ಬೆಂಗಳೂರು, ನವೆಂಬರ್ 30: ಭೀಕರ ಚಳಿಯಲ್ಲಿ ಬಿಸಿಬಿಸಿ ರಸಂ-ಸಾಂಬಾರ್ ಕುಡಿಯುವ ಕನಸು ಕಾಣುತ್ತಿದ್ದಂತೆ ತರಕಾರಿ ಬೆಲೆ ಗಗನಕ್ಕೇರಿದ. ಸಾಮಾನ್ಯವಾಗಿ ಪ್ರತಿ ಅಡುಗೆಯಲ್ಲೂ ಕಾಣಸಿಗುವ ಎರಡು ಪ್ರಮುಖ ತರಕಾರಿಗಳು ಟೊಮೆಟೊ ಮತ್ತು ನುಗ್ಗೆಕಾಯಿ ಈ ಬಾರಿ ದಾಖಲೆಯ ಬೆಲೆಯಲ್ಲಿ ಮಾರಾಟವಾಗುತ್ತಿವೆ.
ಟೊಮೆಟೊ, ಯಾವಾಗಲೂ ಬೆಲೆಯಲ್ಲಿ ಏರಿಳಿತದ ಆಟವಾಡುವ ತರಕಾರಿ ಎಂದೇ ಖ್ಯಾತಿ. ಆದರೆ ಈ ಬಾರಿ ಅದು ಗಂಭೀರವಾಗಿ ಶತಕದ ಸಮೀಪ ನಿಂತಿದೆ. ಟೊಮೆಟೊ ಹೋಲ್‌ಸೇಲ್ ಮಾರ್ಕೆಟ್‌ನಲ್ಲಿ 15 ಕೆಜಿ ಬಾಕ್ಸ್‌ಗೆ 600-850 ರೂಪಾಯಿ ದರ ಕೇಳಿಬರುತ್ತಿದೆ. ಅಂದರೆ ಪ್ರತಿ ಕೆಜಿ ಹೋಲ್‌ಸೇಲ್ ದರ 50-60 ರೂಪಾಯಿ. ಬೆಂಗಳೂರಿನ ಚಿಲ್ಲರೆ ಮಾರುಕಟ್ಟೆಯಲ್ಲಿ ಗ್ರಾಹಕರಿಗೆ 70-80 ರೂಪಾಯಿಗೆ ಟೊಮೆಟೊ ಸಿಗುತ್ತಿದೆ. ಹೊರ ರಾಜ್ಯಗಳಿಂದ ಬೇಡಿಕೆ ಹೆಚ್ಚಾದರೂ ಸಾಕಷ್ಟು ಪೂರೈಕೆ ಇಲ್ಲದ ಕಾರಣ ದರ ಏರಿಕೆಯಾಗಿದೆ ಎಂದು ವ್ಯಾಪಾರಿಗಳು ಹೇಳುತ್ತಾರೆ.
ಆದರೆ ನುಗ್ಗೆಕಾಯಿ ಬೆಲೆ ಆಫಾತ ತಂದಿದೆ. ಒಂದು ಕಾಲದಲ್ಲಿ 30-40 ರೂಪಾಯಿ ಕೆಜಿಗೆ ಸಿಗುತ್ತಿದ್ದ ನುಗ್ಗೆಕಾಯಿ ಇಂದು 500-600 ರೂಪಾಯಿಗೆ ಜಿಗಿದಿದೆ. ಬೆಂಗಳೂರಿಗೆ ಪ್ರತಿದಿನ 100 ಟನ್ ನುಗ್ಗೆಕಾಯಿ ಆಗಮಿಸುತ್ತಿತ್ತು. ಆದರೆ ಅಕಾಲಿಕ ಮಳೆ, ಚಂಡಮಾರುತ ಮತ್ತು ವಾತಾವರಣ ಬದಲಾವಣೆಯಿಂದ ಬೆಳೆ ಹಾನಿಯಾಗಿ ಈಗ ಕೇವಲ 30-40 ಟನ್ ಮಾತ್ರ ಬರುತ್ತಿದೆ. ಪೂರೈಕೆಯಲ್ಲಿ ಶೇ.60ರಷ್ಟು ಕುಸಿತ ಕಂಡಿದೆ. ತಮಿಳುನಾಡಿನಲ್ಲಿ ಹೊಸ ಬೆಳೆ ಬರುವವರೆಗೆ (ಜನವರಿ-ಫೆಬ್ರವರಿ) ಈ ದರ ಮುಂದುವರಿಯುವ ಸಾಧ್ಯತೆ ಇದೆ ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ.
ಇನ್ನುಳಿದ ತರಕಾರಿಗಳ ಸ್ಥಿತಿಯು ಹೆಚ್ಚು ಭಿನ್ನವಾಗಿಲ್ಲ. ನೂರರ ಗಡಿ ದಾಟುತ್ತಿರುವ ಅವರೆಕಾಯಿ, ತೊಂಡೆಕಾಯಿ, ಹುರಳಿಕಾಯಿ, ಹಸಿಮೆಣಸಿನಕಾಯಿಗಳು ಜನರ ಕೈ ಜೇಬಿಗೆ ದೊಡ್ಡ ಹೊಡೆತ ನೀಡುತ್ತಿವೆ.
ಇಂದಿನ (30-11-2025) ಬೆಂಗಳೂರು ಚಿಲ್ಲರೆ ತರಕಾರಿ ದರ (ಪ್ರತಿ ಕೆಜಿ)
- ನುಗ್ಗೆಕಾಯಿ : ₹500-600
- ಹಣ್ಣು ಹುರಳಿಕಾಯಿ : ₹100-120
- ಅವರೆಕಾಯಿ : ₹80-100
- ಹಸಿಮೆಣಸಿನಕಾಯಿ : ₹80-100
- ತೊಂಡೆಕಾಯಿ : ₹80-100
- ಗ್ರೀನ್ ಬಟಾಣಿ : ₹80-100
- ಬೀನ್ಸ್ : ₹60-80
- ಕ್ಯಾರೆಟ್ : ₹60-80
- ಬೆಂಡೇಕಾಯಿ : ₹60-80
- ತೊಗರಿಕಾಯಿ : ₹70-80
- ಬೀಟ್ರೂಟ್ : ₹60
- ಟೊಮೆಟೊ : ₹70-80
ಅಕಾಲಿಕ ಮಳೆ ಮತ್ತು ಚಂಡಮಾರುತ ಇನ್ನೂ ಮುಂದುವರಿದಿದ್ದು, ಡಿಸೆಂಬರ್‌ನಲ್ಲಿಯೂ ತರಕಾರಿ ದರ ಕಡಿಮೆಯಾಗುವ ಲಕ್ಷಣ ಕಾಣುತ್ತಿಲ್ಲ. ಜನವರಿಯಲ್ಲಿ ತಮಿಳುನಾಡು-ಆಂಧ್ರದಿಂದ ಹೊಸ ಬೆಳೆ ಬಂದರೆ ಮಾತ್ರ ಸ್ವಲ್ಪ ನಿರಾಳ ಇರಲಿದೆ.
ದಿಢೀರ್ ಹೆಚ್ಚಾದ ಟೊಮೆಟೊ ರೇಟ್‌: ಬೆಲೆ ಏರಿಕೆಯಿಂದ ಕಂಗಾಲಾದ ಗ್ರಾಹಕರು
ಚಿಕ್ಕಬಳ್ಳಾಪುರ, ನ.30: ಚಿಕ್ಕಬಳ್ಳಾಪುರ ಮತ್ತು ಬಂಗಾರಪೇಟೆಯಲ್ಲಿ ಕಳೆದ 8-10 ದಿನಗಳಿಂದ ಟೊಮೆಟೋ ಬೆಲೆ ಸತತವಾಗಿ ಏರುತ್ತಿದೆ. ಪ್ರತಿ ಕೆಜಿಗೆ 100 ರೂಪಾಯಿ ಗಡಿಯನ್ನು ಮುಟ್ಟಿರುವ ಟೊಮೆಟೋ, ಉತ್ತಮ ದರ್ಜೆಯದು ಹಾಪ್‌ಕಾಮ್‌ಗಳಲ್ಲಿ ಕೆ.ಜಿಗೆ ₹80 ರಿಂದ ಮಾರಾಟವಾಗುತ್ತಿದೆ. ಈ ಬೆಲೆ ಏರಿಕೆಯ ಹಿಂದೆ ಮುಖ್ಯ ಕಾರಣವೆಂದರೆ ಮುಖ್ಯವಾಗಿ ಇದು ಟೊಮೆಟೋ ಸೀಸನ್ ಅಲ್ಲ ಜೊತೆಗೆ ಟೊಮೆಟೋ ಇಳುವರಿ ಕುಸಿತವಾಗಿದೆ ಇದರಿಂದಾಗಿ ಮಾರುಕಟ್ಟೆಗೆ ಬರುವ ಟೊಮೆಟೋದ ಪ್ರಮಾಣ ಗಮನಾರ್ಹವಾಗಿ ಕಡಿಮೆಯಾಗಿದೆ.
ಸೀಸನ್‌ಗೆ ಹೊರತಾದ ಕಾಲವಾದ್ದರಿಂದ, ರೈತರು ಕಡಿಮೆ ಪ್ರಮಾಣದಲ್ಲಿ ಟೊಮೆಟೋ ಬೆಳೆಯನ್ನು ಮಾರುಕಟ್ಟೆಗೆ ತಲುಪಿಸುತ್ತಿದ್ದಾರೆ. ಸಾಮಾನ್ಯವಾಗಿ, ಚಿಕ್ಕಬಳ್ಳಾಪುರ ಎಪಿಎಂಸಿ ಮಾರುಕಟ್ಟೆಗೆ ದಿನಕ್ಕೆ ಸುಮಾರು 800 ರಿಂದ 1000 ಬಾಕ್ಸ್‌ಗಳಷ್ಟು ಟೊಮೆಟೋ ಸರಬರಾಜಾಗುತ್ತಿತ್ತು. ಆದರೆ ಇತ್ತೀಚೆಗೆ ಈ ಪ್ರಮಾಣ ಅರ್ಧದಷ್ಟು ಕುಸಿದಿದೆ ಎಂದು ತಿಳಿದುಬಂದಿದೆ. ಕೋಲಾರದಿಂದಲೂ ಟೊಮೆಟೋದ ಸರಬರಾಜು ಕಡಿಮೆಯಾಗಿದೆ. ಪೂರೈಕೆ ಕಡಿಮೆಯಾದಂತೆಲ್ಲಾ ಬೇಡಿಕೆ ಅಧಿಕವಾಗಿ, ಬೆಲೆಗಳು ಏರುತ್ತಲೇ ಇವೆ.
ಚಿಕ್ಕಬಳ್ಳಾಪುರ ಎಪಿಎಂಸಿ ಮಾರುಕಟ್ಟೆಯಲ್ಲಿ, ಉತ್ತಮ ದರ್ಜೆಯ ‘ಸಾಹು’ ಹೈಬ್ರಿಡ್ ಟೊಮೆಟೋವಿನ 15 ಕೆ.ಜಿ ಬಾಕ್ಸ್, 500 ರೂ. ಇಂದ 1500 ರ ವರೆಗೆ ಮಾರಾಟವಾಗುತ್ತಿದೆ. ಶನಿವಾರ ನಡೆದ ಬಂಗಾರಪೇಟೆ ಎಪಿಎಂಸಿ ಮಾರುಕಟ್ಟೆಯಲ್ಲಿ,14 ಕೆ.ಜಿ ಬಾಕ್ಸ್ ಟೊಮೆಟೋ ₹500 ರಿಂದ ₹1100ರ ವರೆಗೆ ಹರಾಜು ರೇಟುಗಳಲ್ಲಿ ಮಾರಾಟವಾಗಿದೆ. ಚಿಂತಾಮಣಿ ಎಪಿಎಂಸಿ ಮಾರುಕಟ್ಟೆಯಲ್ಲಿ ₹600 ರಿಂದ ₹1200ರ ವರೆಗೆ ಬೆಲೆ ನಿಗದಿಯಾಗಿದೆ.
ಕೇವಲ ಎರಡು ವಾರಗಳ ಹಿಂದೆ ಟೊಮೆಟೋ ಕೆ.ಜಿಗೆ ₹15-20 ರಂತೆ ಮಾರಾಟವಾಗುತ್ತಿದ್ದರೆ, ಈಗ ಅದೇ ಟೊಮೆಟೋ ₹50 ರಿಂದ ₹90 ರ ವರೆಗೆ ಏರಿಕೆಯಾಗಿದೆ. ಈ ಬೆಲೆ ಏರಿಕೆಯಿಂದ ರೈತರು ಸಂಭಾವ್ಯ ಲಾಭ ಪಡೆದಿದ್ದರೂ, ಗ್ರಾಹಕರಿಗೆ ತಲೆಬಿಸಿಯಾಗಿದೆ. ದಿನನಿತ್ಯದ ಅವಶ್ಯಕತೆಯಾದ ಟೊಮೆಟೋ ಕೊಳ್ಳುವುದು ಈಗ ಹೆಚ್ಚಿನ ಖರ್ಚಿನ ಕಾರ್ಯವಾಗಿದೆ. ಬೆಲೆ ಏರಿಕೆಯ ನಡುವೆ, ರೈತರು ತಮ್ಮ ಬೆಳೆಯಿಂದ ಉತ್ತಮ ಬೆಲೆ ಪಡೆಯುವುದನ್ನು ನೋಡಿ ಸಂತೃಪ್ತರಾಗಿದ್ದಾರೆ, ಆದರೆ ಈ ಸಂಭಾವ್ಯ ಲಾಭವೂ ಸ್ಥಿರವಾದ ಪೂರೈಕೆಯ ಮೇಲೆ ಅವಲಂಬಿತವಾಗಿದೆ.
ಹವಾಮಾನ ಸನ್ನಿವೇಶ ಮತ್ತು ಬೆಳೆಯ ಸಮಯ ಪರಿಗಣಿಸಿದರೆ, ಟೊಮೆಟೋದ ಈ ಬೆಲೆ ಏರಿಕೆ ಇನ್ನೂ ಕೆಲವು ದಿನಗಳು ಮುಂದುವರೆಯುವ ಸಾಧ್ಯತೆಯಿದೆ. ಹೊಸ ಬೆಳೆ ಮಾರುಕಟ್ಟೆಗೆ ಬರುವವರೆಗೂ ಪರಿಸ್ಥಿತಿ ಹಾಗೇ ಇರಬಹುದು ಎಂದು ವ್ಯವಸಾಯ ತಜ್ಞರು ಅಭಿಪ್ರಾಯಪಡುತ್ತಾರೆ. ರೈತರು ತಮ್ಮ ಉತ್ಪನ್ನಕ್ಕೆ ಉತ್ತಮ ಬೆಲೆ ಸಿಗುತ್ತಿರುವುದಕ್ಕೆ ಸಂತಸ ವ್ಯಕ್ತಪಡಿಸಿದ್ದಾರೆ.
