ಬಿಎಂಟಿಸಿ (BMTC) ನಡೆಸುತ್ತಿರುವ ಶಕ್ತಿ ಯೋಜನೆ (ಮಹಿಳೆಯರಿಗೆ ಉಚಿತ ಪ್ರಯಾಣ) ಹೆಸರಿನಲ್ಲಿ ಕಂಡಕ್ಟರ್ಗಳೇ ಲಕ್ಷಾಂತರ ರೂಪಾಯಿ ಕಳ್ಳಾಟ ಮಾಡುತ್ತಿದ್ದ ದೊಡ್ಡ ಹಗರಣ ಬಯಲಾಗಿದೆ.
ಕನ್ನಡ ಬಾರದ ಪುರುಷ ಪ್ರಯಾಣಿಕರನ್ನು ಟಾರ್ಗೆಟ್ ಮಾಡಿ, ಅವರಿಗೆ ಶಕ್ತಿ ಯೋಜನೆಯ ಉಚಿತ ಟಿಕೆಟ್ ನೀಡುತ್ತಿದ್ದ ಕಂಡಕ್ಟರ್ಗಳು, ಬದಲಿಗೆ ತಮ್ಮ ಸ್ವಂತ UPI QR ಕೋಡ್ ತೋರಿಸಿ ಹಣ ವಸೂಲಿ ಮಾಡುತ್ತಿದ್ದರು. ಟಿಕೆಟ್ ಹಣ ನೇರವಾಗಿ ಕಂಡಕ್ಟರ್ಗಳ ವೈಯಕ್ತಿಕ ಬ್ಯಾಂಕ್ ಖಾತೆಗೆ ವರ್ಗಾವಣೆ ಆಗುತ್ತಿತ್ತು.
ಹೇಗಿತ್ತು ಮೋಸದ ಟ್ರಿಕ್?
- ಬಸ್ ಹೊರಡುತ್ತಿದ್ದಂತೆ ಅಧಿಕೃತ QR ಕೋಡ್ ತೆಗೆದು ಇಡುತ್ತಿದ್ದರು.
- ಕನ್ನಡ ಬಾರದ ಪ್ರಯಾಣಿಕರಿಗೆ “ಶಕ್ತಿ ಯೋಜನೆ” ಎಂದು ಹೇಳಿ ಉಚಿತ ಟಿಕೆಟ್ ಕೊಡುತ್ತಿದ್ದರು.
- ಬದಲಿಗೆ ತಮ್ಮ ವೈಯಕ್ತಿಕ UPI QR ಕೋಡ್ ನೀಡಿ ಹಣ ಪಾವತಿ ಮಾಡಿಸುತ್ತಿದ್ದರು.
- ಶಕ್ತಿ ಯೋಜನೆ ಟಿಕೆಟ್ ಕನ್ನಡದಲ್ಲಿರುವುದರಿಂದ ಪ್ರಯಾಣಿಕರು ಮೋಸಕ್ಕೆ ಒಳಗಾಗುತ್ತಿದ್ದರು.
ತನಿಖೆ ವೇಳೆ ಚೆಕಿಂಗ್ ಇನ್ಸ್ಪೆಕ್ಟರ್ಗಳು ಈ ಸ್ಫೋಟಕ ಸತ್ಯ ಬಯಲು ಮಾಡಿದ್ದಾರೆ. 10ಕ್ಕೂ ಹೆಚ್ಚು ಕಂಡಕ್ಟರ್ಗಳು ಈ ಮೋಸದಲ್ಲಿ ಭಾಗಿಯಾಗಿದ್ದಾರೆ ಎಂದು ಆರೋಪಿಸಲಾಗಿದೆ.
ಕಂಡಕ್ಟರ್ಗಳು ನುಂಗಿದ್ದ ಹಣ (ಕೆಲವು ಉದಾಹರಣೆಗಳು):
- ಸೂರ್ಯನಾರಾಯಣ : ₹54,290
- ಬೊಮ್ಮಲಿಂಗೇಶ್ : ₹16,404
- ಬ್ರಿಜೇಶ್ ಬಾಬು : ₹9,795
- ಮೋಹನ್ : ₹6,117
ಈಗಾಗಲೇ 4 ಮಂದಿ ಕಂಡಕ್ಟರ್ಗಳನ್ನು ಸಸ್ಪೆಂಡ್ ಮಾಡಲಾಗಿದೆ. ಉಳಿದವರ ಮೇಲೂ ಕ್ರಮ ತೆಗೆದುಕೊಳ್ಳುವ ಪ್ರಕ್ರಿಯೆ ಆರಂಭವಾಗಿದೆ ಎಂದು BMTC ಮೂಲಗಳು ತಿಳಿಸಿವೆ.
ಈ ಹಗರಣವು ಶಕ್ತಿ ಯೋಜನೆಯನ್ನು ದುರುಪಯೋಗಪಡಿಸಿಕೊಂಡು ನಡೆದಿರುವುದು ಗಂಭೀರ ಆರೋಪವಾಗಿದೆ. BMTC ಅಧಿಕಾರಿಗಳು ಪೂರ್ಣ ತನಿಖೆ ನಡೆಸಿ, ತಪ್ಪಿತಸ್ಥರ ಮೇಲೆ ಕಠಿಣ ಕ್ರಮ ತೆಗೆದುಕೊಳ್ಳುವುದಾಗಿ ಭರವಸೆ ನೀಡಿದ್ದಾರೆ.
