ಇತ್ತೀಚಿನ ದಿನಗಳಲ್ಲಿ ಸಂಬಂಧಗಳು ಮತ್ತು ವಿವಾಹ ಜೀವನದ ಕುರಿತು ಸೋಶಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಚರ್ಚೆಗಳು ನಡೆಯುತ್ತಿವೆ. ಅದರಲ್ಲೂ, 35 ರಿಂದ 40 ವರ್ಷದ ವಯಸ್ಸಿನ ಮಹಿಳೆಯರು ವಿವಾಹೇತರ ಸಂಬಂಧಗಳತ್ತ ಹೆಚ್ಚು ವಾಲುತ್ತಾರೆ ಎಂಬ ವಿಚಾರ ಹೆಚ್ಚು ಗಮನ ಸೆಳೆಯುತ್ತಿದೆ. ಆದರೆ ಈ ವಿಷಯವನ್ನು ಕೇವಲ “ದಾಂಪತ್ಯ ದ್ರೋಹ” ಎಂಬ ಸೀಮಿತ ದೃಷ್ಟಿಕೋನದಲ್ಲಿ ನೋಡದೇ, ಅದರ ಹಿಂದೆ ಇರುವ ಭಾವನಾತ್ಮಕ, ಮಾನಸಿಕ ಮತ್ತು ಸಾಮಾಜಿಕ ಅಂಶಗಳನ್ನು ಅರ್ಥಮಾಡಿಕೊಳ್ಳಬೇಕಾದ ಅಗತ್ಯವಿದೆ.
ಸಾಮಾನ್ಯವಾಗಿ ಚೀಟಿಂಗ್ ಅಥವಾ ಮೋಸ ಎನ್ನುವುದು ಪುರುಷರಲ್ಲಿ ಹೆಚ್ಚು ಕಾಣಬಹುದು.. ಆದರೆ ಇತ್ತೀಚಿನ ವರ್ಷಗಳಲ್ಲಿ ಮಹಿಳೆಯರೂ ಸಹ ಈ ರೀತಿಯ ಸಂಬಂಧಗಳಲ್ಲಿ ತೊಡಗಿಸಿಕೊಳ್ಳುತ್ತಾರೆ ಎಂಬ ಅಭಿಪ್ರಾಯ ಕೇಳಿಬರುತ್ತಿದೆ. ಮದುವೆಯಾದ ಹಲವು ವರ್ಷಗಳ ನಂತರ, ದಾಂಪತ್ಯ ಜೀವನ ಒಂದೇ ಮಾದರಿಯಲ್ಲಿ ಸಾಗುವಾಗ, ಕೆಲವರು ಭಾವನಾತ್ಮಕ ಅಸಮಾಧಾನವನ್ನು ಅನುಭವಿಸಲು ಪ್ರಾರಂಭಿಸುತ್ತಾರೆ. ಇದರಲ್ಲಿ ಮಹಿಳೆಯರ ಪಾತ್ರವೂ ಮಹತ್ವದ್ದಾಗಿದೆ.
35 ರಿಂದ 40 ವರ್ಷದ ವಯಸ್ಸಿನ ಮಹಿಳೆಯರ ಜೀವನದಲ್ಲಿ ಅತ್ಯಂತ ಮಹತ್ವದ ಹಂತವಾಗಿದೆ. ಈ ಸಮಯದಲ್ಲಿ ಬಹುತೇಕ ಮಹಿಳೆಯರು ತಾಯಂದಿರಾಗಿರುತ್ತಾರೆ, ಕುಟುಂಬದ ಜವಾಬ್ದಾರಿಗಳನ್ನು ಹೊತ್ತುಕೊಂಡಿರುತ್ತಾರೆ ಮತ್ತು ಮನೆಯ ನಿರ್ವಹಣೆಯಲ್ಲೇ ತಮ್ಮ ಹೆಚ್ಚಿನ ಸಮಯವನ್ನು ಕಳೆಯುತ್ತಾರೆ. ಕುಟುಂಬಕ್ಕಾಗಿ ತಮ್ಮ ಆಸೆ-ಆಕಾಂಕ್ಷೆಗಳನ್ನು ತ್ಯಜಿಸುವ ಪರಿಸ್ಥಿತಿ ಎದುರಾದಾಗ, ನಿಧಾನವಾಗಿ ಸ್ವಾಭಿಮಾನ ಕುಗ್ಗುವ ಸಾಧ್ಯತೆ ಹೆಚ್ಚಾಗುತ್ತದೆ. “ನನ್ನನ್ನೇ ಯಾರೂ ಗಮನಿಸುತ್ತಿಲ್ಲ” ಎಂಬ ಭಾವನೆ ಮನಸ್ಸಿನಲ್ಲಿ ಬೇರುಬಿಡಬಹುದು.
ಈ ವಯಸ್ಸಿನಲ್ಲಿ ಮಹಿಳೆಯರು ತಮ್ಮ ಸಂಗಾತಿಯಿಂದ ಕೇವಲ ಆರ್ಥಿಕ ಭದ್ರತೆ ಮಾತ್ರವಲ್ಲದೆ, ಪ್ರೀತಿ, ಗೌರವ, ತಿಳುವಳಿಕೆ ಮತ್ತು ಭಾವನಾತ್ಮಕ ಬೆಂಬಲವನ್ನು ಬಯಸುತ್ತಾರೆ. ಆದರೆ ದಿನನಿತ್ಯದ ಒತ್ತಡಗಳು, ಕೆಲಸದ ಒತ್ತಾಯಗಳು ಮತ್ತು ಕುಟುಂಬದ ಜವಾಬ್ದಾರಿಗಳ ನಡುವೆ, ದಂಪತಿಗಳ ನಡುವೆ ಸಂವಹನ ಕಡಿಮೆಯಾಗುತ್ತದೆ. ಇದರ ಪರಿಣಾಮವಾಗಿ, ಭಾವನಾತ್ಮಕ ಅಂತರ ಹೆಚ್ಚಾಗುತ್ತದೆ. ಈ ಅಂತರವೇ ಕೆಲ ಸಂದರ್ಭಗಳಲ್ಲಿ ಮಹಿಳೆಯರನ್ನು ಬೇರೆ ಯಾರಾದರೂ ತಮ್ಮ ಮಾತು ಕೇಳಿದಾಗ, ತಮ್ಮನ್ನು ಅರ್ಥಮಾಡಿಕೊಂಡಾಗ ಆಕರ್ಷಣೆಗೆ ಒಳಗಾಗುತ್ತಾರೆ.
ಹೆಚ್ಚಾಗಿ ಈ ರೀತಿಯ ಸಂಬಂಧಗಳು ದೈಹಿಕತೆಯಿಂದ ಆರಂಭವಾಗುವುದಿಲ್ಲ. ಮೊದಲಿಗೆ ಅದು ಸ್ನೇಹವಾಗಿರುತ್ತದೆ, ಮಾತುಕತೆ, ಭಾವನೆ ಹಂಚಿಕೊಳ್ಳುವಿಕೆ ಮತ್ತು ಮನಸ್ಸಿನ ನೋವನ್ನು ಹೇಳಿಕೊಳ್ಳುವ ಅವಕಾಶವಾಗಿರುತ್ತದೆ. ಆದರೆ ಸಮಯದೊಂದಿಗೆ, ಈ ಭಾವನಾತ್ಮಕ ಬಂಧವೇ ಪ್ರಣಯವಾಗಿ ಬದಲಾಗುತ್ತದೆ. ಯಾವ ಕ್ಷಣದಲ್ಲಿ ಸ್ನೇಹ ಪ್ರೀತಿಯಾಗುತ್ತದೆ ಎಂಬುದನ್ನು ಗುರುತಿಸುವುದು ಬಹಳ ಕಷ್ಟ.
ಒಂದೇ ರೀತಿಯ ದಿನಚರಿ, ಒಂದೇ ಜವಾಬ್ದಾರಿಗಳು, ಹೊಸತನದ ಕೊರತೆ ಇವೆಲ್ಲವೂ ಮಹಿಳೆಯರಲ್ಲಿ ಅಸಮಾಧಾನವನ್ನು ಉಂಟುಮಾಡಬಹುದು. ಇಂತಹ ಸಂದರ್ಭದಲ್ಲಿ ಹೊರಗಿನಿಂದ ಸಿಗುವ ಸ್ವಲ್ಪ ಗೌರವ, ಗಮನ ಅಥವಾ ಮೆಚ್ಚುಗೆ ಮಹಿಳೆಯರಿಗೆ ವಿಶೇಷವಾಗಿ ಕಾಣಬಹುದು. ಆ ಕ್ಷಣಿಕ ಸಂತೋಷವೇ ಕೆಲವೊಮ್ಮೆ ದೊಡ್ಡ ನಿರ್ಧಾರಗಳತ್ತ ಕರೆದೊಯ್ಯುತ್ತದೆ.
ಎಲ್ಲ ಮಹಿಳೆಯರೂ ಈ ವಯಸ್ಸಿನಲ್ಲಿ ವಿವಾಹೇತರ ಸಂಬಂಧಗಳತ್ತ ವಾಲುತ್ತಾರೆ ಎಂಬುದು ಸತ್ಯವಲ್ಲ. ಪ್ರತಿ ವ್ಯಕ್ತಿಯ ಜೀವನಾನುಭವ, ಸಂಬಂಧದ ಗುಣಮಟ್ಟ ಮತ್ತು ಪರಿಸ್ಥಿತಿಗಳು ವಿಭಿನ್ನವಾಗಿರುತ್ತವೆ.
ಕೊನೆಗೆ, ಇಲ್ಲಿ ಉಲ್ಲೇಖಿಸಲಾದ ಮಾಹಿತಿಯು ಸೋಶಿಯಲ್ ಮೀಡಿಯಾ ಮತ್ತು ಸಾರ್ವಜನಿಕ ಚರ್ಚೆಗಳ ಆಧಾರಿತವಾಗಿದ್ದು, ಇದಕ್ಕೆ ದೃಢವಾದ ವೈಜ್ಞಾನಿಕ ಪುರಾವೆಗಳು ಇಲ್ಲ. ಆದ್ದರಿಂದ, ಸಂಬಂಧಗಳಲ್ಲಿ ಉಂಟಾಗುವ ಸಮಸ್ಯೆಗಳನ್ನು ದ್ರೋಹದ ಕಣ್ಣಿನಿಂದ ಮಾತ್ರ ನೋಡದೇ, ಪರಸ್ಪರ ಸಂವಹನ, ತಿಳುವಳಿಕೆ ಮತ್ತು ಗೌರವದ ಮೂಲಕ ಪರಿಹರಿಸುವ ಪ್ರಯತ್ನವೇ ದಾಂಪತ್ಯ ಜೀವನವನ್ನು ಗಟ್ಟಿಗೊಳಿಸುವ ಮಾರ್ಗವಾಗಿರುತ್ತದೆ.
