ಕ್ರೇಜಿಸ್ಟಾರ್ ರವಿಚಂದ್ರನ್ ಎಂತಹ ಪ್ಯಾಷನೇಟ್ ಫಿಲ್ಮ್ ಮೇಕರ್ ಅನ್ನೋದಕ್ಕೆ ಮಲ್ಲ ಸಿನಿಮಾದ ನಟಿಯ ಹಾಡೊಂದರ ಕಾಸ್ಟ್ಯೂಮ್ ಸಾಕ್ಷಿಯಾಗಿದೆ. ಹೌದು.. ಪ್ರಿಯಾಂಕಾ ಉಪೇಂದ್ರಗೆ ಜಸ್ಟ್ ಹಾಡೊಂದರ ಕಾಸ್ಟ್ಯೂಮ್‌‌ಗಾಗಿ ಲಕ್ಷಾಂತರ ರೂಪಾಯಿ ಖರ್ಚು ಮಾಡಿದ್ದ ರವಿಮಾಮನ ಆ ದಿನದ ಪರಿಸ್ಥಿತಿ ಎಂಥದ್ದು ಅಂತ ಅವ್ರ ಬಾಯಿಂದಲೇ ಕೇಳಿ.
ಪ್ರೇಮಲೋಕ, ರಣಧೀರ ಸಿನಿಮಾಗಳ ಮೂಲಕ ಕನ್ನಡ ಚಿತ್ರರಂಗಕ್ಕೆ ಹೊಸ ದಿಕ್ಕು, ದೆಸೆ ತೋರಿಸಿ, ಫಿಲ್ಮ್ ಮೇಕಿಂಗ್‌‌ನಲ್ಲಿ ಹೊಸ ಕ್ರಾಂತಿ ಮಾಡಿದಂತಹ ಗರಿಮೆ ಕ್ರೇಜಿಸ್ಟಾರ್ ರವಿಚಂದ್ರನ್‌‌ಗೆ ಸಲ್ಲುತ್ತದೆ. ನಟನೆ, ನಿರ್ದೇಶನ, ನಿರ್ಮಾಣ, ಬರವಣಿಗೆ, ಸಾಹಿತ್ಯ, ಸಂಗೀತ ಹೀಗೆ ಎಲ್ಲಾ ವಿಭಾಗಗಳನ್ನ ಒಬ್ಬರೇ ನಿಭಾಯಿಸಬಲ್ಲಂತಹ ಮ್ಯಾನ್ ಆಫ್ ಮಲ್ಟಿ ಟ್ಯಾಲೆಂಟ್ ಈ ಕನಸುಗಾರ.
ಟ್ರೆಂಡ್ ಸೆಟ್ ಸಿನಿಮಾಗಳಿಂದ ಚಿತ್ರರಂಗಕ್ಕೊಂದು ಸ್ಟ್ಯಾಂಡರ್ಡ್‌ ಸೆಟ್ ಮಾಡಿ, ಟ್ರೆಂಡ್ ಸೆಟ್ಟರ್ ಆದ ರವಿಚಂದ್ರನ್, ಅದೆಷ್ಟೋ ಮಂದಿ ಸಿನಿಮೋತ್ಸಾಹಿಗಳಿಗೆ ಸ್ಫೂರ್ತಿ. ಒಂದಷ್ಟು ಮಂದಿ ಇವ್ರನ್ನ ದ್ರೋಣಾಚಾರ್ಯರಂತೆ ಭಾವಿಸಿ, ದೂರದಿಂದಲೇ ಇವ್ರ ಫಿಲ್ಮ್ ಮೇಕಿಂಗ್ ನೋಡಿ ಚಿತ್ರರಂಗದಲ್ಲಿ ಸೆಟಲ್ ಆಗಿರೋ ನಿದರ್ಶನಗಳೂ ಇವೆ. ಇವರಿಗೆ ಊಟ, ತಿಂಡಿ, ನೀರು ಎಲ್ಲವೂ ಸಿನಿಮಾನೇ. ಕನಸಲ್ಲೂ ಸಿನಿಮಾನೇ ಕನವರಿಸೋ ರವಿಮಾಮ ಉಸಿರಾಡೋ ಉಸಿರು ಕೂಡ ಸಿನಿಮಾ.
ಸಿನಿಮಾದಿಂದಲೇ ಕೋಟಿ ಕೋಟಿ ಗಳಿಸಿರೋ ಇವರು, ಅದೇ ಸಿನಿಮಾಗಾಗಿ ಎಲ್ಲವನ್ನ ಕಳೆದುಕೊಂಡ ನಿದರ್ಶನವೂ ಉಂಟು. ಶಾಂತಿ ಕ್ರಾಂತಿ ಸಿನಿಮಾದಿಂದ ಅವರಿಗಾದ ಲಾಸ್ ಬಗ್ಗೆ ಪ್ರತ್ಯೇಕವಾಗಿ ಹೇಳಬೇಕಿಲ್ಲ. ಆ ರೀತಿ ಅವರು ಎಕ್ಸ್‌‌ಪೆರಿಮೆಂಟ್ಸ್ ಮಾಡೋಕೆ ಹೋಗಿ ಕಳೆದುಕೊಂಡ ದುಡ್ಡು ಅಷ್ಟಿಷ್ಟಲ್ಲ. ಏಕಾಂಗಿ ಸಿನಿಮಾ ಮಾಡಿ ಅದನ್ನ ಒಂಟಿಯಾಗಿ ಕೂತು ನೋಡುವಂತಹ ಪರಿಸ್ಥಿತಿ ಎದುರಾಗುತ್ತೆ. ಒನ್ಸ್ ಅಗೈನ್ ದೊಡ್ಡ ಮೊತ್ತದ ಹಣ ಕಳೆದುಕೊಳ್ತಾರೆ. ಆಗ ಸಿನಿಮಾ ಸಹವಾಸ ಸಾಕು ಅಂತ ಆರು ತಿಂಗಳು ಸುಮ್ಮನಿದ್ದಾಗ ಗೆಳೆಯರ ಬಳಗ ಅವ್ರನ್ನ ಸುಮ್ಮನಿರೋಕೆ ಬಿಡಲ್ಲ.
ಸ್ನೇಹಿತರ ಒತ್ತಾಯದ ಮೇರೆಗೆ ಮತ್ತೆ ಡೈರೆಕ್ಷನ್ ಮಾಡಿ, ನಟನೆಗೆ ಇಳಿಯೋ ರವಿಮಾಮ, ಮಲ್ಲ ಸಿನಿಮಾದ ಬಗ್ಗೆ ಮೊದಲೇ ಆಪ್ತರಿಗೆ ಸೂಚನೆ ಕೊಡ್ತಾರಂತೆ. ಆದ್ರೆ ಮಲ್ಲ ಚಿತ್ರದ ಯಮ್ಮೋ ಯಮ್ಮೋ ಸಾಂಗ್ ಕೇಳಿ ನಗಾಡ್ತಿದ್ದವ್ರಿಗೆ ಆ ಆಲ್ಬಮ್‌‌ನ ಮೊದಲ ಹಿಟ್ ಇದೇ ಆಗಲಿದೆ ಅಂತ ಭವಿಷ್ಯ ನುಡಿದಿದ್ರಂತೆ. ಅಷ್ಟೇ ಅಲ್ಲ, ಅದು ನಿಜ ಕೂಡ ಆಯ್ತು.
ಇನ್ನು ಮಲ್ಲ ಚಿತ್ರದ ನಾಯಕನಟಿ ಪ್ರಿಯಾಂಕಾ ಉಪೇಂದ್ರಗೆ ಆ ಹಾಡೊಂದರ ಕಾಸ್ಟ್ಯೂಮ್‌ಗೆ ಬರೋಬ್ಬರಿ 2 ಲಕ್ಷ ಖರ್ಚು ಮಾಡಿದ್ರಂತೆ. ಅದರ ಅರ್ಥ ಹೀರೋಯಿನ್ಸ್ ಸದಾ ಗ್ಲಾಮರಸ್ ಆಗಿ ಕಾಣಬೇಕು. ಸಿನಿಮಾದಲ್ಲಿ ಅವ್ರ ಮೇಕಪ್, ಕಾಸ್ಟ್ಯೂಮ್ ರಿಚ್ ಆಗಿದ್ರೆ ನೋಡುಗರು ಖುಷಿ ಪಡ್ತಾರೆ ಅನ್ನೋದು. ಸಿನಿಮಾ ನಿರ್ಮಾಣಕ್ಕೆ ಹಣದ ಕೊರತೆ ಇದ್ರೂ ಪ್ರಿಯಾಂಕಾ ಕಾಸ್ಟ್ಯೂಮ್‌ಗೆ ಲಕ್ಷಾಂತರ ಖರ್ಚು ಮಾಡಿದ್ದನ್ನ ಸ್ವತಃ ರವಿಚಂದ್ರನ್ ಅವರೇ ಹೇಳಿಕೊಂಡಿದ್ದಾರೆ.
ಅಂದಹಾಗೆ ಝೀ ಕನ್ನಡದ ಭರ್ಜರಿ ಬ್ಯಾಚುಲರ್ಸ್‌ ವೇದಿಕೆಗೆ ಸ್ಪೆಷಲ್ ಗೆಸ್ಟ್ ಆಗಿ ಹೋಗಿದ್ದ ರವಿಮಾಮ, ಅಲ್ಲಿ ಡ್ಯಾನ್ಸ್ ಪರ್ಫಾರ್ಮ್‌ ಮಾಡಿದಂತಹ ಕಂಟೆಸ್ಟೆಂಟ್ಸ್ ಕಾಸ್ಟ್ಯೂಮ್ ನೋಡಿ, ಹಳೆಯ ನೆನಪಿನ ಬುತ್ತಿ ಬಿಚ್ಚಿಟ್ಟಿದ್ದಾರೆ. ಇದನ್ನ ಕೇಳಿದ ಬಳಿಕ ಕರೆಕ್ಟ್ ಗುರೂ.. ಜನ ಯಾಕೆ ಇವ್ರನ್ನ ಕ್ರೇಜಿಸ್ಟಾರ್ ಅಂತ ಕರೆದ್ರು ಅಂದ್ರೆ ಇಂತಹ ಕ್ರೇಜಿ ವಿಷಯಗಳಿಗಾಗಿ ಅಂತ ಬಾಯ್ ಮೇಲೆ ಬೆರಳಿಟ್ಟುಕೊಳ್ತಿದ್ದಾರೆ.
