ಮೊಬೈಲ್‌ಗಳಲ್ಲಿ ಮೊಳಗಿದ ಸೈರನ್: ಫೋನ್‌ಗೆ ಬಂದ ಎಚ್ಚರಿಕೆ ಏನು?

ನವದೆಹಲಿ: ಇಂದು ಮಧ್ಯಾಹ್ನ 12 ಗಂಟೆ ಆಗುತ್ತಿದ್ದಂತೆ ದೇಶಾದ್ಯಂತ ಲಕ್ಷಾಂತರ ಮೊಬೈಲ್ ಫೋನ್‌ಗಳಲ್ಲಿ ಜೋರಾದ ಎಚ್ಚರಿಕೆ ಧ್ವನಿ (ಸೈರನ್) ಮತ್ತು ಅಲರ್ಟ್ ಸಂದೇಶಗಳು ಬಂದವು. ಪ್ರಕೃತಿ ವಿಕೋಪ ಮತ್ತು ತುರ್ತು ಸಂದರ್ಭಗಳಲ್ಲಿ ನಾಗರಿಕರನ್ನು ರಕ್ಷಿಸಲು ಕೇಂದ್ರ ಸರ್ಕಾರ ರೂಪಿಸಿರುವ ‘ಸೆಲ್ ಬ್ರಾಡ್‌ಕಾಸ್ಟ್ ಅಲರ್ಟ್’ ವ್ಯವಸ್ಥೆಯನ್ನು ಯಶಸ್ವಿಯಾಗಿ ಪರೀಕ್ಷಿಸಲಾಗಿದೆ. ಈ ಎಚ್ಚರಿಕೆ ಕೇವಲ ಪರೀಕ್ಷಾ ಸಂದೇಶವಾಗಿದ್ದು, ಯಾವುದೇ ನಿಜವಾದ ಆಪತ್ಕಾಲ ಪರಿಸ್ಥಿತಿ ಇಲ್ಲ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಹೊಸ ಸೆಲ್ ಬ್ರಾಡ್‌ಕಾಸ್ಟ್ ತಂತ್ರಜ್ಞಾನ ಎಂದರೇನು?

ದೂರಸಂಪರ್ಕ ಇಲಾಖೆ ಮತ್ತು ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪ್ರಾಧಿಕಾರದ ಸಹಕಾರದೊಂದಿಗೆ ಭಾರತವು ಸಂಪೂರ್ಣ ಸ್ವದೇಶಿ ತಂತ್ರಜ್ಞಾನದ ಮೇಲೆ ಈ ಸೆಲ್ ಬ್ರಾಡ್‌ಕಾಸ್ಟಿಂಗ್ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಿದೆ. ಸಾಂಪ್ರದಾಯಿಕ SMS ಎಚ್ಚರಿಕೆಗಳಿಗಿಂತ ಇದು ಹೆಚ್ಚು ಪರಿಣಾಮಕಾರಿಯಾಗಿದೆ. ಸಾಮಾನ್ಯ SMS ಅಧಿಸೂಚನೆಗಳಂತೆ ಇದು ಮೊಬೈಲ್‌ನ ನೋಟಿಫಿಕೇಶನ್‌ನಲ್ಲಿ ಮಾತ್ರ ಕಾಣಿಸುವುದಿಲ್ಲ. ಬದಲಿಗೆ, ಇದು ತಕ್ಷಣವೇ ಜೋರಾದ ಸೈರನ್ ನುಡಿಸುತ್ತದೆ ಮತ್ತು ಫೋನ್ ಸ್ಕ್ರೀನ್‌ನಲ್ಲಿ ತುರ್ತು ಸಂದೇಶವನ್ನು ಪ್ರದರ್ಶಿಸುತ್ತದೆ. ನಿಮ್ಮ ಫೋನ್ ಸೈಲೆಂಟ್ ಮೋಡ್‌ನಲ್ಲಿದ್ದರೂ ಸಹ ಸೈರನ್ ನುಡಿಸುತ್ತದೆ.

ಏಕೆ ಈ ವ್ಯವಸ್ಥೆ ಅಗತ್ಯ?

ಈ ವ್ಯವಸ್ಥೆಯ ಮುಖ್ಯ ಗುರಿ ವಿಪತ್ತಿನ ಸಂದರ್ಭದಲ್ಲಿ ತ್ವರಿತ, ನಿಖರ ಮತ್ತು ಸ್ಥಳಾಧಾರಿತ ಎಚ್ಚರಿಕೆಗಳನ್ನು ನಾಗರಿಕರಿಗೆ ತಲುಪಿಸುವುದು. ನಿರ್ದಿಷ್ಟವಾಗಿ ಈ ಕೆಳಗಿನ ಪರಿಸ್ಥಿತಿಗಳಲ್ಲಿ ಈ ವ್ಯವಸ್ಥೆ ಕಾರ್ಯನಿರ್ವಹಿಸುತ್ತದೆ.

• ನೈಸರ್ಗಿಕ ವಿಕೋಪಗಳು: ಭೂಕಂಪ, ಸುನಾಮಿ, ಪ್ರವಾಹ, ಚಂಡಮಾರುತ,  ಮಳೆ

• ಮಾನವ ನಿರ್ಮಿತ ಅಪಾಯಗಳು: ಅನಿಲ ಸೋರಿಕೆ, ರಾಸಾಯನಿಕ ಸ್ಫೋಟಗಳು, ಕೈಗಾರಿಕಾ ದುರಂತಗಳು

• ತುರ್ತು ಪರಿಸ್ಥಿತಿಗಳಲ್ಲಿ ಮುನ್ನೆಚ್ಚರಿಕಾ ಕ್ರಮಗಳು 

ಇದು SMS ನಿಂದ ಹೇಗೆ ಭಿನ್ನವಾಗಿದೆ?

SMS ಎಚ್ಚರಿಕೆಗಳು ಸಾಮಾನ್ಯವಾಗಿ ದೊಡ್ಡ ಪ್ರಮಾಣದಲ್ಲಿ ಟ್ರಾಫಿಕ್ ಆದಾಗ ವಿಳಂಬವಾಗಬಹುದು ಅಥವಾ ಅನೇಕ ಬಾರಿ ಗಮನಕ್ಕೆ ಬರದೆ ಹೋಗಬಹುದು. 

• ಮೊಬೈಲ್ ನೆಟ್‌ವರ್ಕ್‌ನ ನಿರ್ದಿಷ್ಟ ಸೆಲ್ ಟವರ್‌ಗಳ ವ್ಯಾಪ್ತಿಯಲ್ಲಿರುವ ಎಲ್ಲಾ ಫೋನ್‌ಗಳಿಗೆ ತಕ್ಷಣ ಸಂದೇಶ ರವಾನಿಸುತ್ತದೆ.

• ಫೋನ್ ಸೈಲೆಂಟ್ ಮೋಡ್‌ನಲ್ಲಿದ್ದರೂ ಸೈರನ್ ನುಡಿಸುತ್ತದೆ.

• ಫೋನ್ ನ ಸೆಟ್ಟಿಂಗ್‌ಗಳನ್ನು ಲೆಕ್ಕಿಸದೆ ಸ್ಕ್ರೀನ್ ತುಂಬಾ ಸಂದೇಶ ತೋರಿಸುತ್ತದೆ.

• ಭೌಗೋಳಿಕ ನಿರ್ದೇಶಾಂಕಗಳ ಆಧಾರದಲ್ಲಿ ನಿರ್ದಿಷ್ಟ ಪ್ರದೇಶಕ್ಕೆ ಮಾತ್ರ ಎಚ್ಚರಿಕೆ ಕಳುಹಿಸಬಹುದು.

ಇಂದಿನ ಪರೀಕ್ಷೆಯ ಸಂಪೂರ್ಣ ವಿವರ

ಇಂದು ಮಧ್ಯಾಹ್ನ 12 ಗಂಟೆಗೆ ನಡೆದ ಈ ಪರೀಕ್ಷಾ ಎಚ್ಚರಿಕೆಗಳು ಇಂಗ್ಲಿಷ್, ಹಿಂದಿ ಮತ್ತು ವಿವಿಧ ಪ್ರಾದೇಶಿಕ ಭಾಷೆಗಳಲ್ಲಿ ಬಂದವು. ಈ ಸಂದೇಶವು “THIS IS A TEST” ಎಂದು ಸ್ಪಷ್ಟವಾಗಿ ನಮೂದಿಸಿತ್ತು. ಮೊಬೈಲ್ ಸೆಟ್ಟಿಂಗ್‌ಗಳಲ್ಲಿ ‘ಟೆಸ್ಟ್ ಚಾನಲ್’ ಅಥವಾ ‘ಎಮರ್ಜೆನ್ಸಿ ಅಲರ್ಟ್’ ಸಕ್ರಿಯವಾಗಿದ್ದಲ್ಲಿ ಮಾತ್ರ ಈ ಸಂದೇಶಗಳು ಬಂದಿವೆ ಎಂದು ಅಧಿಕಾರಿಗಳು ಖಚಿತಪಡಿಸಿದ್ದಾರೆ. ಬಂದ ಸಂದೇಶದಲ್ಲಿ ಯಾವುದೇ ಲಿಂಕ್ ಅಥವಾ ವೈಯಕ್ತಿಕ ಮಾಹಿತಿ ಕೇಳಲು ಯತ್ನಿಸಿಲ್ಲ.

ಪೂರ್ಣ ಪ್ರಮಾಣದಲ್ಲಿ ಕಾರ್ಯರೂಪಕ್ಕೆ ಬರುವ ಮುನ್ನ, ಈಗಾಗಲೇ ಈ ವ್ಯವಸ್ಥೆಯನ್ನು ಬಳಸಿಕೊಂಡು ವಿಪತ್ತು ನಿರ್ವಹಣಾ ಅಧಿಕಾರಿಗಳು 19 ಕ್ಕೂ ಹೆಚ್ಚು ಭಾರತೀಯ ಭಾಷೆಗಳಲ್ಲಿ 134 ಶತಕೋಟಿ (13,400 ಕೋಟಿ)ಗೂ ಹೆಚ್ಚು SMS ಎಚ್ಚರಿಕೆಗಳನ್ನು ಕಳುಹಿಸಿದ್ದಾರೆ. ನೈಸರ್ಗಿಕ ವಿಕೋಪಗಳು, ಹವಾಮಾನ ವೈಪರೀತ್ಯಗಳು ಮತ್ತು ಚಂಡಮಾರುತದ ಸಂದರ್ಭಗಳಲ್ಲಿ ಈ ವ್ಯವಸ್ಥೆ ಜನರ ಪ್ರಾಣ ರಕ್ಷಣೆಗೆ ಸಹಕಾರಿಯಾಗಿದೆ.

ಸಾರ್ವಜನಿಕರಿಗೆ ಸಲಹೆ

• ಇಂತಹ ಎಚ್ಚರಿಕೆ ಸಂದೇಶ ಬಂದಾಗ ಭಯಪಡಬೇಡಿ. ಸೂಚನೆಗಳನ್ನು ಎಚ್ಚರಿಕೆಯಿಂದ ಓದಿ.

• ನಿಜವಾದ ವಿಪತ್ತು ಸಂದರ್ಭದಲ್ಲಿ, ಸಂದೇಶದಲ್ಲಿ ನೀಡಲಾದ ಸೂಚನೆಗಳನ್ನು (ತಕ್ಷಣ ಸ್ಥಳಾಂತರ, ಸುರಕ್ಷಿತ ಸ್ಥಳಕ್ಕೆ ಹೋಗುವುದು) ಪಾಲಿಸಿ.

• ನಿಮ್ಮ ಮೊಬೈಲ್ ಸೆಟ್ಟಿಂಗ್‌ಗಳಲ್ಲಿ ‘ಎಮರ್ಜೆನ್ಸಿ ಅಲರ್ಟ್’ ಆಯ್ಕೆಯನ್ನು ಸಕ್ರಿಯವಾಗಿಡಿ.

• ಯಾವುದೇ ತುರ್ತು ಎಚ್ಚರಿಕೆ ಸಂದೇಶವನ್ನು ಇತರರೊಂದಿಗೆ ಹಂಚಿಕೊಳ್ಳಿ, ಆದರೆ ಸುಳ್ಳು ಸುದ್ದಿಗೆ ಒತ್ತು ನೀಡಬೇಡಿ.