ನವದೆಹಲಿ, ಆಗಸ್ಟ್ 12: ಸೈಬರ್ ವಂಚನೆ ಹಾಗೂ ಅಕ್ರಮ ಸಾಲದ ಆ್ಯಪ್‌ಗಳ ಹಾವಳಿಗೆ ಕಡಿವಾಣ ಹಾಕಲು ಕೇಂದ್ರ ಸರ್ಕಾರ ಕಠಿಣ ಕ್ರಮ ಕೈಗೊಂಡಿದೆ. ಜೂನ್ 30, 2026ರವರೆಗೆ ವಂಚನೆಯ ಸಾಲದ ಆ್ಯಪ್‌ಗಳು ಸೇರಿದಂತೆ ಒಟ್ಟು 3,718 ಮೊಬೈಲ್ ಅಪ್ಲಿಕೇಶನ್‌ಗಳನ್ನು ನಿರ್ಬಂಧಿಸಲಾಗಿದೆ ಎಂದು ಕೇಂದ್ರ ಗೃಹ ವ್ಯವಹಾರಗಳ ರಾಜ್ಯ ಸಚಿವ ಬಂಡಿ ಸಂಜಯ್ ಕುಮಾರ್ ಲೋಕಸಭೆಗೆ ತಿಳಿಸಿದ್ದಾರೆ.
ಭಾರತೀಯ ಸೈಬರ್ ಅಪರಾಧ ಸಮನ್ವಯ ಕೇಂದ್ರ (I4C) ಮಾಹಿತಿ ತಂತ್ರಜ್ಞಾನ ಕಾಯ್ದೆಯ ಸೆಕ್ಷನ್ 69(A) ಹಾಗೂ 79(3)(b) ಅಡಿಯಲ್ಲಿ ಈ ಆ್ಯಪ್‌ಗಳ ವಿರುದ್ಧ ಕ್ರಮ ಕೈಗೊಂಡಿದೆ. ನಾಗರಿಕರನ್ನು ವಂಚಿಸುವ ಅಕ್ರಮ, ಮೋಸದ ಹಾಗೂ ದಾರಿತಪ್ಪಿಸುವ ಆ್ಯಪ್‌ಗಳ ವಿರುದ್ಧ ಸರ್ಕಾರದ ಕಾರ್ಯಾಚರಣೆ ಮುಂದುವರಿದಿದೆ ಎಂದು ಸಚಿವರು ಹೇಳಿದ್ದಾರೆ.
15.75 ಲಕ್ಷ ಸಿಮ್, 5.77 ಲಕ್ಷ IMEI ಬ್ಲಾಕ್
ಸೈಬರ್ ಅಪರಾಧಕ್ಕೆ ಸಂಬಂಧಿಸಿದಂತೆ ವಿವಿಧ ಪೊಲೀಸ್ ಅಧಿಕಾರಿಗಳು ವರದಿ ಮಾಡಿರುವ ಆಧಾರದ ಮೇಲೆ 15.75 ಲಕ್ಷಕ್ಕೂ ಹೆಚ್ಚು ಸಿಮ್ ಕಾರ್ಡ್‌ಗಳು ಹಾಗೂ 5.77 ಲಕ್ಷ IMEI ಸಂಖ್ಯೆಗಳನ್ನೂ ಕೇಂದ್ರ ಸರ್ಕಾರ ನಿರ್ಬಂಧಿಸಿದೆ. ಇದರ ಮೂಲಕ ಸೈಬರ್ ವಂಚನೆ ನಡೆಸುವ ಮೊಬೈಲ್ ಸಂಪರ್ಕಗಳು ಮತ್ತು ಸಾಧನಗಳ ಬಳಕೆಯನ್ನು ತಡೆಯುವ ಪ್ರಯತ್ನ ನಡೆಸಲಾಗಿದೆ.
11,158 ಕೋಟಿ ಹಣ ಉಳಿಸಿದ ವ್ಯವಸ್ಥೆ
2021ರಲ್ಲಿ ಆರ್ಥಿಕ ಸೈಬರ್ ವಂಚನೆಗಳನ್ನು ತಕ್ಷಣ ವರದಿ ಮಾಡಲು ಆರಂಭಿಸಲಾದ I4C ನಿರ್ವಹಣೆಯ ಸಿಟಿಜನ್ ಫೈನಾನ್ಷಿಯಲ್ ಸೈಬರ್ ಫ್ರಾಡ್ ರಿಪೋರ್ಟಿಂಗ್ ಅಂಡ್ ಮ್ಯಾನೇಜ್‌ಮೆಂಟ್ ಸಿಸ್ಟಮ್ (CFCFRMS) ಮೂಲಕವೂ ಮಹತ್ವದ ಫಲಿತಾಂಶ ದೊರೆತಿದೆ.
ಜೂನ್ 30ರವರೆಗೆ 32.80 ಲಕ್ಷಕ್ಕೂ ಅಧಿಕ ದೂರುಗಳ ಆಧಾರದ ಮೇಲೆ 11,158 ಕೋಟಿ ರೂ. ಗೂ ಹೆಚ್ಚು ಹಣವನ್ನು ವಂಚನೆಯಿಂದ ರಕ್ಷಿಸಲಾಗಿದೆ ಎಂದು ಸಚಿವರು ತಿಳಿಸಿದ್ದಾರೆ.
ಇದರ ಜೊತೆಗೆ, ಬ್ಯಾಂಕ್‌ಗಳು ಮತ್ತು ಹಣಕಾಸು ಸಂಸ್ಥೆಗಳ ಸಹಯೋಗದಲ್ಲಿ ಸೈಬರ್ ಅಪರಾಧಿಗಳ ಶಂಕಿತ ಗುರುತಿನ ದತ್ತಾಂಶವನ್ನು ಹಂಚಿಕೊಳ್ಳಲಾಗುತ್ತಿದೆ. ಜೂನ್ 30ರವರೆಗೆ 25,698 ಕೋಟಿ ರೂ. ಮೌಲ್ಯದ ಅನುಮಾನಾಸ್ಪದ ವಹಿವಾಟುಗಳನ್ನು ತಡೆಹಿಡಿಯಲಾಗಿದೆ ಎಂದು ಕೇಂದ್ರ ತಿಳಿಸಿದೆ.
ವಂಚನೆಗೊಳಗಾದ ಹಣ ವಾಪಸ್ ಪಡೆಯಲು ಹೊಸ ವ್ಯವಸ್ಥೆ
ಸೈಬರ್ ವಂಚನೆ ಪ್ರಕರಣಗಳಲ್ಲಿ ಕಾರ್ಯಾಚರಣೆಯನ್ನು ಸುಗಮಗೊಳಿಸಲು ಗೃಹ ಸಚಿವಾಲಯವು NCRP-CFCFRMSಗಾಗಿ ಸಮಗ್ರ ಪ್ರಮಾಣಿತ ಕಾರ್ಯಾಚರಣಾ ವಿಧಾನ (SOP) ಜಾರಿಗೊಳಿಸಿದೆ. ಬ್ಯಾಂಕ್‌ಗಳೊಂದಿಗೆ ಸಮನ್ವಯ, ದೂರುಗಳ ಪರಿಶೀಲನೆ, ವಂಚನೆಗೊಳಗಾದ ಹಣವನ್ನು ತ್ವರಿತವಾಗಿ ಮರುಪಡೆಯುವುದು ಸೇರಿದಂತೆ ಹಲವು ಹಂತಗಳಿಗೆ ಇದರಲ್ಲಿ ಮಾರ್ಗಸೂಚಿ ನೀಡಲಾಗಿದೆ.
ಏಪ್ರಿಲ್ 2026ರಿಂದ ಹಣ ಮರುಸ್ಥಾಪನೆ ಹಾಗೂ ಬ್ಯಾಂಕ್ ಖಾತೆಗಳಿಗೆ ಸಂಬಂಧಿಸಿದ ಕುಂದುಕೊರತೆ ಪರಿಹಾರ ಮಾಡ್ಯೂಲ್‌ಗಳನ್ನೂ ಜಾರಿಗೆ ತರಲಾಗಿದೆ.
ಸೈಬರ್ ಜಾಗೃತಿಗೂ ಒತ್ತು
ಸೈಬರ್ ಅಪರಾಧ ತಡೆಗೆ ಸರ್ಕಾರವು SMS, ಕಾಲರ್ ಟ್ಯೂನ್, ಸಾಮಾಜಿಕ ಮಾಧ್ಯಮ, ಟಿವಿ-ರೇಡಿಯೋ ಜಾಹೀರಾತುಗಳು, ಶಾಲಾ ಕಾರ್ಯಕ್ರಮಗಳು, ಸಿನಿಮಾ ಜಾಹೀರಾತುಗಳು ಹಾಗೂ CyberDost ಸೇರಿದಂತೆ ವಿವಿಧ ವೇದಿಕೆಗಳ ಮೂಲಕ ಜಾಗೃತಿ ಮೂಡಿಸುತ್ತಿದೆ. ನಾಗರಿಕರು ಸೈಬರ್ ಅಪರಾಧಗಳನ್ನು ವರದಿ ಮಾಡಲು NCRP ವ್ಯವಸ್ಥೆಯನ್ನೂ ಬಳಸಬಹುದು.
