ಚಳಿಗಾಲ ಬಂದಾಕ್ಷಣ ಕೆಲವರು ಸ್ವೇಟರ್, ಜಾಕೆಟ್, ಕ್ಯಾಪ್, ಸಾಕ್ಸ್ ಎಲ್ಲವನ್ನೂ ಧರಿಸಿಕೊಂಡು ನಡುಗುತ್ತಿರುತ್ತಾರೆ. ಅದೇ ಸಮಯದಲ್ಲಿ ಇನ್ನೂ ಕೆಲವರು ಕೇವಲ ಶರ್ಟ್ ಅಥವಾ ಟಿ-ಶರ್ಟ್‌ನಲ್ಲಿ ಆರಾಮವಾಗಿ ಓಡಾಡುತ್ತಾರೆ. ಇನ್ನು ಕೆಲವರಿಗೆ ಸ್ವಲ್ಪ ಬಿಸಿಲು ತಾಕಿದರೂ ಬೆವರುತ್ತದೆ, ಮತ್ತಷ್ಟು ಜನರಿಗೆ ಎಷ್ಟೇ ಬಿಸಿಲಿದ್ದರೂ ಯಾವುದೇ ವ್ಯತ್ಯಾಸವೇ ಕಾಣಿಸೋದಿಲ್ಲ. ಈ ಎಲ್ಲ ವ್ಯತ್ಯಾಸಗಳನ್ನು ನೀವು ಗಮನಿಸಿದ್ದೀರಾ? ಆದರೆ ಇದಕ್ಕೆ ಕಾರಣವೇನು ಎಂದು ಯೋಚಿಸಿದ್ದೀರಾ?
ಆರೋಗ್ಯ ತಜ್ಞರ ಪ್ರಕಾರ, ಚಳಿ ಹೆಚ್ಚು ಅಥವಾ ಕಡಿಮೆ ಅನುಭವವಾಗುವುದಕ್ಕೆ ದೇಹದ ಚಯಾಪಚಯ ಕ್ರಿಯೆ (Metabolism) ಮತ್ತು ರಕ್ತ ಪರಿಚಲನೆ (Blood Circulation) ಪ್ರಮುಖ ಕಾರಣಗಳಾಗಿವೆ. ಪ್ರತಿಯೊಬ್ಬರ ದೇಹದ ಕಾರ್ಯವಿಧಾನ ಒಂದೇ ರೀತಿಯಲ್ಲಿರುವುದಿಲ್ಲ. ಅದಕ್ಕಾಗಿಯೇ ಕೆಲವರಿಗೆ ಚಳಿ ತೀವ್ರವಾಗಿ ತಾಗುತ್ತದೆ, ಕೆಲವರಿಗೆ ತಾಕುವುದೇ ಇಲ್ಲ.
ಚಯಾಪಚಯ ಕ್ರಿಯೆ ಮತ್ತು ಚಳಿ ನಡುವಿನ ಸಂಬಂಧ
ದೇಹದಲ್ಲಿ ಆಹಾರವನ್ನು ಶಕ್ತಿಯಾಗಿ ಪರಿವರ್ತಿಸುವ ಪ್ರಕ್ರಿಯೆಯೇ ಚಯಾಪಚಯ ಕ್ರಿಯೆ. ವೇಗವಾದ ಚಯಾಪಚಯ ಕ್ರಿಯೆ ಇರುವವರು ದೇಹದಲ್ಲಿ ಹೆಚ್ಚಿನ ಶಾಖವನ್ನು ಉತ್ಪಾದಿಸುತ್ತಾರೆ. ಹೀಗಾಗಿ ಅವರಿಗೆ ಚಳಿ ಕಡಿಮೆ ಅನುಭವವಾಗುತ್ತದೆ.
ಇನ್ನು, ಚಯಾಪಚಯ ಕ್ರಿಯೆ ನಿಧಾನವಾಗಿರುವವರಲ್ಲಿ ದೇಹದ ಉಷ್ಣತೆ ಕಡಿಮೆಯಾಗುತ್ತದೆ. ಇದರ ಪರಿಣಾಮವಾಗಿ ಚಳಿ ಹೆಚ್ಚು ತಾಗುತ್ತದೆ. ವಿಶೇಷವಾಗಿ ಕಡಿಮೆ ಚಟುವಟಿಕೆ, ವ್ಯಾಯಾಮದ ಕೊರತೆ ಮತ್ತು ಅಸಮರ್ಪಕ ಆಹಾರ ಪದ್ಧತಿ ಇರುವವರಲ್ಲಿ ಈ ಸಮಸ್ಯೆ ಹೆಚ್ಚಾಗಿ ಕಂಡುಬರುತ್ತದೆ.
ರಕ್ತ ಪರಿಚಲನೆ ಸರಿಯಾಗಿಲ್ಲದಿದ್ದರೆ ಏನಾಗುತ್ತದೆ?
ದೇಹದಲ್ಲಿ ರಕ್ತ ಸರಿಯಾಗಿ ಪರಿಚಲನೆ ಆಗದಿದ್ದರೆ ಕೈಗಳು ಮತ್ತು ಪಾದಗಳು ಹೆಚ್ಚು ತಣ್ಣಗಾಗುತ್ತವೆ. ಅಂಥವರು ಬೆಚ್ಚಗಿನ ವಾತಾವರಣದಲ್ಲಿಯೂ ಸಹ ಚಳಿಯಾಗುತ್ತಿದೆ ಎಂದು ಹೇಳುತ್ತಾರೆ.
ಇನ್ನು, ಉತ್ತಮ ರಕ್ತ ಪರಿಚಲನೆ ಇರುವವರಲ್ಲಿ ದೇಹದ ಎಲ್ಲಾ ಭಾಗಗಳಿಗೂ ಶಾಖ ಸಮರ್ಪಕವಾಗಿ ತಲುಪುತ್ತದೆ. ಹೀಗಾಗಿ ಅವರಿಗೆ ಚಳಿ ಅಷ್ಟಾಗಿ ತಾಗುವುದಿಲ್ಲ. ನಿಯಮಿತ ವ್ಯಾಯಾಮ, ನಡಿಗೆ ಮತ್ತು ಯೋಗ ರಕ್ತ ಪರಿಚಲನೆಯನ್ನು ಉತ್ತಮಗೊಳಿಸಲು ಸಹಾಯ ಮಾಡುತ್ತದೆ.
ದೇಹದ ತೂಕ ಮತ್ತು ಆಕಾರವೂ ಕಾರಣ
ದೇಹದ ಗಾತ್ರ ದೊಡ್ಡದಾಗಿದ್ದರೆ ಅಥವಾ ದೇಹದಲ್ಲಿ ಕೊಬ್ಬಿನ ಅಂಶ ಹೆಚ್ಚು ಇದ್ದರೆ ಚಳಿ ಕಡಿಮೆ ತಾಗುತ್ತದೆ. ಕೊಬ್ಬು ದೇಹಕ್ಕೆ ಒಂದು ರೀತಿಯ ರಕ್ಷಣಾ ಪದರದಂತೆ ಕೆಲಸ ಮಾಡುತ್ತದೆ.
ಇನ್ನು, ತೆಳ್ಳಗಿನ ದೇಹ ಹೊಂದಿರುವವರು ಅಥವಾ ಕಡಿಮೆ ತೂಕ ಇರುವವರು ಬೇಗ ಚಳಿಗೆ ಒಳಗಾಗುತ್ತಾರೆ.
ಮಹಿಳೆಯರಿಗೆ ಪುರುಷರಿಗಿಂತ ಚಳಿ ಏಕೆ ಜಾಸ್ತಿ?
ಮಹಿಳೆಯರಲ್ಲಿ ಪುರುಷರಿಗಿಂತ ಹೆಚ್ಚಾಗಿ ಚಳಿ ತಾಗುವುದಕ್ಕೆ ಹಲವಾರು ಕಾರಣಗಳಿವೆ. ಪ್ರಮುಖವಾಗಿ ಮಹಿಳೆಯರಲ್ಲಿ ಹಿಮೋಗ್ಲೋಬಿನ್ ಪ್ರಮಾಣ ಕಡಿಮೆ ಇರುವ ಸಾಧ್ಯತೆ ಹೆಚ್ಚಿರುತ್ತದೆ. ರಕ್ತದ ಕೊರತೆ ಇದ್ದರೆ ದೇಹದ ಉಷ್ಣತೆಯನ್ನು ಸಮರ್ಪಕವಾಗಿ ಕಾಯ್ದುಕೊಳ್ಳಲು ಸಾಧ್ಯವಾಗುವುದಿಲ್ಲ.
ಇದರ ಜೊತೆ, ಮಹಿಳೆಯರಲ್ಲಿ ಸ್ನಾಯುಗಳ ಪ್ರಮಾಣ ಕಡಿಮೆ ಇರುತ್ತದೆ. ಸ್ನಾಯುಗಳು ದೇಹದಲ್ಲಿ ಶಾಖ ಉತ್ಪಾದಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಈ ಕಾರಣಗಳಿಂದ ಮಹಿಳೆಯರಿಗೆ ಪುರುಷರಿಗಿಂತ ಬೇಗ ಚಳಿ ತಾಗುತ್ತದೆ.
ವಯಸ್ಸು ಮತ್ತು ಜೀವನಶೈಲಿಯ ಪ್ರಭಾವ
ವಯಸ್ಸಾದಂತೆ ದೇಹದ ಆಂತರಿಕ ತಾಪಮಾನವನ್ನು ನಿಯಂತ್ರಿಸುವ ಸಾಮರ್ಥ್ಯ ಕಡಿಮೆಯಾಗುತ್ತದೆ. ಅದಕ್ಕಾಗಿಯೇ ಹಿರಿಯ ನಾಗರಿಕರಿಗೆ ಚಳಿ ಹೆಚ್ಚು ತಾಗುತ್ತದೆ. ಇನ್ನು, ಕಡಿಮೆ ನೀರು ಕುಡಿಯುವುದು, ಹೆಚ್ಚು ಕೆಫೀನ್ ಸೇವನೆ, ನಿದ್ರೆಯ ಕೊರತೆ ಮತ್ತು ಅಸಮರ್ಪಕ ಜೀವನಶೈಲಿ ಕೂಡ ದೇಹದ ಉಷ್ಣತೆಯ ನಿಯಂತ್ರಣಕ್ಕೆ ಅಡ್ಡಿಯಾಗುತ್ತದೆ.
ಚಳಿಯನ್ನು ಕಡಿಮೆ ಮಾಡಿಕೊಳ್ಳಲು ಏನು ಮಾಡಬೇಕು?
ಪೌಷ್ಟಿಕ ಆಹಾರ ಸೇವನೆ, ಸಾಕಷ್ಟು ನೀರು ಕುಡಿಯುವುದು, ನಿಯಮಿತ ವ್ಯಾಯಾಮ ಮತ್ತು ಸರಿಯಾದ ನಿದ್ರೆ ದೇಹದ ಉಷ್ಣತೆಯನ್ನು ಸಮತೋಲನದಲ್ಲಿಡಲು ಸಹಾಯ ಮಾಡುತ್ತದೆ. ಚಳಿ ಹೆಚ್ಚಾಗಿ ತೊಂದರೆ ಕೊಡುತ್ತಿದ್ದರೆ ವೈದ್ಯರ ಸಲಹೆ ಪಡೆಯುವುದು ಉತ್ತಮ.
