ಕನ್ನಡಿಗರಿಗೆ ತಮ್ಮ ಭಾಷೆಯ ಮೇಲಿನ ಅಭಿಮಾನವನ್ನು ಮತ್ತಷ್ಟು ಹೆಚ್ಚಿಸುವಂತೆ ಮಾಡಿದೆ ಕ್ಯಾಡ್ಬರೀಸ್ ಡೈರಿ ಮಿಲ್ಕ್. ಚಾಕೊಲೇಟ್ ಪ್ಯಾಕಿಂಗ್ನಲ್ಲಿ ಕನ್ನಡ ಪದಗಳನ್ನು ಬಳಸಿ, ಕನ್ನಡ ಸಂಸ್ಕೃತಿಗೆ ಗೌರವ ಸಲ್ಲಿಸಿರುವ ಈ ಕಂಪನಿಯ ವಿಶಿಷ್ಟ ಪ್ರಯತ್ನಕ್ಕೆ ಕನ್ನಡಿಗರು ಫಿದಾ ಆಗಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಈ ಕನ್ನಡ ಪದಗಳಿರುವ ಚಾಕೊಲೇಟ್ ಪ್ಯಾಕಿಂಗ್ನ ಫೋಟೋಗಳು ವೈರಲ್ ಆಗುತ್ತಿವೆ.
ಕ್ಯಾಡ್ಬರೀಸ್ ಡೈರಿ ಮಿಲ್ಕ್ ತನ್ನ ಚಾಕೊಲೇಟ್ ಪ್ಯಾಕಿಂಗ್ನಲ್ಲಿ ದೈನಂದಿನ ಬಳಕೆಯ ಕನ್ನಡ ಪದಗಳಾದ ಧನ್ಯವಾದ, ಏನು, ಹೇಗಿದ್ದೀಯಾ, ಕ್ಷಮಿಸಿ, ಸ್ವಲ್ಪ, ಸಂಜೆ, ಬೆಳಿಗ್ಗೆ, ರಾತ್ರಿ ಮುಂತಾದವುಗಳನ್ನು ಮುದ್ರಿಸಿದೆ. ಇದರ ಜೊತೆಗೆ “ಸ್ವಲ್ಪ ಸ್ವಲ್ಪ ಕನ್ನಡ ವೇರಿ ವೇರಿ ಸ್ವೀಟ್” ಎಂಬ ಸಾಲನ್ನು ಸಹ ಪ್ರಿಂಟ್ ಮಾಡಿ, ಕನ್ನಡಿಗರ ಮನಸ್ಸಿಗೆ ನಾಟುವಂತೆ ಮಾಡಿದೆ.
ಕನ್ನಡ ಕಲಿಕೆಗೆ ಕ್ಯಾಡ್ಬರೀಸ್ನ ಕೊಡುಗೆ
ಈ ಪ್ಯಾಕಿಂಗ್ನ ವಿಶೇಷತೆ ಏನೆಂದರೆ, ಕನ್ನಡ ಬಾರದವರಿಗೂ ಕನ್ನಡ ಪದಗಳನ್ನು ಕಲಿಯಲು ಸಹಾಯವಾಗುವಂತೆ ಇಂಗ್ಲಿಷ್ನಲ್ಲಿ ಅನುವಾದವನ್ನು ನೀಡಲಾಗಿದೆ. ಉದಾಹರಣೆಗೆ, “ಧನ್ಯವಾದ” ಎಂದರೆ “Thank You”, “ಏನು” ಎಂದರೆ “What” ಎಂದು ಇಂಗ್ಲಿಷ್ನಲ್ಲೇ ವಿವರಿಸಲಾಗಿದೆ. ಈ ಮೂಲಕ ಕನ್ನಡ ಭಾಷೆಯ ಸರಳ ಪದಗಳನ್ನು ಎಲ್ಲರಿಗೂ ಪರಿಚಯಿಸುವ ಪ್ರಯತ್ನವನ್ನು ಕ್ಯಾಡ್ಬರೀಸ್ ಮಾಡಿದೆ.
ಕನ್ನಡಿಗರಿಂದ ಮೆಚ್ಚುಗೆಯ ಸುರಿಮಳೆ
ಕನ್ನಡ ಭಾಷೆಗೆ ಈ ರೀತಿಯ ಗೌರವ ಸಲ್ಲಿಸಿರುವ ಕ್ಯಾಡ್ಬರೀಸ್ಗೆ ಕನ್ನಡಿಗರು ಸಾಮಾಜಿಕ ಜಾಲತಾಣಗಳಲ್ಲಿ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ಈ ಚಾಕೊಲೇಟ್ ಪ್ಯಾಕಿಂಗ್ಗಳು ಕೇವಲ ಸಿಹಿತಿಂಡಿಯಾಗದೆ, ಕನ್ನಡ ಭಾಷೆಯ ಪ್ರಚಾರಕ್ಕೂ ಸಹಾಯಕವಾಗಿವೆ ಎಂದು ಅನೇಕರು ಅಭಿಪ್ರಾಯಪಟ್ಟಿದ್ದಾರೆ. ಕನ್ನಡ ಸಂಸ್ಕೃತಿಯನ್ನು ಜಾಗತಿಕವಾಗಿ ತಲುಪಿಸುವ ಈ ಕ್ರಮಕ್ಕೆ ಕನ್ನಡಿಗರು ಹೆಮ್ಮೆಯಿಂದ ಬೆನ್ನುತಟ್ಟುತ್ತಿದ್ದಾರೆ.
ಕನ್ನಡದ ಸರಳ ಪದಗಳ ಪಾಠ
ಕ್ಯಾಡ್ಬರೀಸ್ ಡೈರಿ ಮಿಲ್ಕ್ ಚಾಕೊಲೇಟ್ ಪ್ಯಾಕಿಂಗ್ನಲ್ಲಿ ಮುದ್ರಿತವಾಗಿರುವ ಕೆಲವು ಕನ್ನಡ ಪದಗಳು ಇಂಗ್ಲಿಷ್ ಅನುವಾದದೊಂದಿಗೆ ಈ ಕೆಳಗಿನಂತಿವೆ:
- ಧನ್ಯವಾದ (dhanyavada) – Thank You
- ಏನು? (enu) – What?
- ಕ್ಷಮಿಸಿ (kshamisi) – Sorry
- ಹೇಗಿದ್ದೀಯಾ? (hegiddiya?) – How are you?
- ಸ್ವಲ್ಪ (swalpa) – Little
- ಸಹಾಯ ಬೇಕಾ? (sahaya beka) – Need help?
- ಸಂಜೆ (sanje) – Evening
- ಬೆಳಿಗ್ಗೆ (beligge) – Morning
- ರಾತ್ರಿ (ratri) – Night
ಕನ್ನಡ ಭಾಷೆಯ ಸಿಹಿಯನ್ನು ಚಾಕೊಲೇಟ್ನೊಂದಿಗೆ ಸವಿಯುವ ಈ ಪ್ರಯತ್ನವು ಕನ್ನಡಿಗರಿಗೆ ಹೆಮ್ಮೆಯ ಕ್ಷಣವಾಗಿದೆ. ಕ್ಯಾಡ್ಬರೀಸ್ ಡೈರಿ ಮಿಲ್ಕ್ನ ಈ ಕನ್ನಡ ಪ್ರೀತಿಯು ಭಾಷೆಯನ್ನು ಜನಪ್ರಿಯಗೊಳಿಸುವಲ್ಲಿ ಒಂದು ಹೆಜ್ಜೆ ಮುಂದಿಟ್ಟಿದೆ.
