ಸ್ಪೇನ್: ಯೂರೋಪ್ ನ ಸುಂದರ ದೇಶಗಳಲ್ಲಿ ಒಂದಾಗಿರುವ ಸ್ಪೇನ್ ಗೆ ಇದೀಗ ಅಕ್ರಮ ವಲಸಿಗರ ಕಾಟ ತೀವ್ರಗೊಂಡಿದೆ. ಅದರಲ್ಲೂ ಆಫ್ರಿಕಾ ಖಂಡದ ನೆರೆಯ ದೇಶವಾದ ಮೊರಾಕೊದಿಂದ (Morocco) ಅಕ್ರಮ ವಲಸಿಗರು ಸ್ಪೇನ್ನ ಗಡಿ ಭಾಗಗಳಿಗೆ ಮುನ್ನುಗ್ಗುತ್ತಿದ್ದು, ಇವರನ್ನು ನಿಯಂತ್ರಿಸುವಲ್ಲಿ ಸ್ಪೇನ್ ಸರ್ಕಾರ ಹಾಗೂ ಭದ್ರತಾ ಪಡೆಗಳು ಹೈರಾಣಾಗಿವೆ.
ಅಕ್ರಮ ವಲಸಿಗರಿಂದ ಸ್ಪೇನ್ ನಲ್ಲಿ ಹೆಚ್ಚಿದ ಆತಂಕ:
ಸ್ಪೇನ್ ನಲ್ಲಿ ಅಕ್ರಮ ವಲಸಿಗರ ಸಮಸ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದ್ದು, ಸ್ಥಳೀಯ ಆಡಳಿತ ಎಷ್ಟೇ ಕಠಿಣ ಕ್ರಮಗಳನ್ನು ಕೈಗೊಂಡರೂ ವಲಸಿಗರ ಒಳಹರಿವನ್ನು ಸಂಪೂರ್ಣವಾಗಿ ತಡೆಯಲು ಸಾಧ್ಯವಾಗುತ್ತಿಲ್ಲ. ಮೊರಾಕೊದಿಂದ ಗುಂಪುಗುಂಪಾಗಿ ಬರುತ್ತಿರುವ ವಲಸಿಗರು ಅಕ್ರಮ ಡ್ರಗ್ಸ್ ದಂಧೆ, ಮಾನವ ಕಳ್ಳಸಾಗಣೆ (Human Trafficking) ಸೇರಿದಂತೆ ವಿವಿಧ ಕಾನೂನುಬಾಹಿರ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳುತ್ತಿದ್ದಾರೆ. ಇದು ಸ್ಥಳೀಯರ ಆತಂಕಕ್ಕೆ ಕಾರಣವಾಗಿದೆ.
ಸಮುದ್ರ ಮಾರ್ಗದ ಮೂಲಕ ಒಳನುಗ್ಗುತ್ತಿರುವ ವಲಸಿಗರು:
ಆಫ್ರಿಕಾ ಖಂಡದಲ್ಲಿರುವ ಸ್ಪೇನ್ ನ ಸ್ವಾಯತ್ತ ನಗರವಾದ ಸಿಯುಟಾ (Ceuta) ಮತ್ತು ಮೊರಾಕೊ ನಡುವೆ ಕೇವಲ 3 ರಿಂದ 5 ಕಿಲೋಮೀಟರ್ ಅಂತರವಿದ. ಈ ಅಲ್ಪ ದೂರದ ಸಮುದ್ರ ಮಾರ್ಗವನ್ನು ಅಥವಾ ಗಡಿಯನ್ನು ಈಜಿ ಇಲ್ಲವೇ ದೋಣಿಗಳ ಮೂಲಕ ದಾಟಿ ನೂರಾರು ಜನರು ಸ್ಪೇನ್ ಭೂಭಾಗಕ್ಕೆ ಕಾಲಿಡುತ್ತಿದ್ದಾರೆ. ಸ್ಥಳೀಯ ಪೊಲೀಸರು ಹಾಗೂ ಸೇನೆ ಇವರನ್ನು ತಡೆದು ವಾಪಸ್ ಕಳುಹಿಸಲು ಹರಸಾಹಸ ಪಡುತ್ತಿವೆ.
ಸರ್ಕಾರಕ್ಕೆ ದೊಡ್ಡ ತಲೆನೋರಾದ ವಲಸಿಗರ ಸಮಸ್ಯೆ:
ಸಿಯುಟಾ ಸೇರಿದಂತೆ ವಿವಿಧ ಮಾರ್ಗಗಳ ಮೂಲಕ ಸ್ಪೇನ್ ಗೆ ನುಗ್ಗುತ್ತಿರುವ ಅಕ್ರಮ ವಲಸಿಗರ ಸಂಖ್ಯೆ ಸಾವಿರಾರು ದಾಟಿದೆ. ಭದ್ರತಾ ಪಡೆಗಳು ಎಷ್ಟೇ ಕಾವಲು ಕಾಯ್ದರೂ ವಲಸಿಗರ ಕಡಲ ದಾಳಿಯನ್ನು ತಡೆಯಲು ಸಾಧ್ಯವಾಗುತ್ತಿಲ್ಲ. ಮುಸ್ಲಿಂ ಹಾಗೂ ಕ್ರಿಶ್ಚಿಯನ್ ಸಂಸ್ಕೃತಿಯ ಸಮ್ಮಿಲನವಿರುವ ಸ್ಪೇನ್ನಲ್ಲಿ ಈ ರೀತಿಯ ಅನಿರೀಕ್ಷಿತ ವಲಸಿಗರ ಪ್ರವಾಹವು ಸ್ಥಳೀಯ ಜನರ ಶಾಂತಿ ಹಾಗೂ ನೆಮ್ಮದಿಗೆ ಭಂಗ ತಂದಿದೆ.
