ದಕ್ಷಿಣ ಕನ್ನಡ (ಆಗಸ್ಟ್ 12): ಧರ್ಮಸ್ಥಳದಲ್ಲಿ ಅನಾಮಿಕ ದೂರುದಾರನ ಸುಳಿವಿನ ಮೇಲೆ ವಿಶೇಷ ತನಿಖಾ ತಂಡ (SIT) ನಡೆಸುತ್ತಿರುವ ಉತ್ಖನನ ಕಾರ್ಯದಲ್ಲಿ 13ನೇ ಪಾಯಿಂಟ್‌ನಲ್ಲಿ 14 ಅಡಿ ಆಳ ಅಗೆದರೂ ಯಾವುದೇ ಅಸ್ತಿಪಂಜರ ಅಥವಾ ಕಳೇಬರ ಸಿಗಲಿಲ್ಲ. ಈ ಸ್ಥಳದಲ್ಲಿ ಕೇವಲ ನೀರು ಉಕ್ಕಿ ಬರುತ್ತಿದೆ. ಇದರಿಂದ ಶೋಧ ಕಾರ್ಯಕ್ಕೆ ತಾತ್ಕಾಲಿಕ ತಡೆಯಾಗಿದ್ದು, ನೀರನ್ನು ಹೊರಹಾಕಲು ಮೋಟರ್ ಪಂಪ್‌ಗಳನ್ನು ಅಳವಡಿಸಲಾಗಿದೆ. ಹಿಟಾಚಿ ಯಂತ್ರಗಳು ಕೆಲಸಕ್ಕೆ ಬ್ರೇಕ್ ಹಾಕಿವೆ.
ಹಿನ್ನೆಲೆ
ಧರ್ಮಸ್ಥಳದಲ್ಲಿ ಸ್ವಚ್ಛತಾ ಕಾರ್ಯಕರ್ತನೊಬ್ಬರು ಅನಾಮಿಕ ದೂರು ನೀಡಿ, ಕಳೆದ ಹಲವು ವರ್ಷಗಳಿಂದ ನೂರಾರು ಶವಗಳನ್ನು ಕಾಡಿನಲ್ಲಿ ಹೂತು ಹಾಕಿದ್ದಾರೆ ಎಂದು ಆರೋಪಿಸಿದ್ದರು. ಕರ್ನಾಟಕ ಸರ್ಕಾರವು ತಕ್ಷಣ ವಿಶೇಷ ತನಿಖಾ ತಂಡವನ್ನು ರಚಿಸಿ, ದೂರುದಾರನು ತೋರಿಸಿದ 13 ಸ್ಥಳಗಳಲ್ಲಿ ಉತ್ಖನನ ಆರಂಭಿಸಿತ್ತು. ಇದುವರೆಗೂ ಕೆಲವು ಸ್ಥಳಗಳಲ್ಲಿ ಅಸ್ತಿಪಂಜರಗಳು ಪತ್ತೆಯಾಗಿವೆ. ಉದಾಹರಣೆಗೆ, 6ನೇ ಸೈಟ್‌ನಲ್ಲಿ ಪೂರ್ಣ ಅಸ್ತಿಪಂಜರ ಸಿಕ್ಕಿದೆ. 11ನೇ ಸೈಟ್ ಬಳಿ ಹೊಸ ಸ್ಥಳದಲ್ಲಿ ತಲೆಬುರುಡೆ ಮತ್ತು ಕೆಲವು ಮೂಳೆಗಳು ದೊರೆತಿವೆ. ಆದರೆ ಇತರ ಕೆಲವು ಸೈಟ್‌ಗಳಲ್ಲಿ ಏನೂ ಸಿಗಲಿಲ್ಲ.
ಇದೀಗ 13ನೇ ಪಾಯಿಂಟ್ ಅತ್ಯಂತ ಮುಖ್ಯವಾದದ್ದು ಎಂದು ಪರಿಗಣಿಸಲಾಗಿತ್ತು. ನೇತ್ರಾವತಿ ನದಿ ತೀರದ ಕಾಡಿನಲ್ಲಿ ಈ ಸ್ಥಳವಿದ್ದು, ದೂರುದಾರನು ಇಲ್ಲಿ 20 ಅಡಿ ಆಳದಲ್ಲಿ ಶವಗಳಿರುವುದಾಗಿ ಹೇಳಿದ್ದನು. SIT ತಂಡವು ಮೊದಲು ಗ್ರೌಂಡ್ ಪೆನೆಟ್ರೇಟಿಂಗ್ ರೇಡಾರ್ (GPR) ಯಂತ್ರ ಬಳಸಿ ಶೋಧಿಸಿತ್ತು. ಆದರೆ ಯಾವುದೇ ಕುರುಹು ಸಿಗದಿದ್ದರೂ, ದೂರುದಾರನ ನಂಬಿಕೆಯ ಮೇಲೆ ಉತ್ಖನನ ಆರಂಭಿಸಲಾಯಿತು. ದೊಡ್ಡ ಹಿಟಾಚಿ ಮತ್ತು ಸಣ್ಣ ಹಿಟಾಚಿ ಯಂತ್ರಗಳನ್ನು ಬಳಸಿ ಅಗೆಯಲಾಯಿತು. ಆರಂಭದಲ್ಲಿ ಮಣ್ಣು ತೆಗೆಯುವ ಕೆಲಸ ಸುಗಮವಾಗಿ ಸಾಗಿತ್ತು. ಆದರೆ 14 ಅಡಿ ಆಳಕ್ಕೆ ಬಂದಾಗ ಒಳಗಿಂದ ನೀರು ಮಿಶ್ರಿತ ಮಣ್ಣು ಹೊರಬರಲು ಆರಂಭಿಸಿತ್ತು. ಗುಂಡಿಯಲ್ಲಿ ನೀರು ಉಕ್ಕಿ ಬರಲು ಶುರುವಾಯಿತು. ಇದರಿಂದ ಸಣ್ಣ ಹಿಟಾಚಿ ಕೆಲಸ ನಿಲ್ಲಿಸಲಾಯಿತು. ದೊಡ್ಡ ಯಂತ್ರವೂ ಸ್ಥಗಿತಗೊಂಡಿತ್ತು.
ನೀರನ್ನು ಹೊರಹಾಕುವುದು SIT ಸಿಬ್ಬಂದಿಗಳು ಹರಸಾಹಸ ಪಟ್ಟು ಮೋಟರ್ ಪಂಪ್ ಸೆಟ್ ಅಳವಡಿಸಿದರು. ಆದರೆ ಮೊದಲ ಪಂಪ್ ಕೈಕೊಟ್ಟ ಕಾರಣ, ಮತ್ತೊಂದು ಪಂಪ್ ತರಲಾಯಿತು. ಸ್ಥಳದ ಪಕ್ಕದಲ್ಲೇ ನೇತ್ರಾವತಿ ನದಿ ಅಣೆಕಟ್ಟು ಇರುವುದರಿಂದ, ಹೊರಬರುವ ನೀರನ್ನು ನದಿಗೆ ಬಿಡಲು ಪ್ರಯತ್ನಿಸಲಾಗುತ್ತಿದೆ. ಈ ಪ್ರಕ್ರಿಯೆಯು ಸಮಯ ತೆಗೆದುಕೊಳ್ಳುತ್ತಿದ್ದು, ನೀರು ತೆರವುಗೊಂಡ ನಂತರ ಮತ್ತೆ ಅಗೆಯುವ ಸಾಧ್ಯತೆಯಿದೆ. ಇದುವರೆಗೂ ಅಗೆದ ಗುಂಡಿಯಲ್ಲಿ ಪ್ಲಾಸ್ಟಿಕ್ ಕಸ, ಗಿಡಗಳ ಬೇರುಗಳು ಮತ್ತು ಇತರ ಅವಶೇಷಗಳು ಮಾತ್ರ ಸಿಕ್ಕಿವೆ. ಯಾವುದೇ ಮಾನವ ಮೂಳೆಗಳು ಪತ್ತೆಯಾಗಿಲ್ಲ.
SIT ಅಧಿಕಾರಿ ಜಿತೇಂದ್ರ ಕುಮಾರ್ ದಯಾಮ ಅವರು ಸ್ಥಳದಲ್ಲೇ ಇದ್ದು, ತನಿಖೆಯನ್ನು ಮೇಲ್ವಿಚಾರಣೆ ಮಾಡುತ್ತಿದ್ದಾರೆ. ದೂರುದಾರನ ಸುಳಿವುಗಳ ಮೇಲೆ ಪೂರ್ಣ ನಂಬಿಕೆಯಿಟ್ಟು ಕಾರ್ಯಾಚರಣೆ ಮುಂದುವರೆದಿದೆ.
