ಟೆಹ್ರಾನ್ / ಜೆರುಸಲೇಮ್, ಜೂನ್ 8: ಮಧ್ಯಪ್ರಾಚ್ಯದಲ್ಲಿ ಮತ್ತೆ ಯುದ್ಧದ ವಾತಾವರಣ ಗಂಭೀರವಾಗಿದೆ. ಇರಾನ್ ದೇಶದ ರಕ್ಷಣಾ ಮೂಲ ಸೌಕರ್ಯಗಳ ಮೇಲೆ ಇಸ್ರೇಲ್ ಭಾರೀ ವಾಯುದಾಳಿ ನಡೆಸಿದೆ. 12 ಕ್ಕೂ ಹೆಚ್ಚು ಇಸ್ರೇಲಿ ಫೈಟರ್ ಜೆಟ್ಗಳಿಂದ ಇರಾನ್ ಮೇಲೆ ನಿರಂತರ ದಾಳಿ ನಡೆಸಲಾಗಿದೆ. ಈ ದಾಳಿಯಲ್ಲಿ ಇರಾನ್ನ ಕ್ಷಿಪಣಿ ನಿಗ್ರಹ ವ್ಯವಸ್ಥೆಯನ್ನೇ ಇಸ್ರೇಲ್ ಉಡೀಸ್ ಮಾಡಿದೆ ಎಂದು ವರದಿಯಾಗಿದೆ.
ಬೇಹುಗಾರಿಕಾ ಮಾಹಿತಿ ಆಧರಿಸಿದ ದಾಳಿ
ಬೇಹುಗಾರಿಕಾ ಮಾಹಿತಿಯನ್ನು ಆಧರಿಸಿ ಇಸ್ರೇಲ್ ಈ ಏರ್ ಸ್ಟೈಕ್ ನಡೆಸಿದೆ. ಇರಾನ್ ರಾಜಧಾನಿ ಟೆಹ್ರಾನ್ ಸೇರಿದಂತೆ ಹಲವಾರು ನಗರಗಳಲ್ಲಿ ಭಾರೀ ಸ್ಫೋಟದ ಸದ್ದು ಕೇಳಿಬಂದಿದೆ. ಆಕಾಶದಲ್ಲಿ ಸತತವಾಗಿ ಸ್ಫೋಟದ ಬೆಳಕು ಕಾಣಿಸಿಕೊಂಡಿದ್ದು, ಜನರು ಭಯಭೀತಿಗೊಳಗಾಗಿದ್ದಾರೆ. ಇರಾನ್ ದೇಶದ ದಾಳಿ ಸಾಮರ್ಥ್ಯ ಮತ್ತು ರಕ್ಷಣಾ ಸಾಮರ್ಥ್ಯ ಎರಡಕ್ಕೂ ಇಸ್ರೇಲ್ ದಾಳಿಯಿಂದ ಹಾನಿಯಾಗಿದೆ.
ಇರಾನ್ನ ಪ್ರತಿದಾಳಿ: ಐಫಾ ಬಂದರು ನಗರಿಯ ಮೇಲೆ ದಾಳಿ
ಇಸ್ರೇಲ್ನ ದಾಳಿಗೆ ತಕ್ಷಣ ಪ್ರತಿಕ್ರಿಯೆ ನೀಡಿದ ಇರಾನ್, ಇಸ್ರೇಲ್ನ ಪ್ರಮುಖ ವಾಣಿಜ್ಯ ಕೇಂದ್ರವಾದ ಐಫಾ ಬಂದರು ನಗರಿ ಮೇಲೆ ದಾಳಿ ನಡೆಸಿದೆ. ಇರಾನ್ ಕ್ಷಿಪಣಿಗಳು ಐಫಾದ ಬಂದರು ಪ್ರದೇಶ ಮತ್ತು ಅದರ ಸುತ್ತಮುತ್ತಲಿನ ಪ್ರದೇಶಗಳಿಗೆ ಅಪ್ಪಳಿಸಿವೆ. ಇಸ್ರೇಲ್ ದೇಶದ ಸೇನೆ ಮಾತ್ರವಲ್ಲದೆ, ಈ ದಾಳಿಯಿಂದ ವ್ಯಾಪಾರ ಮತ್ತು ವಹಿವಾಟಿಗೂ ತೀವ್ರ ಧಕ್ಕೆ ಉಂಟಾಗಿದೆ. ಐಫಾ ಬಂದರಿನ ಮೂಲಕ ನಡೆಯುತ್ತಿದ್ದ ಸರಕು ಸಾಗಾಣಿಕೆ ಸಂಪೂರ್ಣ ನಿಂತುಹೋಗಿದೆ.
ಪೆಟ್ರೋ ಕೆಮಿಕಲ್ ಕಾರ್ಖಾನೆ ದಾಳಿಗೆ ಪ್ರತೀಕಾರ
ಇಸ್ರೇಲ್ ಇತ್ತೀಚೆಗೆ ಇರಾನ್ನ ಪೆಟ್ರೋ ಕೆಮಿಕಲ್ ಕಾರ್ಖಾನೆಯ ಮೇಲೆ ನಡೆಸಿದ ದಾಳಿಗೆ ಪ್ರತೀಕಾರವಾಗಿಯೂ ಇರಾನ್ ಐಫಾ ಮೇಲೆ ದಾಳಿ ನಡೆಸಿದೆ ಎಂದು ಮೂಲಗಳು ತಿಳಿಸಿವೆ. ಪೆಟ್ರೋ ಕೆಮಿಕಲ್ ಕಾರ್ಖಾನೆಯ ಮೇಲೆ ನಡೆದ ದಾಳಿಯಿಂದ ಕಾರ್ಖಾನೆಯಲ್ಲಿ ಭಾರಿ ಸ್ಫೋಟ ಸಂಭವಿಸಿತ್ತು. ಅದಕ್ಕೆ ಪ್ರತೀಕಾರವಾಗಿ ಇರಾನ್ ಐಫಾ ನಗರಿಯನ್ನು ಗುರಿಯಾಗಿಸಿಕೊಂಡಿದೆ.
ಹೆಜ್ಬೊಲ್ಲಾ ಮತ್ತು ಹೌತಿ ಉಗ್ರ ಸಂಘಟನೆಗಳ ಪಾತ್ರ
ಇರಾನ್ ಸಮರಕ್ಕೆ ಲೆಬನಾನ್ನ ಹೆಜ್ಬೊಲ್ಲಾ ಮತ್ತು ಯೆಮೆನ್ನ ಹೌತಿ ಉಗ್ರ ಸಂಘಟನೆಗಳು ಕೈಜೋಡಿಸಿವೆ. ಹೆಜ್ಬೊಲ್ಲಾ ಉಗ್ರರು ಇಸ್ರೇಲ್ನ ಉತ್ತರದ ಗಡಿಯಲ್ಲಿ ಇಸ್ರೇಲಿ ಸೈನ್ಯದ ಮೇಲೆ ದಾಳಿಗಳನ್ನು ನಡೆಸುತ್ತಿದ್ದಾರೆ. ಹೌತಿಗಳು ಇಸ್ರೇಲ್ ಮೇಲೆ ಕ್ಷಿಪಣಿ ಮತ್ತು ಡ್ರೋನ್ ದಾಳಿಗಳನ್ನು ಪ್ರಯೋಗಿಸುತ್ತಿದ್ದಾರೆ. ಇದು ಇಸ್ರೇಲ್ಗೆ ಎರಡು ಅಥವಾ ಹಲವು ಕಡೆಗಳಲ್ಲಿ ಯುದ್ಧ ಎದುರಿಸುವ ಸವಾಲನ್ನು ಸೃಷ್ಟಿಸಿದೆ.
