ಯುಪಿಎಸ್‌ಸಿ ಫಲಿತಾಂಶ ಪ್ರಕಟ: ಪ್ರಯಾಗ್‌ರಾಜ್‌ನ ಶಕ್ತಿ ದುಬೆ ಟಾಪರ್‌

ನವದೆಹಲಿ (ಏಪ್ರಿಲ್ 22): ಕೇಂದ್ರ ಲೋಕಸೇವಾ ಆಯೋಗ (UPSC) ತನ್ನ ಅಧಿಕೃತ ವೆಬ್‌ಸೈಟ್‌ upsc.gov.in ನಲ್ಲಿ UPSC ನಾಗರಿಕ ಸೇವಾ ಪರೀಕ್ಷೆ (CSE) 2025 ರ ಅಂತಿಮ ಫಲಿತಾಂಶವನ್ನು ಪ್ರಕಟಿಸಿದೆ. ಪ್ರಯಾಗ್‌ರಾಜ್‌ನ ಶಕ್ತಿ ದುಬೆ ಈ ಬಾರಿ ಭಾರತದ ಅತ್ಯಂತ ಸ್ಪರ್ಧಾತ್ಮಕ ಪರೀಕ್ಷೆ UPSC CSE 2025ರಲ್ಲಿ ಟಾಪರ್ ಆಗಿ ಹೊರಹೊಮ್ಮಿದ್ದಾರೆ. ಹರಿಯಾಣದ ಹರ್ಷಿತಾ ಗೋಯಲ್ ಮತ್ತು ಡೊಂಗ್ರೆ ಅರ್ಚಿತ್ ಪರಾಗ್ ಕ್ರಮವಾಗಿ ಎರಡನೇ ಮತ್ತು ಮೂರನೇ ಸ್ಥಾನ ಪಡೆದಿದ್ದಾರೆ.

ಈ UPSC ಫಲಿತಾಂಶವು 2024ರ ಲಿಖಿತ ಪರೀಕ್ಷೆ (ಸೆಪ್ಟೆಂಬರ್‌ನಲ್ಲಿ ನಡೆದಿತ್ತು) ಮತ್ತು 2025ರ ಜನವರಿಯಿಂದ ಏಪ್ರಿಲ್‌ವರೆಗೆ ನಡೆದ ವೈಯಕ್ತಿಕ ಸಂದರ್ಶನಗಳ (ಪರ್ಸನಾಲಿಟಿ ಟೆಸ್ಟ್‌) ನಂತರ ಪ್ರಕಟಿಸಲಾಗಿದೆ.

2025 UPSC ಫಲಿತಾಂಶದಲ್ಲಿ ಶಕ್ತಿ ದುಬೆ 1ನೇ ಶ್ರೇಯಾಂಕ ಪಡೆದಿದ್ದಾರೆ. ಅವರು ಉತ್ತರ ಪ್ರದೇಶದ ಪ್ರಯಾಗ್‌ರಾಜ್‌ನವರು. ಹರಿಯಾಣ ಮೂಲದ ಹರ್ಷಿತಾ ಗೋಯಲ್, ವಡೋದರಾದಲ್ಲಿ ಹುಟ್ಟಿ ಬೆಳೆದಿದ್ದು ವೃತ್ತಿಯಲ್ಲಿ ಚಾರ್ಟರ್ಡ್ ಅಕೌಂಟೆಂಟ್ ಆಗಿದ್ದಾರೆ. ಅವರು 2ನೇ ಶ್ರೇಯಾಂಕವನ್ನು ಪಡೆದಿದ್ದಾರೆ. ಮಹಾರಾಷ್ಟ್ರದ ಡೊಂಗ್ರೆ ಅರ್ಚಿತ್ ಪರಾಗ್ 3ನೇ ಸ್ಥಾನದಲ್ಲಿ ಸ್ಥಾನ ಪಡೆದಿದ್ದಾರೆ.

UPSC ಶಿಫಾರಸು ಮಾಡಿದ ಅಭ್ಯರ್ಥಿಗಳ ಸಂಖ್ಯೆ ಹಾಗೂ ವಿಭಾಗಗಳು

ಈ ಬಾರಿ UPSC ಒಟ್ಟು 1009 ಅಭ್ಯರ್ಥಿಗಳನ್ನು ವಿವಿಧ ಸಿವಿಲ್ ಸೇವೆಗಳಿಗಾಗಿ ಶಿಫಾರಸು ಮಾಡಿದೆ. ಇದರಲ್ಲಿ ವಿವಿಧ ವರ್ಗಗಳ ಹಂಚಿಕೆ ಹೀಗಿದೆ.

• ಸಾಮಾನ್ಯ ವರ್ಗ: 335

• ಆರ್ಥಿಕ ದುರ್ಬಲ ವರ್ಗ (EWS): 109

• ಇತರ ಹಿಂದುಳಿದ ವರ್ಗ (OBC): 318

• ಪರಿಶಿಷ್ಟ ಜಾತಿ (SC): 160

• ಪರಿಶಿಷ್ಟ ಪಂಗಡ (ST): 87

45 ಅಭ್ಯರ್ಥಿಗಳು ಅಂಗವಿಕಲರ ಪಿಡಬ್ಲ್ಯೂಬಿಡಿ (PwBD) ವರ್ಗದಲ್ಲಿ ಆಯ್ಕೆಯಾಗಿದ್ದಾರೆ. 230 ಅಭ್ಯರ್ಥಿಗಳಿಗಾಗಿ ಮೀಸಲು ಪಟ್ಟಿ ಮತ್ತು 1 ಅಭ್ಯರ್ಥಿಯ ಫಲಿತಾಂಶ ತಾತ್ಕಾಲಿಕವಾಗಿ ತಡೆಹಿಡಿದಿದೆ.

UPSC ಟಾಪ್ 10 ಪಟ್ಟಿಯಲ್ಲಿ ಸ್ಥಾನ ಪಡೆದವರು:

1. ಶಕ್ತಿ ದುಬೆ

2. ಹರ್ಷಿತಾ ಗೋಯಲ್

3. ಡೊಂಗ್ರೆ ಅರ್ಚಿತ್ ಪರಾಗ್

4. ಶಾಹ್ ಮಾರ್ಗಿ ಚಿರಾಗ್

5. ಆಕಾಶ್ ಗಾರ್ಗ್

6. ಕೋಮಲ್ ಪುನಿಯಾ

7. ಆಯೂಷಿ ಬನ್ಸಾಲ್

8. ರಾಜ್ ಕೃಷ್ಣ ಝಾ

9. ಆದಿತ್ಯ ವಿಕ್ರಮ್ ಅಗರವಾಲ್

10. ಮಯಂಕ್ ತ್ರಿಪಾಠಿ

ಅಭ್ಯರ್ಥಿಗಳು ಫಲಿತಾಂಶವನ್ನು ಪರಿಶೀಲಿಸುವ ವಿಧಾನ:

1. UPSC ಅಧಿಕೃತ ವೆಬ್‌ಸೈಟ್‌ ಗೆ ಭೇಟಿ ನೀಡಿ: upsc.gov.in

2. ಮುಖ್ಯ ಪುಟದಲ್ಲಿ ‘Final Result – Civil Services Examination, 2024’ ಲಿಂಕ್‌ ಮೇಲೆ ಕ್ಲಿಕ್ ಮಾಡಿ

3. ಫಲಿತಾಂಶ PDF ಡೌನ್‌ಲೋಡ್ ಮಾಡಿ

4. ನಿಮ್ಮ ರೋಲ್ ಸಂಖ್ಯೆ ಹುಡುಕಿ

5. ರೆಫರೆನ್ಸ್‌ಗಾಗಿ ಪ್ರಿಂಟ್‌ ತೆಗೆದುಕೊಳ್ಳಬಹುದು

ಐಎಎಸ್, ಐಎಫ್‌ಎಸ್, ಐಪಿಎಸ್ ಸೇರಿದಂತೆ ಕೇಂದ್ರ ಸೇವೆಗಳ ಗ್ರೂಪ್ ಎ ಮತ್ತು ಬಿಗೆ ಈ ಅಭ್ಯರ್ಥಿಗಳ ನೇಮಕಾತಿ ಖಾಲಿ ಹುದ್ದೆಗಳ ಲಭ್ಯತೆ ಮತ್ತು UPSC ಸೇವಾ ನಿಯಮಗಳ ಆಧಾರದಲ್ಲಿ ನಡೆಯಲಿದೆ. ಕೇಂದ್ರ ಸರ್ಕಾರವು ಈ ವರ್ಷ ಒಟ್ಟು 1129 ಹುದ್ದೆಗಳನ್ನು ಘೋಷಿಸಿದೆ. ಇದರಲ್ಲಿ 50 ಹುದ್ದೆಗಳು ಅಂಗವಿಕಲರಿಗೆ ಮೀಸಲಿಡಲಾಗಿದೆ. ಅಂತಿಮ ಅಂಕಗಳನ್ನು ಫಲಿತಾಂಶ ಪ್ರಕಟವಾದ 15 ದಿನಗಳಲ್ಲಿ ವೆಬ್‌ಸೈಟ್‌ನಲ್ಲಿ ಅಪ್‌ಲೋಡ್ ಮಾಡಲಾಗುವುದು.

ಅಭ್ಯರ್ಥಿಗಳ ಯಾವುದೇ ಪ್ರಶ್ನೆಗಳಿಗೆ ಉತ್ತರ ನೀಡಲು UPSC ನವದೆಹಲಿಯ ಕಚೇರಿಯಲ್ಲಿ ಬೆಳಿಗ್ಗೆ 10 ರಿಂದ ಸಂಜೆ 5 ರವರೆಗೆ ಸೌಲಭ್ಯ ಕೌಂಟರ್ ಸ್ಥಾಪಿಸಿದೆ.