ಬೆಂಗಳೂರು: ಬಿಗ್ ಬಾಸ್ ಕನ್ನಡ ಸೀಸನ್ 13ರ ದೊಡ್ಮನೆಯಲ್ಲಿ ಕಳೆದ ಎರಡು ವಾರಗಳಿಂದ ನಡೆಯುತ್ತಿರುವ ಆಟ, ಸ್ಪರ್ಧಿಗಳ ವರ್ತನೆ ಹಾಗೂ ಟಾಸ್ಕ್ಗಳ ವೇಳೆ ಕಂಡುಬಂದ ಕೆಲವು ಘಟನೆಗಳ ಬಗ್ಗೆ ನಿರೂಪಕ ಕಿಚ್ಚ ಸುದೀಪ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ‘ವಾರದ ಕಥೆ ಕಿಚ್ಚನ ಜೊತೆ’ ಕಾರ್ಯಕ್ರಮದಲ್ಲಿ ಸ್ಪರ್ಧಿಗಳ ಆಟದ ವೈಖರಿಯನ್ನು ವಿಶ್ಲೇಷಿಸಿದ ಸುದೀಪ್, ಸರಿಯಾಗಿ ಆಟವಾಡುವಂತೆ ಸ್ಪರ್ಧಿಗಳಿಗೆ ಖಡಕ್ ಕಿವಿಮಾತು ಹೇಳಿದ್ದಾರೆ.
‘ಅಗ್ನಿ ಗ್ಯಾಂಗ್’ ಸ್ಪರ್ಧಿಗಳ ಆಟದ ಬಗ್ಗೆ ಸುದೀಪ್ ಗರಂ ಆಗಿದ್ದಾರೆ. ಬಿಗ್ ಬಾಸ್ ಮನೆಗೆ ಪ್ರವೇಶ ಪಡೆಯಲು ನಡೆದ ‘ಅಗ್ನಿ ಪರೀಕ್ಷೆ’ ಆಯ್ಕೆ ಪ್ರಕ್ರಿಯೆಯ ಬಗ್ಗೆಯೂ ಅವರು ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ. ಇಂತಹ ಆಯ್ಕೆ ಪ್ರಕ್ರಿಯೆಗಳನ್ನು ಮುಂದಿನ ದಿನಗಳಲ್ಲಿ ಕೈಬಿಡುವಂತೆ ಬಿಗ್ ಬಾಸ್ಗೆ ಸಲಹೆ ನೀಡಿದ್ದಾರೆ.
ಅಗ್ನಿ ಪರೀಕ್ಷೆ ಮೂಲಕ ಮನೆಗೆ ಪ್ರವೇಶ ಪಡೆದಿರುವ ಸ್ಪರ್ಧಿಗಳಿಂದ ನಿರೀಕ್ಷಿಸಿದ ಮಟ್ಟದ ಆಟ ಕಂಡುಬಂದಿಲ್ಲ ಎಂಬುದು ಸುದೀಪ್ ಅವರ ಅಸಮಾಧಾನಕ್ಕೆ ಕಾರಣವಾಗಿದೆ. ದೊಡ್ಮನೆಗೆ ಬಂದಿರುವ ಸ್ಪರ್ಧಿಗಳು ತಮ್ಮ ಜವಾಬ್ದಾರಿಯನ್ನು ಅರಿತುಕೊಂಡು ಆಟವಾಡಬೇಕು. ಕೇವಲ ಜಗಳ, ಗೊಂದಲ ಅಥವಾ ವೈಯಕ್ತಿಕ ವಿಚಾರಗಳಲ್ಲೇ ಸಮಯ ಕಳೆಯದೆ ಆಟದ ಮೇಲೆ ಗಮನಹರಿಸಬೇಕು ಎಂಬ ಸಂದೇಶವನ್ನು ಸುದೀಪ್ ನೀಡಿದ್ದಾರೆ.
ಇದೇ ವೇಳೆ ಟಾಸ್ಕ್ವೊಂದರ ಸಂದರ್ಭದಲ್ಲಿ ಮಂಜನಿಗೆ ಹೊಡೆದ ಆರೋಪಕ್ಕೆ ಸಂಬಂಧಿಸಿದಂತೆ ಸೌಂದರ್ಯ ಶೆಟ್ಟಿ ಅವರನ್ನೂ ಸುದೀಪ್ ತರಾಟೆಗೆ ತೆಗೆದುಕೊಂಡಿದ್ದಾರೆ. ಟಾಸ್ಕ್ ವೇಳೆ ನಡೆದ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿದ ಅವರು, ಸೌಂದರ್ಯ ಅವರ ವರ್ತನೆ ಸರಿಯಲ್ಲ ಎಂದು ಹೇಳಿದ್ದಾರೆ. ಈ ಹಿನ್ನೆಲೆ ಅವರಿಗೆ ಜೈಲು ಶಿಕ್ಷೆಯನ್ನೂ ವಿಧಿಸಲಾಗಿದೆ.
‘ಯಾರೂ ಚಪ್ಪಾಳೆಗೆ ಅರ್ಹರಲ್ಲ’
ಕಾರ್ಯಕ್ರಮದ ಪ್ರಮುಖ ಕ್ಷಣವೆಂದರೆ ‘ಕಿಚ್ಚನ ಚಪ್ಪಾಳೆ’ ವಿಚಾರ. ಪ್ರತಿ ವಾರ ಉತ್ತಮ ಪ್ರದರ್ಶನ ನೀಡಿದ ಸ್ಪರ್ಧಿಗೆ ಸುದೀಪ್ ತಮ್ಮದೇ ಶೈಲಿಯಲ್ಲಿ ಚಪ್ಪಾಳೆ ನೀಡುವುದು ವಾಡಿಕೆ. ಆದರೆ ಈ ಬಾರಿ ಕಳೆದ ಎರಡು ವಾರಗಳ ಆಟವನ್ನು ಗಮನಿಸಿದ ಬಳಿಕ, ತಮ್ಮ ದೃಷ್ಟಿಯಲ್ಲಿ ಯಾವುದೇ ಸ್ಪರ್ಧಿಯೂ ಕಿಚ್ಚನ ಚಪ್ಪಾಳೆಗೆ ಅರ್ಹರಾಗಿಲ್ಲ ಎಂಬುದನ್ನು ಸುದೀಪ್ ಸ್ಪಷ್ಟಪಡಿಸಿದ್ದಾರೆ.
ಸ್ಪರ್ಧಿಗಳ ಆಟದಿಂದ ನಿರಾಸೆ ವ್ಯಕ್ತಪಡಿಸಿದ ಸುದೀಪ್, ದೊಡ್ಮನೆಯೊಳಗಿನ ಆಟ ಇನ್ನಷ್ಟು ಸುಧಾರಿಸಬೇಕಿದೆ ಎಂದು ಸೂಚಿಸಿದ್ದಾರೆ. ಸ್ಪರ್ಧಿಗಳು ತಮ್ಮ ಆಟದ ಮೂಲಕ ವೀಕ್ಷಕರನ್ನು ಸೆಳೆಯಬೇಕು. ಬಿಗ್ ಬಾಸ್ ಮನೆಯ ಅವಕಾಶವನ್ನು ಸದುಪಯೋಗಪಡಿಸಿಕೊಂಡು ಉತ್ತಮ ಪ್ರದರ್ಶನ ನೀಡಬೇಕು ಎಂಬ ಸಂದೇಶವನ್ನು ನೀಡಿದ್ದಾರೆ.
ಆದರೆ ಇದೇ ಸಂದರ್ಭದಲ್ಲಿ ಸುದೀಪ್ ಕಿಚ್ಚನ ಚಪ್ಪಾಳೆಯನ್ನು ಬಿಗ್ ಬಾಸ್ ಸ್ಪರ್ಧಿಗಳಿಗೆ ನೀಡದೆ ಕರುನಾಡಿನ ಜನತೆಗೆ ನೀಡಿದ್ದಾರೆ. ಕಳೆದ ಎರಡು ವಾರಗಳಿಂದ ಬಿಗ್ ಬಾಸ್ ಕಾರ್ಯಕ್ರಮವನ್ನು ವೀಕ್ಷಿಸುತ್ತಿರುವ ಪ್ರೇಕ್ಷಕರಿಗೆ ಧನ್ಯವಾದ ಸಲ್ಲಿಸಿದ ಅವರು, ವೀಕ್ಷಕರ ಸಹನೆ ಮತ್ತು ಬೆಂಬಲವನ್ನು ಮೆಚ್ಚಿಕೊಂಡಿದ್ದಾರೆ.
ಕರುನಾಡಿನ ವೀಕ್ಷಕರಿಗೆ ಕಿಚ್ಚನ ಸಲಾಂ
“ಈ ಚಪ್ಪಾಳೆ ಕೊಡೋದಕ್ಕೆ ನಾನಿನ್ನೂ ಚಿಕ್ಕವನು. ಎರಡು ವಾರ ಈಗ ನಡೆದಿರುವ ಹಾಗೂ ಹಿಂದಿನ ಎಪಿಸೋಡ್ಗಳನ್ನೂ ನೋಡಿಯೂ ನಮ್ಮ ಮೇಲೆ ಇನ್ನೂ ಭರವಸೆ ಇಟ್ಟು ಬಿಗ್ ಬಾಸ್ ನೋಡುತ್ತಿರುವ ಕರುನಾಡಿನ ವೀಕ್ಷಕರಿಗೆ ನನ್ನ ಚಪ್ಪಾಳೆ” ಎಂದು ಸುದೀಪ್ ಹೇಳಿದ್ದಾರೆ.
ಕಳೆದ ಎರಡು ವಾರಗಳ ಘಟನೆಗಳ ಹೊರತಾಗಿಯೂ ಬಿಗ್ ಬಾಸ್ ಕಾರ್ಯಕ್ರಮವನ್ನು ವೀಕ್ಷಿಸುತ್ತಿರುವ ಕರ್ನಾಟಕದ ಜನತೆಗೆ ಸುದೀಪ್ ವಿಶೇಷವಾಗಿ ಧನ್ಯವಾದ ತಿಳಿಸಿದ್ದಾರೆ. ಬಿಗ್ ಬಾಸ್ನ ಹಿಂದಿನ 12 ಸೀಸನ್ಗಳಿಂದಲೂ ತಮ್ಮೊಂದಿಗೆ ಇರುವ ವೀಕ್ಷಕರಿಗೆ ಕೃತಜ್ಞತೆ ವ್ಯಕ್ತಪಡಿಸಿದ್ದಾರೆ.
