ಮಂಡ್ಯದ ಹಳ್ಳಿ ಹೈದ ಗಿಲ್ಲಿ ನಟ ಅವರು ಬಿಗ್ ಬಾಸ್ ಕನ್ನಡ ಸೀಸನ್ 12ರಲ್ಲಿ ಭರ್ಜರಿ ಗೆಲುವು ಸಾಧಿಸಿ ಕನ್ನಡಿಗರ ಮನಗೆದ್ದಿದ್ದಾರೆ. 111 ದಿನಗಳ ರೋಚಕ ಪಯಣದ ನಂತರ ಗಿಲ್ಲಿ ನಟ ಟ್ರೋಫಿ ಎತ್ತಿಕೊಂಡು, ₹50 ಲಕ್ಷ ನಗದು ಬಹುಮಾನ, ಮಾರುತಿ ಸುಜುಕಿ ವಿಕ್ಟೋರೀಸ್ ಅಥವಾ ಇನ್ವಿಕ್ಟೋ SUV ಕಾರು, ಹೋಸ್ಟ್ ಕಿಚ್ಚ ಸುದೀಪ್ ಅವರಿಂದ ₹10 ಲಕ್ಷ ವೈಯಕ್ತಿಕ ಬಹುಮಾನ ಮತ್ತು ಶರವಣ ಅವರಿಂದ ಮತ್ತೊಂದು ₹10 ಲಕ್ಷ ಸೇರಿ ಒಟ್ಟು ಸುಮಾರು 60 ಲಕ್ಷಕ್ಕೂ ಹೆಚ್ಚು ಮೊತ್ತ ಪಡೆದಿದ್ದಾರೆ. ಈ ದೊಡ್ಡ ಬಹುಮಾನದ ಹಣದೊಂದಿಗೆ ಗಿಲ್ಲಿ ನಟ ಏನು ಮಾಡುತ್ತಾರೆ ಎಂಬ ಕುತೂಹಲಕ್ಕೆ ಅವರೇ ಸ್ಪಷ್ಟ ಉತ್ತರ ನೀಡಿದ್ದಾರೆ.
ಗ್ರ್ಯಾಂಡ್ ಫಿನಾಲೆಯ ನಂತರ ನೀಡಿದ ಸಂದರ್ಶನದಲ್ಲಿ ಗಿಲ್ಲಿ ನಟ ಹೇಳಿದರು. “ನಾನು ಗೆಲ್ಲುತ್ತೇನೆ ಎಂಬ ನಂಬಿಕೆ ಇರಲಿಲ್ಲ. ಕೇವಲ 7-8 ವಾರ ಇರುತ್ತೇನೆ ಎಂದುಕೊಂಡಿದ್ದೆ. ಆದರೆ ಟ್ರೋಫಿ ಗೆದ್ದಿದ್ದು ತುಂಬ ಖುಷಿ. ಜನರು ನನ್ನನ್ನು ಇಷ್ಟಪಟ್ಟಿದ್ದು, ಶಿವರಾಜ್ಕುಮಾರ್ ಸೇರಿದಂತೆ ರಾಜಕಾರಣಿಗಳು ವಿಶ್ ಮಾಡಿದ್ದು ಕೂಡ ದೊಡ್ಡ ಖುಷಿ ಕೊಟ್ಟಿದೆ.”
ಅಭಿಮಾನಿಗಳ ಪ್ರೀತಿಯ ಬಗ್ಗೆ ಮಾತನಾಡಿದ ಅವರು, “ಜನರು ಟ್ಯಾಟೂ ಹಾಕಿಸಿದ್ದು, ಕಟೌಟ್ ಹಾಕಿಸಿದ್ದು ನೋಡಿ ಆಶ್ಚರ್ಯವಾಯ್ತು. ನನ್ನನ್ನು ನಾನೇ ಗಿಲ್ಲಿಕೊಂಡೆ ಅಷ್ಟು ಆಶ್ಚರ್ಯ ಆಯ್ತು” ಎಂದು ಹೇಳಿ ನಗುತ್ತಾ ಭಾವುಕರಾದರು.
ಬಹುಮಾನದ ಹಣದ ಬಳಕೆಯ ಬಗ್ಗೆ ಪ್ರಶ್ನಿಸಿದಾಗ ಗಿಲ್ಲಿ ನಟ ಸರಳವಾಗಿ ಹೇಳಿದರು. “ಊರಿನಲ್ಲಿ ಒಂದು ಫಾರ್ಮ್ಹೌಸ್ ಮಾಡಬೇಕು, ಜಮೀನು ಖರೀದಿಸಬೇಕು, ವ್ಯವಸಾಯ ಮಾಡಬೇಕು. ನನಗೆ ಊರಿನಲ್ಲಿ ಇರೋದು ಇಷ್ಟ. ಅದಕ್ಕೆ ಈ ಹಣ ಸಹಾಯ ಮಾಡುತ್ತದೆ.”
ಗಿಲ್ಲಿ ನಟನ ಈ ಯೋಜನೆಗಳು ಅವರ ಹಳ್ಳಿಯ ಹಿನ್ನೆಲೆಯನ್ನು ಪ್ರತಿಬಿಂಬಿಸುತ್ತವೆ. ಬಡತನದಿಂದ ಬಂದು ಹಾಸ್ಯದ ಮೂಲಕ ಜನರ ಮನಗೆದ್ದ ಅವರು, ಈಗ ತಮ್ಮ ಊರಿನಲ್ಲಿ ಸ್ಥಿರವಾಗಿ ಬದುಕುವ ಕನಸು ಕಾಣುತ್ತಿದ್ದಾರೆ. ಶೋದಲ್ಲಿ ವಾರಕ್ಕೆ ಸಿಗುವ ಸಂಭಾವನೆಯ ಹಣವೂ ಸೇರಿ ಅವರ ಆರ್ಥಿಕ ಸ್ಥಿತಿ ಸುಧಾರಣೆಗೆ ಸಹಾಯಕವಾಗಿದೆ.
ಗಿಲ್ಲಿ ನಟನ ಗೆಲುವು ಕೇವಲ ಹಣಕ್ಕೆ ಸೀಮಿತವಲ್ಲ ಅವರ ಮುಗ್ಧತೆ, ಹಾಸ್ಯ ಮತ್ತು ಸ್ನೇಹಶೀಲತೆಯು ಪ್ರೇಕ್ಷಕರನ್ನು ಆಕರ್ಷಿಸಿತು. ಈಗ ಅವರು ತಮ್ಮ ಕನಸುಗಳನ್ನು ನನಸಾಗಿಸುವ ಹಾದಿಯಲ್ಲಿದ್ದಾರೆ. ಅಭಿಮಾನಿಗಳು ಗಿಲ್ಲಿ ನಟನ ಭವಿಷ್ಯಕ್ಕೆ ಶುಭ ಹಾರೈಸುತ್ತಿದ್ದಾರೆ.
