ಕೋಟೆನಾಡು ಚಿತ್ರದುರ್ಗದಲ್ಲಿ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಹವಾ ಹೇಗಿತ್ತು ಅಂದ್ರೆ, ಅಲ್ಲಿ ಸೇರಿದ್ದ ಸಾವಿರಾರು ಫ್ಯಾನ್ಸ್ ಆರ್ಭಟಕ್ಕೆ ಬ್ಯಾರಿಕೇಡ್‌ಗಳೇ ಧೂಳೀಪಟವಾದ್ವು. ಅದ್ರಲ್ಲೂ ಹೆಲಿಕಾಪ್ಟರ್‌ನಿಂದ ಇಳಿದ ಕಿಚ್ಚ, ಚಪ್ಪಲಿ ಕೂಡ ಹಾಕದೇ ಬರಿಗಾಲಲ್ಲಿ ಕೋಟೆನಾಡಿಗೆ ಬಂದಿದ್ದು ಯಾಕೆ..? ಕಿಚ್ಚನ ಈ ಬರಿಗಾಲಿನ ರಹಸ್ಯ ಮತ್ತು ಕೋಟೆನಾಡಿನಲ್ಲಿ ಸೃಷ್ಟಿಯಾದ ಆ ಹೈ-ವೋಲ್ಟೇಜ್ ರಂಪಾಟದ ಕಂಪ್ಲೀಟ್ ರಿಪೋರ್ಟ್ ಇಲ್ಲಿದೆ ನೋಡಿ.
- ಕೋಟೆನಾಡಿಗೆ ಹೆಲಿಕಾಪ್ಟರ್‌ನಲ್ಲಿ ಬಂದಿಳಿದ ಸುದೀಪ್
- ಬರಿಗಾಲಲ್ಲೇ ಬಂದ ಕಿಚ್ಚನ ಹಿಂದಿದೆ ನವರಾತ್ರಿ ವ್ರತ..!
- ಪೊಲೀಸರ ಹರಸಾಹಸ.. ನಿಯಂತ್ರಣಕ್ಕೆ ಸಿಗದ ಅಭಿಮಾನಿಗಳು
- ‘ಚಿತ್ರದುರ್ಗಕ್ಕೆ ಕರೆದಾಗ ತಪ್ಪಿಸಿಕೊಳ್ಳಲ್ಲ’ ಎಂದ ಕಿಚ್ಚ..!
ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅಂದ್ರೆನೆ ಅಲ್ಲಿ ಮಾಸ್, ಕ್ರೇಜ್ ಮತ್ತು ಅಭಿಮಾನದ ಭಕ್ತಿ. ಚಿತ್ರದುರ್ಗದ ಹಳೇ ಮಾಧ್ಯಮಿಕ ಶಾಲಾ ಆವರಣದಲ್ಲಿ ನಡೆದ ಮದಕರಿನಾಯಕ ಜಯಂತೋತ್ಸವಕ್ಕೆ ಹೆಲಿಕಾಪ್ಟರ್‌ನಲ್ಲಿ ಬಂದಿಳಿದ ಕಿಚ್ಚ, ಬರಿಗಾಲಲ್ಲೇ ಕೆಳಗಿಳಿದು ನಡೆದುಕೊಂಡು ಬಂದಾಗ ಅಲ್ಲಿ ನೆರೆದಿದ್ದ ಫ್ಯಾನ್ಸ್ ಕಣ್ಣರಳಿಸಿ ನೋಡಿದ್ದಾರೆ. ಅಷ್ಟಕ್ಕೂ ಸುದೀಪ್ ಚಪ್ಪಲಿ ಹಾಕದೇ ಬರಲು ಕಾರಣ ಅವರ ಕಠಿಣ ನವರಾತ್ರಿ ವ್ರತ. ಪ್ರತಿ ವರ್ಷದಂತೆ ಈ ವರ್ಷವೂ ನವರಾತ್ರಿಯ 9 ದಿನಗಳ ಕಾಲ ಉಪವಾಸ ವ್ರತ ಆಚರಿಸುತ್ತಿರೋ ಕಿಚ್ಚ, ದಿನಕ್ಕೆ ಒಂದೇ ಹೊತ್ತು ಊಟ ಮಾಡುತ್ತಾ ಅತ್ಯಂತ ಭಕ್ತಿಯಿಂದ ಕಾಲಳೆಯುತ್ತಿದ್ದಾರೆ. ಹಿಂದೆ ಬಿಗ್ ಬಾಸ್ ಶೋ ವೇದಿಕೆಗೂ ಬರಿಗಾಲಲ್ಲಿ ಬಂದು ನಿಂತಿದ್ದ ಸುದೀಪ್, ಈಗ ಕೋಟೆನಾಡಿನ ನೆಲಕ್ಕೂ ಬರಿಗಾಲಲ್ಲೇ ಕಾಲಿಟ್ಟು ತಮ್ಮ ಕಠಿಣ ದೈವಭಕ್ತಿಯನ್ನು ಮೆರೆದಿದ್ದಾರೆ.
ಕಾರ್ಯಕ್ರಮಕ್ಕೆ ಬರುವ ಮುನ್ನ ಶಿವಶರಣ ಮಾದಾರ ಚನ್ನಯ್ಯ ಗುರುಪೀಠಕ್ಕೆ ಭೇಟಿ ನೀಡಿದ ಕಿಚ್ಚ, ಶ್ರೀಗಳ ದರ್ಶನ ಪಡೆದು ಆಶೀರ್ವಾದ ಪಡೆದುಕೊಂಡರು. ಆದರೆ ಜಯಂತೋತ್ಸವದ ವೇದಿಕೆ ಹತ್ತುತ್ತಿದ್ದಂತೆ ಕೋಟೆನಾಡಿನಲ್ಲಿ ಅಕ್ಷರಶಃ ಸುನಾಮಿಯೇ ಎದ್ದಿತ್ತು. ತಮ್ಮ ನೆಚ್ಚಿನ ನಟನನ್ನು ಕಣ್ಣುಂಬಿಕೊಳ್ಳಲು ಸಾವಿರಾರು ಅಭಿಮಾನಿಗಳು ಪೊಲೀಸರು ಹಾಕಿದ್ದ ಬ್ಯಾರಿಕೇಡ್‌ಗಳನ್ನೇ ಹಾರಿ, ‘ಕಿಚ್ಚ ಕಿಚ್ಚ’ ಅಂತ ಘೋಷಣೆ ಕೂಗುತ್ತಾ ವೇದಿಕೆಗೆ ನುಗ್ಗಿದರು. ಫ್ಯಾನ್ಸ್ ಅಟ್ಯಾಕ್‌ನಿಂದಾಗಿ ಅಲ್ಲಿದ್ದ ಸಚಿವರಾದ ಸತೀಶ್ ಜಾರಕಿಹೊಳಿ, ರಘುಮೂರ್ತಿ ಹಾಗೂ ವಿವಿಧ ಮಠಾಧೀಶರು ಕೊಂಚ ಗಲಿಬಿಲಿಗೊಂಡರೆ, ಪೊಲೀಸರು ಕಂಟ್ರೋಲ್ ಮಾಡಲು ಹರಸಾಹಸ ಪಟ್ಟರು. ಮಾಜಿ ಸಚಿವ ರಾಜೂಗೌಡ ಎಷ್ಟೇ ಸಮಾಧಾನಪಡಿಸಲು ಯತ್ನಿಸಿದರೂ ಫ್ಯಾನ್ಸ್ ಹಂಗಾಮ ನಿಲ್ಲಲೇ ಇಲ್ಲ.
ಇಷ್ಟೆಲ್ಲಾ ರಂಪಾಟ ನಡೆದರೂ ಸದಾ ಕೂಲ್ ಆಗಿರೋ ಕಿಚ್ಚ, “ನೀವೆಲ್ಲ ಹೇಗಿದ್ದೀರಿ? ಚಿತ್ರದುರ್ಗಕ್ಕೆ ಕರದಾಗ ನಾನು ಎಂದಿಗೂ ತಪ್ಪಿಸಿಕೊಳ್ಳಲ್ಲ, ಮತ್ತೆ ಮತ್ತೆ ನಿಮ್ಮನ್ನು ನೋಡಲು ಬರ್ತೀನಿ” ಅಂತ ಮೈಕ್ ಹಿಡಿದು ಮಾತಾಡಿ ಅಭಿಮಾನಿಗಳನ್ನು ತೇಲಿಸಿದರು.
ಅದಾದ ಬಳಿಕ ಸುದೀಪ್ ವೇದಿಕೆಯಿಂದ ನಿರ್ಗಮಿಸುತ್ತಿದ್ದಂತೆ, ಅವರ ಹಿಂದೆಯೇ ಸಾವಿರಾರು ಜನ ಜಾಗ ಖಾಲಿ ಮಾಡಿದ್ದರಿಂದ ವೇದಿಕೆಯಲ್ಲಿದ್ದ ಗಣ್ಯರು ಹಾಗೂ ಸ್ವಾಮೀಜಿಗಳು ಅಸಮಾಧಾನಗೊಂಡು ಒಂದೊಂದಾಗಿ ಕಾಲ್ಕಿತ್ತರು. ಒಟ್ಟಿನಲ್ಲಿ ಬರಿಗಾಲಲ್ಲಿ ಬಂದು ದೈವಭಕ್ತಿ ಮೆರೆದ ಸುದೀಪ್, ಕೋಟೆನಾಡಿನಲ್ಲಿ ಎಬ್ಬಿಸಿದ ಮಾಸ್ ಹವಾ ಮಾತ್ರ ನೆಕ್ಸ್ಟ್ ಲೆವೆಲ್‌ನಲ್ಲಿ ಸೌಂಡ್ ಮಾಡ್ತಿದೆ.
ಕೀರ್ತಿ ಪಾಟೀಲ್, ಫಿಲಂ ಬ್ಯೂರೋ, ಗ್ಯಾರಂಟಿ ನ್ಯೂಸ್
