ಕನ್ನಡ ಚಿತ್ರರಂಗದ ಜನಪ್ರಿಯ ನಟ ಧ್ರುವ ಸರ್ಜಾ ವಿರುದ್ಧ ಮುಂಬೈನ ಅಂಬೋಲಿ ಪೊಲೀಸ್ ಠಾಣೆಯಲ್ಲಿವಂಚನೆ ಆರೋಪದಡಿ ಎಫ್‌ಐಆರ್ ದಾಖಲಾಗಿದೆ. ಚಿತ್ರ ನಿರ್ದೇಶಕ ಮತ್ತು ನಿರ್ಮಾಪಕ ರಾಘವೇಂದ್ರ ಹೆಗಡೆ ಅವರ ದೂರಿನ ಆಧಾರದ ಮೇಲೆ ಈ ಕ್ರಮ ಕೈಗೊಳ್ಳಲಾಗಿದೆ. ಧ್ರುವ ಸರ್ಜಾ ಅವರು ತಮ್ಮ ಒಪ್ಪಂದದ ಬದ್ಧತೆಗಳನ್ನು ಪೂರೈಸದೆ, ಹೆಗಡೆಯವರಿಂದ 3.15 ಕೋಟಿ ರೂಪಾಯಿಗಳನ್ನು ಪಡೆದುಕೊಂಡು ವಂಚಿಸಿದ್ದಾರೆ ಎಂದು ಆರೋಪಿಸಲಾಗಿದೆ.
ರಾಘವೇಂದ್ರ ಹೆಗಡೆ ಅವರು ತಮ್ಮ ದೂರಿನಲ್ಲಿ ತಿಳಿಸಿರುವಂತೆ, 2016ರಲ್ಲಿ ಧ್ರುವ ಸರ್ಜಾ ಅವರು ತಮ್ಮೊಂದಿಗೆ ಒಂದು ಚಿತ್ರ ಯೋಜನೆಯಲ್ಲಿ ಕೆಲಸ ಮಾಡಲು ಒಪ್ಪಂದ ಮಾಡಿಕೊಂಡಿದ್ದರು. ಈ ಯೋಜನೆಗೆ ಸಂಬಂಧಿಸಿದಂತೆ, ಧ್ರುವ ಸರ್ಜಾ ಅವರು 2018ರಲ್ಲಿ 3.15 ಕೋಟಿ ರೂಪಾಯಿಗಳನ್ನು ಫ್ಲಾಟ್ ಖರೀದಿಗಾಗಿ ಮತ್ತು ಚಿತ್ರದ ಸ್ಕ್ರಿಪ್ಟ್ ಅಭಿವೃದ್ಧಿಗಾಗಿ ಕೇಳಿದ್ದರು. ಹೆಗಡೆಯವರು ತಮ್ಮ ಆರ್‌ಎಚ್ ಎಂಟರ್‌ಟೈನ್‌ಮೆಂಟ್ ಮತ್ತು ಆರ್‌ಎಸ್ 9 ಎಂಟರ್‌ಟೈನ್‌ಮೆಂಟ್ ಕಂಪನಿಗಳ ಮೂಲಕ ಹಾಗೂ ವೈಯಕ್ತಿಕವಾಗಿ 3.15 ಕೋಟಿ ರೂಪಾಯಿಗಳನ್ನು ಧ್ರುವ ಸರ್ಜಾಗೆ ವರ್ಗಾಯಿಸಿದ್ದರು. ಫೆಬ್ರವರಿ 21, 2019ರಂದು ಒಪ್ಪಂದಕ್ಕೆ ಸಹಿ ಹಾಕಲಾಯಿತು, ಇದರಂತೆ ಚಿತ್ರೀಕರಣವು ಜನವರಿ 2020ರಿಂದ ಆರಂಭವಾಗಿ ಜೂನ್ 2020ರ ವೇಳೆಗೆ ಮುಗಿಯಬೇಕಿತ್ತು.
FIR Copy : 0818 Publish FIR (1)
ಆದರೆ, ಹಣವನ್ನು ಪಡೆದ ನಂತರ ಧ್ರುವ ಸರ್ಜಾ ಯೋಜನೆಯಲ್ಲಿ ಭಾಗವಹಿಸಲು ವಿಳಂಬ ಮಾಡಿದರು ಮತ್ತು ಕೋವಿಡ್-19 ಲಾಕ್‌ಡೌನ್ ನಂತರವೂ ಸಂಪರ್ಕಕ್ಕೆ ಸಿಗದೆ ಇದ್ದರು. ಸರ್ಜಾ ಹೆಚ್ಚಿನ ಖರ್ಚುಗಳಿಗಾಗಿ ಮೂರನೇ ವ್ಯಕ್ತಿಗಳಿಗೆ (ಸ್ಕ್ರಿಪ್ಟ್ ರೈಟರ್‌ಗಳು ಮತ್ತು ಪಬ್ಲಿಸಿಟಿ ಕನ್ಸಲ್ಟಂಟ್‌ಗಳಿಗೆ) ಒಟ್ಟು 3.43 ಕೋಟಿ ರೂಪಾಯಿಗಳನ್ನು ಪಾವತಿಸಲು ಒತ್ತಾಯಿಸಿದ್ದರು. 2020ರಿಂದ ಯೋಜನೆ ಸ್ಥಗಿತಗೊಂಡಿದ್ದು, ಸರ್ಜಾ ಯಾವುದೇ ನಟನೆಯ ಬದ್ಧತೆಯನ್ನು ಪೂರೈಸಲಿಲ್ಲ. 2018ರಿಂದ 18% ಬಡ್ಡಿಯೊಂದಿಗೆ ಒಟ್ಟು 9.58 ಕೋಟಿ ರೂಪಾಯಿಗಳ ನಷ್ಟವಾಗಿದೆ ಎಂದು ಹೆಗಡೆ ಆರೋಪಿಸಿದ್ದಾರೆ.
ಅಂಬೋಲಿ ಪೊಲೀಸ್ ಠಾಣೆಯಲ್ಲಿ ರಾಘವೇಂದ್ರ ಹೆಗ್ಗಡೆಯ ದೂರಿನ ಆಧಾರದ ಮೇಲೆ ಎಫ್‌ಐಆರ್ ದಾಖಲಾಗಿದ್ದು, ತನಿಖೆ ಆರಂಭವಾಗಿದೆ. ಈ ಆರೋಪದ ಕುರಿತು ಧೃವ ಸರ್ಜಾ ಅವರಿಂದ ಯಾವುದೇ ಸ್ಪಷ್ಟೀಕರಣ ಇನ್ನೂ ಬಂದಿಲ್ಲ. ಪೊಲೀಸರು ಈ ವಂಚನೆ ಪ್ರಕರಣದ ಆಳವಾದ ತನಿಖೆಗೆ ಮುಂದಾಗಿದ್ದಾರೆ.
