ಜೈಲರ್-2 ಮೂಲಕ ಒಂದ್ಕಡೆ ಗಂಡುಗಲಿ ಕೆ ಮಂಜು ಸದ್ದು ಮಾಡ್ತಿದ್ರೆ.. ಮತ್ತೊಂದ್ಕಡೆ ಅವರ ಮಗ ಪಡ್ಡೆಹುಲಿ ಶ್ರೇಯಸ್ ಸೌಂಡ್ ಜೋರಿದೆ. ಯೆಸ್.. ಈ ಬಾರಿ ಶ್ರೇಯಸ್ ದಿಲ್ದಾರ್ ಆಗಿ ಬರ್ತಿದ್ದಾರೆ. ಅದಕ್ಕೆ ರೋರಿಂಗ್ ಸ್ಟಾರ್ ಶ್ರೀಮುರಳಿ ಕೂಡ ಸಾಥ್ ನೀಡಿದ್ದು, ಫಸ್ಟ್ ಸಾಂಗ್‌‌ನಲ್ಲೇ ಧೂಳೆಬ್ಬಿಸಿದ್ದಾರೆ. ಹಾಗಾದ್ರೆ ಸಾಂಗ್ ಹೇಗಿದೆ..? ದಿಲ್ದಾರ್ ಕಥೆ ಏನು ಅಂತೀರಾ..? ಇಲ್ಲಿದೆ ನೋಡಿ..
- D ಫಾರ್ ದಿಲ್ದಾರ್.. ಪಡ್ಡೆಹುಲಿಗೆ ರೋರಿಂಗ್ ಸ್ಟಾರ್ ಸಾಥ್
- ತಲೈವಾ ಚಿತ್ರದಿಂದ ಗಂಡುಗಲಿ ಕಂಬ್ಯಾಕ್.. ಮಗ ಕೂಡ ರಾಕ್ಸ್..!
- ಱಪರ್ ಚಂದನ್-ಚೇತನ್-ಜನ್ಯ ಕಾಂಬೋ.. ಕೂಲ್ ಬ್ರದರ್
- ಕಲರ್‌‌ಫುಲ್ ಸೆಟ್.. ಬಿಂದಾಸ್ ಡ್ಯಾನ್ಸ್.. ಸ್ಟೈಲಿಶ್ ಲುಕ್ಸ್‌ ಕಿಕ್
ದಿಲ್ದಾರ್.. ಸ್ಯಾಂಡಲ್‌ವುಡ್‌ನ ಪಡ್ಡೆಹುಲಿ ಶ್ರೇಯಸ್ ಮಂಜು ನಟನೆಯ ಐದನೇ ಸಿನಿಮಾ. ಯೆಸ್.. ಪಡ್ಡೆಹುಲಿ, ರಾಣ, ವಿಷ್ಣುಪ್ರಿಯ ಹಾಗೂ ಮಾರುತ ಚಿತ್ರಗಳ ಬಳಿಕ ಶ್ರೇಯಸ್ ಮತ್ತೆ ಬೆಳ್ಳಿತೆರೆ ಮೇಲೆ ದರ್ಬಾರ್ ಮಾಡೋಕೆ ದಿಲ್ದಾರ್ ಆಗಿ ಬರ್ತಿರೋ ಸಿನಿಮಾ ಇದು. ಇತ್ತೀಚೆಗೆ ಚಿತ್ರದ ಫಸ್ಟ್ ಸಾಂಗ್ ಕೂಲ್ ಬ್ರದರ್ ಬಿಡುಗಡೆ ಆಗಿದ್ದು, ಸ್ಟೈಲಿಶ್ ಲುಕ್ಸ್‌ ಹಾಗೂ ಬಿಂದಾಸ್ ಡ್ಯಾನ್ಸ್‌‌ನಿಂದ ಸಖತ್ ಕಿಕ್ ಕೊಡ್ತಿದ್ದಾರೆ ದಿಲ್ದಾರ್ ಶ್ರೇಯಸ್.
ಮಧು ಗೌಡ ಗಂಗೂರ್ ನಿರ್ದೇಶನದಲ್ಲಿ ತಯಾರಾಗಿರೋ ದಿಲ್ದಾರ್ ಸಿನಿಮಾದ ಫಸ್ಟ್ ಸಾಂಗ್ ಈ ಕೂಲ್ ಬ್ರದರ್. ಇದನ್ನು ರೋರಿಂಗ್ ಸ್ಟಾರ್ ಶ್ರೀಮುರಳಿ ಬಿಡುಗಡೆ ಮಾಡಿ, ತಂಡಕ್ಕೆ ಶುಭ ಹಾರೈಸಿದ್ರು. ಅಲ್ಲದೆ.. ಸ್ಟೇಜ್ ಮೇಲೆ ಸ್ಟೆಪ್ ಹಾಕಿ ಎಲ್ಲರ ಹುಬ್ಬೇರಿಸಿದ್ರು. ಶ್ರೇಯಸ್‌‌‌ಗೆ ಒಳ್ಳೆಯ ಭವಿಷ್ಯವಿದೆ. ನನಗೆ ಈ ಡಾನ್ಸ್ ನಂಬರ್ ಸಾಂಗಲ್ಲಿ ಆ್ಯಕ್ಟ್ ಮಾಡಲು ಹೇಳಿದಾಗ ಆಗಲ್ಲ ಎಂದಿದ್ದೆ. ಶ್ರೇಯಸ್ ತುಂಬಾ ಚೆನ್ನಾಗಿ ಸ್ಟೆಪ್ಸ್ ಹಾಕಿದ್ದಾನೆ ಎಂದರು.
ಮಾಸ್ ಪಾತ್ರಗಳ ಮೂಲಕ ಗಮನ ಸೆಳೆದಿರುವ ಶ್ರೇಯಸ್ ಮಂಜು.. ಈ ಚಿತ್ರದಲ್ಲಿ ಮತ್ತೊಂದು ಹಂತದ ರಾ & ರಗಡ್ ರೋಲ್‌‌‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಏನ್ಸಿಯಂಟ್ ಮೂವೀಸ್ ಬ್ಯಾನರ್‌‌‌ನಡಿ ಆರ್ ಸಂತೋಷ್ ಕುಮಾರ್ ನಿರ್ಮಿಸಿದ್ದಾರೆ. ಇಂಟೆಸ್ಟಿಂಗ್ ಅಂದ್ರೆ ನಟ ಶರಣ್, ನಟಿ ಶ್ರುತಿ ಅವರ ಸಹೋದರಿಯ ಮಗಳಾದ ಕೀರ್ತಿ ಕೃಷ್ಣ ಈ ಚಿತ್ರದ ಮೂಲಕ ನಾಯಕಿಯಾಗಿ ಪದಾರ್ಪಣೆ ಮಾಡುತ್ತಿದ್ದಾರೆ.
ಮುಖ್ಯ ಅತಿಥಿಗಳಾಗಿ ಆಗಮಿಸಿದ ಮಾಜಿ ಸಚಿವ ಅರವಿಂದ ಲಿಂಬಾವಳಿ ಮಾತನಾಡುತ್ತಾ ನಮ್ಮ ರಾಜಕಾರಣದಲ್ಲಿ ತುಂಬಾ ನಾಟಕ, ಸಿನಿಮಾ ನಡೀತಿರುತ್ತೆ. ನಿರ್ಮಾಪಕ ಸಂತೋಷ್, ಹರಿಕೃಷ್ಣ ನಮ್ಮ ಕ್ಷೇತ್ರದವರೇ.. ಅವರಿಗಾಗಿ ನಾನಿಲ್ಲಿಗೆ ಬಂದೆ. ಈ ಸಿನಿಮಾ ಯಶಸ್ವಿಯಾಗಲಿ ಎಂದು ಶುಭ ಹಾರೈಸಿದರು. ಕೆ ಮಂಜು ಮಾತನಾಡುತ್ತಾ ಅರ್ಜುನ್ ಜನ್ಯ ಅವರ ಮ್ಯೂಸಿಕ್‌‌‌ನಲ್ಲಿ ಈ ಹಾಡು ತುಂಬಾ ಚೆನ್ನಾಗಿ ಮೂಡಿಬಂದಿದೆ ಎಂದರು. ನಿರ್ಮಾಪಕರಾದ ರಮೇಶ್ ಯಾದವ್, ಮಾಧವ್ ಕಿರಣ್ ಕೂಡ ಶುಭ ಹಾರೈಸಿದರು.
ಅಂದಹಾಗೆ ಈ ಕಲರ್‌‌ಫುಲ್ ಹಾಡಿಗೆ ದುಬಾರಿ ಸೆಟ್‌‌ಗಳನ್ನ ಹಾಕಿ, ಕೋಟ್ಯಂತರ ರೂಪಾಯಿ ಖರ್ಚು ಮಾಡಿ ಮಾಡಿರೋದು ಪ್ರತಿ ಫ್ರೇಮ್‌‌ನಲ್ಲೂ ಎದ್ದು ಕಾಣ್ತಿದೆ. ಅರ್ಜುನ್ ಜನ್ಯ ಸಂಗೀತ ಸಂಯೋಜನೆಯ ಈ ಹಾಡಿಗೆ ಚೇತನ್ ಕುಮಾರ್ ಸಾಹಿತ್ಯ ಹಾಗೂ ಱಪರ್ ಚಂದನ್ ಶೆಟ್ಟಿ ಗಾಯನವಿದೆ. ಖಳನಾಯಕನಾಗಿ ಭಜರಂಗಿ ಲೋಕಿ ಬಣ್ಣ ಹಚ್ಚಿದ್ದು, ತಮ್ಮ ಪಾತ್ರದ ಬಗ್ಗೆ ವಿವರಿಸಿದರು.
ಇವರಲ್ಲದೆ.. ನಟ ಸಾಧು ಕೋಕಿಲ, ಚಂದ್ರಪ್ರಭ, ಕಾರ್ತಿಕ್, ಚಿಲ್ಲರ್ ಮಂಜು ಮುಂತಾದ ಹಾಸ್ಯ ನಟರ ದಂಡು ಈ ದಿಲ್ದಾರ್ ಚಿತ್ರದಲ್ಲಿದೆ. ಕೆಜಿಎಫ್ ಖ್ಯಾತಿಯ ಅವಿನಾಶ್, ಅರ್ಪಿತ್ ಕೂಡ ತಾರಾಗಣದಲ್ಲಿದ್ದಾರೆ.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್
