ಸಿಹಿ ಜೊತೆ ಬರ್ನಲ್‌ ಹಂಚಿದ ಯುವತಿ: CSK ಫ್ಯಾನ್ಸ್‌‌ ವಿರುದ್ಧ RCB ಅಭಿಮಾನಿ ರಿವೇಂಜ್.!

17 ವರ್ಷಗಳ ಸುದೀರ್ಘ ಕಾಯುವಿಕೆಯ ನಂತರ ಆರ್‌ಸಿಬಿ ತಂಡವು ಐಪಿಎಲ್ ಕಪ್ ಗೆದ್ದುಕೊಂಡಿದೆ. ಈ ಐತಿಹಾಸಿಕ ಗೆಲುವು ಆರ್‌ಸಿಬಿ ಅಭಿಮಾನಿಗಳಿಗೆ ಅಪಾರ ಖುಷಿಯನ್ನು ತಂದಿದೆ. ಆದರೆ, ಈ ಗೆಲುವಿನ ಸಂಭ್ರಮದ ನಡುವೆ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆದ ಕಾಲ್ತುಳಿತದ ದುರಂತದಲ್ಲಿ 11 ಜನ ಅಭಿಮಾನಿಗಳು ಜೀವ ಕಳೆದುಕೊಂಡಿದ್ದಾರೆ. ಈ ದುರಂತವು ಆರ್‌ಸಿಬಿ ಗೆಲುವಿನ ಸಂತಸಕ್ಕೆ ಕಪ್ಪುಮೋಡವನ್ನುಂಟುಮಾಡಿದೆ. ಆದರೂ, ಆರ್‌ಸಿಬಿ ಅಭಿಮಾನಿಗಳು ತಮ್ಮ ತಂಡದ ಗೆಲುವನ್ನು ವಿಭಿನ್ನ ರೀತಿಯಲ್ಲಿ ಸಂಭ್ರಮಿಸುತ್ತಿದ್ದಾರೆ. ಇದರ ಜೊತೆಗೆ, ತಮ್ಮನ್ನು ಟ್ರೋಲ್ ಮಾಡಿದವರಿಗೆ ತಿರುಗೇಟು ನೀಡುವ ಸಲುವಾಗಿ ಕೆಲವರು ವಿವಿಧ ರೀತಿಯಲ್ಲಿ ತಮ್ಮ ಸಂತೋಷವನ್ನು ವ್ಯಕ್ತಪಡಿಸುತ್ತಿದ್ದಾರೆ.

ಕ್ರೀಡಾ ಇತಿಹಾಸದಲ್ಲಿ ಆರ್‌ಸಿಬಿ ತಂಡ ಮತ್ತು ಅದರ ಅಭಿಮಾನಿಗಳು ಸತತ ಸೋಲಿನಿಂದಾಗಿ ಅತಿಹೆಚ್ಚು ಟ್ರೋಲ್‌ಗೆ ಒಳಗಾಗಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಆರ್‌ಸಿಬಿಯನ್ನು ಕೀಳಾಗಿ ಟೀಕಿಸುವ ಮೀಮ್ಸ್‌ಗಳು, ಜೋಕ್‌ಗಳು ಸಾಮಾನ್ಯವಾಗಿದ್ದವು. ಆದರೆ ಈ ಬಾರಿಯ ಗೆಲುವು ಆರ್‌ಸಿಬಿ ಅಭಿಮಾನಿಗಳಿಗೆ ಹೊಸ ಉತ್ಸಾಹವನ್ನು ತುಂಬಿದೆ. ಈ ಗೆಲುವಿನ ಖುಷಿಯನ್ನು ಆಚರಿಸಲು ಅಭಿಮಾನಿಗಳು ವಿನೂತನ ರೀತಿಯಲ್ಲಿ ಟ್ರೋಲ್‌ಗೆ ತಿರುಗೇಟು ನೀಡುತ್ತಿದ್ದಾರೆ. ಇದಕ್ಕೊಂದು ಉದಾಹರಣೆಯಾಗಿ, ಒಬ್ಬ ಯುವತಿಯ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗಿದೆ.

ಈ ಯುವತಿ, ಒಬ್ಬ ಆರ್‌ಸಿಬಿ ಅಭಿಮಾನಿಯಾಗಿ, ತನ್ನ ಕಚೇರಿಯಲ್ಲಿ ಆರ್‌ಸಿಬಿಯ ಗೆಲುವಿನ ಸಂತೋಷವನ್ನು ವಿಶಿಷ್ಟ ರೀತಿಯಲ್ಲಿ ಆಚರಿಸಿದ್ದಾಳೆ. ಆಕೆ ತನ್ನ ಸಹೋದ್ಯೋಗಿಗಳಿಗೆ ಸಿಹಿಯನ್ನು ಹಂಚಿದ್ದಾಳೆ. ಆದರೆ ಇದರ ಜೊತೆಗೆ, ಆರ್‌ಸಿಬಿಯ ಸೋಲಿನಿಂದಾಗಿ ತನ್ನನ್ನು ಟ್ರೋಲ್ ಮಾಡಿದವರಿಗೆ “ಬರ್ನಲ್” ಮುಲಾಮನ್ನು ಕೂಡ ನೀಡಿದ್ದಾಳೆ. “ಹೊಟ್ಟೆಯ ಉರಿಯನ್ನು ಶಮನಗೊಳಿಸಲು” ಎಂದು ತಮಾಷೆಯಾಗಿ ಹೇಳುತ್ತಾ, ಆಕೆ ಈ ಬರ್ನಲ್‌ನೊಂದಿಗೆ ಸಿಹಿಯನ್ನು ವಿತರಿಸಿದ್ದಾಳೆ. ಈ ವೀಡಿಯೋದಲ್ಲಿ ಆಕೆ, “ನೀವು ಆರ್‌ಸಿಬಿಯನ್ನು ಟೀಕಿಸಿದ್ದೀರಿ, ಈಗ ಈ ಬರ್ನಲ್ ತಗೊಂಡು, ಹಚ್ಚಿಕೊಳ್ಳಿ!” ಎಂದು ತನ್ನ ಸಹೋದ್ಯೋಗಿಗಳಿಗೆ ತಿರುಗೇಟು ನೀಡುತ್ತಿರುವುದನ್ನು ಕಾಣಬಹುದು. ಕೆಲವರು ತಾವು ಆರ್‌ಸಿಬಿಯನ್ನು ಬೆಂಬಲಿಸಿದ್ದೇವೆ ಎಂದು ಸುಳ್ಳು ಹೇಳಿದಾಗ, ಆಕೆ “ನನ್ನ ಬಳಿ ವೀಡಿಯೋ ಇದೆ, ಸುಳ್ಳು ಹೇಳಬೇಡಿ!” ಎಂದು ಚಾಟಿಯಾಗಿ ಉತ್ತರಿಸಿದ್ದಾಳೆ.

ಈ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದ್ದು, ಸಾವಿರಾರು ಜನರು ಇದನ್ನು ವೀಕ್ಷಿಸಿ, ಕಾಮೆಂಟ್ ಮಾಡಿದ್ದಾರೆ. ಕೆಲವರು ಈಕೆಯ ರಿವೇಂಜ್‌ಗೆ “ಸೂಪರ್ ಸೆಲೆಬ್ರೇಷನ್!” ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಆದರೆ, ಚಿನ್ನಸ್ವಾಮಿ ಸ್ಟೇಡಿಯಂನ ದುರಂತದ ಹಿನ್ನೆಲೆಯಲ್ಲಿ ಈಕೆಯ ಕ್ರಮವನ್ನು ಕೆಲವರು ಟೀಕಿಸಿದ್ದಾರೆ. “ಈ ಸಂಭ್ರಮದ ನಡುವೆ 11 ಜನ ಜೀವ ಕಳೆದುಕೊಂಡಿದ್ದಾರೆ. ಇದನ್ನು ಆರ್‌ಸಿಬಿ ತಂಡವು ಪರಿಹರಿಸುತ್ತದೆಯೇ?” ಎಂದು ಒಬ್ಬರು ಪ್ರಶ್ನಿಸಿದ್ದಾರೆ.

ಇನ್ನೊಬ್ಬರು, “ನಾವು ಯಾವಾಗ ಬುದ್ಧಿವಂತರಾಗುತ್ತೇವೆ? ಈ ರೀತಿಯ ಅತಿರೇಕದ ಅಭಿಮಾನವನ್ನು ಮನೆಯವರಿಗೆ ತೋರಿಸಿದರೆ ಒಳಿತು. ಯಾವುದೇ ತಂಡವಾಗಲಿ, ಸರ್ಕಾರವಾಗಲಿ, ನಮ್ಮ ತಪ್ಪಿಗೆ ಹೊಣೆಯಾಗುವುದಿಲ್ಲ. ಎಷ್ಟೇ ಪರಿಹಾರ ಕೊಟ್ಟರೂ ಕಳೆದುಹೋದ ಜೀವವನ್ನು ಮರಳಿ ತರಲು ಸಾಧ್ಯವಿಲ್ಲ. ನಾವು ಎಚ್ಚರಿಕೆಯಿಂದ ಯಾವುದನ್ನು ಎಷ್ಟು ಸಂಭ್ರಮಿಸಬೇಕೆಂದು ತಿಳಿಯಬೇಕು,” ಎಂದು ಕಾಮೆಂಟ್ ಮಾಡಿದ್ದಾರೆ.