ಉತ್ತರ ಪ್ರದೇಶದ ಸೋನ್ಭದ್ರದಲ್ಲಿ ನಡೆದ ಒಂದು ಅಚ್ಚರಿಯ ಘಟನೆ ಎಲ್ಲರ ಗಮನ ಸೆಳೆದಿದೆ. ಫೇಸ್ಬುಕ್ನಲ್ಲಿ ಆರಂಭವಾದ ಪ್ರೀತಿಯ ಕಥೆಯೊಂದು ಮದುವೆಯಾದ ಬಳಿಕ ಅನಿರೀಕ್ಷಿತ ತಿರುವು ಪಡೆದಿದೆ. ಯುವಕನೊಬ್ಬ ತನ್ನ ಪತ್ನಿಯನ್ನೇ “ನೀನು ಯಾರು?” ಎಂದು ಪ್ರಶ್ನಿಸಿ, ವಿವಾಹವನ್ನೇ ಒಪ್ಪಿಕೊಳ್ಳಲು ನಿರಾಕರಿಸಿದ್ದಾನೆ. ಈ ಘಟನೆಯಿಂದ ಆಘಾತಗೊಂಡ ಯುವತಿ, ಯುವಕನ ಮನೆಯ ಮುಂದೆ ಧರಣಿ ಕುಳಿತು ನ್ಯಾಯಕ್ಕೆ ಆಗ್ರಹಿಸಿದ್ದಾಳೆ. ಈ ಪ್ರಕರಣ ಈಗ ಪೊಲೀಸ್ ಠಾಣೆಯ ಮೆಟ್ಟಿಲೇರಿದೆ.
ಸೋನ್ಭದ್ರದ ಯುವಕ ಮತ್ತು ಜಾರ್ಖಂಡ್ನ ಯುವತಿಯ ನಡುವಿನ ಸಂಬಂಧ ಫೇಸ್ಬುಕ್ನಲ್ಲಿ ಫ್ರೆಂಡ್ ರಿಕ್ವೆಸ್ಟ್ನಿಂದ ಶುರುವಾಯಿತು. ಆರಂಭದಲ್ಲಿ ಸಾಮಾನ್ಯ ಆನ್ಲೈನ್ ಚಾಟಿಂಗ್ನಿಂದ ಪರಿಚಯವಾದ ಈ ಜೋಡಿ, ಕ್ರಮೇಣ ವಿಡಿಯೊ ಕಾಲ್ಗಳ ಮೂಲಕ ಹತ್ತಿರವಾಯಿತು. ಚಾಟಿಂಗ್ನಿಂದ ಆರಂಭವಾದ ಸ್ನೇಹವು ಶೀಘ್ರವೇ ಪ್ರೀತಿಯಾಗಿ, ಪ್ರೀತಿಯಿಂದ ಮದುವೆಯ ತೀರ್ಮಾನಕ್ಕೆ ಕೊಂಡೊಯಿತು. ಇಬ್ಬರೂ ಖುದ್ದಾಗಿ ಭೇಟಿಯಾಗಿ, ಸ್ಥಳೀಯ ದೇವಸ್ಥಾನದಲ್ಲಿ ಸಪ್ತಪದಿ ಸುತ್ತುವ ಮೂಲಕ ವಿವಾಹವಾದರು ಎಂದು ತಿಳಿದುಬಂದಿದೆ.
ವಿವಾಹದ ನಂತರ ಯುವತಿ ತನ್ನ ಕುಟುಂಬವನ್ನು ತೊರೆದು, ಯುವಕನೊಂದಿಗೆ ಹೊಸ ಜೀವನ ಆರಂಭಿಸಲು ಅವನ ಮನೆಗೆ ತೆರಳಿದಳು. ಆದರೆ, ಸೋನ್ಭದ್ರದ ಕಾಲೊನಿಯಲ್ಲಿರುವ ಯುವಕನ ಮನೆಗೆ ತಲುಪಿದ ಯುವತಿಗೆ ಅನಿರೀಕ್ಷಿತ ಆಘಾತವೊಂದು ಕಾದಿತ್ತು. ಯುವಕ ಆಕೆಯನ್ನು ಸ್ವಾಗತಿಸುವ ಬದಲು, “ನೀನು ಯಾರು? ನನಗೆ ಗೊತ್ತಿಲ್ಲ” ಎಂದು ತಿರಸ್ಕರಿಸಿದನು. ತಾನು ಆತನ ಕಾನೂನುಬದ್ಧವಾಗಿ ಪತ್ನಿ ಎಂದು ಯುವತಿ ಒತ್ತಾಯಿಸಿದರೂ, ಯುವಕ ವಿವಾಹವನ್ನೇ ನಿರಾಕರಿಸಿದನು. ಈ ಘಟನೆಯಿಂದ ಆಘಾತಗೊಂಡ ಯುವತಿ ಕಣ್ಣೀರಿಡುತ್ತಾ ಯುವಕನ ಮನೆಯ ಮುಂದೆ ಧರಣಿ ಕುಳಿತಳು.
ಯುವತಿಯ ಧರಣಿಯಿಂದ ಸ್ಥಳದಲ್ಲಿ ಜನಸಂದಣಿ ಜಮಾಯಿಸಿತ್ತು. ವಿಷಯ ಗಂಭೀರವಾದ ಹಿನ್ನೆಲೆಯಲ್ಲಿ ಅನ್ಪಾರಾ ಪೊಲೀಸ್ ಠಾಣೆಯ ಅಧಿಕಾರಿಗಳು ಮಧ್ಯಸ್ಥಿಕೆಗೆ ಧಾವಿಸಿದರು. ಯುವತಿ ತನ್ನ ದೂರಿನಲ್ಲಿ, ಫೇಸ್ಬುಕ್ ಮೂಲಕ ಯುವಕ ಪರಿಚಯವಾಗಿ, ವಿವಾಹದ ಭರವಸೆ ನೀಡಿ, ಈಗ ಮೋಸಗೊಳಿಸಿದ್ದಾನೆ ಎಂದು ಆರೋಪಿಸಿದ್ದಾಳೆ. ತನ್ನನ್ನು ಕಾನೂನುಬದ್ಧವಾಗಿ ಪತ್ನಿಯಾಗಿ ಸ್ವೀಕರಿಸಬೇಕೆಂದು ಒತ್ತಾಯಿಸಿದ್ದಾಳೆ. ಅಲ್ಲದೆ, ತನ್ನ ಹಕ್ಕುಗಳ ರಕ್ಷಣೆಗಾಗಿ ನ್ಯಾಯಕ್ಕೆ ಮನವಿ ಮಾಡಿದ್ದಾಳೆ.
ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿರುವ ಪೊಲೀಸರು ತನಿಖೆಯನ್ನು ಆರಂಭಿಸಿದ್ದಾರೆ. ವಿವಾಹದ ಕಾನೂನುಬದ್ಧತೆ, ಯುವತಿಯ ಆರೋಪಗಳ ಸತ್ಯಾಸತ್ಯತೆಯನ್ನು ಪರಿಶೀಲಿಸಲಾಗುತ್ತಿದೆ. ಯುವಕನ ವಿರುದ್ಧ ಆರೋಪಗಳು ಸಾಬೀತಾದರೆ, ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.
