ಪ್ರೀತಿ ಮತ್ತು ನಂಬಿಕೆಯ ಮೇಲೆ ನಿಂತಿರಬೇಕಾದ ಸಂಬಂಧವು ಕೆಲವೊಮ್ಮೆ ದುಸ್ವಪ್ನವಾಗಿ ಪರಿವರ್ತನೆಗೊಳ್ಳುತ್ತದೆ. ಅಂತಹ ಒಂದು ಭೀಕರ ಘಟನೆ ವಿಶ್ವದಾದ್ಯಂತ ವೈರಲ್ ಆಗಿದೆ. ನೆದರ್ಲ್ಯಾಂಡ್ಸ್ನ 52 ವರ್ಷದ ಮಹಿಳೆ ಜೋಕ್ (Joke) ಅವರ ಮೇಲೆ ಅವರ ಮಾಜಿ ಸಂಗಾತಿ ನಡೆಸಿದ ಘೋರ ದೌರ್ಜನ್ಯವು ಸೋಶಿಯಲ್ ಮೀಡಿಯಾದಲ್ಲಿ ಬೆಚ್ಚಿಬೀಳುವಂತೆ ಮಾಡಿದೆ.
ತನ್ನ ಸಂಗಾತಿಯನ್ನು ಪೂರ್ಣವಾಗಿ ಹದ್ದುಬಸ್ತಿನಲ್ಲಿಡಲು ಮತ್ತು ತನ್ನ ಆಧಿಪತ್ಯ ಸಾಬೀತುಪಡಿಸಲು ಆ ವ್ಯಕ್ತಿ ಅವಳ ಶರೀರದ ಪ್ರತಿ ಭಾಗದ ಮೇಲೆ – ಮುಖ, ಕುತ್ತಿಗೆ, ಕೈ, ಬೆನ್ನು, ಖಾಸಗಿ ಭಾಗಗಳು ಸೇರಿದಂತೆ – ತನ್ನ ಹೆಸರು ಮತ್ತು “property of” ಎಂಬ ಸಂದೇಶಗಳನ್ನು ಬರೋಬ್ಬರಿ 250 ಬಾರಿ ಟ್ಯಾಟೂ ಹಾಕಿಸಿದ್ದಾನೆ. ಅವಳಿಗೆ ಇಷ್ಟವಿಲ್ಲದಿದ್ದರೂ ದೈಹಿಕ ಹಲ್ಲೆಯ ಬೆದರಿಕೆ ಹಾಕಿ ಈ ಪೈಶಾಚಿಕ ಕೃತ್ಯ ಮಾಡಿಸಿದನು. ಸಸ್ತಾ ಆನ್ಲೈನ್ ಟ್ಯಾಟೂ ಮೆಷಿನ್ ಬಳಸಿ ವರ್ಷಗಳ ಕಾಲ ಈ ಹಿಂಸೆ ನಡೆಸಿದ್ದಾನೆ.
ಈ ಟ್ಯಾಟೂಗಳು ಅವಳ ಶರೀರದ ಸುಮಾರು 90% ಭಾಗವನ್ನು ಆವರಿಸಿದ್ದವು. ಇದು ಕೇವಲ ಶಾರೀರಿಕ ನೋವು ಮಾತ್ರವಲ್ಲದೆ, ಅವಳ ಆತ್ಮಗೌರವ, ಮಾನಸಿಕ ಸ್ಥಿತಿ ಮತ್ತು ಜೀವನವನ್ನೇ ಜರ್ಜರಿತಗೊಳಿಸಿತು. ಕನ್ನಡಿಯಲ್ಲಿ ತನ್ನನ್ನು ನೋಡಿದಾಗಲೆಲ್ಲಾ ಹಳೆಯ ಆ ಭಯಾನಕ ನೆನಪುಗಳು ಅವಳನ್ನು ಕಾಡುತ್ತಿದ್ದವು.
ಆದರೆ ಜೋಕ್ ಅವರು ಧೈರ್ಯ ತಂದುಕೊಂಡು ಆ ವಿಷಪೂರಿತ ಸಂಬಂಧದಿಂದ ತಪ್ಪಿಸಿಕೊಂಡರು. ಪೊಲೀಸರನ್ನು ಸಂಪರ್ಕಿಸಿ ತಮ್ಮ ಮೇಲೆ ನಡೆದ ಅನ್ಯಾಯವನ್ನು ವಿವರಿಸಿದರು. ಈಗ ಅವರು ಲೇಸರ್ ಟ್ಯಾಟೂ ರಿಮೂವಲ್ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ಪ್ರಕ್ರಿಯೆ ದೀರ್ಘಕಾಲದ್ದು ಮತ್ತು ದುಬಾರಿಯಾಗಿದ್ದರೂ, ಅವರು ತಮ್ಮ ಹೊಸ ಜೀವನವನ್ನು ಪುನರ್ನಿರ್ಮಾಣ ಮಾಡುತ್ತಿದ್ದಾರೆ. ಅವರ ಧೈರ್ಯದ ಕಥೆಯು ಟಾಕ್ಸಿಕ್ ಸಂಬಂಧಗಳಿಂದ ಬಳಲುತ್ತಿರುವ ಅನೇಕ ಮಹಿಳೆಯರಿಗೆ ಸ್ಫೂರ್ತಿಯಾಗಿದೆ.
ಸೋಶಿಯಲ್ ಮೀಡಿಯಾದಲ್ಲಿ ಈ ಕಥೆ ವೈರಲ್ ಆದ ನಂತರ, ಜೋಕ್ ಅವರ ಟ್ಯಾಟೂ ತೆಗೆಯುವ ವೆಚ್ಚಕ್ಕಾಗಿ ಸುಮಾರು $35,000ಕ್ಕೂ ಹೆಚ್ಚು ಹಣ ಸಂಗ್ರಹವಾಗಿದೆ. ಇಂತಹ ಘಟನೆಗಳು ಟಾಕ್ಸಿಕ್ ಬಾಂಧವ್ಯಗಳಲ್ಲಿ ಮಹಿಳೆಯರು ಎದುರಿಸುತ್ತಿರುವ ಮಾನಸಿಕ ಮತ್ತು ದೈಹಿಕ ಹಿಂಸೆಯನ್ನು ಮತ್ತೊಮ್ಮೆ ಎತ್ತಿ ತೋರಿಸುತ್ತವೆ.