ನವದೆಹಲಿ, ಡಿ.16: ನಮ್ಮ ದೇಹದ ಒಟ್ಟಾರೆ ಆರೋಗ್ಯವನ್ನು ನಿರ್ಧರಿಸುವ ಪ್ರಮುಖ ಅಂಶಗಳಲ್ಲಿ ಜೀರ್ಣಕ್ರಿಯೆ ಅತ್ಯಂತ ಮಹತ್ವದ್ದಾಗಿದೆ. ಜೀರ್ಣಕ್ರಿಯೆ ಸರಿಯಾಗಿಲ್ಲದಿದ್ದರೆ ಅಜೀರ್ಣ, ಗ್ಯಾಸ್ಟ್ರಿಕ್ ಸಮಸ್ಯೆ, ಮಲಬದ್ಧತೆ, ದಣಿವು ಹಾಗೂ ಮನಸ್ಸಿನ ಅಸ್ವಸ್ಥತೆ ಕೂಡ ಕಾಣಿಸಿಕೊಳ್ಳಬಹುದು. ಅದಕ್ಕಾಗಿಯೇ ತಜ್ಞರು ದಿನದ ಮೊದಲ ಊಟವಾದ ಬೆಳಗಿನ ಉಪಾಹಾರವನ್ನು ಅತ್ಯಂತ ಪೌಷ್ಟಿಕವಾಗಿರಿಸಲು ಸಲಹೆ ನೀಡುತ್ತಾರೆ.
ಜೀರ್ಣಾಂಗ ತಜ್ಞರ ಪ್ರಕಾರ, ಪ್ರೋಬಯಾಟಿಕ್, ಫೈಬರ್ ಮತ್ತು ಪ್ರೋಟೀನ್ ಸಮೃದ್ಧ ಆಹಾರಗಳು ಕರುಳಿನ ಆರೋಗ್ಯವನ್ನು ಸುಧಾರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಇವು ಕೇವಲ ಜೀರ್ಣಕ್ರಿಯೆಯನ್ನು ಮಾತ್ರವಲ್ಲದೆ, ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸಿ ದಿನವಿಡೀ ಆ್ಯಕ್ಟೀವ್ ಆಗಿ ಇರಲು ಸಹಾಯ ಮಾಡುತ್ತವೆ. ಹಾಗಾದರೆ ಆರೋಗ್ಯಕರ ಜೀರ್ಣಕ್ರಿಯೆಗೆ ಸೂಕ್ತವಾದ ಉಪಾಹಾರ ಆಯ್ಕೆಗಳು ಯಾವುವು? ಇಲ್ಲಿದೆ ಸಂಪೂರ್ಣ ವಿವರ.
ಓವರ್ನೈಟ್ ಓಟ್ಸ್ ಜತೆ ಚಿಯಾ ಬೀಜ ಮತ್ತು ಬೆರ್ರಿಗಳು
ಓಟ್ಸ್ ಅತ್ಯುತ್ತಮ ಪೌಷ್ಟಿಕ ಆಹಾರಗಳಲ್ಲಿ ಒಂದಾಗಿದೆ. ಇದರಲ್ಲಿ ಹೆಚ್ಚಿನ ಪ್ರಮಾಣದ ಫೈಬರ್, ಪ್ರೋಟೀನ್ ಮತ್ತು ಒಮೆಗಾ–3 ಕೊಬ್ಬಿನಾಮ್ಲಗಳು ಇರುತ್ತವೆ. ಚಿಯಾ ಬೀಜಗಳು ಜೀರ್ಣಕ್ರಿಯೆಯನ್ನು ಸುಗಮಗೊಳಿಸುವಲ್ಲಿ ಸಹಾಯಕವಾಗಿದ್ದು, ಕರುಳಿನ ಚಲನವಲನವನ್ನು ನಿಯಂತ್ರಿಸುತ್ತವೆ. ಬೆರ್ರಿಗಳು ಉತ್ಕರ್ಷಣ ನಿರೋಧಕಗಳಿಂದ ಸಮೃದ್ಧವಾಗಿದ್ದು ಜೀರ್ಣಾಂಗದ ಉರಿಯನ್ನು ಕಡಿಮೆ ಮಾಡುತ್ತವೆ.
ಅವಕಾಡೊ ಟೋಸ್ಟ್
ಅವಕಾಡೊ ಟೋಸ್ಟ್ ಇಂದು ಆರೋಗ್ಯ ಪ್ರಿಯರಲ್ಲಿ ಹೆಚ್ಚು ಜನಪ್ರಿಯವಾಗಿದೆ. ಸಂಪೂರ್ಣ ಧಾನ್ಯಗಳ ಬ್ರೆಡ್ನೊಂದಿಗೆ ಅವಕಾಡೊ ಸೇವಿಸಿದರೆ ಸಂಕೀರ್ಣ ಕಾರ್ಬೋಹೈಡ್ರೇಟ್, ಫೈಬರ್ ಮತ್ತು ಆರೋಗ್ಯಕರ ಕೊಬ್ಬುಗಳು ದೊರೆಯುತ್ತವೆ. ಇದು ಹೊಟ್ಟೆಯನ್ನು ಹೆಚ್ಚು ಸಮಯ ತುಂಬಿದಂತೆ ಇಟ್ಟು ಅತಿಯಾಗಿ ತಿನ್ನುವುದನ್ನು ತಡೆಯುತ್ತದೆ.
ತರಕಾರಿ ಉಪ್ಪಿಟ್ಟು
ನಮ್ಮ ಸಾಂಪ್ರದಾಯಿಕ ಉಪಾಹಾರಗಳಲ್ಲಿ ಉಪ್ಪಿಟ್ಟು ಕೂಡ ಒಂದು ಆರೋಗ್ಯಕರ ಆಯ್ಕೆಯಾಗಿದೆ. ಸಾಸಿವೆ, ಕರಿಬೇವಿನ ಎಲೆ, ಶುಂಠಿ ಮುಂತಾದ ಜೀರ್ಣಕ್ರಿಯೆ ಉತ್ತೇಜಿಸುವ ಮಸಾಲೆಗಳೊಂದಿಗೆ ವಿವಿಧ ತರಕಾರಿಗಳನ್ನು ಸೇರಿಸಿ ತಯಾರಿಸಿದ ಉಪ್ಪಿಟ್ಟು ಕರುಳಿನ ಆರೋಗ್ಯಕ್ಕೆ ಉತ್ತಮ. ಇದು ಶಕ್ತಿಯನ್ನು ನೀಡುವುದರ ಜೊತೆಗೆ ಜೀರ್ಣಕ್ರಿಯೆಯನ್ನು ಸುಧಾರಿಸುತ್ತದೆ.
ಬಾದಾಮಿ ಹಾಲು ಮತ್ತು ದಾಳಿಂಬೆ ಬೀಜಗಳೊಂದಿಗೆ ಚಿಯಾ ಫುಡ್
ಚಿಯಾ ಬೀಜಗಳನ್ನು ಬಾದಾಮಿ ಹಾಲಿನಲ್ಲಿ ನೆನೆಸಿ, ಮೇಲಿಂದ ದಾಳಿಂಬೆ ಬೀಜಗಳನ್ನು ಸೇರಿಸಿದರೆ ಇದು ಒಂದು ಸಂಪೂರ್ಣ ಪೌಷ್ಟಿಕ ಉಪಾಹಾರವಾಗುತ್ತದೆ. ಇದರಲ್ಲಿ ಉತ್ಕರ್ಷಣ ನಿರೋಧಕಗಳು, ವಿಟಮಿನ್ಗಳು ಹಾಗೂ ಆರೋಗ್ಯಕರ ಕೊಬ್ಬುಗಳು ಸಮೃದ್ಧವಾಗಿದ್ದು ಜೀರ್ಣಾಂಗ ವ್ಯವಸ್ಥೆಯನ್ನು ಬಲಪಡಿಸುತ್ತವೆ.
ತೆಂಗಿನಕಾಯಿ ಚಟ್ನಿಯೊಂದಿಗೆ ದೋಸೆ
ದೋಸೆ ಜೀರ್ಣಕ್ರಿಯೆಗೆ ಅತ್ಯಂತ ಉಪಯುಕ್ತ. ಉದ್ದಿನ ಬೇಳೆಯಿಂದ ತಯಾರಿಸಿದ ದೋಸೆಯಲ್ಲಿ ಪ್ರೋಟೀನ್ ಮತ್ತು ಫೈಬರ್ ಸಮೃದ್ಧವಾಗಿರುತ್ತದೆ. ತೆಂಗಿನಕಾಯಿ ಚಟ್ನಿ ಉತ್ತಮ ಕೊಬ್ಬುಗಳನ್ನು ನೀಡುವುದರಿಂದ ಪೋಷಕಾಂಶಗಳ ಹೀರಿಕೊಳ್ಳುವಿಕೆ ಸುಧಾರಿಸುತ್ತದೆ.
ಸೇಬು ಮತ್ತು ವಾಲ್ನಟ್ಗಳೊಂದಿಗೆ ಕ್ವಿನೋವಾ ಗಂಜಿ
ಕ್ವಿನೋವಾ ಒಂದು ಸಂಪೂರ್ಣ ಪ್ರೋಟೀನ್ ಆಹಾರವಾಗಿದ್ದು ಅಗತ್ಯವಾದ ಎಲ್ಲಾ ಅಮೈನೋ ಆಮ್ಲಗಳನ್ನು ಒದಗಿಸುತ್ತದೆ. ಸೇಬುಗಳಲ್ಲಿ ಇರುವ ಪೆಕ್ಟಿನ್ ಫೈಬರ್ ಜೀರ್ಣಕ್ರಿಯೆಗೆ ಸಹಾಯಕ. ವಾಲ್ನಟ್ಗಳು ಆರೋಗ್ಯಕರ ಕೊಬ್ಬುಗಳು ಮತ್ತು ಉತ್ಕರ್ಷಣ ನಿರೋಧಕಗಳನ್ನು ನೀಡುತ್ತವೆ.
