ಬೆಂಗಳೂರು: ಬೆಂಗಳೂರಿನ ರಾಜಾಜಿನಗರದಲ್ಲಿ ಏಳು ಮಂದಿಯನ್ನು ಬರ್ಬರವಾಗಿ ಹತ್ಯೆಗೈದ ಪ್ರಕರಣ ದಿನಕ್ಕೊಂದು ಭಯಾನಕ ತಿರುವು ಪಡೆದುಕೊಳ್ಳುತ್ತಿದೆ. ತನಿಖೆ ಮುಂದುವರಿಸಿರುವ ಪೊಲೀಸರಿಗೆ ಆರೋಪಿ ಇಂದುಶೇಖರ್‌ನ ಕ್ರೌರ್ಯ ಹಾಗೂ ಕೊಲೆ ಹಿಂದಿನ ಆಸ್ತಿ ದುರಾಸೆಯ ಬಗ್ಗೆ ಮತ್ತಷ್ಟು ಆಘಾತಕಾರಿ ಸಂಗತಿಗಳು ತಿಳಿದುಬಂದಿವೆ. ಈ ಸಾಮೂಹಿಕ ಹತ್ಯೆಯ ಹಿಂದೆ ಪತ್ನಿಯ ತವರು ಮನೆಯ ಆಸ್ತಿಯನ್ನು ತನ್ನದಾಗಿಸಿಕೊಳ್ಳುವ ಸಂಚು ಇತ್ತು ಎಂಬ ಅಂಶ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
ಆಸ್ತಿಗಾಗಿ ಏಳು ಮಂದಿಯ ಹತ್ಯೆಗೆ ಸಂಚು!
ಆರೋಪಿ ಇಂದುಶೇಖರ್‌ನ ಪತ್ನಿ ಸುನೀತಾಳ ತವರು ಮನೆ ಶ್ರೀರಾಮಪುರದಲ್ಲಿತ್ತು. ಈ ಮನೆಯ ಮೇಲೆ ಇಂದುಶೇಖರ್ ಕಣ್ಣಿಟ್ಟಿದ್ದ ಎನ್ನಲಾಗಿದೆ. ಪತ್ನಿಯ ಕುಟುಂಬದ ಎಲ್ಲ ಸದಸ್ಯರು ಮೃತಪಟ್ಟರೆ ಆಸ್ತಿ ತನ್ನ ಪಾಲಾಗಬಹುದು ಎಂಬ ದುರಾಸೆಯಿಂದಲೇ ಏಳು ಮಂದಿಯನ್ನು ಹತ್ಯೆ ಮಾಡಲು ಸಂಚು ರೂಪಿಸಿದ್ದ ಎಂಬ ಆರೋಪ ಕೇಳಿಬಂದಿದೆ.
ಕೊಲೆಗಳನ್ನು ಮಾಡುವುದಕ್ಕೂ ಮೊದಲೇ ಆರೋಪಿ ಸ್ಟಾಂಪ್ ಪೇಪರ್ ಸಿದ್ಧಪಡಿಸಿಕೊಂಡಿದ್ದ ಎನ್ನಲಾಗಿದೆ. ಏಳು ಮಂದಿಯ ಹತ್ಯೆಯ ಬಳಿಕ ಅವರ ಹೆಬ್ಬೆಟ್ಟಿನ ಗುರುತುಗಳನ್ನು ಆ ಸ್ಟಾಂಪ್ ಪೇಪರ್‌ಗಳ ಮೇಲೆ ಒತ್ತಿಸಿಕೊಂಡಿದ್ದಾನೆ ಎಂದು ತನಿಖೆಯಲ್ಲಿ ತಿಳಿದುಬಂದಿದೆ. ಅಷ್ಟೇ ಅಲ್ಲ, ಕೊಲೆ ಮಾಡಿದ ಬಳಿಕ ರಕ್ತದ ಕಲೆಗಳನ್ನು ಸ್ವಚ್ಛಗೊಳಿಸಿ, ನಂತರ ಮೃತರ ಹೆಬ್ಬೆಟ್ಟಿನ ಗುರುತುಗಳನ್ನು ಪಡೆಯುವ ಮೂಲಕ ಆಸ್ತಿ ದಾಖಲೆಗಳನ್ನು ತನ್ನ ಪರವಾಗಿ ಮಾಡಿಕೊಳ್ಳಲು ಪ್ರಯತ್ನಿಸಿದ್ದ ಎಂಬ ಆರೋಪವೂ ಇದೆ.
ತಂದೆಯ ಕೊಲೆ ಸಂಚಿಗೆ ಮಗಳ ಸಾಥ್!
ಈ ಪ್ರಕರಣದಲ್ಲಿ ಆರೋಪಿ ಇಂದುಶೇಖರ್‌ನ ಅಪ್ರಾಪ್ತ ಮಗಳು ಕೂಡ ತಂದೆಯ ಕೃತ್ಯಗಳಿಗೆ ಸಹಕರಿಸಿದ್ದಾಳೆ ಎಂಬ ಆರೋಪ. ಶ್ರೀರಾಮಪುರದ ಮನೆಯನ್ನು ನಿನ್ನ ಹೆಸರಿಗೆ ಮಾಡುತ್ತೇನೆ ಎಂದು ತಂದೆ ಮಗಳಿಗೆ ಆಮಿಷವೊಡ್ಡಿದ್ದ ಎನ್ನಲಾಗಿದೆ. ಆಸ್ತಿ ತನ್ನ ಹೆಸರಿಗೆ ಬರುತ್ತದೆ ಎಂಬ ನಿರೀಕ್ಷೆಯಲ್ಲಿ ಮಗಳು ತಂದೆಯ ಸಂಚಿಗೆ ಸಾಥ್ ನೀಡಿದ್ದಾಳೆ ಎಂದು ಪೊಲೀಸ್ ತನಿಖೆಯಲ್ಲಿ ತಿಳಿದುಬಂದಿದೆ.
ತಾಯಿ ಸುನೀತಾ ಹಾಗೂ ಅಜ್ಜಿ ರೂಪಾವತಿಯ ಹತ್ಯೆಯ ಬಳಿಕವೂ ತಂದೆಯ ಮುಂದಿನ ಸಂಚಿನ ಬಗ್ಗೆ ಮಗಳಿಗೆ ಮಾಹಿತಿ ಇತ್ತು ಎನ್ನಲಾಗಿದೆ. ಆದರೂ ಆಕೆ ಯಾರಿಗೂ ವಿಷಯ ತಿಳಿಸದೆ ಸುಮ್ಮನಿದ್ದಳು ಎಂಬ ಆರೋಪ ಕೇಳಿಬಂದಿದೆ. ತಾಯಿ, ಅಜ್ಜಿ, ಮಾವಂದಿರು, ಅತ್ತೆಯಂದಿರು ಹಾಗೂ ಬಾಲಕನ ಹತ್ಯೆ ನಡೆಯುತ್ತಿದ್ದರೂ ತಂದೆಯನ್ನು ತಡೆಯುವ ಪ್ರಯತ್ನ ಮಾಡಲಿಲ್ಲ ಎಂಬುದು ತನಿಖೆಯ ಪ್ರಮುಖ ಅಂಶವಾಗಿದೆ.
ಮಾಂಸದೂಟದ ನೆಪದಲ್ಲಿ ಕುಟುಂಬಕ್ಕೆ ಆಹ್ವಾನ!
ಹತ್ಯೆಗೂ ಮುನ್ನ ಕುಟುಂಬದ ಸದಸ್ಯರನ್ನು ಮನೆಗೆ ಕರೆಸುವಲ್ಲಿಯೂ ಮಗಳು ಪ್ರಮುಖ ಪಾತ್ರ ವಹಿಸಿದ್ದಳು ಎನ್ನಲಾಗಿದೆ. ಶಿವಕುಮಾರ್ ಹಾಗೂ ಶಂಕರ್ ಕುಟುಂಬದ ಸದಸ್ಯರಿಗೆ ಆಕೆಯೇ ಕರೆ ಮಾಡಿ ಮಾಂಸದೂಟಕ್ಕೆ ಆಹ್ವಾನಿಸಿದ್ದಳು. ಬೇರೆ ಬೇರೆ ದಿನಗಳಲ್ಲಿ ಮನೆಗೆ ಬಂದಿದ್ದ ದಿವ್ಯಾ ಮತ್ತು ನಳಿನಿ ಅವರು ಇಂದುಶೇಖರ್ ಮನೆಯಲ್ಲಿ ಅಡುಗೆ ಮಾಡಿದ್ದರು ಎನ್ನಲಾಗಿದೆ.
ಇದೇ ವೇಳೆ, ಹತ್ಯೆ ನಡೆದ ಸಂದರ್ಭದಲ್ಲಿ ನಿದ್ದೆಯ ಮಂಪರಿನಲ್ಲಿದ್ದ ದಿವ್ಯಾ ಮತ್ತು ನಳಿನಿ ಜೋರಾಗಿ ಕಿರುಚಿಕೊಂಡಿದ್ದರು. ತಮ್ಮನ್ನು ಬಿಟ್ಟುಬಿಡುವಂತೆ ಇಂದುಶೇಖರ್ ಬಳಿ ಪರಿಪರಿಯಾಗಿ ಬೇಡಿಕೊಂಡಿದ್ದರು ಎನ್ನಲಾಗಿದೆ. ‘ಅಣ್ಣಾ, ನಾನೇನು ತಪ್ಪು ಮಾಡಿದ್ದೇನೆ? ನನ್ನನ್ನು ಬಿಟ್ಟುಬಿಡಿ’ ಎಂದು ಅಂಗಲಾಚಿದರೂ ಆರೋಪಿ ಕರುಣೆ ತೋರದೆ ಹಲ್ಲೆ ನಡೆಸಿ ಕೊಲೆ ಮಾಡಿದ್ದಾನೆ ಎಂಬ ಮಾಹಿತಿ ತನಿಖೆಯಲ್ಲಿ ಹೊರಬಂದಿದೆ.
ಸಾಕ್ಷ್ಯ ನಾಶಕ್ಕೂ ಮಗಳ ಸಹಕಾರ?
ಕೊಲೆಗಳ ಬಳಿಕ ಸಾಕ್ಷ್ಯ ನಾಶಪಡಿಸುವ ಕಾರ್ಯದಲ್ಲಿಯೂ ಮಗಳು ತಂದೆಗೆ ನೆರವಾಗಿದ್ದಾಳೆ ಎಂಬ ಗಂಭೀರ ಆರೋಪವಿದೆ. ಮನೆಯಲ್ಲಿದ್ದ ರಕ್ತದ ಕಲೆಗಳನ್ನು ಸ್ವಚ್ಛಗೊಳಿಸಲು ಹಾಗೂ ವಾಶ್‌ರೂಮ್ ತೊಳೆಯಲು ಅಗತ್ಯವಾದ ಫಿನೈಲ್ ಮತ್ತು ಲೈಸಾಲ್‌ನಂತಹ ಸ್ವಚ್ಛತಾ ವಸ್ತುಗಳನ್ನು ಮಗಳೇ ಅಂಗಡಿಗೆ ತೆರಳಿ ಖರೀದಿಸಿ ತಂದಿದ್ದಳು ಎನ್ನಲಾಗಿದೆ.
ಹತ್ಯೆಯ ಬಳಿಕ ರಕ್ತದ ಕಲೆಗಳನ್ನು ಸ್ವಚ್ಛಗೊಳಿಸುವುದು, ಸಾಕ್ಷ್ಯಗಳನ್ನು ನಾಶಪಡಿಸುವುದು, ಮೃತದೇಹಗಳನ್ನು ಸಾಗಿಸುವುದು ಹಾಗೂ ಅವುಗಳನ್ನು ನಿರ್ಜನ ಪ್ರದೇಶಗಳಲ್ಲಿ ಎಸೆದು ಬರುವವರೆಗೂ ಮಗಳು ತಂದೆಗೆ ಸಹಕರಿಸಿದ್ದಾಳೆ.
ಆಸ್ತಿ ಆಸೆಗಾಗಿ ಏಳು ಮಂದಿಯ ಜೀವ ತೆಗೆದ ಆರೋಪ ಎದುರಿಸುತ್ತಿರುವ ಇಂದುಶೇಖರ್ ಮತ್ತು ಆತನ ಅಪ್ರಾಪ್ತ ಮಗಳ ಪಾತ್ರದ ಕುರಿತು ಪೊಲೀಸರು ತೀವ್ರ ವಿಚಾರಣೆ ಮುಂದುವರಿಸಿದ್ದಾರೆ. ಕೊಲೆಗಳಿಗೆ ಬಳಸಿದ ವಿಧಾನ, ಪೂರ್ವಸಿದ್ಧತೆ, ಆಸ್ತಿ ದಾಖಲೆಗಳ ಸಿದ್ಧತೆ ಹಾಗೂ ಸಾಕ್ಷ್ಯ ನಾಶಪಡಿಸಲು ನಡೆಸಿದ ಪ್ರಯತ್ನಗಳ ಕುರಿತು ಪೊಲೀಸರು ಹೆಚ್ಚಿನ ಮಾಹಿತಿ ಕಲೆಹಾಕುತ್ತಿದ್ದಾರೆ.
