ಇತ್ತೀಚೆಗೆ ತೆರೆಕಂಡ ‘ಟೂರಿಸ್ಟ್ ಫ್ಯಾಮಿಲಿ’ ಸಿನಿಮಾಗೆ ರಾಜಮೌಳಿ ಸೇರಿದಂತೆ ಚಿತ್ರಪ್ರೇಮಿಗಳೆಲ್ಲಾ ಭೇಷ್ ಅಂದಿದ್ರು. ಇದೀಗ ಆ ಟೂರಿಸ್ಟ್ ಫ್ಯಾಮಿಲಿ ಫೇಮ್ ಶಶಿಕುಮಾರ್ ನಮ್ಮ ಸ್ಯಾಂಡಲ್‌ವುಡ್‌ಗೆ ಅಧಿಕೃತವಾಗಿ ಎಂಟ್ರಿ ಕೊಡ್ತಿದ್ದಾರೆ. ಅದು ಯಾವ ಸಿನಿಮಾ..? ಡೈರೆಕ್ಟರ್ ಯಾರು ಅನ್ನೋ ಕ್ಯೂರಿಯಾಸಿಟಿಗೆ ಈ ಸ್ಟೋರಿ ಒಮ್ಮೆ ನೋಡಿ.
- ಕನ್ನಡಕ್ಕೆ ಟೂರಿಸ್ಟ್ ಫ್ಯಾಮಿಲಿ ಫೇಮ್ ಶಶಿಕುಮಾರ್ ಎಂಟ್ರಿ..!
- ಕುಂದಾಪುರದ ಕುವರ ಸಂದೇಶ್ ಪ್ರಾಜೆಕ್ಟ್‌‌ನಲ್ಲಿ ಶಶಿಕುಮಾರ್
- ಸಂಗೀತಾ ಬಾರ್ & ರೆಸ್ಟೋರೆಂಟ್‌ಗೆ ಕೋಮಲ್, ಮೇಘನಾ
- ಗುಂಮ್ಟಿ ತಂಡದ ಹೊಸ ಪ್ರಯೋಗ.. ಜನ್ಮ, ಪುನರ್ಜನ್ಮದ ಕಥೆ
ಇತ್ತೀಚೆಗೆ ಏಪ್ರಿಲ್ ತಿಂಗಳಾಂತ್ಯದಲ್ಲಿ ತೆರೆಕಂಡ ತಮಿಳಿನ ಟೂರಿಸ್ಟ್ ಫ್ಯಾಮಿಲಿ ಅಕ್ಷರಶಃ ಪ್ರೇಕ್ಷಕರ ಹಾಗೂ ವಿಮರ್ಶಕರ ಪ್ರಶಂಸೆಗೆ ಪಾತ್ರವಾಯ್ತು. ಅದಕ್ಕೆ ಕಾರಣ ನಾಯಕನಟ ಶಶಿಕುಮಾರ್, ಸಿಮ್ರಾನ್ ಹಾಗೂ ಮಾಸ್ಟರ್ ಕಮಲೇಶ್ ಜಗನ್. ಹೌದು.. ಕೇವಲ ಏಳೆಂಟು ಕೋಟಿಯಷ್ಟು ಸಣ್ಣ ಬಜೆಟ್‌‌ನಲ್ಲಿ ತಯಾರಾದ ಈ ಸಿನಿಮಾ, ಬಾಕ್ಸ್ ಆಫೀಸ್‌‌ನಲ್ಲಿ ಬರೋಬ್ಬರಿ 87ಕೋಟಿ ರೂಪಾಯಿ ಬೃಹತ್ ಮೊತ್ತ ಕಲೆ ಹಾಕಿತು. ರಾಜಮೌಳಿ ಕೂಡ ಈ ಕಾಮಿಡಿ ಡ್ರಾಮಾಗೆ ಫಿದಾ ಆಗಿದ್ರು.
ಇದೀಗ ಅದೇ ಶಶಿಕುಮಾರ್ ನಮ್ಮ ಸ್ಯಾಂಡಲ್‌ವುಡ್‌ಗೆ ಪಾದಾರ್ಪಣೆ ಮಾಡ್ತಿದ್ದಾರೆ. ವಿಜಯ್ ಸೇತುಪತಿಯಂತೆ ಅದ್ಭುತ ಕಲಾವಿದ ಅನಿಸಿಕೊಂಡಿರೋ ಶಶಿಕುಮಾರ್ ಅವ್ರನ್ನ ಕನ್ನಡಕ್ಕೆ ಕರೆತರುತ್ತಿರೋದು ಕುಂದಾಪುರದ ಪ್ರತಿಭೆ ಸಂದೇಶ್ ಶೆಟ್ಟಿ. ಯೆಸ್.. ಸಂದೇಶ್ ಶೆಟ್ಟಿ ನಿರ್ದೇಶನದ ಮುಂದಿನ ಸಿನಿಮಾ ಸಂಗೀತಾ ಬಾರ್ & ರೆಸ್ಟೋರೆಂಟ್ ಚಿತ್ರದಲ್ಲಿ ಬಣ್ಣ ಹಚ್ಚಲಿದ್ದಾರೆ ಶಶಿಕುಮಾರ್.
ಕತ್ತಲೆ ಕೋಣೆ, ಇನಾಮ್ದಾರ್ ಹಾಗೂ ಗುಂಮ್ಟಿ ಚಿತ್ರಗಳ ಖ್ಯಾತಿಯ ಸಂದೇಶ್ ಶೆಟ್ಟಿ, ಅದೇ ಕುಂದಾಪುರದ ರಿಷಬ್ ಶೆಟ್ಟಿ ರೀತಿ ಹೈಲಿ ಟ್ಯಾಲೆಂಟೆಡ್ ಫಿಲ್ಮ್ ಮೇಕರ್. ಸದಾ ಹೊಸತನಕ್ಕೆ ಹಾತೊರೆಯುವ ಇವರು, ಮಲಯಾಳಂ, ತಮಿಳು ಚಿತ್ರಗಳಲ್ಲಿ ಕೂಡ ನಟಿಸಿದ್ದಾರೆ. ನಟನೆ ಜೊತೆಗೆ ನಿರ್ದೇಶನ, ನಿರ್ಮಾಣ, ಬರವಣಿಗೆಯಿಂದ ಕನ್ನಡ ಚಿತ್ರರಂಗದಲ್ಲಿ ಛಾಪು ಮೂಡಿಸುತ್ತಿದ್ದಾರೆ.
ಇತ್ತೀಚೆಗೆ ಕುಡುಬಿ ಜನಾಂಗದ ಕುರಿತ ಗುಂಮ್ಟಿ ಸಿನಿಮಾ ಮಾಡಿದ್ದ ಸಂದೇಶ್, ಇದೀಗ ಜನ್ಮ ಹಾಗೂ ಪುನರ್ಜನ್ಮದ ಕುರಿತ ಸಂಗೀತಾ ಬಾರ್ & ರೆಸ್ಟೋರೆಂಟ್ ಚಿತ್ರಕ್ಕೆ ಕೈ ಹಾಕಿದ್ದಾರೆ. ಈಗಾಗ್ಲೇ ಸಿನಿಮಾಗೆ ಕೋಮಲ್ ಹಾಗೂ ಮೇಘನಾ ರಾಜ್ ಲೀಡ್ ಪಾತ್ರಗಳಿಗೆ ಆಯ್ಕೆ ಆಗಿದ್ದಾರೆ. ಅವರೊಟ್ಟಿಗೆ ಶಶಿಕುಮಾರ್ ಕೂಡ ಚಿತ್ರದ ಕೇಂದ್ರಬಿಂದು ಆಗಲಿದ್ದು, ಅವರೊಟ್ಟಿಗೆ ಒಂದು ಸುತ್ತಿನ ಮಾತುಕತೆ ನಡೆಸಿದೆ ಚಿತ್ರತಂಡ.
ಗುಂಮ್ಟಿ ಚಿತ್ರದ ನಿರ್ಮಾಪಕರಾದ ವಿಕಾಸ್‌ ಶೆಟ್ಟಿ ಸಂಗೀತಾ ಬಾರ್ & ರೆಸ್ಟೋರೆಂಟ್ ಚಿತ್ರಕ್ಕೆ ಬಂಡವಾಳ ಹೂಡುತ್ತಿದ್ದು, ಮಗದೊಮ್ಮೆ ಟೀಂ ಗುಂಮ್ಟಿ ಭರವಸೆಯ ಕಥೆಯೊಂದನ್ನ ಕೈಗೆತ್ತಿಕೊಳ್ತಿದೆ. ಜುಲೈ 9ರ ನಂತ್ರ ಈ ಸಿನಿಮಾ ಅಫಿಶಿಯಲಿ ಟೇಕಾಫ್ ಆಗಲಿದ್ದು, ಸದ್ಯ ಕಲಾವಿದರು ಹಾಗೂ ತಂತ್ರಜ್ಞರ ಆಯ್ಕೆ ಪ್ರಕ್ರಿಯೆಯಲ್ಲಿ ಬ್ಯುಸಿಯಾಗಿದ್ದಾರೆ ಸಂದೇಶ್ ಶೆಟ್ಟಿ.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್
