ಭಾರತದಲ್ಲಿ ಪ್ರತಿ ವ್ಯಕ್ತಿಯ ಮೇಲಿನ ಸಾಲದ ಪ್ರಮಾಣವು 2025ರ ಮಾರ್ಚ್ನಲ್ಲಿ 4.8 ಲಕ್ಷ ರೂಪಾಯಿಗಳಿಗೆ ಏರಿಕೆಯಾಗಿದೆ. 2023ರ ಮಾರ್ಚ್ನಲ್ಲಿ ಇದು 3.9 ಲಕ್ಷ ರೂಪಾಯಿಗಳಷ್ಟಿತ್ತು, ಇದು ಕೇವಲ ಎರಡು ವರ್ಷಗಳಲ್ಲಿ ಶೇ.23ರಷ್ಟು ಹೆಚ್ಚಳವನ್ನು ಕಂಡಿದೆ. ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (ಆರ್ಬಿಐ) ಬಿಡುಗಡೆ ಮಾಡಿರುವ 2025ರ ಜೂನ್ನ ಆರ್ಥಿಕ ಸ್ಥಿರತೆ ವರದಿಯು ಈ ಆಂಕೆಗಳನ್ನು ಬಹಿರಂಗಪಡಿಸಿದ್ದು, ಜನರಲ್ಲಿ ಆತಂಕಕ್ಕೆ ಕಾರಣವಾಗಿದೆ.
ಕಳೆದ ಎರಡು ವರ್ಷಗಳಲ್ಲಿ ಪ್ರತಿ ಭಾರತೀಯನ ಸಾಲವು 90,000 ರೂಪಾಯಿಗಳಷ್ಟು ಹೆಚ್ಚಾಗಿದೆ. ಗೃಹ ಸಾಲಗಳು, ವೈಯಕ್ತಿಕ ಸಾಲಗಳು, ಕ್ರೆಡಿಟ್ ಕಾರ್ಡ್ಗಳು ಮತ್ತು ಇತರ ಚಿಲ್ಲರೆ ಸಾಲಗಳು ಈ ಏರಿಕೆಗೆ ಪ್ರಮುಖ ಕಾರಣಗಳಾಗಿವೆ. ಆದರೆ, ಸಾಲದ ಹೊರೆ ಹೆಚ್ಚಾಗಲು ಇದೊಂದೇ ಕಾರಣವಲ್ಲ. ಜನರು ತಮ್ಮ ಆದಾಯದಿಂದ ದೈನಂದಿನ ಅಗತ್ಯಗಳನ್ನು ಪೂರೈಸಲಾಗದೆ, ಸಾಲದ ಮೊರೆ ಹೋಗುತ್ತಿದ್ದಾರೆ. ಆದಾಗ್ಯೂ, ಸಾಲಗಾರರು ತಾವು ಪಡೆದ ಸಾಲವನ್ನು ಮರುಪಾವತಿಸುವ ಸಾಮರ್ಥ್ಯವನ್ನು ಕಾಪಾಡಿಕೊಳ್ಳುವುದು ಮುಖ್ಯವಾಗಿದೆ ಎಂದು ಆರ್ಬಿಐ ವರದಿಯು ಸೂಚಿಸಿದೆ.
ಕಳೆದ ದಶಕದಲ್ಲಿ ಭಾರತದ ಆರ್ಥಿಕತೆಯು ಶೇ.105ರಷ್ಟು ಬೆಳವಣಿಗೆ ಕಂಡಿದೆ, ಇದು ಇತರ ದೇಶಗಳಿಗಿಂತ ವೇಗವಾಗಿದೆ. ಆದರೆ, ದೇಶದ ಬಾಹ್ಯ ಸಾಲವು 2025ರ ಮಾರ್ಚ್ನಲ್ಲಿ 736.3 ಬಿಲಿಯನ್ ಡಾಲರ್ಗಳಿಗೆ ತಲುಪಿದೆ, ಇದು ಜಿಡಿಪಿಯ ಶೇ.19.1ರಷ್ಟು. ಈ ಸಾಲವನ್ನು ಭಾರತವು ಮೂಲಸೌಕರ್ಯ ಅಭಿವೃದ್ಧಿ, ಆರ್ಥಿಕ ಬೆಳವಣಿಗೆ ಮತ್ತು ಇತರ ನೀತಿಗಳಿಗಾಗಿ ಬಳಸಿಕೊಂಡಿದೆ.
ಕಾಂಗ್ರೆಸ್ ಪಕ್ಷವು ಕೇಂದ್ರ ಸರ್ಕಾರವನ್ನು ತೀವ್ರವಾಗಿ ಟೀಕಿಸಿದ್ದು, “ಮೋದಿ ರಾಜ್”ನಲ್ಲಿ ಸಾಲದ ಹೊರೆ ಗರಿಷ್ಠ ಮಟ್ಟಕ್ಕೆ ತಲುಪಿದೆ ಎಂದು ಆರೋಪಿಸಿದೆ. “ಕಳೆದ 11 ವರ್ಷಗಳಲ್ಲಿ ಆರ್ಥಿಕತೆಯನ್ನು ಸಂಪೂರ್ಣವಾಗಿ ಹಾಳು ಮಾಡಲಾಗಿದೆ. ಸಾಮಾನ್ಯ ಜನರು ಸಾಲದ ಭಾರದಿಂದ ಕುಗ್ಗುತ್ತಿದ್ದಾರೆ, ಆದರೆ ಕೇಂದ್ರ ಸರ್ಕಾರ ತನ್ನ ಆರ್ಥಿಕ ನೀತಿಗಳನ್ನು ಕೆಲವು ಪೂಂಜಿಪತಿಗಳಿಗೆ ಅನುಕೂಲವಾಗುವಂತೆ ರೂಪಿಸಿದೆ,” ಇದು ಅಚ್ಛೇ ದಿನದ ಸಾಲ ಎಂದು ಕಾಂಗ್ರೆಸ್ನ ಹಿರಿಯ ಮುಖಂಡ ಜೈರಾಂ ರಮೇಶ್ ಟೀಕಿಸಿದ್ದಾರೆ.
