ಐಷಾರಾಮಿ ಕಾರು ಖರೀದಿಸಿದ ಬಿಗ್‌ಬಾಸ್‌ ಮಾಜಿ ಸ್ಪರ್ಧಿ ಶ್ರುತಿ ಪ್ರಕಾಶ್‌: ಇದರ ಬೆಲೆ ಎಷ್ಟು ಗೊತ್ತಾ?

ಬೆಂಗಳೂರು (ಜ.28): ಬಿಗ್ ಬಾಸ್ ಕನ್ನಡದ ಮಾಜಿ ಸ್ಪರ್ಧಿ, ಗಾಯಕಿ ಹಾಗೂ ನಟಿ ಶ್ರುತಿ ಪ್ರಕಾಶ್ ಅವರು ತಮ್ಮ ಜೀವನದ ಮಹತ್ವದ ಕನಸೊಂದನ್ನು ನನಸಾಗಿಸಿಕೊಂಡಿದ್ದಾರೆ. ಬಹಳ ದಿನಗಳ ನಿರೀಕ್ಷೆ, ಶ್ರಮದ ನಂತರ ಶ್ರುತಿ ಪ್ರಕಾಶ್ ತಮ್ಮ ಮೊದಲ ಲಕ್ಷುರಿ ಕಾರನ್ನು ಖರೀದಿಸಿದ್ದು, ಈ ಸಂತಸದ ಕ್ಷಣವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ.

ಶ್ರುತಿ ಪ್ರಕಾಶ್ ಖರೀದಿಸಿದ ಕಾರು ಸ್ಕೋಡಾ ಸ್ಲಾವಿಯಾ ಮಾಂಟೆ ಕಾರ್ಲೋ ಸ್ಪೆಷಲ್ ಎಡಿಶನ್. ಸಿಗ್ನೇಚರ್ ಬ್ಲೂ ಬಣ್ಣದ ಈ ಕಾರು ಅವರ ಮೊದಲ ಲಕ್ಸುರಿ ವಾಹನವಾಗಿದ್ದು, ಕಾರು ಡೋರ್ ತೆರೆಯುವ ಕ್ಷಣದಲ್ಲೇ ಅವರು ಭಾವುಕರಾಗಿರುವ ದೃಶ್ಯಗಳು ಅಭಿಮಾನಿಗಳ ಹೃದಯ ಗೆದ್ದಿವೆ. ಹೊಸ ಕಾರಿನ ಕವರ್ ತೆಗೆಯುವಾಗ ಖುಷಿಪಟ್ಟ ಶ್ರುತಿ ಪ್ರಕಾಶ್, ಪೂಜೆ ನೆರವೇರಿಸಿ ಕಾರಿನಲ್ಲಿ ಮೊದಲ ಪ್ರಯಾಣ ಮಾಡಿದ್ದಾರೆ.

ಈ ಸಾಧನೆಯ ಹಿಂದೆ ಇರುವ ತಮ್ಮ ಹೋರಾಟದ ಕಥೆಯನ್ನು ಹಂಚಿಕೊಂಡ ಶ್ರುತಿ ಪ್ರಕಾಶ್, “ಇದು ನನಗೆ ಮೊದಲ ಪ್ರೀತಿಯಂತೆ ಅನಿಸುತ್ತಿದೆ. ಕಳೆದ 10 ವರ್ಷಗಳ ಮುಂಬೈ ಜೀವನದಲ್ಲಿ ಅನೇಕ ಸವಾಲುಗಳನ್ನು ಎದುರಿಸಿದ್ದೇನೆ. ಪ್ರತಿದಿನ ಆಡಿಷನ್‌ಗಳಿಗೆ ಹೋಗಿ ಅವಕಾಶಕ್ಕಾಗಿ ಕಾಯುತ್ತಿದ್ದೆ. ಕೆಲವೊಮ್ಮೆ ಕೆಲಸವಿರಲಿಲ್ಲ, ಆದರೆ ನನ್ನ ಕನಸುಗಳನ್ನು ಬಿಡಲಿಲ್ಲ. ಹಲವರು ‘ನಿನ್ನಿಂದ ಆಗಲ್ಲ’ ಎಂದು ಹೀಯಾಳಿಸಿದರು. ಆದರೆ ನನ್ನೊಳಗಿನ ಒಂದು ಸಣ್ಣ ಧ್ವನಿ ಮಾತ್ರ ‘ನಿನ್ನಿಂದ ಸಾಧ್ಯ’ ಎಂದು ಹೇಳುತ್ತಲೇ ಇತ್ತು” ಎಂದು ಭಾವುಕರಾಗಿ ಹೇಳಿದ್ದಾರೆ.

“ದೇವರ ಆಶೀರ್ವಾದ, ಪೋಷಕರ ಬೆಂಬಲ, ಸ್ನೇಹಿತರ ಪ್ರೀತಿ ಮತ್ತು ಅಭಿಮಾನಿಗಳ ವಿಶ್ವಾಸ ನನಗೆ ಶಕ್ತಿ ನೀಡಿತ್ತು. ಈ ಮೊದಲ ಕಾರು ನನ್ನ ಹಲವು ಕನಸುಗಳಲ್ಲಿ ಒಂದಾಗಿತ್ತು. ಇಂದು ಅದು ನನ್ನ ಮನೆಗೆ ಬಂದಿದೆ. ಇದು ನನ್ನ ಪಯಣದ ಆರಂಭ ಮಾತ್ರ” ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ.

ಶ್ರುತಿ ಪ್ರಕಾಶ್ ಅವರ ಈ ಯಶಸ್ಸಿಗೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಅನೇಕ ಸೆಲೆಬ್ರಿಟಿಗಳು ಹಾಗೂ ಅಭಿಮಾನಿಗಳು ಅಭಿನಂದನೆಗಳ ಸುರಿಮಳೆಗೈದಿದ್ದಾರೆ.

View this post on Instagram

 

A post shared by Shruti Prakash (@shrutiprakash)

ಶ್ರುತಿ ಪ್ರಕಾಶ್ ಖರೀದಿಸಿದ ಕಾರಿನ ಬೆಲೆ ಮತ್ತು ವೈಶಿಷ್ಟ್ಯಗಳು

ಶ್ರುತಿ ಪ್ರಕಾಶ್ ಖರೀದಿಸಿದ ಸ್ಕೋಡಾ ಸ್ಲಾವಿಯಾ ಮಾಂಟೆ ಕಾರ್ಲೋ ಸ್ಪೆಷಲ್ ಎಡಿಶನ್ ಕಾರಿನ ಎಕ್ಸ್-ಶೋರೂಮ್ ಬೆಲೆ 17.99 ಲಕ್ಷ ರೂಪಾಯಿ. ಬೆಂಗಳೂರು ನಗರದಲ್ಲಿ ಇದರ ಆನ್-ರೋಡ್ ಬೆಲೆ ಸರಿಸುಮಾರು 22 ಲಕ್ಷ ರೂಪಾಯಿ ಆಗಿದೆ.

ಈ ಕಾರಿನಲ್ಲಿ 1498 ಸಿಸಿ ಪೆಟ್ರೋಲ್ ಎಂಜಿನ್ ಇದ್ದು, ಆಟೋಮ್ಯಾಟಿಕ್ ಟ್ರಾನ್ಸ್‌ಮಿಷನ್ ಸೌಲಭ್ಯ ಹೊಂದಿದೆ. ಇದು 147.51 bhp ಪವರ್ ಮತ್ತು 250 Nm ಪೀಕ್ ಟಾರ್ಕ್ ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ. ಮೈಲೇಜ್ ವಿಚಾರಕ್ಕೆ ಬಂದರೆ, ಪ್ರತಿ ಲೀಟರ್ ಪೆಟ್ರೋಲ್‌ಗೆ 19.36 ಕಿಲೋಮೀಟರ್ ವರೆಗೆ ಮೈಲೇಜ್ ನೀಡುತ್ತದೆ.

ಸುರಕ್ಷತೆಯ ದೃಷ್ಟಿಯಿಂದ ಈ ಕಾರಿನಲ್ಲಿ 6 ಏರ್‌ಬ್ಯಾಗ್‌ಗಳು, ಎಬಿಎಸ್ (Anti-lock Braking System), ಎಲೆಕ್ಟ್ರಾನಿಕ್ ಬ್ರೇಕ್ ಫೋರ್ಸ್ ಡಿಸ್ಟ್ರಿಬ್ಯೂಶನ್ (EBD), ಟ್ರಾಕ್ಷನ್ ಕಂಟ್ರೋಲ್, ಎಲೆಕ್ಟ್ರಾನಿಕ್ ಸ್ಟೆಬಿಲಿಟಿ ಕಂಟ್ರೋಲ್ (ESC) ಸೇರಿದಂತೆ ಅನೇಕ ಅತ್ಯಾಧುನಿಕ ಸುರಕ್ಷಾ ವೈಶಿಷ್ಟ್ಯಗಳನ್ನು ಒಳಗೊಂಡಿದೆ.

ಆಕರ್ಷಕ ಡಿಸೈನ್, ಶಕ್ತಿಶಾಲಿ ಎಂಜಿನ್ ಹಾಗೂ ಉನ್ನತ ಸುರಕ್ಷಾ ಫೀಚರ್‌ಗಳೊಂದಿಗೆ ಸ್ಕೋಡಾ ಸ್ಲಾವಿಯಾ ಮಾಂಟೆ ಕಾರ್ಲೋ ಎಡಿಶನ್ ಯುವಜನತೆಯ ಗಮನ ಸೆಳೆಯುತ್ತಿದೆ.