ಈ ವರ್ಷದ ಪ್ರಥಮ ಸೂರ್ಯಗ್ರಹಣವು ಫೆಬ್ರವರಿ ತಿಂಗಳಿನಲ್ಲಿ ಸಂಭವಿಸಲಿದ್ದು, ಇದು ಕಂಕಣ ಸೂರ್ಯಗ್ರಹವಾಗಿರಲಿದೆ. ಸೂರ್ಯನು ಒಂದು ಚಿನ್ನದ ಉಂಗುರದಂತೆ ಹೊಳೆಯುವ ಈ ದೃಶ್ಯವನ್ನು ನೋಡಲು ಇಡೀ ಜಗತ್ತು ಕಾತರದಿಂದ ಕಾಯುತ್ತಿದೆ. ಆದರೆ, ಈ ಸುಂದರ ದೃಶ್ಯ ಭಾರತೀಯರಿಗೆ ಲಭ್ಯವಿದೆಯೇ ಎಂಬ ಕುತೂಹಲಕ್ಕೆ ಈಗ ಉತ್ತರ ಸಿಕ್ಕಿದೆ.
ಗ್ರಹಣ ಯಾವಾಗ ?
ಸಮಯ ಮತ್ತು ದಿನಾಂಕ: 2026ರ ಮೊದಲ ಸೂರ್ಯಗ್ರಹಣವು ಫೆಬ್ರವರಿ 17, ಮಂಗಳವಾರ ಸಂಭವಿಸಲಿದೆ.
-
ಆರಂಭದ ಸಮಯ: ಭಾರತೀಯ ಕಾಲಮಾನದ ಪ್ರಕಾರ (IST) ಮಧ್ಯಾಹ್ನ 12:31 ಕ್ಕೆ ಗ್ರಹಣ ಪ್ರಕ್ರಿಯೆ ಆರಂಭವಾಗಲಿದೆ.
-
ಗರಿಷ್ಠ ಮಟ್ಟ: ಮಧ್ಯಾಹ್ನ 3:26 ರಿಂದ ಸಂಜೆ 7:57 ರ ಅವಧಿಯಲ್ಲಿ ಗ್ರಹಣವು ವಿವಿಧ ಹಂತಗಳಲ್ಲಿ ಘಟಿಸಲಿದೆ. ವಿಶೇಷವೆಂದರೆ, ಈ ದಿನ ಫಾಲ್ಗುಣ ಮಾಸದ ಅಮಾವಾಸ್ಯೆಯೂ ಆಗಿರುವುದರಿಂದ ಆಧ್ಯಾತ್ಮಿಕವಾಗಿಯೂ ಇದಕ್ಕೆ ಮಹತ್ವವಿದೆ.
ಭಾರತದಲ್ಲಿ ಗೋಚರವಿದೆಯೇ ?
ಗ್ರಹಣ ವೀಕ್ಷಿಸಲು ಕಾತರರಾಗಿರುವ ಭಾರತೀಯರಿಗೆ ಈ ಬಾರಿ ನಿರಾಸೆ ಕಾದಿದೆ. ಈ ಕಂಕಣ ಸೂರ್ಯಗ್ರಹಣವು ಭಾರತದಲ್ಲಿ ಗೋಚರಿಸುವುದಿಲ್ಲ. ಭಾರತ ಮಾತ್ರವಲ್ಲದೆ ಏಷ್ಯಾದ ಬಹುತೇಕ ರಾಷ್ಟ್ರಗಳಲ್ಲಿ ಈ ಗ್ರಹಣ ಕಾಣಿಸುವುದಿಲ್ಲ. ಆದ್ದರಿಂದ ಭಾರತದಲ್ಲಿ ಯಾವುದೇ ರೀತಿಯ ಸೂತಕ ಅಥವಾ ಧಾರ್ಮಿಕ ನಿಯಮಗಳ ಪಾಲನೆಯ ಅಗತ್ಯವಿರುವುದಿಲ್ಲ ಎಂದು ಜ್ಯೋತಿಷ್ಯ ಶಾಸ್ತ್ರಜ್ಞರು ತಿಳಿಸಿದ್ದಾರೆ.
ಎಲ್ಲಿ ಗೋಚರವಾಗಲಿದೆ ?
ಈ ಬಾರಿಯ “ರಿಂಗ್ ಆಫ್ ಫೈರ್” ದೃಶ್ಯವು ಮುಖ್ಯವಾಗಿ ಅಂಟಾರ್ಕ್ಟಿಕಾ ಖಂಡದಲ್ಲಿ ಅತ್ಯಂತ ಸ್ಪಷ್ಟವಾಗಿ ಕಾಣಿಸಲಿದೆ. ಇದರ ಜೊತೆಗೆ ದಕ್ಷಿಣ ಆಫ್ರಿಕಾ, ಅರ್ಜೆಂಟೀನಾ ಮತ್ತು ಚಿಲಿ ದೇಶಗಳ ದಕ್ಷಿಣ ಭಾಗಗಳಲ್ಲಿ ಭಾಗಶಃ ಗ್ರಹಣ ಗೋಚರಿಸಲಿದೆ. ಜೊತೆಗೆ ಮಾರಿಷಸ್, ಜಿಂಬಾಬ್ವೆ ಮತ್ತು ತಾಂಜಾನಿಯಾ ಭಾಗಗಳಲ್ಲಿಯೂ ಸಲ್ಪ ಮಟ್ಟಿಗೆ ಇದರ ದರ್ಶನವಾಗಲಿದೆ.
ಏನಿದು ಕಂಕಣ ಸೂರ್ಯಗ್ರಹಣ?
ಭೂಮಿ ಮತ್ತು ಸೂರ್ಯನ ನಡುವೆ ಚಂದ್ರನು ಹಾದುಹೋಗುವಾಗ, ಚಂದ್ರನು ಭೂಮಿಯಿಂದ ದೂರವಿರುವುದರಿಂದ ಸೂರ್ಯನನ್ನು ಸಂಪೂರ್ಣವಾಗಿ ಮುಚ್ಚಲು ಸಾಧ್ಯವಾಗುವುದಿಲ್ಲ. ಆಗ ಸೂರ್ಯನ ಮಧ್ಯಭಾಗ ಕಪ್ಪಾಗಿ ಕಾಣಿಸಿ, ಅಂಚುಗಳು ಮಾತ್ರ ಪ್ರಕಾಶಮಾನವಾದ ಉಂಗುರದಂತೆ ಹೊಳೆಯುತ್ತವೆ. ಇದನ್ನೇ ‘ಕಂಕಣ’ ಅಥವಾ ‘ರಿಂಗ್ ಆಫ್ ಫೈರ್’ ಎಂದು ಕರೆಯಲಾಗುತ್ತದೆ.
ವೀಕ್ಷಕರಿಗೆ ಎಚ್ಚರಿಕೆ: ಗ್ರಹಣ ಗೋಚರಿಸುವ ಪ್ರದೇಶಗಳಲ್ಲಿ ಇರುವವರು ಎಂದಿಗೂ ಬರಿಗಣ್ಣಿನಿಂದ ಸೂರ್ಯನನ್ನು ನೋಡಬಾರದು. ಸೌರ ಫಿಲ್ಟರ್ಗಳು ಅಥವಾ ವಿಶೇಷ ಗ್ರಹಣ ಕನ್ನಡಕಗಳನ್ನು (Solar Glasses) ಬಳಸಿ ಮಾತ್ರ ವೀಕ್ಷಿಸಬೇಕು.
