹೊರೆಯಾಗದಂತೆ ಕ್ರಮ ವಹಿಸಬೇಕು ಎಂದು ಮನವಿ ಮಾಡಲಾಗಿದೆ. ಒಂದು ವೇಳೆ ಸರ್ಕಾರ ಈ ನಿರ್ಧಾರದಿಂದ ಹಿಂದೆ ಸರಿಯದಿದ್ದರೆ ಹೋರಾಟ ರೂಪಿಸುವ ಎಚ್ಚರಿಕೆಯನ್ನೂ ನೀಡಲಾಗಿದೆ.
ಬೆಲೆ ಏರಿಕೆಯ ಸುಳಿಯಲ್ಲಿ ಸಿಲುಕಿರುವ ಪೋಷಕರಿಗೆ ಈಗ ಪಠ್ಯಪುಸ್ತಕಗಳ ದರ ಹೆಚ್ಚಳವು ಗಾಯದ ಮೇಲೆ ಬರೆ ಎಳೆದಂತಾಗಿದೆ. ಶಿಕ್ಷಣ ಇಲಾಖೆಯು ಈ ದರ ಏರಿಕೆಯನ್ನು ಹಿಂಪಡೆಯುತ್ತದೆಯೇ ಅಥವಾ ಪೋಷಕರ ಜೇಬಿಗೆ ಕತ್ತರಿ ಬೀಳುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.
