ಮ್ಯಾಡ್ರಿಡ್: ಸ್ಪೇನ್ ರಾಜಪ್ರಭುತ್ವದ ಇತಿಹಾಸದಲ್ಲಿ ಹೊಸ ಅಧ್ಯಾಯ ಆರಂಭವಾಗುವ ಸೂಚನೆಗಳು ಕಾಣುತ್ತಿವೆ. 19ನೇ ಶತಮಾನದಲ್ಲಿ ಆಳ್ವಿಕೆ ನಡೆಸಿದ ರಾಣಿ ಇಸಬೆಲ್ಲಾ ನಂತರ, ಸುಮಾರು 150 ವರ್ಷಗಳ ಬಳಿಕ ಮೊತ್ತೊಮ್ಮೆ ಮಹಿಳೆಯೊಬ್ಬರು ಸ್ಪೇನ್ನ ಸಿಂಹಾಸನವೇರಲಿದ್ದಾರೆ. ಅವರೇ ಪ್ರಿನ್ಸೆಸ್ ಲಿಯೋನೋರ್. ರಾಜ ಫೆಲಿಪೆ VI ಮತ್ತು ರಾಣಿ ಲೆಟಿಜಿಯಾ ಅವರ ಹಿರಿಯ ಪುತ್ರಿಯಾಗಿರುವ ಲಿಯೋನೋರ್, ಸ್ಪ್ಯಾನಿಷ್ ಸಿಂಹಾಸನದ ಅಧಿಕೃತ ಉತ್ತರಾಧಿಕಾರಿಯಾಗಲಿದ್ದಾರೆ.
2005ರ ಅಕ್ಟೋಬರ್ 31ರಂದು ಮ್ಯಾಡ್ರಿಡ್ನಲ್ಲಿ ಜನಿಸಿದ ಲಿಯೋನೋರ್ ಡಿ ಬೋರ್ಬೊನ್ ವೈ ಒರ್ಟಿಜ್, 2014ರಲ್ಲಿ ತಂದೆ ರಾಜ ಫೆಲಿಪೆ VI ಸಿಂಹಾಸನ ಏರಿದಾಗ ‘ಅಸ್ಟುರಿಯಾಸ್ ಪ್ರಿನ್ಸೆಸ್’ ಎಂಬ ಬಿರುದನ್ನು ಪಡೆದರು. ಇದರೊಂದಿಗೆ ಅವರಿಗೆ ಪ್ರಿನ್ಸೆಸ್ ಆಫ್ ಗಿರೋನಾ, ಡ್ಯುಕೆಸ್ ಆಫ್ ಮಾಂಟ್ಬ್ಲಾಂಕ್ನಂತಹ ಹಲವು ಶೀರ್ಷಿಕೆಗಳು ಸಿಕ್ಕವು.
ಶಿಕ್ಷಣದಲ್ಲಿ ಶಿಸ್ತು
ಲಿಯೋನೋರ್ ಅವರ ಶಿಕ್ಷಣದಲ್ಲಿ ಎಚ್ಚರಿಕೆ ವಹಿಸಲಾಗಿತ್ತು. ಮ್ಯಾಡ್ರಿಡ್ನ ಸಾಂಟಾ ಮರಿಯಾ ಡಿ ಲೋಸ್ ರೋಸಲೆಸ್ ಶಾಲೆಯಲ್ಲಿ ಪ್ರಾಥಮಿಕ ಹಾಗೂ ಪ್ರೌಢ ಶಿಕ್ಷಣ ಪಡೆದ ಅವರು, 2021ರಲ್ಲಿ ವೇಲ್ಸ್ನ ಪ್ರತಿಷ್ಠಿತ UWC ಅಟ್ಲಾಂಟಿಕ್ ಕಾಲೇಜಿನಲ್ಲಿ ಅಂತರರಾಷ್ಟ್ರೀಯ ಬ್ಯಾಕಲೌರಿಯೇಟ್ (IB) ಕೋರ್ಸ್ಗೆ ಸೇರಿದರು. 2023ರಲ್ಲಿ ಅವರು ಈ ಕೋರ್ಸ್ ಅನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದರು.
ಲಿಯೋನೋರ್ ಅವರು ಸ್ಪ್ಯಾನಿಷ್, ಇಂಗ್ಲಿಷ್ ಮತ್ತು ಕ್ಯಾಟಲನ್ನಲ್ಲಿ ನಿಪುಣರಾಗಿದ್ದಾರೆ. ಅವರು, ಫ್ರೆಂಚ್, ಗ್ಯಾಲಿಶಿಯನ್, ಬಾಸ್ಕ್, ಅರೇಬಿಕ್ ಹಾಗೂ ಮ್ಯಾಂಡರಿನ್ ಭಾಷೆಗಳಲ್ಲಿಯೂ ಅಭ್ಯಾಸ ಹೊಂದಿದ್ದಾರೆ.
ಸೈನ್ಯ ತರಬೇತಿ: ಕಮಾಂಡರ್-ಇನ್-ಚೀಫ್ ಆಗುವ ಗುರಿ
ಸ್ಪೇನ್ನ ಸಶಸ್ತ್ರ ಪಡೆಗಳ ಅಧಿಪತಿಯಾಗುವ ಹೊಣೆಗಾರಿಕೆಗೆ ಸಿದ್ಧರಾಗುವ ಉದ್ದೇಶದಿಂದ, ಲಿಯೋನೋರ್ 2023ರಲ್ಲಿ ಮೂರು ವರ್ಷಗಳ ಕಡ್ಡಾಯ ಸೈನ್ಯ ತರಬೇತಿಯನ್ನು ಆರಂಭಿಸಿದರು. ಮೊದಲ ಹಂತದಲ್ಲಿ ಜರಗೋಜಾದ ಜನರಲ್ ಮಿಲಿಟರಿ ಅಕಾಡೆಮಿಯಲ್ಲಿ ಸೇನಾ ತರಬೇತಿ ಪಡೆದರು.
2024ರಲ್ಲಿ ನೌಕಾ ತರಬೇತಿಗಾಗಿ ಮರಿನ್ನ ನೌಕಾ ಮಿಲಿಟರಿ ಅಕಾಡೆಮಿಗೆ ವರ್ಗಾವಣೆಗೊಂಡ ಅವರು, 2025ರಲ್ಲಿ ಐತಿಹಾಸಿಕ ತರಬೇತಿ ಹಡಗು ‘ಜುವಾನ್ ಸೆಬಾಸ್ಟಿಯನ್ ಡಿ ಎಲ್ಕಾನೊ’ ಮೂಲಕ ಐದು ತಿಂಗಳ ಸಮುದ್ರಯಾನ ಕೈಗೊಂಡರು. ಈ ಪ್ರಯಾಣದ ವೇಳೆ ಲ್ಯಾಟಿನ್ ಅಮೆರಿಕಾ ದೇಶಗಳು ಹಾಗೂ ನ್ಯೂಯಾರ್ಕ್ಗೆ ಭೇಟಿ ನೀಡಿ, ಸ್ಪೇನ್ನ ರಾಜತಾಂತ್ರಿಕ ಪ್ರತಿನಿಧಿಯಾಗಿಯೂ ಗಮನ ಸೆಳೆದರು.
ಇದೀಗ ಅಂತಿಮವಾಗಿ, ವಾಯುಪಡೆ ತರಬೇತಿಗಾಗಿ ಮುರ್ಸಿಯಾದ ಜನರಲ್ ಏರ್ ಅಂಡ್ ಸ್ಪೇಸ್ ಅಕಾಡೆಮಿಯಲ್ಲಿ ಶಿಕ್ಷಣ ಪಡೆಯುತ್ತಿದ್ದು, ಪೈಲಟ್ ತರಬೇತಿಯಲ್ಲಿ ಮೊದಲ ಸೋಲೋ ಫ್ಲೈಟ್ ನೆರವೇರಿಸುವ ಮೂಲಕ ಇತಿಹಾಸದಲ್ಲೇ ಮೊದಲ ಬಾರಿಗೆ ಈ ಸಾಧನೆ ಮಾಡಿದ ಸ್ಪ್ಯಾನಿಷ್ ರಾಜಕುಮಾರಿಯಾಗಿ ಹೊರಹೊಮ್ಮಿದ್ದಾರೆ.
2023ರ ಅಕ್ಟೋಬರ್ 31ರಂದು, ತಮ್ಮ 18ನೇ ಜನ್ಮದಿನದಂದು, ಲಿಯೋನೋರ್ ಸ್ಪೇನ್ ಸಂಸತ್ತಿನ ಮುಂದೆ ಸಂವಿಧಾನಕ್ಕೆ ನಿಷ್ಠೆಯ ಪ್ರಮಾಣ ವಚನ ಸ್ವೀಕರಿಸಿದರು. ಬಳಿಕ ರಾಷ್ಟ್ರೀಯ ಹಾಗೂ ಅಂತರರಾಷ್ಟ್ರೀಯ ಕಾರ್ಯಕ್ರಮಗಳಲ್ಲಿ ಸಕ್ರಿಯವಾಗಿ ಭಾಗವಹಿಸುತ್ತಾ, ಜನರೊಂದಿಗೆ ನೇರ ಸಂಪರ್ಕ ಹೊಂದಿದ್ದಾರೆ. ಅಲ್ಲದೇ ದೇಶೀಯ ಹಾಗೂ ವಿದೇಶಿ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿ, ಸ್ಪೇನ್ನ ಪ್ರತಿನಿಧಿಯಾಗಿ ತಮ್ಮನ್ನು ತಾವು ಗುರುತಿಸಿಕೊಂಡಿದ್ದಾರೆ.
