ಬಾಲಿವುಡ್ ಸಂಗೀತ ಲೋಕದ ಜನಪ್ರಿಯ ಗಾಯಕಿ ನೇಹಾ ಕಕ್ಕರ್ ಅವರ ಕುಟುಂಬದಲ್ಲಿ ಬಿರುಕು ಮೂಡಿದೆ. ಹಿರಿಯ ಗಾಯಕಿ ಹಾಗೂ ನೇಹಾ ಅವರ ಅಕ್ಕರಾದ ಸೋನು ಕಕ್ಕರ್ ಇತ್ತೀಚೆಗೆ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಮಾಡಿದ ಘೋಷಣೆಯಿಂದ ಅಭಿಮಾನಿಗಳು ದಿಗ್ಭ್ರಮೆಗೆ ಒಳಗಾಗಿದ್ದಾರೆ. ಅವರು “ನಾನು ನೇಹಾ ಮತ್ತು ಟೋನಿ ಕಕ್ಕರ್ ಅವರ ಸಹೋದರಿ ಅಲ್ಲ” ಎಂದು ಬರೆದುಕೊಂಡಿದ್ದಾರೆ.
ಪೋಸ್ಟ್ ನಲ್ಲಿ ಏನಿದೆ?
ಏಪ್ರಿಲ್ 9 ರಂದು ಟೋನಿ ಕಕ್ಕರ್ ಅವರ ಹುಟ್ಟುಹಬ್ಬದ ಸಂದರ್ಭದಲ್ಲೂ ಸೋನು ಕಕ್ಕರ್ ಇರಲಿಲ್ಲ. ಇದರಿಂದ ಅಭಿಮಾನಿಗಳಲ್ಲಿ ಅನೇಕ ಪ್ರಶ್ನೆಗಳು ಎದ್ದಿದ್ದವು. ಇದೀಗ ಸೋನು ಅವರ ಪ್ರಕಟಣೆಯೊಂದಿಗೆ ಮತ್ತಷ್ಟು ಸ್ಪಷ್ಟವಾಗಿದೆ.
ಇಬ್ಬರು ಪ್ರತಿಭಾನ್ವಿತ ಸೂಪರ್ಸ್ಟಾರ್ಗಳಾದ ಟೋನಿ ಮತ್ತು ನೇಹಾ ಕಕ್ಕರ್ ಅವರಿಗೆ ನಾನು ಇನ್ನು ಮುಂದೆ ಸಹೋದರಿಯಲ್ಲ ಎಂಬುದನ್ನು ಎಲ್ಲರಿಗೂ ತಿಳಿಸಲು ತುಂಬಾ ದುಃಖವಾಗಿದೆ. ಈ ನಿರ್ಧಾರ ನನ್ನ ಆಂತರಿಕ ನೋವಿನಿಂದ ಬಂದಿದೆ. ಇಂದು ನಾನು ನಿಜವಾಗಿಯೂ ನಿರಾಶೆಗೊಂಡಿದ್ದೇನೆ.” ಎಂದು ಬರೆದುಕೊಂಡಿದ್ದಾರೆ.
ಈ ಹೇಳಿಕೆ ಪೋಸ್ಟ್ ಮಾಡಿದ ಕೆಲವೇ ಕ್ಷಣಗಳಲ್ಲಿ ವೈರಲ್ ಆಗಿದ್ದು, ನೂರಾರು ಅಭಿಮಾನಿಗಳು ಹಾಗೂ ಸಾಮಾಜಿಕ ಮಾಧ್ಯಮ ಬಳಕೆದಾರರು ತಮ್ಮದೇ ಆದ ಅಭಿಪ್ರಾಯವನ್ನು ವ್ಯಕ್ತಪಡಿಸಿದರು. ಈ ಎಲ್ಲ ಚರ್ಚೆ ನಡುವೆ, ಸೋನು ತಕ್ಷಣವೇ ತನ್ನ ಪೋಸ್ಟ್ ಅನ್ನು ಡಿಲೀಟ್ ಮಾಡಿದರು. ಇದು ಪ್ರಚಾರದ ತಂತ್ರವೋ ಅಥವಾ ನಿಜವಾದ ಸಂಬಂಧದ ವ್ಯತ್ಯಾಸವೋ ಎಂಬ ಪ್ರಶ್ನೆಗಳು ಎದ್ದಿವೆ.
ಸೋಶಿಯಲ್ ಮೀಡಿಯಾದ ಪ್ರತಿಕ್ರಿಯೆಗಳು
ಪೋಸ್ಟ್ ಡಿಲೀಟ್ ಆದ ನಂತರ, ಹಲವಾರು ನೆಟಿಜನ್ಗಳು ಶಂಕೆ ವ್ಯಕ್ತಪಡಿಸಿದರು. “ಇದು ಅವರ ಮುಂದಿನ ಮ್ಯೂಸಿಕ್ ಆಲ್ಬಮ್ಗೆ ಪಿಆರ್ ಸ್ಟಂಟ್ ಆಗಿರಬಹುದು” ಎಂಬ ಮಾತುಗಳು ವೈರಲ್ ಆಗಿವೆ. ಇನ್ನು ಕೆಲವರು “ಸೂಪರ್ಸ್ಟಾರ್ ಎಂಬ ಪದವನ್ನು ಬಳಸುವುದು ಹಾಸ್ಯಾಸ್ಪದವಾಗಿದೆ” ಎಂದು ಗೇಲಿ ಮಾಡಿದ್ದಾರೆ. ಟೋನಿ ಕಕ್ಕರ್ ಅವರ ಪ್ರತಿಭೆ ಕುರಿತು ಕೆಲವರು ನಿಂದನೆ ಮಾಡಿದ್ದು, “ಅವರು ಹಿಂದಿನ ಶೈಲಿಗೆ ಹಿಂದಿರುಗುವುದು ಉತ್ತಮ” ಎಂಬ ಅಭಿಪ್ರಾಯವನ್ನು ತಿಳಿಸಿದ್ದಾರೆ.
ಕಕ್ಕರ್ ಕುಟುಂಬದ ಹಿನ್ನಲೆ
ಸಂಗೀತ ಕ್ಷೇತ್ರದಲ್ಲಿ ಕಕ್ಕರ್ ಕುಟುಂಬದ ಮೊದಲ ಹೆಜ್ಜೆ ಇಟ್ಟಿದವರು ಸೋನು ಕಕ್ಕರ್. ಅವರು 2003 ರಲ್ಲಿ ಬಿಡುಗಡೆಯಾದ ‘ದಮ್’ ಚಿತ್ರದಲ್ಲಿನ ‘ಬಾಬುಜಿ ಜರಾ ಧೀರೆ ಚಲೋ’ ಹಾಡಿನಿಂದ ಪ್ರಸಿದ್ಧಿ ಪಡೆದರು. ನಂತರ ಹಲವು ಹಿಟ್ ಹಾಡುಗಳನ್ನು ನೀಡಿದರು. ನೇಹಾ ಕಕ್ಕರ್ ಬಾಲ್ಯದಲ್ಲಿಯೇ ಸಂಗೀತ ಕ್ಷೇತ್ರಕ್ಕೆ ಪ್ರವೇಶಿಸಿದರು. ಅವರು ತಮ್ಮ ವಿಶಿಷ್ಟ ಶೈಲಿ, ಭಾವಭರಿತ ಹಾಡುಗಳಿಂದ ಜನಪ್ರಿಯರಾದರು. ಇನ್ಸ್ಟಾಗ್ರಾಮ್ನಲ್ಲಿ 78.2 ಮಿಲಿಯನ್ ಫಾಲೋವರ್ಗಳನ್ನು ಹೊಂದಿರುವ ನೇಹಾ, ಸಾಮಾಜಿಕ ಮಾಧ್ಯಮದಲ್ಲಿ ಪ್ರಭಾವ ಬೀರುವ ವ್ಯಕ್ತಿಯೂ ಆಗಿದ್ದಾರೆ. ಟೋನಿ ಕಕ್ಕರ್ ಸಹ ಗಾಯಕರಾಗಿದ್ದು, ಹಲವು ಪಾಪ್ ಹಾಡುಗಳ ಮೂಲಕ ತಮ್ಮದೇ ಆದ ಪ್ರೇಕ್ಷಕರನ್ನು ಹೊಂದಿದ್ದಾರೆ.
